Roma 7
7
Ito aroko topaksa nontumun Hukum Torat awi Yesus molampas ito ika nontumun Roh Mohotara
7:1-6
1Kawan konduang kuh ikan uras paham tintun hukum. Jadi ikan mahi tantu monau bahawa kokuasaan hukum ma ico dulun baya bolaku kotahin are incah bolum. 2Cuntueh: Oko hukum co mongikat oruh ma banaieh. Kotahin banaieh incah bolum, oruh eh sobulih nuhit hukum cioh. Tapi, amun banaieh matoi, maka oruh eh bebas ingkan hukum cioh. 3Amun oruh eh yoh jarin oruh bakah co bokon hiah waktu banaieh incah bolum, maka socara hukum are tonisi hokoruh ma bakah co bokon ma banaieh. Tapi amun oruh eh yoh jarin oruh bakah co bokon opah banai eh ocop matoi, maka are aroko hokoruh ma bakah co bokon ma banaieh.
4Sanioh ka ma ikan, kawan konduang kuh! Cara bolum me co nomuun ocop matoi tului betin Kristus matoi indam me. Maka, hubungan me ma Hukum Torat ocop toputus. Makitu, ikan oko hubungan ma Kristus, iyohonon Are co ocop bolum hopuli ingkan pompatoi. Kokon iyoh tojadi ina to hegah jarin boguna indan Mohotara. 5Batuh, ito incah bolum sosuai ma kawan kojere to sobagai kolunon. Hukum Torat ngosiit ito bodosa, tapi malah iyoh co umpi kawan kojere to meleh bohimat kole. Jadi, kawan anggota betin to ngumba kawan kojere jahat yoh dapot ito bodosa. Akibat eh, ito sobulih tomohukum matoi topisah ingkan Mohotara. 6Tapi makitu, ito tongolampas. Ito aroko tokaeng bat ma Hukum Torat tului cara bolum to co tomuun yoh ocop matoi. Makitu, ito bolum ma cara co baa. Ito molayan Mohotara aroko ma cara bolum ngumba Hukum Torat co tonulih tapi ma cara bolum co ngumba Roh Mohotara.
Kuasan dosa morusak tujuan co pio ingkan Hukum Torat
7:7-11
7Amun sanioh, ome co lian to mantun eh? Mainboh Hukum Torat yoh jahat? Samah sindo aroh! Tokalik eh, malah Hukum Torat majar mara akuh tintun dosa. Cuntueh: Oko porentah cotuh ponah Hukum Torat: Aroh ngonyere tioh dulun.#7:7 Ingkan buku Koluaran 20:17. Ingkan iyoh, akuh monau kojere isan iyoh iyohco dosa. 8Molalui Hukum Torat, dosa haba kosempatan ina posomput kokon macam kojere co ngalam nyan ponah atoi kuh; awi amun Hukum Torat arelu oko, maka dosa aroko bokuasa samah sindo 9hintang akuh bolum. Tapi, opah akuh monau porentah cioh, kuasan dosa hegah bogawi umpi akuh sasar naleh Mohotara ibarat eh kuasan dosa yoh molai bolum 10hintang akuh matoi. Jadi, tujuan porentah cioh iyohco umpi dulun bolum, tapi tonyata akuh molangar porentah cioh dapot akuh sobulih tomohukum matoi topisah ingkan Mohotara. 11Awi, opah akuh monau porentah cioh, kuasan dosa monu kosempatan cioh ika nipu atoi kuh hintang akuh sobulih tomohukum matoi topisah ingkan Mohotara.
Kojere ika bodosa korinah bohimat, tapi Yesus lian ngolampas ito ingkan kuasan dosa yoh
7:12-25
12Hukum Torat boasar ingkan Mohotara, hintang kokon porentah ponah buku cioh korombut eh ingkan Mohotara, iyoh sucing hintang pio. 13Amun sanioh, mainboh porentah co pio yoh umpi akuh sobulih tomohukum matoi topisah ingkan Mohotara? Samah sindo aroh! Kuasan dosa co nguan iyoh! Kuasan dosa hapo porentah co pio ika umpi akuh sobulih tomohukum matoi topisah ingkan Mohotara. Iyoh tojadi ina tonta cioh dosa. Porentah co pio tohapan ina meleh tonta kole dosa mula korinah jahat.
14Ito monau bahawa Hukum Torat borasar ingkan Roh Mohotara. Tapi, akuh iyohco kolunon leh. Akuh numba kojere kuh ika bodosa. 15Akuh aroko monau kura akuh nguan iyoh. Akuh aroko nguan kawan alogawi pio co jere kuh umpieh. Malah akuh nguan kawan alogawi jahat co tongodolee kuh. 16Akuh umpi kojahat oluco akuh aroko nyau nguan eh. Tapi, awi akuh aroko kolu umpi kojahat, maka iyoh borati akuh sotuju bahawa Hukum Torat yoh pio. 17Akuh umpi aang co jahat aroko tului akuh jere umpieh, tapi tului dosa oko nyan ponah betingkuh. 18Tomonau kuh arelu oko co pio ponah arop kuh, iyohonon akuh iyohco kolunon ma kojere ika bodosa. Oluco akuh mahi oko kojere ika umpi aang co pio, tapi akuh aroko mampu nguan eh. 19Jadi, akuh aroko nguan kawan alogawi pio co jere kuh nguan eh. Malah seen, akuh nguan kawan alogawi jahat co aroko kuh jere umpieh. 20Amun akuh umpi kojahat, tapi akuh aroko jere umpi aang co jahat yoh, artieh akuh umpi kojahat yoh awi oko dosa nyan ponah aropkuh, aroko tului akuh leh jere umpi kojahat.
21Kosimpulan eh, oko kobiasaan cotuh co tojadi ponah kobolumkuh: Akuh jere umpi aang co pio, tapi akuh umpi aang co jahat. 22Ponah arop kuh, akuh herak kokon porentah hintang poraturan Mohotara ponah Hukum Torat. 23Oluco akuh bopikir uras poraturan taiyoh pio, akuh aroko mampu nguan eh, awi oko kobiasaan bokon ponah arop kuh co naleh poraturan Mohotara yoh, iyohonon kuasan dosa. Kuasan dosa bogawi ponah arop kuh dapot akuh jarin cipon dosa. 24-25Akuh bopikir Hukum Torat pio hintang akuh nyau ngumba Mohotara. Tapi, beting kuh ngumba kojere ika bodosa dapot akuh angar haba hukuman matoi sokotahi-tahieh! Ah, akuh tuh kolunon co hina! Omeboh angar nyolamat akuh ingkan koadaan cotuh? Bosukurboh ma Mohotara awi Are ocop nyoruhan Tuhan to, Yesus Kristus, ika nyolamat akuh ingkan koadaan cioh.
Currently Selected:
Roma 7: TBSS
Highlight
Copy
Compare
Share
Want to have your highlights saved across all your devices? Sign up or sign in
