Kesah Rasul 26
26
Paulus mombela arop eh nyan tohimo Laca Agripa
26:1-8
1Laca Agripa mantun timo Paulus, “Iko boraoi hopander ika mombela arop mu.”
Jadi, Paulus mihi kode hapo siluieh paluh mantun, 2“Tuan Agripa, akuh ocop tonondah pian kawan dulun Yahudi. Tapi nyan ondo tuh akuh jorih lau awi akuh cuhun mombela arop kuh nyan tohimo tuan kuh. 3Co portama akuh jorih awi tuan ocop monau sojalom-jalom eh tintun kokon adat turan dulun Yahudi. Tuan mahi monau tintun kawan aang co posomput pondapat bobeda nyan halo dulun Yahudi. Poko tului iyoh, akuh nyawot ika Tuan ngoneh akuh ma kosabar.
4Ingkan korajang kuh, akuh nukui nyan halo bangsa kuh dulun Yahudi nyan derah ika kuh tonganak hintang nyan kota Yerusalem. Maka, kokon dulun Yahudi ocop monau cara kuh bolum batuh. 5Iroh ocop tahi nyono akuh. Jadi, amun iroh kolu, iroh mahi lian ngesah tintun cara kuh bolum batuh. Akuh tomasuk kolompok dulun Parisi, iyohonon kolompok dulun co poko tahan borohon tuhit ma kokon poraturan agama to.
6Nyan jaman sinan, Mohotara bojanji nyoruhan ico beti laca indan tatu hiang to. Ingkan batuh, akuh porocaya ma Mohotara angar monepat janji-Eh yoh. Tului koporocayaan cononboh maka akuh tomongadili makitu. 7Podahar, duo balas suku ingkan bangsa to Israel mahi korinah moharap janji cioh tonepati. Ononboh tului eh iroh tuu-tuu nyembah nyuku Mohotara. Iroh nyembah nyuku Mohotara hondo homalom.
Tuan Agripa, akuh tonondah pian kawan dulun Yahudi tului akuh porocaya ma Mohotara ocop monepat janji-Eh yoh.
8 Kawan dulun co nondah akuh, sobulih eh ikan porocaya bahawa Mohotara umpi dulun bolum hopuli ingkan pompatoi.
Paulus ngesah cara Yesus mongubah pomolum eh
26:9-23
9Batuh akuh mahi bopikir bahawa akuh sobulih bohimat lau monentang kokon dulun co porocaya ma Yesus. 10Maka hiah kotika akuh nukui nyan Yerusalem, akuh ngolawan kawan dulun co porocaya ma Yesus. Akuh haba kuasa ingkan kawan imam kopala ika pokuntam orong ingkan iroh co porocaya ma Yesus yoh hia ponah seper. Malah akuh sotuju ka amun oko nyan halo iroh co tomohukum matoi. 11Derek ka akuh monyiksa iroh co tonyopopak kuh nyan ponah kawan lopo ika sombayang. Akuh bousaha momaksa iroh ika aroh bat porocaya ma Yesus. Korinah angit kuh ma iroh dapot akuh nyiah iroh. Akuh nyiah iroh hia kawan kota co bokon ka ika akuh haba monyiksa iroh.
12Ponah koadaan ciohboh akuh tulak hia Damsyik. Akuh haba kuasa ingkan kawan imam kopala ika nawan kawan dulun co porocaya ma Yesus. 13Tapi, ngoneh otuh yoh lacakuh, nyan tohun ondo ponah solana hia kota Damsyik yoh, nongkocok oko cohaya ingkan langit. Cohaya cioh labih panda hangki matanondo. Cohaya cioh nyingah toliut kuh hintang kawan jolahang kuh co nyalan umba akuh. 14Lansung kaih uras tahak hia tana. Paluh, akuh ngoneh suara co mantun ma akuh ponah bohasa Ibrani. Hie-Eh, ‘Saulus, Saulus, kura iko monyiksa Akuh? Kura iko ngolawan kojere Mohotara? Iko baya ngomporoh arop mu amun iko ngolawan Mohotara co labih bokuasa ma iko.’
15Opahiyoh, akuh ngisok, ‘Omeboh Iko, Tuan?’
Tuhan mantun ma akuh, ‘Akuh tuh ceh co Yesus, co tomonganiaya mu! 16Makitu kokatbat. Akuh poleha arop Kuh ma iko ika nyoruhan iko ina bogawi indang Kuh. Iko sobulih momborita tintun ome co ocop kitam mu makitu. Iko mahi sobulih momborita tintun ome co angar tomototo Kuh ma iko daai. 17Akuh angar nyolamat iko ingkan kawan dulun co ngolawan iko, iyoh co ingkan dulun Yahudi atawa co bokon ma Yahudi. Iko tonyoruhan Kuh hia iroh. 18Iko angar dohop iroh paham dapot iroh aroh bat bolum ponah kopindong, tapi bobalik bolum ponah kopanda. Iko angar dohop iroh paham dapot iroh aroh bat bolum nyambo kuasan Iblis, tapi bobalik paluh bolum nyambo kuasan Mohotara. Ma sanioh, amun iroh porocaya ma Akuh, maka kawan dosan doh angar tomongampun. Iroh haba ika nyan halo dulun tioh Mohotara.’ Nonnai hien Yesus ma akuh.
