Roma 8
8
Roh Mohotara dohop ito ngalah kuasan dosa
8:1-17
1Tului iyoh, makitu Mohotara aroko angar mohukum dulun co oko nyan ponah Kristus Yesus. 2Awi, kuasan Roh Mohotara ocop polampas ikan ingkan kuasan dosa hintang hukuman pompatoi yoh. Roh Mohotara mihi indam me pomolum co tuu-tuu ponah Kristus Yesus. 3Hukum Torat aroko lian polampas dulun ingkan kuasan dosa tului kojere kolunon hintang aroko hegah nuhit Hukum Torat yoh. Tapi aang cioh co aroko bodai tongompian Hukum Torat, ocop tonguan pian Mohotara. Are nyoruhan Anak-Eh leh dombut hia dunia tuh ika nowuh dosan kolunon. Betin Anak-Eh oko kojere ika bodosa samah isan kolunon biasa, tapi Are aroko bodosa. Jadi, Are lian nangung hukuman dosan kolunon. 4Mohotara nguan kokon iyoh ina to lian bolum ma cara co tomaksut ponah Hukum Torat, iyohonon ito co bolum ma cara co buah, aroko nontumun kojere kolunon tapi nontumun kojere Roh Mohotara.
5Kawan dulun co bolum nontumun kojere kolunon baya bopikir tintun caraeh ika nyumpu kojere kolunon yoh. Tapi kawan dulun co bolum nontumun Roh Mohotara baya bopikir tintun caraeh ngonyorih Roh Mohotara. 6Kawan dulun co nontumun kojere Roh Mohotara bolum ma kongolandah kongolami ingkan Mohotara hintang ngohaba kobolum co tuu-tuu. Tapi kawan dulun co nontumun kojere kolunon bolum ocu ingkan Mohotara. Iroh ngohaba hukuman matoi sokotahi-tahieh 7awi iroh hobomusuh ma Mohotara. Iroh aroko nontumun kawan porentah Mohotara. Malah, iroh aroko bodai hegah nontumun eh. 8Dulun co baya nguan ome co tongonyere eh tarop, aroko bodai ngonyorih Mohotara.
9Tapi ikan aroko bolum nontumun kojere kolunon. Ikan bolum nontumun kojere Roh Mohotara, amun, mulaeh Roh Mohotara nukui ponah arop me. Amun Roh Kristus aroko nukui ponah dulun, borati dulun cioh bokon tioh Kristus. 10Mula betin to angar matoi tului dosa. Tapi, amun Kristus nukui ponah arop me, Roh-Eh angar mihi ikan kobolum sumong kotahi awi ikan jarin bujur nyan tohimo Mohotara. 11Roh Mohotara ocop umpi Yesus Kristus bolum hopuli ingkan pompatoi. Hintang iyohboh Roh co nukui ponah arop me ka. Jadi, oluco betim me angar matoi, Roh Mohotara angar umpi betim me bolum hopuli.
12Jadi, kawan konduang, ito sobulih bolum nontumun Roh Mohotara, aroh nontumun kojere kolunon. 13Awi, amun ikan bolum nontumun kojere kolunon, ikan angar matoi topisah ingkan Mohotara. Tapi ma pondohop ingkan Roh Mohotara, ikan sobulih naat kawan alogawim me co jahat yoh. Amun ikan nguan iyoh, maka ikan angar ngohaba kobolum co sumong kototahieh.
14Kokon dulun co tomombimbing Roh Mohotara iyohonon kawan anak Mohotara. 15Batuh, ikan isan cipon co takut.#8:15 Sorinai porocaya ma Yesus, oko tonga dulun co jarin ‘cipon’ dosa co bolum ponah akut. Oko ka dulun Yahudi co jarin ‘cipon’ tului nongkomo topaksa nuhit kokon Hukum Torat. Iroh takut Mohotara lalu jere ngohukum iroh. Tapi, Roh Mohotara co tomihi indam me aroko umpi ikan jarin isan iyoh bat. Roh Mohotara umpi ikan jarin kawan anak Mohotara co tongasih. Tului Roh-Eh yoh, ito naah, “Oh Mohotara! Iko Tamang kuh!” 16Roh Mohotara ciohboh co porahan homboh ma roh to bahawa ito iyohco kawan anak Mohotara. 17Nah, amun ito iyohco kawan anak-Eh, maka ito mahi angar norima kokon aang co pio hinut co tomondakan-Eh indan kawan anak-Eh. Samah isan Kristus haba aang co pio hinut ingkan Mohotara, ito mahi angar haba aang co pio hinut. Maksut eh, amun ito mondorita samah isan Kristus, ito angar norima kobolum co tohormat samah isan Are ka.
Roh Mohotara dohop ito ponah pondoritaan
8:18-30
18Akuh yakin bahawa pondoritaan co buah ito makitu aroko korinah bahat tombanding ma pomolum co tohormat co angar ihin indan to daai. 19Sobujur eh, kokon aranaang co tomoncipta Mohotara mahi korinah kobolingu ma kotika cioh, iyohonon waktu Mohotara porahan omeboh kawan anak-Eh. 20Awi, batuh kokon ciptaan Mohotara tomoholu-Eh. Koadaan eh jarin mohampa hintang sasar rusak. Ciptaan cioh leh aroko kolu isan iyoh, tapi Are nyau nguan iyoh tului Are boharap, 21daai Are angar molampas ciptaan-Eh ingkan kuasa co ngohancur eh. Are mahi angar umpi ciptaan-Eh lampas hintang tohormat kole homboh ma kawan anak-Eh.
