Kesah Rasul 5
5
Ananias doruo Sapira matoi tului nyuwah ngoncunih kawan rasul
5:1-11
1Oko ka ico beti dulun co araieh Ananias. Aran oruh eh Sapira. Iroh ruo yoh mahi bojuar ico kobidang tana doh samah ma Barnabas. 2Are pura-pura nyarah kokoi eh lekan tana doh yoh hia kawan rasul taiyoh, podahar tonga tomika eh indan doh tarop.
3Tapi hien Petrus, “Ananias, kura iko dapot moholu Lacan Setan monguasai songammu! Iko nyuwah ngoncunih Roh Mohotara. Iko ngoncunih ma duit pongulih lekan tanamu co sobujur eh. Iko mika tonga eh indam me tarop. 4Sorinai tobojuar, tana cioh mula hak tiko. Opah tobojuar, duit eh mahi tatap iko co bohak nantu cara mongguna eh. Jadi, kura dapot iko sobulih umpi roncana ponah songam mu dapot ngoncunih isan onon. Korinah kojahat conon! Iko aroh baya nyuwah ngoncunih kolunon, tapi ngoncunih Mohotara ka!”#5:4 Kosolaan Ananias aroh tului mika tonga duit eh. Iyoh hak eh. Tapi kosolaai eh iyohonon are nyuwah ngoncunih, tului aroh mara kawan rasul bahawa iyoh baya tonga ingkan duit lekan tana eh.
5-6Kotika Ananias ngoneh antun Petrus yoh, paluh diuh leh are. Pira pira bakah lehoi dombut ika mungkuh ontuieh ma benang. Iroh mehen ontuieh hia luar kota paluh ngolowong eh. Kokon dulun co ngoneh kojadian cioh jarin potontakut.
7Kira-kira tolu jam opah iyoh, oruh Ananias yoh muntam hia ika kawan rasul taiyoh. Aroh koraoieh ome co ocop tojadi ma banai eh. 8Petrus paluh mantun ma Sapira, “Mara eh bujur-bujur ma akuh. Main mula tikas otuh leh pai lekan tana co toborakang me ruo yoh?”
Hien Sapira museh, “Iyoh boh, mula kahan onon leh kuhat eh.”
9Jadi hien, Petrus mantun kole ma are, “Ikan duo tuh mula ocop hosopakat ika ngoncunih kaih. Ma gawi isan onon ikan duo nyuwah Roh Tuhan. Ikan bopikir Roh Tuhan aroh angar monau ome co tongompian me. Ngoneh eh! Iroh co opah ngolowong ontun banammu oko nyan baun tungkang. Makitu, ontum mu mahi angar ehen doh hia luar!”
10Hiah iyoh ka, Sapira matoi, kolungkang nyan tohimo paan Petrus. Kotika kawan lehoi bakah taiyoh muntam, iroh noto Sapira ocop matoi. Jadi, iroh mehen ontui eh hia luar kota paluh ngolowong eh nandai kolowong banai eh. 11Kokon dulun co porocaya Yesus hintang kokon dulun bokon co ngoneh tintun pompatoi Ananias doruo Sapira yoh jarin mias akut doh.
Kawan rasul Yesus pomambuh orong dulun
5:12-16
12Kawan rasul Yesus umpi orong aang co mosotahir nyan halo dulun orong. Nyan waktu cioh, kokon dulun co porocaya ma Yesus derek hokumpur nyan songkolang kawan sorambi Lopo Mohotara co araieh ‘Sorambi Salomo’. 13Kawan dulun bokon co arinai porocaya ma Yesus aroh bohanyi hokahung ma iroh,#5:13 Mungkin iroh takut tului ome co tojadi ma Ananias doruo Sapira, atawa boraoi ka takut tului ancaman ingkan kawan pomimpin agama Yahudi. tapi orong dulun mohormat iroh. 14Kuhat dulun co porocaya ma Tuhan Yesus sasar botambah, iyohonon bakah hintang bawe.
15Kawan rasul Yesus umpi orong aang co mosotahir. Tului iyoh, orong dulun mehen kawan dulun hotoro mahah kawan calan paluh pokaling iroh nyan tungkui ihap atawa ika pongaling. Iroh boharap kotika Petrus nyihin, are pongkek pira pira dulun co hotoro yoh, atawa poko ngaroh tontingoi eh buah iroh, ika doh mambuh. 16Orong dulun ingkan kawan kota nyan sokitar Yerusalem mahi mehen orong dulun hotoro hintang dulun co hojok tului tomorasuk roh jahat. Uras doh tongomambuh.
