Kesah Rasul 28
28
Paulus nyan pulo Malta
28:1-10
1Opah kaih solamat dapot pantai, kawan dulun co nukui nyan intin mara eh ma kaih bahawa pulo cioh araieh Malta. 2Dalo kopion doh norima kaih. Waktu iyoh ucan ocop moce hintang hawa eh sorongin. Jadi, iroh nahun apui indan kaih. 3Paulus mahi ngumpur kawan-pating kaju ika tungkup apui cioh. Pas waktu are nyau mandak kawan pating kaju taiyoh nyan tungkui apui, poko tului kopanai apui yoh, pusit nyipo co mohari toco ingkan kawan pating kaju taiyoh. Nyipo cioh lie-liet noco silun Paulus elu picai. 4Nyipo cioh tenden leket nyan silun Paulus. Waktu ponduduk pulo cioh kito iyoh, iroh mantun ingkan ico ma co bokon, “Eeh mositi dulun cotuh piji ngompatoi dongai. Awi olu are solamat ingkan bohaya nyan laut. Tapi hapo cara cotuh dewi Koadilan tenden mohukum are ika eh matoi.”
5Tapi Paulus hobirik nyipo cioh ingkan silui eh hia ponah apui. Are arelu komo poroh ome-ome. 6Kawan dulun taiyoh nyompan bahawa silun Paulus angar lonting atawa nongkocok are angar pokolungkang matoi. Tahan bat kotahi iroh nganto ome co angar tojadi. Tapi arelu oko co tojadi ma are. Maka, iroh balih pikiran doh. Iroh mantun bahawa Paulus iyohco dewa.
7Aroh ocu ingkan ika cioh, oko tana tioh Publius. Publius iyohco gubernur pulo cioh. Publius norima kaih pio lau. Kotahin tolu ondo kaih nukui nyan lopo eh yoh. 8Pas kotika iyoh, taman Publius hotoro mondam hintang noso. Otoi kaling leh are nyan ika ponirui eh. Jadi, Paulus ngoroni are. Paulus bodoa samir ngoncamak are. Hanyih iyoh ka taman Publius yoh mambuh.
9Opah iyoh, kokon dulun bokon co hotoro nyan pulo cioh dombut hia Paulus. Kokon doh mahi tongomambuh. 10Hurmat lau iroh ma kaih Waktu kaih nyau ngoholuh solana, tonyodia doh ka uras koporuluan kaih.
Paulus cakat kapal hia Roma
28:11-16
11Opah tolu bulan nyan pulou Kreta iyoh, kaih tulak cakat kapal co borasal ingkan kota Aleksandria. Kapal cioh tenden oko nyan pulo Malta yoh kotahin sorang lowut laut. Bagian urung kapal cioh tomoukir molambang duo dewa Dioskuri. Kaih tulak cakat kapal cioh.
12Kaih tondo nyan kota Sirakusanyan pulo Sicilia paluh kotahin tolu ondo kaih nukui nyan idi. 13Ingkan intin kaih dapot hia kota Regium nyan ujung propinsi Italia. Nyuap ondo eh oko bahi napi ingkan tintu solatan, sohingga nyan ondo opahiyoh, kaih dapot hia kota Puteoli co komatung labih utara. Maka, 14nyan kota cioh, kaih sopopak ma kawan dulun co porocaya ma Yesus. Kaih tonyawot doh nukui umba iroh kotahin pitu ondo. Opahiyoh, kaih ngoholuh solana hia Roma buah calan tana.
15Kawan dulun co porocaya ingkan kota Roma ocop ngoneh borita tintun kaih. Jadi, oko ingkan iroh dombut nyopopak kaih nyan lowu Pasar Apius. Co bokon eh oko co nyopopak kaih nyan lowu co araieh Ponginapan tolu. Kotika Paulus kito kokon iroh, are bosukur ma Mohotara. Paluh atoi eh bosomangat.
16Ingkan duo kolowu yoh kaih dapot hia kota Roma. Nyan idi, kawan pomimpin pomorintah Romawi kuhan ika Paulus boraoi nukui tarop eh nyan ico lopo. Baya sobulih oko tontara co monjaga are.
