Kesah Rasul 4
4
Petrus doruo Yohanes tomehen hia muka kolompok pomimpin dulun Yahudi
4:1-22
1Dahat Petrus doruo Yohanes hopander ma dulun orong yoh, iroh ruo tongohia pira pira pomimpin dulun Yahudi. Oko kopala ponjaga Lopo Mohotara, kawan imam, hintang kawan dulun ingkan kolompok Saduki.#4:1 Kolompok Saduki Pokongorong anggota kolompok Saduki iyohco kawan pomimpin agama Yahudi, tomasuk orong imam. Iroh baya porocaya ma limo buku co sulak eh ponah Perjanjian Lama (iyohonon kawan buku co tonulih pian Musa: Kojadian, Koluaran, Imamat, Bilangan, hintang Ulangan). Iroh porocaya bahawa opah pompatoi kolunon aroko kobolum kole. Noto Mrk. 12:18 hintang Kes. 23:8. 2Korinah angit kokon pomimpin taiyoh tului Petrus doruo Yohanes momborita tintun Yesus ma dulun orong. Petrus doruo Yohanes majar otuh: amun Yesus ocop bolum hopuli ingkan pompatoi, maka dulun co porocaya ma Yesus angar bolum hopuli ka. Monurut kawan pomimpin, ajaran cioh korinah sala. 3Jadi kawan pomimpin nyuhu nawan rasul duo iyoh holuh pokuntam eh ponah seper. Tului ondo ocop pindong, maka iroh ruo tonahan nyan intin dapot ondo panda. 4Tapi orong dulun co ocop ngoneh ajaran Petrus doruo Yohanes jarin porocaya ma Yesus. Maka kuhat dulun porocaya jarin kira-kira limo ribu beti kawan bakah co ngongko.#4:4 Oko bawe hintang daja ka, tapi aroh muntam kitung.
5Ondo cioh ka, kawan pomimpin agama Yahudi co poko penting bokumpur nyan Yerusalem. Iroh sidang ika hopakat. Oko kawan pomimpin agama, kawan tokoh masarakat, hintang kawan guru Hukum Yahudi. 6Imam Kopala co poko bokuasa co arai Hanas, dombut hia sidang cioh ka. Oko ka kawan dulun penting ingkan koturunan Hanas yoh, tomasuk Kayafas, Yohanes, hintang Aleksander. 7Kawan pomimpin taiyoh nyuhu ika Petrus doruo Yohanes tomehen hia tohimo iroh. Paluh ngisok tamput ingi, “Ome co pian ikan duo? Ikan duo hapo kuasan ome dapot dulun lumpuh conon jarin mambuh?”
8Opah iyoh, Roh Mohotara monguasai Petrus. Maka hien Petrus, “Kawan bapa pomimpin bangsa hintang agama. 9Ngondaii tuh karo tomongadili tului nguan anco pio indan dulun co lumpuh tuh. Kaih tongisok tintun kuasa ingkan ome co ocop ngomambuh are. 10Maka olu kokom me bat monau eh. Kokon dulun bangsa to Yahudi sobulih monau eh ka! Dulun cotuh tonjok sehat nyan tohimo ikan makitu tului are tongomambuh ponah aran hintang kuasan Yesus Kristus ingkan Nasaret. Ikan ocop kuloi ma Are dapot Are tomohukum matoi nyan sompolaki Tapi Mohotara ocop umpi Are bolum hopuli. 11Samah ma co oko tonulih nyan ponah Surat Borasih. Yesus, Laca Co Tomonjanji Mohotara somporengu batu co boguna tapi tomende kawan tukang bangunan. Otuh nai tulisan cioh:
‘Batu co poko boguna ika pondasi co tonongkuloi kawan tukang bangunan.
Tapi Mohotara umpi Batu cioh jarin Batu co poko penting.’
12Jadi tikas Yesus leh co lian nyolamat kolunon ingkan hukuman dosa. Awi nyan ngolauh pinda-ondo baya Are leh ihin kuasa pian Mohotara ika nyolamat kolunon. Arelu oko co bokon.”
13Hayak kawan pomimpin ngoneh Petrus doruo Yohanes bohanyi hopander nain iyoh, iroh hurong tului rasul duo iyoh dulun biasa awi dorua yoh arelu piji sokulah Hukum Yahudi. Kawan pomimpin taiyoh ka sadar bahawa Petrus doruo Yohanes yoh murid Yesus. 14Dulun co ocop tongomambuh iyoh tonjok nyan intin homboh Petrus doruo Yohanes. Jadi poko tului taiyoh, kawan pomimpin taiyoh aroh lian mantun ome-ome ika naleh koduo rasul cioh.
15Jadi iroh nyuhu ika rasul duo iyoh ehen pusit ingkan ruang ika sidang pongadilan yoh. Paluh, kawan pomimpin taiyoh borunding. Hien doh, 16“Ome co angar tongompian to ma dulun duo onon? Kokon dulun nyan Yerusalem tuh ocop monau eh, iroh ruo co umpi aang co mosotahir hintang bohimat lau yoh. Ito aroh lian naleh aang conon. 17Tapi aroh dapot borita conon sasar tosebar ma dulun orong. Ito sobulih mongancam iroh ruo ika aroh bat mander tintun Dulun cioh. Petrus hintang Yohanes porocaya Dulun isan onon jah#4:17 Iroh ocop monau aran ‘Dulun cioh’, Yesus, tapi iroh hapo antun ‘Dulun cioh’ ika mohina Are hintang kawan rasul Eh. co mihi kuasa ika umpi aang co mosotahir yoh. Tapi ito sobulih ngosiit iroh ruo ika aroh momborita hia ome bewe ajaran Dulun cioh co tongorapot Eh ma iroh.”
