Roma 9
9
Paulus jorung tului orong dulun Yahudi aroko porocaya ma Yesus
9:1-5
1Awi akuh hokohico ma Kristus, maka antun kuh tuh mositi tangar. Akuh aroko ngoncunih. Roh Mohotara umpi atoi-kuh yakin tintun iyoh. 2Akuh korinah jorung hintang atoi kuh mondorita 3awi orong dulun Yahudi aroko kolu porocaya ma Kristus. Malah akuh selang tonulut, topisah ingkan Kristus sompamaeh aang cioh umpi iroh jarin solamat. Tului iroh iyohco kawan konduang kuh leh, samah-samah bangsa Israel. 4Iroh iyohco umat Mohotara. Are umpi iroh jarin kawan anak-Eh. Are porahan ma iroh bahawa Are korinah bokuasa. Are umpi kawan pojanjian husus ma iroh. Are mihi Hukum Torat indan doh hintang mara ma iroh cara doh sobulih nyembah Are. Are mahi umpi orong janji bokon ma iroh. 5Iroh iyohco koturunan Abraham, Ishak hintang Yakup, kawan taman loluhur doh. Kotika Kristus jarin kolunon, Are tonganak sobagai koturunan dulun Israel ka. Are bokuasa ma kokon aranaang. Areboh Mohotara co patut tonara indan sokotahi-tahieh. Amin!
Mohotara porahan kopomasi hintang mili dulun sosuai ma kojere-Eh leh
9:6-29
6Akuh aroko mantun bahawa janji Mohotara aroko tolaksana. Ome co tomonjanji Mohotara sobujur eh ocop tojadi, awi aroko kokon dulun Israel iyohco umat co tomili Mohotara. 7-9Aroko uras koturunan Abraham jarin kawan anak eh co tomili Mohotara. Awi, hiah jaman sinan Mohotara bojanji ma Abraham, “Nyan waktu co tonantu, Akuh angar hopuli hintang oruhmu Sara angar empun anak bakah.”#9:7-9 Ingkan buku Kojadian 18:10,14. Anak co tonganak tului janji cioh iyohco Ishak. Jadi, baya koturunan Ishak jarin koturunan co bujur. Oluco Abraham oko anak bokon, koturunan ingkan anak cioh bokon koturunan co tomili Mohotara. Mohotara mantun, “Baya koturunan Ishak lehboh co angar tonisi koturunanmu.”#9:7-9 Ingkan buku Kojadian 21:12.
10Hintang ka, Ishak, taman loluhur to yoh, empun anak tatup duo, Yakup doruo Esau. Kotika oruh eh Ripka rahat botohi, 11-12Mohotara mantun ma Ripka, “Anak co pokongongko angar jarin hamba anak co daja.”#9:11-12 Ingkan buku Kojadian 25:23. Mohotara mili Yakup sorinai duo anak eh yoh tonganak, sorinai iroh nguan aranaang co pio atawa co jahat. Mohotara nguan iyoh ina jelas bahawa Are mili dulun aroh sosuai ma alogawin doh, tapi sosuai ma kojere-Eh leh. 13Nain antun Mohotara cotuh co totulih nyan Surat Borasih: “Akuh hopasi Yakup tapi ngondolee Esau.”#9:13 Ingkan buku Maleaki 1:2-3.
14Amun sanioh, ome co lian to mantun eh? Mainboh Mohotara aroko sucing? Mositi Mohotara sucing! 15Awi, Mohotara mantun ma Musa, “Akuh angar porahan koboraoi ma dulun co nyau toporahan Kuh koboraoi. Akuh angar porahan kopomasi ma dulun co nyau toporahan Kuh kopomasi.”#9:15 Ingkan buku Koluaran 33:19. 16Jadi, Mohotara mili dulun aroh tului dulun cioh nyau, hintang aroh tului dulun cioh bousaha umpi kopio, tapi Mohotara mili dulun tului Are nyau porahan kopomasi ma dulun cioh. 17Awi, ponah Surat Borasih tonulih bahawa Mohotara mantun ma laca Mesir: “Akuh ocop umpi iko jarin laca ika maksut otuh, iyohonon ika hapo iko jarin alat ika poleha kuasang-Kuh ma kokon dulun, ina kawan dulun nyan ngolauh dunia monau tintun Akuh.”#9:17 Ingkan buku Koluaran 9:16. 18Jadi, ocop jelas bahawa Mohotara porahan kopomasi ma dulun sosuai ma kojere-Eh. Tapi Mohotara mahi boraoi umpi dulun makeng atoi sosuai ma kojere-Eh, isan co tojadi ma laca Mesir yoh.
