2 Korintus 13
13
Paulus nopoh dulun Korintus ina doh hopuli bolum jarin dulun porocaya
13:1-10
1Akuh angar dombut kole hia ikan indan kotolu kalieh. Oko tonulih nyan Surat Borasih bahawa sika tondah hanyar tobukti bujur amun oko duo beti saksi atawa labih, co bosumpah bahawa matan doh leh noto kojadian porokara cioh.#13:1 Poraturan cioh ingkan Ulangan 19:15. 2Hiah waktu akuh oko halo ikan batuh nyan kohonduo, akuh ocop momporingat kokom me, husus eh kawan dulun co aroko umbot umpi dosa. Sanioh ka, makitu oluco akuh arelu oko halo ikan, akuh momporingat dulun ma antun co samah tuh: Nyan waktu akuh dombut kole, akuh aroko angar bosikap lomun. 3Akuh angar umpi sanioh, awi ikan leh nyawot akuh poleha bahawa Kristus mihi hak indang kuh ika hopander mowakili Are. Are aroko lomun tohimo ikan, tapi Are porahan kuasai-Eh nyan tohun-tohun ikan. 4Mula Kristus lian tongompatoi nyan sompolaki tului Are empun beti lamah isan kokon kolunon. Tapi Are bolum tului kuasan Mohotara. Sanioh ka ma kaih. Kaih lamah awi tului kaih mondorita samah isan Kristus. Tapi, ponah cara kaih nohimo ikan, kaih angar bolum ponah Kristus ma kuasan Mohotara.
5Ngujiboh arop me tarop mainboh ikan bujur-bujur bolum jarin dulun co porocaya ma Kristus. Morisabat arop me! Mositi koraom me bahawa Kristus Yesus oko nyan ponah atoi me. Awi amun Kristus aroko nguasa atoi me tantu ikan ocop gagal kotika tonguji. 6Tapi, akuh boharap ikan monau bahawa kaih lulus ujian co porahan kaih bujur-bujur rasul Kristus. 7Kaih bodoa ma Mohotara ina me aroh umpi kojahat. Iyoh aroh ika mombukti bahawa kaih mula lulus ujian sobagai rasul Kristus. Cioh aroko kohimat kaih. Kohimat kaih ina me umpi aang co pio, ngumba ajaran co buah. Hintang oluco kaih tokitan aroko lulus ujian, aroko ome-ome leh. 8Kaih aroko lian umpi aang co botentangan ma ome co buah. Kaih otoi lian nguan aranaang co sosuai ma aang co bujur. 9Tapi, kaih jorih lau amun kaih pongitoeh lamah isan iyoh hintang ikan jarin bosomangat hopuli umpi aang co pio. Tuhboh co tomondoa kaih, iyohonon ina me bujur-bujur bolum sobagai dulun co porocaya. 10Otuhboh tuluieh akuh nulih surat cotuh hiah waktu akuh arinai halo ikan. Ika akuh aroko sobulih botindak tegas hapo kuasa co ihin Tuhan ma akuh. Are mihi kuasa cioh ika mombantu ikan meleh borohon porocaya, aroko ika mohancur ikan.
Kawan antun tontiput Paulus ponah surat eh
13:11-13
11Kojekaieh, kawan konduang, jorih jerah boh! Borusahaboh bolum tuu-tuu jarin dulun porocaya. Nontumunboh kokon nosehat kuh. Ikan sobulih bolum hokohico atoi hintang ico pikir, hintang ma kongolandah ico ma co bokon. Amun ikan umpi iyoh, maka Mohotara angar somin ikan. Are boh co sumer kasih hintang kongolandah kongolami.
12Kojerebat ikan hotabe hokoteno ico ma co bokon. Tontoke ingkan kokon dulun husus tioh Mohotara nyan intoi.
13Akuh bodoa ika Yesus Kristus mihi aang co pio hinut ma kokom me. Akuh mahi bodoa ika Mohotara horoholuh masi ikan, hintang Roh Mohotara somin kokom me.
Currently Selected:
2 Korintus 13: TBSS
Highlight
Copy
Compare
Share
Want to have your highlights saved across all your devices? Sign up or sign in