18Jadi iroh nyuhu ika Petrus doruo Yohanes ehen muntam hopuli. Iroh ngosiit duo rasul yoh majar tintun Yesus atawa mander ma ome bewe ajaran Yesus co tongorapot eh ma iroh.
19Tapi Petrus doruo Yohanes museh, “Ikan leh co momikir comoh co bujur: Tuhit ma Mohotara atawa tuhit ma ikan! 20Pokok eh, karo aroh kolu tonih. Kaih sobulih momborita ome co ocop itan hintang koneh kaih ingkan Yesus.”
21-22Dulun co lumpuh ingkan are tonganak umur eh ocop labih hangki opat pulu toun kotika tongomambuh. Aang cioh umpi dulun orong jorih hintang nara Mohotara. Tului iyoh kawan pomimpin dulun Yahudi taiyoh aroh boraoi haba cara ika mohukum rasul duo iyoh co aroh umpi dulun orong sangit. Maka, kawan pomimpin Yahudi taiyoh ngombebas rasul duo iyoh, tapi ngosiit iroh ma ancaman, aroh kole momborita ponah aran Yesus bat.
Kolompok dulun porocaya bodoa
4:23-31
23Opah tomombebas, Petrus doruo Yohanes hopuli hia kolompok dulun porocaya. Paluh iroh ruo ngesah kokon aang co tomantun kawan imam kopala hintang kawan pomimpin Yahudi co bokon. 24Hayak kawan dulun co porocaya ngoneh iyoh, paluh kokon doh hokohico ponah doa hia Mohotara. Hien doh, “Oh Mohotara co Mahakuasa, Ikoboh co nampa langit, bumi, laut, hintang kokon sangan eh.#4:24 Ingkan Masmur 146:6a. 25Nyan jaman sinan, co tatu hiang kaih yoh, Laca Daud iyohco jungus-Mu. Iko nyoruhan Roh-Mu indai eh, paluh are nulih antun Mu co nain otuh nai:
‘Mohampa leh kawan bangsa bokon ma bangsa Yahudi nyuwah ngolawan Mohotara ma angitopo.
Mohampa leh kawan dulun Yahudi boroncana ngolawan Are.
26Kawan laca nyan dunia siap-siap hokohojat.
Paluh pomimpin bokon hokahung ma iroh ika ngolawan Tuhan, Mohotara
hintang Laca Co Tomonjanji-Eh.’#4:25-26 Ingkan Masmur 2:1-2.
27Oo, Tuhan! Anco tonulih Laca Daud yoh ocop jarin konyataan makitu tuh. Nyan kota Yerusalem tuh Gubernur Herodes, Gubernur Pontius Pilatus, kawan dulun co bokon ma Yahudi homboh ma kawan dulun Yahudi ocop hokahung ngolawan Yesus. Are iyohco Jungus husus co tomili Mu, iyohonon Laca Co Tomonjanji Mu. 28Tapi Iko Mahakuasa co mongatur kokoi eh ingkan kosulak eh. Maka kokoi eh yoh ocop tojadi baya tului sosuai ma kojere-Mu.
29Jadi makitu, yoh Tuhan, momporhati eh bat ancaman doh ma kaih. Dohop kaih kawan hamba Mu tuh bat. Umpibat kaih bohanyi ika momborita antun-Mu, iyohonon Tarung Pio tintun Yesus. 30Hapo bat kaih ka, Tuhan, ika pomambuh kawan dulun hotoro. Hapobat kaih ika umpi aang co mosotahir ma kuasan Yesus, Jungus husus co tomili-Mu.”
31Opah doh bodoa, ika doh bokumpur yoh hoguncang. Roh Mohotara monguasai kokon doh, jadi iroh tambah bohanyi momborita antun Mohotara.
Dulun porocaya hotolindah magi harta doh
4:32-37
32-33Ma kuasa co bahai, kawan rasul horoholuh bosaksi bahawa Tuhan Yesus ocop bolum hopuli ingkan pompatoi. Mohotara korinah porahan asi-Eh ma kokon dulun co porocaya yoh. Iroh pompaluh hokohico ponah songa. Arelu oko ingkan iroh co mongangap harta eh iyohco hak tioh tarop. Kokon co tiroh tomongguna ika koporulu doh samah. 34Jadi, arelu oko ico beti dulun ingkan halo iroh co kokurangan tului derek tojadi oko co hoborakang umoi atawa lopo eh. Duit eh ehen 35paluh tonyarah hia duo balas rasul. Duit cioh tomagi doh ma dulun co porulu ma eh.
36Isan iyoh ka co tongompian Yusup. Asal Yusup yoh ingkan koturunan suku Lewi tapi tonganak nyan Pulo Siprus. Kawan rasul naah are Barnabas awi ponah Bohasa Yahudi arti eh ‘dulun co horoholuh mihi somangat indan dongai.’ 37Barnabas borakang umoi eh. Are mehen duit lekan umoi eh yoh paluh nyarah hia kawan rasul ika boraoi tomagi ma dulun co porulu.
Currently Selected:
Kesah Rasul 4: TBSS
Highlight
Copy
Compare
Share
Want to have your highlights saved across all your devices? Sign up or sign in