Paulus nyan Roma
28:17-31
17Opah tolu ondo, Paulus mundang kawan pomimpin dulun Yahudi nyan Roma ika nyopopak are. Opah doh hokumpur, are mantun ma iroh, “Kawan konduang kuh, akuh aroh umpi kosolaa ngolawan bangsa to. Akuh mahi aroh molangar adat turan tatu hiang to. Tapi, nyan kota Yerusalem kawan dulun Yahudi nawan akuh. Paluh tonyarah doh akuh hia pomorintah Romawi. 18Kawan pojabat pomorintah Romawi yoh ocop morisa akuh. Tapi iroh aroh haba kosolaa ome-ome co ika kuh pantas tomohukum matoi. Maka, iroh nyau ngomebas akuh. 19Tapi kawan dulun Yahudi korinah monentang ika akuh aroh tongomebas. Awi iyoh, akuh topaksa nyawot ika porokara kuh tomongadili pian laca co poko bokuasa nyan Roma. Tapi aroh tului akuh nyau nomposala bangsa kuh leh. 20Ononboh tuluieh, akuh nyawot ika sopopak ma ikan, ika akuh boraoi monjelas alasan kuh jarin tohanan nyan intoi. Akuh tonawan awi akuh porocaya ma Laca co tomonjanji Mohotara indan dulun Israel.”
21Iroh mantun, “Kaih arinai norima surat ingkan propinsi Yudea tintun iko. Arinai oko kawan konduang to dulun Yahudi ingkan idi co dombut mehen borita tintun iko. Arinai oko ka co ngesah bahawa iko ocop umpi kojahatan. 22Tapi kaih piji ngoneh tintun koporocaya co tongumba mu yoh. Dulun orong nyan omo-omoh hopander ngolawan koporocayaan cioh. Jadi, kaih nyau ngoneh lansung ingkan iko tintun koporocayaan mu yoh.”
23Paluh, iroh nantu waktu ika doh sopopak ma Paulus kole. Nyan ondo cioh labih orong dulun dombut hokumpur nyan lopo ika are nukui. Ingkan manyuap dapot mamalom Paulus monjelas eh ma iroh tintun Korojaan Mohotara. Are hapo ome co tonulih pian Musa hintang kawan nabi ika poyakin iroh ina porocaya tintun Yesus.#28:23 Orong tulisan Musa hinang kawan nabi mantun aang tojadi tintun Yesus. Ico aang penting ponah kawan buku taiyoh iyohco Mohotara bojanji ika nyoruhan Lac ina momimpin umat-Eh. Jadi, Paulus mendorong iroh ika porocaya bahawa Yesus Laca cioh. 24Oko ingkan halo iroh co jarin porocaya tului ajaran Paulus yoh. Tapi oko ka co aroh porocaya. 25Iroh nyait hotaleh. Maka kohosopopak doh yoh bubar. Tapi sorinai iroh naat ika cioh, Paulus incah mantun ico aang kole ma iroh. Hieeh, “Nyan jaman sinan nabi Yesaya porapot antun Roh Mohotara ma tatu hiang to. Antun cioh tangar lau.
Mohotara mantun ma Yesaya,
26‘Tulakbat hia Israel.
Porapoteh bat santuh: Ikan horoholuh ngonehborita ingkan Mohotara, tapi aroh piji paham.
Ikan horoholuh hotolangon gawin Mohotara tapi aroh piji paham maksud eh.
27Bangsa cotuh aroh paham awi atoi doh ocop ngorengot.
Tolingan doh ocop aroh kolu ngoneh.
Matan doh ocop aroh kolu noto.
Jakai iroh aroh isan iyoh, iroh boraoi noto hapo matan doh,
iroh boraoi ngoneh hapo tolingan doh,
iroh lian paham hapo atoi doh,
sohingga iroh bobalik naat kawan dosan doh paluh bolum tuhit ngonyorih atoi Kuh.
Maka, Akuh angar mongampun iroh.’#28:27 Paulus monu antun cotuh ingkan kitab Yesaya 6:9-10.
28Jadi, ikan sobulih monau otuh: borita tintun kosolamatan ingkan Mohotara tuh angar tomorapot hia kawan bangsa co bokon ma Yahudi. Iroh angar porocaya borita cioh.”
[29Opah Paulus mantun aang taiyoh, kawan dulun Yahudi taiyoh bubar. Iroh incah hotaleh tului pondapat doh korinah bobeda.]
30Paulus nukui nyan intin kotahin duo toun manteng. Are nukui nyan lopo co tonyewa eh. Kokon dulun co dombut hia are pio lau are tohimo iroh. 31Are momborita tintun Korojaan Mohotara. Are majar tintun Tuhan Yesus, Laca Co Tomonjanji Mohotara yoh. Are momborita iyoh ma kobohanyi. Arelu oko co ngolampeng are.
Currently Selected:
Kesah Rasul 28: TBSS
Highlight
Copy
Compare
Share
Want to have your highlights saved across all your devices? Sign up or sign in
