Roma 4
4
Abraham jarin bujur nyan tohimo Mohotara aroh tului alogawieh, tapi awi are porocaya
4:1-25
1Amun isanioh, ome co lian ito mantun eh tintun Abraham, taman tatu hiang to? Maindeon caraeh are jarin bujur nyan tohimo Mohotara? 2Sompamaeh Abraham jarin bujur tului alogawieh, maka are oko alasan ika pobanga arop. Tapi sobujur eh, arelu oko alasan ika Abraham pobanga arop nyan tohimo Mohotara. 3Awi, ponah Surat Borasih tonulih santuh: “Abraham porocaya ma Mohotara. Iyohboh tuluieh Abraham lian jarin bujur nyan tohimo Mohotara.”#4:3 Ingkan buku Kojadian 15:6.
4Amun oko dulun co bogawi, are norima tombah. Tombah cioh bokon hodiah. Are bohak norima tombah awi alogawieh. 5Tapi iyoh aroh caraeh Mohotara umpi dulun co bodosa jarin bujur nyan tohimo-Eh. Jarin bujur aroh isan tombah tapi isan hodiah. Awi, Mohotara umpi dulun jarin bujur aroko tului alogawieh tapi tului are porocaya. 6Hiah jaman sinan, Laca Daud mantun aang co samah. Dulun co tomangap Mohotara bujur aroko tului alogawieh. Daud mantun bahawa dulun cioh iyohco dulun co ihin aang co pio hinut. Santuhboh hien Daud:
7“Ihin aang co pio hinut boh dulun co kawan kosolaaieh tomohapus.
Ihin aang co pio hinut boh dulun co kawan dosai tomampun.
8Ihin aang co pio hinut dulun co aroko tomangap sala bat pian Tuhan.”#4:8 Ingkan buku Masmur 32:1-2.
9Mainboh antun Daud yoh borati baya dulun Yahudi co hobalak haba aang co pio hinut yoh? Samah sindo aroh! Dulun bokon ma Yahudi co aroko hobalak haba aang co pio hinut ka! Awi, kaih ocop mantun bahawa Abraham jarin bujur tului are porocaya. 10Porhatiehboh! Hiah arai Abraham jarin bujur, sorinai are tomalak atawa opah eh? Abraham jarin bujur sorinai are tomalak! 11Are tomalak ika potinjun bahawa are ocop jarin bujur tului are porocaya. Are jarin bujur nyan tohimo Mohotara sorinai are tomalak. Ma sanioh, Abraham jarin taman kokon dulun co porocaya, oluco iroh aroko hobalak. Samah isan Abraham, iroh jarin bujur tului iroh porocaya. 12Tapi Abraham mahi jarin taman dulun co hobalak co bolum umba cuntueh. Iyohonon, iroh aroko baya hobalak, tapi iroh porocaya samah isan Abraham porocaya sorinai are tomalak.
13 Mohotara bojanji ika mihi dunia ma Abraham hintang koturunan eh.#4:13 Ingkan buku Kojadian 2:17-18. Mohotara bojanji ika mihi dunia tomasuk orong aang: Abraham angar oko orong koturunan, iroh angar jarin bangsa husus tioh Mohotara, iroh angar ngalah kokon musuh, ngohaba tana Kanaan co tomonjanji Mohotara, hintang jarin kopio hinut indan kokon bangsa bokon. Mohotara umpi janji cioh aroh tului Abraham nuhit Hukum Torat, tapi tului Abraham porocaya paluh jarin bujur nyan tohimo-Eh. 14Sompamaeh, aang co pio hinut co tomonjanji Mohotara yoh baya ihin indan dulun co nuhit Hukum Torat, maka mohampa leh dulun porocaya ma Mohotara, hintang janji cioh mahi angar balang. 15Hukum Torat yoh umpi dulun buah hukuman, tapi amun arelu oko Hukum Torat aroko polangaran. 16Jadi, janji Mohotara yoh bodasar ma koporocayaan dulun cioh ma Mohotara. Iyoh jarin ico jaminan ma kokon koturunan Abraham bahawa janji cioh sobagai ico pihi co cuma-cuma ingkan Mohotara: Aroko baya ma iroh co tuhit ma Hukum Torat, tapi ma iroh co porocaya ma Mohotara samah isan Abraham porocaya. Awi Abraham iyohco taman to kokon dulun co porocaya. 17Nain co tonulih ponah Surat Borasih: “Akuh ocop umpi iko jarin taman orong bangsa.” Mohotara mantun iyoh ma Abraham, hintang Abraham porocaya ma-Eh. Iyohonon Mohotara bokuasa umpi dulun matoi jarin bolum hopuli hintang molalui antun-Eh leh, Mohotara umpi ome co arelu oko jarin oko. 18Hiah waktu iyoh, deon ponoto Abraham arelu oko horapan bat ika ngohaba koturunan. Tapi, Abraham tenden yakin porocaya ma Mohotara bahawa are angar jarin taman orong bangsa. Are porocaya antun Mohotara santuh maeh: “Daai iko angar empun orong lau koturunan!” 19Abraham nyan kotika cioh koraoieh bahawa are ocop aroko bodai bat empun koturunan, awi betieh ocop dalo kongongko hintang umur eh ocop jonyo solatuh toun; hintang kole Sara, oruh eh yoh, tomanang. Tapi koporocayaan Abraham aroko jarin bokurang. 20Are tenden porocaya hintang aroko ragu-ragu ma janjin Mohotara. Malah, are sasar borohon porocaya hintang nara Mohotara. 21Are korinah porocaya bahawa Mohotara bokuasa nguan ome co ocop tomonjaji-Eh. 22Iyohboh tuluieh Abraham lian jarin bujur nyan tohimo Mohotara.#4:22 Ingkan buku Kojadian 15:6.
23Antun “Lian jarin bujur nyan tohimo Mohotara” tuh ocop tonulih ponah Surat Borasih. Tapi, antun cotuh aroko tonulih baya indan Abraham. 24Antun cioh tonulih indan ito ka. Awi, ito mahi jarin bujur nyan tohimo Mohotara awi ito porocaya ma-Eh. Ito porocaya Are co umpi Yesus, Tuhan to, bolum hopuli ingkan pompatoi. 25Mohotara nyarah Yesus ina Are matoi nyan sompolaki ika nahur hukuman dosan to. Mohotara umpi Yesus bolum hopuli ina to lian jarin bujur nyan tohimo-Eh.#4:25 Ingkan buku Yesaya 53:4-5.
Currently Selected:
Roma 4: TBSS
Highlight
Copy
Compare
Share
Want to have your highlights saved across all your devices? Sign up or sign in
