Kesah Rasul 27
27
Paulus cakat kapal tulak hia kota Roma
27:1-8
1Jadi, gubernur Pestus mutus eh bahawa Paulus sobulih bolayar hia kota Roma nyan propinsi Italia. Iroh nyarah Paulus hintang pira-pira dulun tohanan co bokon hia ico kopala pasukan. Araieh Yulius. Are iyohco anggota ingkan pasukan husus laca co poko bokuasa nyan pomorintahan Romawi.#27:1 Kopala pasukan co bojaga kokon dulun tohanan ponah solanan doh yoh hia Roma.
2 Kotika kaih oko nyan polabuhan nyan kota Kaisarea, oko kapal co dombut ingkan kota Adramitium. Kapal cioh angar hopuli hia Adramitium kole samir tondo nyan pira-pira polabuhan nyan songoko pantai propinsi Asia. Maka, kaih#27:2 ‘Kaih’ borati Lukas, Paulus, pira-pira tahanan co bokon hintang kawan tontara co monjaga iroh. cakat kapal cioh paluh tulak. Aristarkhus mahi umba homboh kaih. Are iyohco konduang kaih co asal eh ingkan kota Tesalonika nyan propinsi Makedonia.
3Nyuap ondo eh, kaih dapot nyan Sidon. Yulius kopala pasukan cioh pio lau atoi eh ma Paulus. Are kuhan Paulus toka ika nganda kawan jolahaieh nyan Sidon ika iroh boraoi mihi ome co tomorulu eh. 4Kotika kaih tulak ingkan Sidon, oko bahi muhat napi ingkan tintu urung kapal. Maka, kapal kaih pokonulu saran laut nyan topit utara pulo Siprus ika tolindung ingkan bahi cioh. 5Kapal kaih mitah laut co bolambah. Kaih bolayar topit solatan propinsi Kilikia hintang Pamfilia. Paluh, kaih dapot nyan polabuhan Mira nyan propinsi Likia. Nyan intin kaih toka ingkan kapal. 6Kopala pasukan cioh popak kapal ingkan kota Aleksandria co angar tulak hia propinsi Italia. Maka, are murus ika kaih uras boraoi umba cakat kapal cioh.
7Bahi horoholuh napi ngecat ingkan tintu urung kapal. Maka, kotahin pira-pira ondo kaih bolayar hokolangkuh lau. Ma koboo kopoca kojekaieh kaih dapot nyan dokin kota Knidus. Tapi bahi ngecat yoh mohalang kapal bolayarhia tintu barat bat. Maka, kaih hiatintu solatan ika tolindung pian pantai solatan pulo Kreta, dokin hurung Salmone. 8Kalut koboo kopoca kaih bolayar pokonulu nyan songoko pantai solatan pulo Kreta yoh. Kojekaieh kaih dapot nyan ico ika co araieh Polabuhan Indah, dokin kota Lasea.
Bahi lowut laut mohantam kapal rombongan Paulus dapot songkarah paluh hancur
27:9-44
9Ocop orong waktu co niho kotahin kaih bolayar yoh. Ondo raya puasa dulun Yahudi ocop ohut.#27:9 Ondo raya dulun Yahudi mungkin sokitar bulan suoi atawa bulan sopuluh. Nyan waktu cioh sorang lowut laut molai. Korinah bohaya amun kaih ngoholuh solana. Poko tului iyoh, Paulus momporingat irohnyan kapal cioh. Hieeh, 10“Kawan konduang, akuh noto korinah bohaya amun ito ngoholuh solana. Ito angar orong rugi, aroh baya kapal hintang sangaieh, tapi orong ingkan ito mahi angar matoi.”
11Tapi pongomudi kapal hintang dulun co tempun kapalyoh bopikir labih pio amun bolayar horoholuh. Kopala tontara cioh labih porocaya ma iroh hangki ma Paulus. 12Memang polabuhan ika kaih oko aroh ika co pio ika doh nukui kotahin sorang lowut laut.#27:12 Ika doh oko aroh aman, mungkin nyan ayat sopoluh Paulus bopikir tenden labih aman hangki ngoholuh solana. Atawa are bomaksud iroh soharus eh nganyap ika co dokin, aroh co ocu. Maka pokongorong ingkan irohnyan kapal cioh labih sotuju ika holuh bolayar. Iroh boharap boraoi dapot hia polabuhan Penik paluh nukui nyan idi kotahin sorang bahi lowut laut. Polabuhan ciohlabih ocu hia tintu barat tapi incah nyan pulo Kreta. Polabuhan cioh nohimo hia duo tintu, hia barat daya hintang hia barat laut.#27:12 Awi nohimo tintu barat isan iyoh maka polabuhan Penik iyoh labih tolindung ingkan bahi lowut.