19Poko tului iyoh, laca Agripa, akuh korinah tuhit ma porintah co cuhun Yesus ma akuh ponah pongito co ingkan sorga yoh. 20Akuh molai momborita tintun Yesus ma kawan dulun nyan Damsyik, paluh nyan Yerusalem, kawun nyan ngolauh propinsi Yudea. Opah iyoh, akuh momborita tintun Yesus ma kawan bangsa co bokon ma Yahudi. Akuh momborita bahawa iroh sobulih naat kawan dosan doh paluh bolum tuhit ngonyorih atoi Mohotara. Akuh momborita, iroh sobulih nguan alo gawi co monunjuk bahawa iroh mula bujur-bujur naat kawan dosan doh. 21Tului akuh momborita kokon aang tanon maka kawan dulun Yahudi nawan akuh nyan Lopo Mohotara paluh suwah ngompatoi akuh. 22Tapi Mohotara nyolindung akuh. Dapot makitu akuh incah bolum sohingga akuh incah lian momborita tintun Yesus makitu hia kawan dulun co aroh penting atawa kawan dulun penting. Ome co tomomborita kuh yoh aroh bokon hangki ome co tonulih pian kawan nabi hintang Musa. Nyan jaman sinan iroh momborita bahawa 23Laca Co Tomonjanji Mohotara sobulih mondorita dapot matoi. Tapi iroh mahi nulih bahawa Are angar jarin dulun co portama co bolum hopuli ingkan pompatoi. Iyoh tojadi ika Are lian momborita kojere Mohotara co jarin isan kopanda ma bangsa Yahudi atawa kawan bangsa co bokon ma Yahudi.”
Paulus nyompakat laca Agripa ika porocaya ma Yesus
26:24-32
24Pondehan Paulus mantun kawan aang taiyoh ika mombela arop eh, Pestus mantun ma suara muhat, “Paulus, iko ocop bobujon! Iko ocop dalo kongorong bolajar dapot bobujon.”
25Tapi Paulus museh, “Gubernur Pestus co tohormat. Akuh aroh bobujon. Antun kuh tuh bujur hintang muntam akar. 26Laca Agripa mahi ocop monau tintun kawan aang cotuh. Tului iyoh, akuh lian hopander ma koterus terang ma are. Akuh yakin bahawa are ocop piji ngoneh tintun kawan aang tatuh. Mositi are monau kokoi eh awi kawan aang tatuh aroh tojadi nyan ika co saro.”
27Paluh Paulus ngisok ma laca Agripa, “Mainboh iko porocaya pai tintun ome co tonulih pian kawan nabi? Akuh yakin bahawa iko porocaya taiyoh!”
28Maka Agripa mantun, “Aroh bopikir iko boraoi ngonok akuh jarin dulun Kristen ponah waktu co nokeket otuh.”
29Hien Paulus, “Oluco tuan kuh porocaya ponah waktu co nokeket otuh, atawa nyan kotahi eh daai tuan kuh mahi porocaya, akuh tenden bodoa ma Mohotara ika tuan kuh porocaya ma Yesus. Aroh baya tuan kuh bewe, tapi kokon dulun co oko ngoneh akuh mantun ngondai tuh. Akuh bodoa ikan uras jarin samah isan akuh, iyohonon porocaya ma Yesus. Tapi akuh aroh kolu ikan tomowot ma rantai umat isan otuh.”
30Opah antun Paulus yoh, laca Agripa tonjok. Gubernur Pestus, Bernike, hintang uras dulun co tuot homboh iroh mahi kokat tonjok. 31Kokon doh pusit ingkan ruang cioh. Opah pusit, iroh mantun ingkan ico ma co bokon, “Sobujur eh dulun cotuh aroh nguan alo gawi co jahat dapot are sobulih tomohukum matoi. Are mahi sobulih eh aroh tomokuntam hia ponah seper.”
32Laca Agripa mantun ma gubernur Pestus, “Dulun cotuh sobujur eh ocop boraoi tomombebas. Tapi are ocop nyawot ika are boraoi tomongadili pian laca co poko bokuasa nyan Roma. Maka, are sobulih tomongadili nyan Roma.”
Currently Selected:
Kesah Rasul 26: TBSS
Highlight
Copy
Compare
Share
Want to have your highlights saved across all your devices? Sign up or sign in
