Kesah Rasul 3
3
Petrus pomambuh ico beti dulun co lumpuh
3:1-10
1Nyan ico kotika ondo jam tolu macohit, Petrus hintang Yohanes nyau umba sombayang macohit. Jadi iroh ruo tulak hia polontaran Lopo Mohotara. 2Iroh ruo dapot nyan tungkang kuta Lopo Mohotara co araieh ‘Kuta Hinut’. Kotika doruo nyau muntam, nyan intin oko dulun co lumpuh ingkan are tonganak. Sika kondaii are ehen hia tungkang kuta cioh ika nyawot sodakah ingkan kawan dulun co pusit muntam polontaran Lopo Mohotara.
3Hayak are kito Petrus hintang Yohanes, are nyawot sodakah ingkan doruo ka. 4Iroh nontonong dulun cioh paluh Petrus mantun, “Noto kaih.”
5Maka are nongkara iroh, boharap iroh ruo angar mihi aranaang indai eh. 6Tapi Petrus mantun, “Akuh arelu oko hoduit, bulou atawa perak ika dohop iko. Tapi oko cara bokon akuh boraoi dohop iko: Ma kuasan Yesus Kristus,#3:6 Terjemahan cotuh menerjemah arti ingkan antun ‘Kristus’ ma ‘Laca Co Tomonjanji Mohotara’. Tapi, awi kokon rasul hintang murid porocaya Yesus iyohco Laca Co Tomonjanji Mohotara yoh, aroko co bokon eh, maka aran Yesus hintang galar Kristus derek jarin ico tisi. Jadi, terjemahan cotuh hapo ‘Yesus Kristus’ indan tisi cioh. ingkan Nasaret, nyalan bat!”
7Paluh Petrus nantot silun kontoun dulun co lumpuh yoh. Petrus dohop are tonjok. Hanyih iyoh ka paai eh jarin kuat. 8Are nyua tonjok paluh molai nyalan hantin hanoh. Are ngonulu Petrus hintang Yohanes muntam hia polontaran Lopo Mohotara samir nyalan hintang nomarang nompesut, kawun nara Mohotara.
9-10Hayak kokon dulun noto are, paluh tonyono doh arop eh. Are yoh dulun co horoholuh tuot cara nyawot nyan Kuta Hinut yoh. Korinah lau kohurong doh, tului batuh are yoh lumpuh tapi makitu are boraoi nyalan samir nara Mohotara.
Petrus mantun ma dulun orong tintun kuasan Yesus
3:11-26
11Dulun co tongomambuh cioh tenden ngonulu Petrus doruo Yohanes tului are korinah kobosukur. Iroh oko nyan ico serambi Lopo Mohotara co arai ‘Serambi Salomo’. Maka kokon dulun co kagum hintang hurong yoh tokoru dombut hia iroh nyan intin. 12Petrus noto bahawa uras doh yoh hurong. Maka, are mantun, “Kawan konduang bakah bawe dulun Israel! Aroh ikan hurong tului kojadian cotuh. Aroh ikan horoholuh noto kaih. Aroh ikan bopikir karo oko kopio co husus ingkan Mohotara sohinga dulun lumpuh cotuh tongomambuh. Aroh ikan bopikir karo oko kuasan tarop ika pomambuh dulun cotuh.
13-16Dulun co ocop kitam me hintang tonyono me tuh topomambuh ma kuasan Yesus. Onon tojadi awi are hintang kaih sama samah porocaya ma kuasan Yesus. Mohotara ocop nompi Yesus korinah tohormat. Yesus hopompaluh tuhit hintang ngonyorih Mohotara, iyohonon Mohotara co tonyembah tonyuku Abraham, Ishak hintang Yakub co tatu hiang ito yoh. Tapi ikan mehen Yesus hia Gubernur Pilatus ika Are tomohukum dapot matoi. Pilatus yoh ocop nukas ika mombebas Are ingkan hukuman. Tapi ikan aroh sotuju hintang paluh nyawot ika Pilatus mombebas indan ikan ico beti co ocop mompatoi dongai#3:13-16 Co herak ngompatoi dongai yoh Barabas. Noto Lukas 23:18. hangki Are. Are iyohco Co kudus hintang Co Bujur.#3:13-16 Oko orong galar ingkan Perjanjian Lama indan nisi dulun co samah, dulun co angar tonyoruhan Mohotara ika momimpin umat-Eh. Nyan tonga bokon oko ‘Kristus/Mesias’ = Laca Co Tomonjanji Mohotara; ‘Co Kudus’ = Dulun co aroh bodosa hintang co molayan Mohotara ma kosotia; hintang ‘Co Bujur’ = Dulun co horoholuh nguan co bujur hintang horoholuh tuhit ma Mohotara. Galar ‘Co Bujur’ ingkan Yesaya 53:11. Jadi, sobujur eh anco tongompatoi me yoh Are co mihi Pombolum.#3:13-16 ‘Mihi Pombolum’ oko duo makna: Yesus mihi bolum sojati co tuu-tuu nyan dunia tuh hintang bolum co kokotahi nyan sorga. Tapi Mohotara ocop umpi-Eh bolum hopuli ingkan pompatoi. Karo ocop monau aang cioh bujur awi kaih monyaksi ma matan kaih tuh leh.
