Kesah Rasul 2
2
Roh Mohotara toka ingkan sorga ika monguasa kawan dulun co porocaya ma Yesus
2:1-13
1Nyan Ondo Pentakosta, kokon dulun co porocaya ma Yesus hokumpur. Iroh hokumpur nyan ico lopo. 2Uras doh tuot nyan intin, nongkocok oko anco muhing ingkan langit. Uhing eh nain kodaras uhing ondolowut. Uhing cioh daras lau, ngoponu ngolauh lopo cioh. 3Opah iyoh iroh kito aang co pongitan doh isan ori apui. Apui cioh topisah pisah isan potongai eh isan kawan cola, tondo paluh nukui nyan iroh hopomasing. 4Roh Mohotara monguasai kokon doh, paluh nompi iroh hopomasing hopander hapo kawan bohasa co aroh piji iroh bolajar eh.
5Nyan kotika cioh, nyan kota Yerusalem ka oko orong dulun Yahudi. Iroh borasal ingkan kokon bangsa nyan dunia. Iroh yoh kawan dulun co nyembah nyuku hintang hopompaluh tuhit ma Mohotara. 6Kotika dulun orong yoh ngoneh uhing co korinah lau komuhing eh nin, iroh dombut hokumpur nyan lopo cioh ka. Tokocit, bingung iroh tului ngoneh kawan murid Yesus dahat hopander hapo bohasa tiroh. 7Kokon doh potohuro-hurong lau. Hien doh ico ma co bokon, “Ndoh, maka kawan dulun co hopander tatuh kokoi eh dulun ingkan propinsi Galilea. 8Kura huli iroh boraoi hopander hapo bohasa tito hopomasing! Kokon to borasal ingkan kawan derah bokon, 9tomasuk Partia, Media, Elam, hintang ponduduk Mesopotamia, Yudea, Kapadokia, Pontus, hintang Asia. 10Tomasuk ka derah Prigia, Pampilia, Mesir, hintang kawan bagian Libia co dokin kota Kirene. Oko ka co dombut ingkan ibukota Roma, 11ingkan pulo Kreta, hintang kawan dulun Arab. Ito co hokumpur aroh baya dulun Yahudi asli, tapi ka dulun ingkan bangsa bokon co ocop muntam agama Yahudi. Jadi hurong lau ito ma eh kura songola kawan murid Yesus yoh co boraoi hopander hapo bohasa tito! Iroh mander tintun aang co bohimat lau co tongompian Mohotara.”
12Kokon dulun ingkan luar derah Yerusalem co dombut yoh, mahi hurong hintang bingung. Oko nyan halo iroh co mantun ico ma co bokon, “Ome arti kokon antatuh?” 13Tapi oko ka pira pira beti dulun bokon co mohulut kawan murid Yesus yoh. Hien doh, “Ceeh, kawan dulun tatuh buso tului ngorih dalo kuhat angur. Baya buso leh boh iroh non!”
Rasul Petrus monjelas Yesus yoh iyohco Laca Co Tomonjanji Mohotara
2:14-42
14Opah iyoh Petrus tonjok samah samah ma sobalas rasul co bokon. Ma suara co muhat are mantun ma kokon dulun orong yoh, “Kawan konduang bakah bawe dulun Yahudi hintang kokon dulun co nukui nyan Yerusalem! Ngoneh antun kuh tuh. Akuh angar monjelas maksud ingkan kokon co tojadi tuh. 15Oko nyan halo ikan co monyangka kaih tuh buso. Onon sala awi makitu punai jam suoi manyuap. 16Sobujur eh nyan jaman sinan Mohotara ocop mara molalui Nabi Yoel tintun poristiwa cotuh. Tonyurat Nabi Yoel, tuh nai.
17‘Mohotara mantun, “Nyan kawan ondo torahir,#2:17 ‘Kawan ondo torahir’ iyohco masa antara Yesus tonganak (noto eh nyan 1 Korintus 10:11; Ibrani 1:2; 9:26; 1 Petrus 1:20 hintang 1 Yohanes 2:18) dapot Are dombut hia piindaondo tuh indan co kohonduo kali eh. (Ondo kiamat, Ondo Ponghakiman Mohotara).
Akuh angar mihi Roh Kuh hia kokon dulun.
Paluh kawan anak me, bakah hintang bawe, angar mantun tungon-Kuh ma kawan dulun.
Kawan lehoi me angar haba kawan ponoto ingkan Mohotara.
Kawan dulun ongko me angar nupi kampa ingkan-Akuh.