13Ondo kotika eh, bahi molai napi horoholui ingkan tintu solatan. Iroh nyompan bahawa iroh boraoi bolayar horoholuhdapot hia polabuhan Penik yoh sosuai ma roncana doh. Maka, iroh mangkat jangkar paluh bolayar kole pokonulu pantai solatan pulo Kreta.
14Tapi aroh tahi opahiyoh, oko bahi lowut napi ingkan tintu pulo cioh. Bahi cioh tonisi “Bahi Timur Laut”. 15Bahi lowut cioh nongkocok mohantam kapal kaih. Aroh kojuan kaih keoh nohimo bahi ngecat cioh. Jadi kawan anak buah kapal topaksa moholu bahi mohaman kapal kaih. 16Kaih pohaman dapot nolangkun ico pulo kolik. Araieh pulo Kauda. Nyan intin kaih boo poca mongaman sokoci (somacam jukung kolik) kapal cioh. 17Opah jukung kolik cioh tonarik hia tungkui kapal, kawan anak buah kapal matop tali molilit nyan toliut kapal cioh ika labih dohon. Iroh takut kapal cioh songkarah nyan barah co jakan nyan ika co araieh Sirtis.#27:17 Sirtis oko nyan pantai utara benua Aprika (nyan negara Libya). Kokon dulun co ngolaut korinah takut awi derah cioh laut eh korinah jakan hintang dasar laut barah eh hubah-hubah. Ika cioh mahi tonisi ‘Kolowong Ngolaut’. Maka, iroh mulur layar#27:17 Teks asli hapan ‘mulur sosuatu’. TB monapsir iyoh sobagai ‘layar’. Tapi boraoi ka tonapsir somacam ‘jangkar’ co tonyeret likut kapal ika kapal aroh laju. ika kapal lumpak lampuk leh. 18Tapi bahi lowut tenden korinah ngecat mohantam kapal kaih. Jadi, manyuap ondo eh, iroh mende uat kapal hia lautika kapal labih mohian. 19Ondo opahiyoh ma silun doh leh iroh sobulih mungkar nyakah kawan alat kapal hia laut. 20Pira-pira ondo kotahi bahi lowut cioh horoholuh napi ma komuhat. Anto ondo horoholuh ngohium nyan langit sohingga kaih aroh kito matanondo atawa potondu.#27:20 Nyan jaman cioh, noto matanondo hintang kawan potondu penting korinah indan dulun co mongomudi kapal. Iyoh cara eh iroh monau nyan omoh iroh oko hintang hia tintu omoh sobulih tonuntuh ika ngorapot tujuan doh. Jadi kojekai eh kaih jarin putus asa. Kaih bopikir aroh bodai lau kaih boraoi solamat.
21Pira-pira ondo arelu oko co kolu kuman. Jadi, Paulus tonjok nyan tohu-tohun kokon kaih. Hieeh, “Kawan konduang, tumun aang tuh ocop tonosehat kuh ika to aroh bolayar ingkan pulo Kreta. Tapi ikan aroh tumun nosehat kuh yoh. Maka, makitu ito buah boncana isan otuh. Ito ocop orong rugi. 22Tapi makitu akuh nosehat ika ikan aroh putus asa. Awi arelu oko ico mahi ingkan halo ito co angar matoi. Baya kapal cotuh leh co angar hancur. 23Akuh bohanyi mantun nain otuh awi mamalom nin oko molekat dombut hia akuh. Molekat cioh tonyoruhan pian Mohotarang kuh, Mohotara co tonyembah kuh hintang co tomolayani kuh.#27:23 Paulus mantun tintun Mohotara ma cara cotuh awi oko orong dulun nyan kapal yoh co arinai nyono Mohotaran dulun Israel. Iroh nyembah nyuku dewa-dewi doh. Molekat ingkan Mohotara yoh tonjok nyan sila akuh. 24Hieeh, ‘Paulus, aroh takut. Iko mositi angar nohimo laca co poko bokuasa nyan Roma. Mohotara angar monunjuk kopion songai-Eh ma iko. Iyoh onon, Mohotara bojanji bahawa kokon dulun co hombo-homboh ma iko nyan kapal cotuh angar solamat.’ 25Jadi, Kawan konduang kuh, arohbat putus asa. Akuh yakin ma Mohotara. Kokoieh angar tojadi tulin isan aang co tomantun molekat yoh ma akuh. 26Tapi kapal cotuh mositi angar songkarah nyan ico pulo.”