Kawan pomimpin Yahudi bousaha ngumbot gawin kawan rasul tapi aroh lian
5:17-42
17Nyan waktu iyoh, oko Imam Kopala co poko bokuasa hintang kawan dulun co tenden umba are. Iroh yoh ingkan pomimpin agama Yahudi ingkan kolompok Saduki. Ngonyangit ingon doh tului orong dulun porocaya Tarung Pio tintun Yesus co tongorapot kawan rasul. 18Jadi iroh nyuhu ika kawan rasul taiyoh tonawan paluh tomokuntam hia ponah seper umum.#5:18 Nyan jaman kawan rasul negara Israel incah tonguasa Roma. Oluco pokongorong dulun Yahudi aroh herak ma pomorentah Romawi, kawan pomimpin agama ingkan kolompok Saduki jarin jolahan pomorentah Romawi ika doh tetap oko kududukan co hunyung. Iroh boraoi nyuru pira pira pongawal Lopo Mohotara ika nawan kawan rasul paluh pokuntam iroh hia ponah seper aroko tohalang ingkan kawan pojabat pomorentah Romawi. Noto catatan Kesah 4:1 ka.
19Tapi momi cioh, oko molekat dombut mukap kawan tungkang seper yoh paluh horulut iroh nyalan hia luar. Hien molekat cioh, 20“Tulakbat hia polontaran Lopo Mohotara. Momborita eh ma kawan dulun nyan idi tintun kobolum co sumong kotahi nyan sorga.”
21Jadi ngonyua-nyua lau, kawan rasul muntam hia polontaran Lopo Mohotara paluh molai majar dulun orong, isan co tonyuhu molekat cioh nin.
Pondehan iyoh Imam Kopala co poko bokuasa hintang kawan jolahai eh ngumpur kawan pomimpin bangsa Yahudi co poko penting. Iroh nyau umpi sidang. Opah hokumpur, iroh nyuhu ika kawan rasul taiyoh tomehen ingkan seper. 22Tapi waktu kawan potugas taiyoh dapot nyan seper, kawan rasul aroko nyan intin. Jadi, iroh hopuli mara ancioh. Hien doh, 23“Kaih noto kawan tungkang seper taiyoh bokunci dohon. Kawan pongawal tonjok nyan ika doh hopomasing nyan baun sika tungkangisan biasa. Tapi waktu kaih mukap sika tungkang, kawan rasul taiyoh aroko bat nyan ponah.” 24Waktu kopala ponjaga Lopo Mohotara hintang kawan imam kopala ngoneh iyoh, iroh bingung, paluh ngisok, main deoi aang co non boraoi tojadi.#5:24 Kawan pomimpin dulun Yahudi kuwatir amun mosorakat porocaya aang co mosotahir taiyoh tojadi, mosorakat angar labih ngumba kawan rasul hangki ma iroh. Nohani, amun mosorakat porocaya Tarung Pio co tongorapot kawan rasul, borati kawan pomimpin tonyala paluh niho hormat nyan ponoto dulun orong.
25Opah iyoh oko dulun co muntam mara ma iroh. Hie eh, “Kawan bapa! Oko kawan dulun taiyoh co tomokuntam me ponah seper malom. Iroh makitu tuh dahat oko nyan polontaran Lopo Mohotara majar dulun orong.” 26Jadi, kopala pojaga Lopo Mohotara hintang kawan anak buah eh tulak hia intin. Iroh nyau mehen hopuli kawan rasul taiyoh. Tapi iroh takut ma dulun orong co dahat ngoneh ajaran doh yoh. Amun dulun orong sangit, maka dulun orong yoh angar medak iroh ma batu dapot matoi. Poko tului iyoh, pongawal Lopo Mohotara hintang kawan anak buah eh mehen hopuli kawan rasul taiyoh tapi aroh tomaksa.
27Iroh mehen kawan rasul taiyoh muntam ika mohadap sidang kawan pomimpin Yahudi yoh. Paluh Imam Kopala co poko bokuasa yoh nondah kawan rasul taiyoh. Hie eh, 28“Kaih ocop bohimat ngosiit ikan ika aroh bat majar ponah aran Dulun cioh. Tapi ikan aroh umbot. Poko tului iyoh, kokon dulun nyan Yerusalem ocop ngoneh ajaran me. Ikan mahi jere nyala kaih ma pompatoi Dulun cioh.”