18Nyan kawan ondo torahir yoh ka,
Akuh angar mihi Roh Kuh malah hia kawan jungus-Kuh, bakah hintang bawe.
Iroh angar porapot tungon Kuh ma kawan dulun.
19Akuh ka angar nompi kawan pociri co mosotahir hintang bohimat lau,
nyan langit hintang nyan pindaondo tuh.
Nyan waktu cioh angar oko daha, apui hintang osun co kapan.
20Matanondo angar jarin pindong.
Bulan angar jarin bohandang isan daha.
Kawan ancioh angar tojadi sorinai Tuhan dombut. Ondo korombut Tuhan iyohco ondo co porulu hintang bohimat lau.
21Nyan ondo cioh, kokon dulun co nyawot pondohop Eh,
iroh angar tonyolamat.’ ”#2:17-21 ingkan Yoel 2:28-32.
22Petrus ngoholuh antun eh, “Jadi konduang bakah bawe dulun Israel, momporhati antun kuh tuh. Yesus ingkan desa Nasaret tonyoruhan pian Mohotara. Mohotara ocop mombukti aang cioh awi Mohotara nompi kokon macam aang co mosotahir nyan halo ikan molalui Are. Ikan ocop monau iyoh. 23Tapi oluco tomonau me ancioh, mahi tatap tonyarah me Are hia kawan dulun co aroh nyono Mohotara. Tujuan me yoh ika Are tomohukum matoi nyan sompolaki Oluco kokoi eh isan iyoh, iyoh tojadi sosuai ma roncana Mohotara. Roncana Mohotara yoh ocop tonatap Eh ingkan sinan. 24Maka, aroh mungkin Yesus hopompaluh tenden matoi. Awi Mohotara ocop nompi Are bolum hopuli, mombebas Are ingkan kohojok pompatoi.
25 Ito ocop monau iyoh. Awi nyan jaman sinan Laca Daud nulih tintun Are. Co isan otuh nai eh:
‘Tohoku nyamang kuh bahawa Iko, Tuhan, hopompaluh soming Kuh.
Akuh aroh angar takut ma kawan musuh Kuh awi Iko hopompaluh dohop Akuh ma kokuatan Mu.
26Tului iyoh, songang-Kuh jorih jerah,
baung-Kuh nara-Iko,
malah beting-Kuh mahi nongkomo ngolandah bolum boharap ma-Iko.
27Akuh landah tului Iko aroh angar moholu Akuh tenden matoi.
Iko aroh angar moholu ontung-Kuh jarin karam nyan kolowong
awi Akuh horoholuh tuhit ma-Iko.
28Ocop tomara Mu ma-Akuh bahawa Akuh angar hopuli bolum.
Akuh angar hopompaluh jorih jerah awi Akuh lian bolum halo Iko.’ ”#2:25-28 ingkan Masmur 16:8-11.
29Petrus ngoholuh antun eh, “Jadi konduang bakah bawe, akuh porulu hopander sak rak ma ikan. Daud, laca co tatu hiang ito yoh, mositi are aroh nulih antun cioh niin tintun arop eh tarop. Awi laca Daud ocop matoi hintang tongolowong. Kolowong eh dapot makitu incah oko. 30Tapi Daud iyoh ico beti nabi. Mohotara ocop mara ma Daud ome co angar tojadi. Oko janji ingkan Mohotara ma are. Janji cioh dohon lau. Tuh boh nain janji-Eh yoh: ico dulun ingkan koturunan Daud angar jarin laca. Laca cioh angar momorentah umat Mohotara. 31Maka, kotika Daud nulih ‘Mohotara aroh angar moholu Akuh tenden matoi’ hintang ‘Mohotara aroh angar moholu ontung-Kuh jarin karam nyan kolowong’, Sobujur eh antun co tonulih Daud yoh iyoh co antun Laca cioh Co Tomonjanji Mohotara. Mohotara angar nompi Laca cioh bolum hopuli.
32 Kawan konduang bakah bawe, Yesus iyohco Laca cioh! Opah Yesus matoi, Mohotara nompi Yesus bolum hopuli. Kaih uras ocop noto Yesus. Matan kaih tuh boh co noto Eh. 33Opah iyoh, Are ocop topangkat hia sorga awi kuasan Mohotara. Yesus ka ocop norima Roh Mohotara awi Roh Mohotara cioh ocop tomonjanji Tamai Eh. Jadi, makitu Yesus mihi Roh Mohotara indan kaih. Non ceh poristiwa co ocop kitam hintang koneh me nyan intoi.