22Ito monau bahawa dapot makitu kokon ciptaan-Eh nangih nyohorui samir korinah kobolingu moharap aang cioh samah isan ico bawe co nangih nyohorui samir bolingu kotika anak eh pusit. 23Hintang aroh baya kokon ciptaan-Eh co nangih nyohorui, tapi ito leh mahi co ocop norima Roh Mohotara sobagai pihin Roh Mohotara co portama, mahi umba mondorita ponah atoi to. Ito mondorita makitu, tapi ito dahat nganto ma korinah kobolingu tomangkat jarin kawan anak Mohotara, iyohonon kotikaeh Mohotara polampas ngolauh arop to uras eh. 24Ingkan waktu ito tonyolamat, ito yakin moharap kokon co tomonjanji Mohotara yoh. Arelu oko dulun co incah moharap aranaang co ocop tomihi indaieh. Amun iyoh ocop tomihi indaieh, borati are aroko moharap iyoh bat. 25Tapi ito yakin moharap aang co pio hinut co arinai tomihi indan ito. Jadi, ito incah sabar nganto.
26Roh Mohotara mahi dohop ito hiah waktu atoi to kurang borohon. Kotika ito aroko monau maindeoi sobulih eh bodoa, Roh Mohotara leh porapot ome co oko nyan ponah atoi to co aroko lian tomonjelas ma luang antun ma Mohotara. 27Mohotara nyoluhi atoi kolunon. Jadi, Are monau maksut Roh-Eh yoh. Are monau bahawa Roh-Eh bodoa indan umat husus Tioh hintang bahawa Roh-Eh bodoa sosuai ma kojere-Eh.
28Ito monau bahawa Mohotara mongatur kokon aranaang co tojadi ika oko hasir co pio indan to co mongasihi Are, iyohonon ito co tonaah-Eh ina jarin kawan anak-Eh awi iyoh roncana-Eh. 29Ingkan sinan, Mohotara ocop monau ome co angar tomili-Eh. Ingkan sinan, Are mahi ocop momutus ina iroh jarin isan Anak-Eh, Yesus. Ma sanioh, Yesus jarin Anak-Eh co portama nyan halo orong konduang. 30Saniohboh, Mohotara naah iroh co ocop tomili-Eh ingkan sinan. Iroh yoh co tonaah-Eh, Are mahi umpi iroh jarin bujur nyan tohimo-Eh. Iroh yoh co jarin bujur, Are mahi mihi kobolum co tohormat.
Olu ito nohimo pondoritaan, arelu oko ome bewe co hegah misah ito ingkan asi-Eh
8:31-39
31Tului iyoh omeboh co angar ito mantun eh tintun kokoieh yoh? Amun Mohotara momihak ma ito, omeboh co lian ngolawan ito? 32Mohotara moholu ina Anak-Eh leh mondorita. Mohotara nyarah Anak-Eh ina Are matoi ika nangung hukuman dosan to. Amun Mohotara ocop nguan iyoh indan to, tantu Are mahi angar mihi indan to uras aang bokon co tomonjanji-Eh. 33Ito umat pilin Mohotara co ocop Are umpi jarin buah nyan tohimo-Eh. Jadi, arelu oko dulun co boraoi posala ito. 34Arelu oko dulun co boraoi mohukum ito. Awi, Kristus Yesus ocop tomohukum matoi indan to. Malah meleh hangki iyoh kole! Kristus ocop bolum hopuli hintang tuot nyan ika co tohormat nyan topit kontoun Mohotara. Are boh co ngilang ito! 35Arelu oko ome bewe co hegah misah ito ingkan asi-Eh. Amun ito nohimo kosusah atawa pondoritaan, amun oko dulun co nyiksa ito, amun ito arelu oko kanon, arelu oko lembon, amun ito nohimo bohaya atawa ito tongompatoi, kokon iyoh aroko hegah misah ito ingkan asin Kristus. 36Oko co tonulih ponah Surat Borasih:
“Tului kaih porocaya ma-Iko, maka sika ondo kawan dulun nyau ngompatoi kaih.
Kaih samah isan kawan domba co angar tonyarak.”#8:36 Ingkan buku Masmur 44:23.
37Tapi ponah kokon poristiwa co tojadi ma ito, ito manang socara somporaka. Are co ocop mongasihi ito, dohop ito ika manang. 38Awi, akuh yakin amun ito bolum atawa matoi, Mohotara tenden mongasihi ito. Arelu oko molekat, roh jahat atawa kuasa bokon co lian misah ito ingkan asin Mohotara. Arelu oko ome bewe co tojadi makitu atawa nyan waktu pongaan, 39arelu oko ome bewe nyan tungkui tana atawa nyan pinda tana, arelu oko ome bewe nyan ngolauh dunia co hegah misah ito ingkan asin Mohotara, iyohonon asi co toporahan-Eh ma ito ponah Kristus Yesus, Tuhan to.
Currently Selected:
Roma 8: TBSS
Highlight
Copy
Compare
Share
Want to have your highlights saved across all your devices? Sign up or sign in