19Amun sanioh, angar oko nyan halo ikan co mantun ma akuh, “Amun arelu oko dulun co mampu monentang aang co nyau Mohotara umpi, kura Mohotara incah mangap dulun sala?” 20Tapi, porhatiehboh! Ikan baya kolunon. Ikan aroko boraoi nyala koputusan Mohotara co nampa ikan. Buong tantu aroko boraoi mantun ma tukang co nampaeh, “Kura iko nampa akuh isan otuh?!”#9:20 Ingkan buku Yesaya 29:16 hintang 45:9. 21Mositi tukang cioh bohak umpi ome bewe co tonyaueh. Ingkan gumpar tana liot co samah, tukang cioh bohak umpi ico buong co istimewa hintang ico buong co bokon co biasa.
22 Sanioh ka Mohotara co bokuasa ma kokon dulun co tonampa-Eh. Oko kawan dulun co umpi Mohotara sangit hintang Are ocop siap ngolumat iroh. Are nyau porahan bahawa Are sangit hintang poleha kuasai-Eh. Tapi Are aroko lansung ngohukum iroh. Are sabar ma iroh 23ika porahan bahawa Are korinah tohormat. Are porahan iyoh ma kawan dulun co norima kopomasi-Eh. Mohotara ocop siap mihi kobolum co tohormat ma kawan dulun taiyoh, 24itoboh iyoh co ocop tonaah-Eh, aroh baya ingkan bangsa Yahudi, tapi ka ingkan kawan bangsa bokon. 25Nain nyan buku nabi Hosea. Mohotara mantun otuh tintun kawan dulun bokon ma Yahudi:
“Ma kawan dulun co bokon umat-Kuh, Akuh angar mantun, ‘Ikan iyohco umat-Kuh.’
Ma kawan dulun co aroko tongasih-Kuh, Akuh angar mantun, ‘Akuh mongasihi ikan.’ ”#9:25 Ingkan buku Hosea 2:22.
26“Nyan ico ika, sinan tomantun ma iroh, ‘Ikan bokon umat-Ku.’
Nyan ika cioh ka angar tomantun ma iroh, ‘Ikan iyohco kawan anak Mohotara co bolum.’ ”#9:26 Ingkan buku Hosea 1:10.
27Hintang nabi Yesaya mantun tintun dulun Yahudi, “Kuhat dulun Israel orong lau isan barah nyan laut. Tapi baya isut leh co angar solamat. 28Awi Tuhan Mohotara angar nguan ome co tomantun-Eh, iyohonon Are angar nyua mohukum kokon dulun nyan dunia.”#9:28 Ingkan buku Yesaya 10:22-23. 29Sorinai ponghakiman yoh Yesaya mahi mantun, “Sompamaeh Tuhan Mohotara co Poko Bokuasa aroko nyolamat pira-pira dulun ika molanjut koturunan indan to, maka kokon to lumat isan co tojadi nyan kota Sodom hintang Gomora.”#9:29 Ingkan buku Yesaya 1:9.
Orong dulun Yahudi aroko tonyolamat tului iroh aroko porocaya ma Yesus Kristus
9:30–10:4
30Amun sanioh, ome co lian to mantun eh? Ito boraoi monyimpul otuh: Kawan dulun bokon ma Yahudi aroko bousaha jarin bujur nyan tohimo Mohotara. Tapi, iroh jarin bujur tului iroh porocaya ma Kristus. 31Tapi, kawan dulun Israel bousaha nuhit Hukum Torat ika jarin bujur nyan tohimo Mohotara. Tapi iyoh aroko bohasir. 32Kura? Awi iroh aroko porocaya ma Yesus tapi bousaha jarin bujur ma alogawi doh co pio. Yesus samah isan batu co umpi iroh tontonop. 33Nain antun Mohotara co tonulih nyan Surat Borasih:
“Porhatiehboh! Akuh mandak Batu nyan Sion.#9:33 Sion iyohco puruk nyan derah kota Yerusalem. Kiasan cotuh hapan ika gamaran bahawa Mohotara nyoruhan Yesus hia umat-Eh kawan dulun Yahudi. Oko dulun co porocaya ma Yesus hintang oko dulun co kuloi Are.
Batu cioh umpi dulun tontonop.
Tapi dulun co porocaya ma-Eh, aroko piji angar jarin mohaan bahawa are porocaya.” #9:33 Ingkan buku Yesaya 28:16.
Currently Selected:
Roma 9: TBSS
Highlight
Copy
Compare
Share
Want to have your highlights saved across all your devices? Sign up or sign in
