Roma 3
3
1Amun sanioh caraeh dulun jarin umat Mohotara, ome kolabihan dulun Yahudi? Mainboh kohobalak oko gunaieh? 2Mula dulun Yahudi oko orong kolabihan ponah kokon aang. Portama-tama awi Mohotara momporocaya Antun-Eh ma dulun Yahudi.
3Tapi maindeoi amun oko dulun Yahudi co aroko tenden porocaya ma Mohotara? Mainboh iyoh angar umpi Mohotara aroko tenden molalus kawan janji-Eh ma iroh? 4Samah sindo aroh! Oluco kokon dulun ngoncunih, Mohotara horoholuh bujur. Iyoh samah nain co tonulih ponah Surat Borasih:
“Kokon antun-Mu mositi bujur!
Sompamaeh, Iko tonondah ponah sidang, mositi Iko co tobukti bujur.”#3:4 Ingkan buku Masmur 51:6.
5Tapi maindeoi amun akuh bopikir socara kolunon, paluh mantun santuh: Hiah waktu ito jahat, aang cioh porahan bahawa Mohotara bujur. Jadi, amun Mohotara majap ito, artieh Mohotara aroko sucing, mikeh eh? 6Samah sindo aroh! Sompamaeh Mohotara aroko sucing, moh bodai Are lian mutus sala atawa buah kawan dulun nyan dunia tuh?
7Tapi maindeoi amun akuh co aroko bolum ma cara co bujur, paluh aang cioh umpi meleh tonta bahawa Mohotara bujur, dapot Mohotara tonara? Kura Mohotara incah nyala akuh tului dosangkuh? 8Kura ito aroko mantun leh, “Haasceh ito umpi kojahat ina Mohotara sasar tonara.” Mositi ajaran cioh sala lau! (Mula oko dulun co posebar kesah unih bahawa kaih porapot ajaran co sala yoh. Daai pantas leh Mohotara mohukum kawan dulun co ngoncunih yoh.)
Koadaan kokon dulun aroko patut nyan tohimo Mohotara
3:9-20
9Jadi, maindeon kosimpulan eh? Mainboh ito dulun Yahudi meleh pio nyan ponoto Mohotara hangki dulun bokon? Samah sindo aroh! Ito ocop monjelas eh bahawa kokon dulun tonguasa pian dosa, iyoh dulun Yahudi atawa dulun bokon ma Yahudi. 10Samah ma co tonulih ponah Surat Borasih;
“Arelu oko ico dulun mahi co bolum bujur nyan tohimo Mohotara.
11Arelu oko dulun co paham ome co bujur.
Arelu oko dulun co jere nyono Mohotara.
12Kokon dulun ocop kuloi Mohotara.
Kokon doh aroko boguna indan Mohotara.
Arelu oko ico dulun mahi co umpi aang co pio.”#3:10-12 Ingkan buku Masmur 14:1-3.
13“Kawan antun co pusit ingkan baun doh ngonok nolujur dulun muntam kolowong co ranga-ranga.
Cola doh nipu dongan doh.”#3:13 Ingkan buku Masmur 5:10.
“Antun doh ngomporoh dongan doh samah ma harin toco nyipo.”#3:13 Ingkan Masmur 140:4.
14“Ma nyaman kodolee iroh hotulut dongan doh.”#3:14 Ingkan buku Masmur 7:10.
15“Iroh horoholuh nyau monyiksa hintang ngompatoi dongan doh.
16Nyan omoh bewe iroh tulak, iroh ngohancur kobolum dongan doh. Iroh umpi dongan doh soranta.
17Iroh aroko monau caraeh bolum landah ma dongan doh.”#3:15-17 Ingkan buku Yesaya 59:7-8.
18“Iroh aroko nyook ma Mohotara.”#3:18 Ingkan buku Masmur 36:2.
19Ito monau bahawa kokon aranaang co tonulih ponah Hukum Torat, tomasuk antun yoh, bolaku indan dulun co empun Hukum Torat yoh. Jadi, arelu oko dulun co lian mantun bahawa are aroko bodosa. Kokon dulun nyan ngolauh dunia tuh patut tomohukum Mohotara. 20Arelu oko dulun co lian jarin bujur nyan tohimo Mohotara ma cara nuhit Hukum Torat. Malah Hukum Torat co umpi dulun tohoku bahawa iroh bodosa tului iroh aroko boraoi nuhit kokon Hukum Torat yoh.
Ma porocaya ma Yesus, dulun ingkan kokon bangsa lian jarin bujur nyan tohimo Mohotara
3:21-31
21Tapi makitu Mohotara ocop poleha caraeh kolunon lian jarin bujur nyan tohimo-Eh. Caraeh aroko ma hotuhit Hukum Torat. Tapi buku Hukum Torat hintang buku kawan nabi mara tintun cara cioh. 22Iyohonon, dulun jarin bujur nyan tohimo Mohotara ma cara porocaya ma Yesus Kristus. Caraeh samah indan kokon dulun. Ponah aang cioh, dulun Yahudi aroko bobeda hangki dulun bokon ma Yahudi. 23Awi kokon dulun ocop bodosa hintang aroko lian poleha bahawa Mohotara tohormat ponah kobolum eh. 24Tapi Mohotara ocop poleha koboraoi-Eh ma kolunon. Are umpi caraeh ina dulun lian jarin bujur nyan tohimo-Eh, iyoh bokon tului usaha to tapi tului Yesus Kristus co nangung hukuman ika nowuh iroh ingkan dosa. 25Are nahur ma daha-Eh leh hiah waktu Are matoi nyan sompolaki Are jarin kurban ina dosan dulun boraoi tomampun, iyohonon amun iroh porocaya ma-Eh. Mohotara nyarah Yesus isan iyoh ika poleha bahawa Are sucing hintang mohukum dosa. Sinan, Mohotara sabar ma kolunon. Are arinai mohukum kokon dosan doh. 26Tapi makitu, Mohotara botindak tohimo dosa ika poleha bahawa Are sucing.#3:26 Amun Mohotara aroko mohukum dosa, Are aroko boraoi tonisi sucing. Mohotara umpi aang cioh ina nyata bahawa Are bujur hintang ngombujur dulun co porocaya ma Yesus.
27Amun sanioh, mainboh kolunon lian pobanga arop bahawa are jarin bujur nyan tohimo Mohotara tului usaha eh tarop? Samah sindo aroh! Awi, iyoh tojadi aroko tului alogawieh leh, tapi tului are porocaya ma Yesus. 28Kaih yakin bahawa kolunon jarin bujur nyan tohimo Mohotara aroko tului are nuhit Hukum Torat, tapi awi are porocaya ma Yesus Kristus. 29Cuba momikir: Mainboh Mohotara baya Mohotaran dulun Yahudi leh? Tantu aroh! Are iyohco Mohotaran kawan bangsa bokon ka! 30Baya oko ico Mohotara. Jadi, caraeh jarin bujur nyan tohimo-Eh iyohco cara co samah indan dulun Yahudi co hobalak hintang indan dulun bokon ma Yahudi co aroko hobalak. Caraeh iyohco porocaya ma Yesus. 31Amun ito jarin bujur tului ito porocaya, mainboh iyoh borati ito bopikir bahawa Hukum Torat arelu oko gunaieh? Samah sindo aroh! Malah seen awi ito porocaya, maka ito sotuju bahawa Hukum Torat yoh bujur.
Currently Selected:
Roma 3: TBSS
Highlight
Copy
Compare
Share
Want to have your highlights saved across all your devices? Sign up or sign in