29Tapi Petrus museh mowakili kawan rasul taiyoh hie eh, “Kaih sobulih tuhit ma Mohotara hangki ma ikan. 30Ikan ocop kuloi ma Yesus paluh poko tului ikan ka Are tomohukum matoi nyan sompolakisamah ma dulun jahat. Tapi Mohotaran tatu hiang to yoh umpi Are ocop bolum hopuli. 31Yesus ocop topangkat hia sorga paluh tuot nyan ika co poko tohormat nyan topit kontoun Mohotara. Mohotara umpi Yesus jarin Laca hintang Ponyolamat. Mohotara nguan aang cioh ika ito dulun Israel naat kawan dosan to hintang lian tomongampun. 32Kokoi eh yoh uras ocop kitan kaih. Nohani, Mohotara ocop mihi Roh-Eh indan kokon kaih co tuhit ma Are. Maka, Roh Mohotara mahi mombukti kokon ancioh bujur.”
33Hayak kawan pomimpin Yahudi ngoneh ancioh, karas lau angit doh dapot kawan rasul yoh mahi jere tongompatoi doh. 34Tapi oko ico dulun ingkan halo kolompok pomimpin taiyoh. Arai eh Gamaliel. Are yoh guru Hukum Yahudi ingkan kolompok dulun Parisi. Kokon dulun mohormat are. Are tonjok paluh nyuhu ika kawan rasul taiyoh pondehan eh ehen hia luar. Opah iyoh, are mantun ma kawan pomimpin taiyoh nyan intin.
35Hie eh, “Kawan bapa ico bangsa kuh Israel! Cuba ikan bopikir pio-pio houn, tintun anco angar pian to ma kawan rasul tanon. 36Batuh oko dulun co araieh Teudas. Are mongaku arop eh sobagai pomimpin.#5:36 Teudas mungkin mongaku arop sobagai nabi atawa Mesias (Laca Co Tomonjanji Mohotara). Are momimpin dulun Yahudi ika momboruntak ngolawan pomorentah Romawi. Opat latuh kuhat dulun jarin pongikut eh, Tapi are paluh tongompatoi. Opah iyoh dulun co jarin pongikut eh topisah darai. Jadi, garakan eh arelu oko toganah eh bat. 37Opah iyoh, nyan waktu pomorentah Romawi nguan sensus, oko dulun kole. Are ingkan propinsi Galilea. Arai eh Yudas. Are momimpin kawan dulun Yahudi ika momboruntak ngolawan pomorentah Romawi. Dulun cioh mahi tongompatoi, paluh uras dulun co umba are yoh topisah-darai. 38Poko tului iyoh, ponah porokara cotuh makitu ma kawan rasul tanon, akuh mihi saran indam me aroh dalo karas mohukum iroh. Olu doh leh. Amun tujuan atawa gawin doh borasal ingkan kolunon, mositi angar aroh nyolung isan co tongompian Teudas doruo Yudas yoh. 39Tapi amun kira-kira gawin doh non mula ingkan Mohotara, Aroh angar liam me ngumbot iroh. Malah tomonau bat bahawa ikan co ngolawan Mohotara.”
Kawan pomimpin sotuju ma antun Gamaliel yoh. 40Iroh nyuhu ika kawan rasul yoh tomehen hopuli muntam paluh tomoncambuk. Opah iyoh, iroh ngosiit kawan rasul taiyoh ika aroh hopander ponah aran Yesus. Paluh kawan rasul taiyoh tomolapas.
41Paluh tulak bat kawan rasul taiyoh ingkan intin ma kojorih jerah. Otuhboh cara Mohotara mohormat iroh. Mohotara moholu dulun bokon nyoranta iroh tului iroh yoh kawan murid Yesus. 42Iroh aroh umbot majar Tarung Pio bahawa Yesus yoh Laca Co Tomonjanji Mohotara. Iroh momborita ancioh sika ondo nyan polontaran Lopo Mohotara hintang nyan kawan lopo dulun.
Currently Selected:
Kesah Rasul 5: TBSS
Highlight
Copy
Compare
Share
Want to have your highlights saved across all your devices? Sign up or sign in