17Kawan konduang bakah bawe! Ikan hintang kawan pomimpin to nompi kojahat cioh tohimo Yesus. Tapi akuh sadar awi ikan yoh aroh monau bahawa Are yoh Laca Co Tomonjanji Mohotara. 18Tapi ma cara conon Mohotara monepat antun Eh, co ocop tongorapot nyan jaman sinan pian kawan nabi. Kawan nabi taiyoh nyurat bahawa Laca Co Tomonjanji Mohotara yoh sobulih noro kohojok dapot matoi. 19Poko tului iyoh, naat bat dosam me hintang hopuli tuhit ngonyorih songan Mohotara. Nguan antanon ika kawan dosam me tomampun. 20Paluh Tuhan angar mihi kosoloah songa indam me. Mohotara, ka angar nyoruhan Yesus Kristus, co ocop tonantu Mohotara indam me.#3:20 Oko duo pondapat tintun hiaharai Mohotara angar nyoruhan Yesus. 1) Opah iroh naat dosa hintang tuhit ma Mohotara, nyan kotika iyoh ka Mohotara angar nyoruhan Yesus indan doh. Iroh angar tomampun. ATAWA 2) Nyan masa co tonuntuh Mohotara angar nyoruhan Yesus hopuli hia dunia tuh ika nyolamat dulun co porocaya ma Eh, hintang mohukum dulun co aroh porocaya ma Are. 21Tapi Yesus sobulih nukui nyan sorga houn. Are dombut kole nyan kotika Mohotara angar umpi dunia jarin baa. Mohotara ocop monjanji ancioh. Janji-Eh tonulih kawan nabi Eh ingkan jaman sinan.
22Isan Nabi Musa. Mingkat eh boh antun ehma dulun Israel, ‘Tuhan, Mohotaram me angar nyoruhan ico dulun ingkan bangsa to. Are jarin Nabi co porapot antun Mohotara ma ikan. Are angar samah isan akuh.#3:22 Nabi cioh iyohco Yesus. Mohotara nyoruhan Musa hia dulun Israel ika nyolamat iroh ingkan ika doh tohocipon nyan Mesir. Musa ka jarin dulun co porapot antun Mohotara ma iroh (nabi) hintang dulun co bodoa hia Mohotara indan doh (imam). Jadi, Yesus samah isan Musa awi Are ka jarin Pomimpin, Ponyolamat, Nabi hintang Imam to. Ikan sobulih tuhit ma aranaang co tomantun pian Nabi cioh. 23Amun oko dulun co aroh tuhit ma antun Eh, dulun cioh angar tongompusit ingkan umat Mohotara paluh tongolompuh.’#3:22-23 Ingkan Ulangan 18:15,19.
24Kokon nabi bokon mahi ocop momborita tintun kawan poristiwa co tojadi jaman cotuh,#3:24 Maksud eh, kawan peristiwa tintun Yesus (ingkan Are tonganak, pompatoi Eh, Are bolum hopuli, dapot Are dombut hopuli). tomasuk Nabi Samuel hintang kokon nabi co bokon opah are. 25Mohotara mantun ma Abraham, taman loluhur to. Hie Eh; “Kokon bangsa nyan pindaondo tuh angar haba aang co pio ingkan Mohotara poko tului koturunanmu.”#3:25 Ingkan Kojadian 22:18; 26:24. Antun ‘koturunan’ tungkan, jadi maksud eh Yesus iyohco koturunan Abraham yoh. Ito tomomberkat tului Yesus mukap calan ika to tonyolamat ingkan hukuman dosa. Janji cotuh tomorapot ma tatu hiang to molalui kawan nabi co soun hangki otuh. Janji cotuh mahi bolaku indan kokon to. Yesus iyohco koturunan Abraham yoh. 26Mohotara nyoruhan Yesus co horoholuh tuhit hintang ngonyorih Are indan to bangsa Yahudi co labih soun. Mohotara ocop umpi Are bolum hopuli maksud eh ika momberkat ito. Cara Mohotara momberkat ito iyoh onon ma cara dohop ito ika to hopomasing boraoi naat dosan to paluh tuhit ma Are.”
Currently Selected:
Kesah Rasul 3: TBSS
Highlight
Copy
Compare
Share
Want to have your highlights saved across all your devices? Sign up or sign in