27Opat balas ondo ocop ohut. Nyan momi cioh kaih incah lumpak-lampuk dapot nyan tohun laut Adria. Tohun momi kawan anak buah kapal nongkomo bahawa kapal dahat ngoroni pantai. 28Jadi, iroh mulur batu botali hia ponah danum ika mukur kojalom danum laut. Kojalom eh kira-kira opat pulu meter. Opah kapal maju isut labih ocu, iroh mukur eh kole. Tonyata kojalom eh baya kira-kira tolun pulu meter. 29“Jadi, sopondehan iroh porotong opat jangkar ingkan likut kapal ika kapal maju hokolangkuh hintang iroh boharap mudahan ondo nyua panda.”
30Tapi kawan anak buah kapal cioh nyau nyolamat arop doh. Iroh pura-pura molai porotong pira-pira jangkar ingkan urung kapal kaih. Tapi sobujur eh iroh potoka jukung kolik ika ngomuho arop doh. 31Kito iyoh, Paulus mantun ma kopala pasukan hintang kawan tontara eh, “Amun kawan anak buah kapal tanon aroh tenden nukui nyan kapal cotuh, ikan aroh angar solamat.”
32Jadi, kawan tontara taiyoh notok kawan-tali co tohapan ika potoka jukung kolik taiyoh. Iroh moholu jukung kolik taiyoh nokah hia laut paluh pohaman tamput umbak.
33Nuntuh panda, Paulus monggasak kokon kaih ika kuman. Hieeh, “Ocop opat balas ondo ikan aroh kuman ome-ome. Ikan tundui-tundui leh, takut ome co angar tojadi. 34Jadi, akuh nyompakat ikan hopomasing ika kuman makitu. Ikan sobulih kuman ika haba kokuatan ika nyolamat arop. Arelu ico beti mahi ingkan halo ikan co angar matoi.”
35Opah are mantun iyoh, are monu rute paluh botorima kasih hia Mohotara nyan muka kokon dulun. Are nyila rute taiyoh, paluh molai kuman. 36Maka iroh uras hopuli bosomangat hintang mahi kolu kuman. 37(Kaih co oko nyan ponah kapal cioh kuhat eh duo latuh pitun pulu onom beti). 38Kaih uras kuman dapot bosuh. Opahiyoh kawan anak buah kapal cioh mende uatan gandum hia laut ika kapal cioh labih mohian.
39Waktu matanondo ocop nyomput, iroh kito liku hintang pantai co tomangap doh aman ingkan umbak laut. Jadi, iroh nyau nyongkarah kapal nyan pantai cioh, oluco derah cioh tonyono doh 40Paluh iroh notok talin kawan jangkar. Iroh moholu kawan-jangkar taiyoh nokah hia ponah laut leh. Pondehan iyoh, iroh molapas kawan tali co tomatop niin nyan alat komudiika doh boraoi mongarah kapal kole. Iroh mahi potukat layar ika bahi napi kapal cioh. Paluh iroh suwah nuntuh hia pantai. 41Tapi danum eh aroh dalo jalom. Jadi urung kapal cioh cantuk barah langan sohingga songkarah. Kapal cioh aroh lian hogerek bat. Sadangkan bagian lai kapal cioh molai hancur tului tomohantam pian umbak.
42Nyan waktu iyoh, kawan tontara takut amun kokon tohanan angar nangui hia pantai paluh ngomuho arop doh. Jadi, iroh ngewak ika ngompatoi kokon tohanan taiyoh. 43Tapi kopala tontara nyau nyolamat Paulus. Jadi are ngosiit iroh. Are morentah kokon dulun co lian nangui houn tapuk hia laut paluh nangui ngampat pantai. 44Kawan dulun bokonco aroh lian nangui cuhun ika nantot nyan kawan-papan atawa kawan posak aang co bokon ingkan kapal cioh. Ma cara isan iyoh, kokon dulun solamat dapot pantai.
Currently Selected:
Kesah Rasul 27: TBSS
Highlight
Copy
Compare
Share
Want to have your highlights saved across all your devices? Sign up or sign in
