Roma 6
6
Dulun co bolum hokohico ma Kristus, aroko nyambo kuasan dosa
6:1-14
1Amun sanioh, ome co lian to mantun? Mainboh ito kuhan horoholuh umpi dosa ina Mohotara sasar poleha koboraoi-Eh ma ito? 2Tantu aroh! Dosa aroh bat bokuasa ma ito, jadi, moh boraoi ito horoholuh bolum umpi dosa.? 3Aroh solingo otuh: Nyan waktu ito tomombaptis ponah Kristus Yesus, artieh samah ma ito ocop matoi umba Are. 4Ponah baptisan cioh, ito matoi hintang tongolowong umba Kristus ina to mahi ngohaba kobolum co baa, samah isan Mohotara Tama umpi Kristus bolum hopuli ingkan pompatoi tului kuasai-Eh co tohormat.
5Ito ocop jarin ico ma Kristus awi ito ocop matoi umba Are. Maka, daai ito angar bolum hokohico ma Are ka awi ito angar bolum hopuli samah isan Are. 6Ito monau bahawa cara bolum to co nomuun ocop matoi somporengueh tongompatoi nyan sompolaki umba Kristus. Iyoh tojadi ina kuasan dosa ponah arop to hegah topotiho. Ma sanioh, ito aroko bat sobulih tohocipon dosa. 7Awi, dosa aroko lian monguasa dulun co ocop matoi.
8Jadi, awi ito ocop matoi umba Kristus, maka ito porocaya bahawa ito angar bolum umba Are ka. 9Awi, koraon to bahawa Kristus ocop bolum hopuli hintang Are aroko angar matoi bat. Pompatoi aroko bat bokuasa ma Are. 10Are matoi sindo leh ina kuasan dosa tongalah indan sokotahi-tahieh. Makitu, Are ocop bolum hopuli hintang Are horoholuh bolum ika ngonyorih Mohotara. 11Ikan sobulih noto arop me isan iyoh ka. Ikan ocop matoi tohimo dosa hintang ikan bolum ika ngonyorih Mohotara awi ikan hokohico ma Kristus Yesus.
12Tului iyoh, aroh bat moholu dosa nguasa kobolum me nyan dunia tuh co baya sopondehan. Aroh bat ngumba kojere ika bodosa. 13Aroh nyarah arop me ma dosa hintang dosa hapo kawan anggota betim me jarin alat ika umpi aang co jahat. Kobolum me co tomuun yoh ocop matoi. Makitu, ikan ihin bolum baa. Jadi, nyarah arop me ma Mohotara paluh moholu Are hapo kawan anggota betim me jarin alat ika umpi aang co bujur. 14Dosa aroko monguasa ikan bat. Tului, ikan aroh bolum nyambo kuasan Hukum Torat, tapi ikan bolum nyambo kuasan kopion atoi Mohotara.
Aroh bat jarin cipon dosa tapi jarin cipon Mohotara co horoholuh ngonyorih Are
6:15-23
15Jadi maindeoi? Akuh mantun bahawa ito aroko bolum nyambo kuasan Hukum Torat, tapi ito bolum nyambo kuasan kopion atoi Mohotara. Mainboh iyoh borati ito boraoi leh umpi dosa? Samah sindo aroh! 16Ikan tantu monau otuh: amun ikan nyarah arop me ma ico dulun hintang nuhit are, borati ikan iyohco cipon dulun cioh. Ikan boraoi jarin cipon dosa paluh akibat eh ikan angar matoi topisah ingkan Mohotara. Tokalik eh ikan ka hegah jarin cipon Mohotara co nuhit Are. Paluh akibat eh ikan angar umpi aang co buah. 17Mula batuh ikan iyohco cipon dosa. Tapi, bosukurboh ma Mohotara, awi makitu ikan tuu-tuu ocop nuhit ajaran co buah co ocop tomorapot indam me. 18Ikan ocop tomolampas hintang bokon cipon dosa bat. Ikan ocop jarin cipon Mohotara co umpi aang co bujur. 19(Koraong kuh ikan moho paham. Jadi, akuh hapo cuntu cotuh tintun cipon ina me meleh bohinai paham.) Batuh ikan nyarah arop me jarin cipon dosa. Kawan anggota betim me tohapan ika umpi kawan aang co luse hintang jahat. Sanioh ka makitu ikan sobulih nyarah arop me jarin cipon Mohotara ina kawan anggota betim me boraoi tohapan ika umpi kawan aang co buah hintang husus indan Mohotara.
20Hiah waktu ikan cipon dosa, ikan bebas ika nguan aang co aroko bujur. 21Cara bolum me co nomuun yoh ome hasir eh? Makitu, ikan mohaan tintun kokon alogawi taiyoh awi cara bolum cioh baya umpi ikan matoi topisah ingkan Mohotara. 22Tapi makitu, ikan ocop lampas ingkan kuasan dosa. Ikan jarin cipon Mohotara. Ikan lian bolum borasih ingkan dosa. Cara bolum isanioh umpi kobolum me jarin husus indan Mohotara iyohonon ngohaba kobolum co sumong kotahi nyan sorga. 23Tombah ingkan dosa iyohco ito sobulih matoi topisah ingkan Mohotara. Tapi Mohotara porahan kopio-Eh ma ito. Are mihi kobolum sumong kotahi nyan sorga indan to awi ito hokohico ponah Yesus Kristus, Tuhan to.
Currently Selected:
Roma 6: TBSS
Highlight
Copy
Compare
Share
Want to have your highlights saved across all your devices? Sign up or sign in