34 Nah Daud tarop aroh topangkat hia sorga. Tapi are nulih luang antun tatuh:
‘Tuhan mantun ma Tuhan kuh:#2:34 arti eh, Mohotara mantun ma Laca co Tomonjanji Eh.
“Tuotbat nyan ika co tohormat nyan topit kontoung-Kuh.
35Tuotbat nyan intin dapot Akuh umpi kawan musuh Mu tunduk ma kuasam Mu.’ ”#2:35 ingkan Masmur 110:1.
36Paluh Petrus monyimpul, “Tului kokon bukti tanon, maka kokon dulun Israel sobulih sadar aang cotuh: Mohotara monatap Yesus jarin Laca co ocop tomonjanji-Eh ingkan sinan. Laca cotuh tonisi ito ka Kristus. Tapi ikan nompi Are tomohukum matoi nyan sompolaki”
37Kotika dulun orong ngoneh aang cioh, korinah komoneser doh. Tongisok doh ma Petrus hintang ma kawan rasul co bokon, “Kawan konduang, ome co sobulih kaih umpieh?”
38Hien Petrus museh iroh, “Naat eh bat dosam me paluh ngonyorih songan Mohotara, Ikan sobulih tomombaptis ponah aran Yesus, Laca Co Tomonjanji Mohotara iyoh. Ma isan iyoh dosam me tomongampun hintang angar norima Roh Mohotara. 39Awi Roh Mohotara cioh boh co tomonjanji indan me, indan kawan anak me, hintang ma iroh co oko nyan ika co ocu,#2:39 Ponah ayat cotuh antun ‘ocu’ ika monunjuk jarak atawa waktu. ‘Jarak co ocu’ borati janji Mohotara indan dulun co bokon ma Yahudi. ‘Waktu co ocu’ borati janji Mohotara indan koturunan co pongaan. Boraoi ka antun co ‘ocu’ nyan intoi borati duo-duo eh, jarak hintang waktu. iyoh onon kokon dulun co tonaah Tuhan, Mohotaran to ika jarin dulun Tioh.”
40Oko orong kole kawan antun Petrus co bokon. Ika ngondohon hintang mompokingat iroh. Hie eh, “Mohotara angar nompi hukuman indan kawan dulun jaman cotuh co jahat. Aroh numun iroh ika me tonyolamat ingkan hukuman taiyoh.”
41Nyan ondo cioh, oko orong dulun co porocaya ma antun Petrus yoh, kira-kira tolu ribu beti dulun. Iroh mahi tomombaptis. Maka, kuhat dulun co porocaya ma Yesus botambah kole. 42Iroh horoholuh tumun ajaran kawan rasul. Kokon doh derek bokumpur ma kawan dulun bokon co porocaya. Iroh derek kuman#2:42 Teks asli bohasa Yunani hapo kiasan ‘nyila rute’. ‘Yesus nyila rute’ hiah Are monatap acara Pojamuan Kudus, iyohonon acara kuman rute hintang ngorih anggur ika mingkat Are (Luk. 22:14-20). Hiyah waktu kawan rasul, kokon dulun co porocaya ma Yesus moraya iyoh kotika iroh hokumpur ik kuman kanon co biasa ka. hintang bodoa sama-samah.
Cara kobolum kawan dulun co porocaya ma Yesus
2:43-47
43Nyan waktu cioh, kawan rasul nguan kokon macam aang co mosotahir. Pokotului iyoh, kokon dulun nyan Yerusalem nongkomo kagum. 44Kokon dulun co porocaya tenden hokohico. Iroh uras nongkomo kokon anco oko, aroh tiroh tarop tapi sama-samah empui. 45Maka derek oko ingkan halo iroh co borakang harta doh. Hasir ingkan lekan anco toborakang doh yoh, tohobagi ma dongan doh co porulu tongondohop. 46Sika ondo iroh bokumpur nyan polontaran Lopo Mohotara. Iroh bokumpur hico songa hico pikir. Iroh ka derek hotolindah hobara ika kuman samah-samah nyan kawan lopo doh hintang iroh mahi moraya Perjamuan Kudus. Iroh umpi kokon antaiyoh ma kotuun songa hintang jorih korinah, 47samir nara Mohotara. Kokon dulun herak ma iroh. Kolompok dulun co porocaya yoh botambah orong awi sika ondo oko dulun co tonyolamat Tuhan.
Currently Selected:
Kesah Rasul 2: TBSS
Highlight
Copy
Compare
Share
Want to have your highlights saved across all your devices? Sign up or sign in
