Kesah Rasul 25
25
Paulus nyan tohimo gubernur Pestus hintang kawan pomimpin dulun Yahudi
25:1-12
1Jadi, Pestus jarin gubernur nyan propinsi Yudea yoh. Are dombut nyan Kaisarea, ibukota eh. Opah tolu ondo, are tulak hia kota Yerusalem. 2Nyan idi, kawan imam kopala hintang kawan pomimpin dulun Yahudi co bokon dombut hia eh. Iroh monjelas ma gubernur Pestus kawan tondah doh tohimo Paulus. 3Iroh nyawot dohop ingkan gubernur Pestus yoh. Iroh nyawot asi ngorinah lau ika Paulus tomehen hia Yerusalem. Tapi iroh oko kewak ika ngompatoi Paulus nyan owang calan.
4Gubernur Pestus museh, “Paulus incah tonahan nyan Kaisarea. Ponah pira pira ondo akuh angar hia idi. 5Jadi, pioleh kawan pomimpin ikan tulak homboh akuh. Amun Paulus mula umpi kosolaa, tondah me boraoi tomorapot nyan idi.”
6Pestus nukui nyan Yerusalem kurang labih jalu dapot sopuluh kondai. Paluh, are hopuli hia Kaisareahomboh kawan pomimpin dulun Yahudi yoh. Ico kondai opah are dapot nyan Kaisarea, Pestus mongada sidang pongadilan. Jadi, are nyuhu ika Paulus tomehen ingkan seper. 7Opah Paulus tomehen muntam hia ruangan cioh, kokon dulun Yahudi co dombut ingkan Yerusalem tonjok toliut are. Iroh nompi orong tondah co bahat tohimo are. Tapi iroh aroh lian mombukti ome-ome.
8Opahiyoh, Paulus mombela arop. Hieeh, “Akuh aroh piji molangar kawan porintah dulun Yahudi co tonulih Musa ponah Hukum agama Yahudi. Akuh aroh molangar poraturan tintun Lopo Mohotara. Akuh mahi aroh molangar kawan hukum pomorintahan Romawi.”
9Tapi Pestus nyau ngonyorih kawan dulun Yahudi. Maka, are ngisok ma Paulus, “Mainboh iko sotuju ika tulak hia Yerusalem? Akuh boraoi mongadili iko nyan idi, paluh umpi koputusan ponah porokara cotuh.”
10Tapi Paulus museh, “Akuh makitu oko nyan pongadilan co resmi pomorintahan Romawi. Maka, akuh sobulih tomongadili nyan intoi leh aroh nyan Yerusalem. Akuh aroh sala tohadap bangsa Yahudi. Iko leh mahi ocop monau iyoh. 11Amun akuh bujur-bujur ocop umpi kojahatan dapot akuh pantas tomohukum matoi, akuh torima hukuman cioh. Tapi amun tondah doh tohimo akuh aroh bujur, maka arelu oko dulun co bohak nyarah akuh ma iroh. Socara resmi makitu akuh nyawot ika laca co poko bokuasa nyan Roma co mongadili porokara kuh.”
12Jadi, gubernur Pestus borunding ma kawan ponasehat eh. Paluh are museh, “Pio leh isan iyoh! Iko ocop nyawot ika laca co poko bokuasa co mongadili porokaramu. Maka, iko angar tomongadili pian are nyan kota Roma.”
Paulus nyan tohimo laca Agripa#25:12 Laca Agripa tuh iyohco anak Laca Herodes Agripa. Are bokuasa ma propinsi Abilena, Galilea, Iturea, hintang Trakonitis. Are incah nyan pinda Nero, laca co poko bokuasa nyan Roma.
25:13–26:32
Gubernur Pestus nyawot nosehat ingkan Laca Agripa
25:13-22
13Pira pira ondo opahiyoh, laca dulun Yahudi co araieh Agripa hintang tarieh co bawe co araieh Bernike dapot nyan Kaisarea. Iroh dombut paluh hotabe samir mongucap solamat indan Pestus awi are baa jarin gubernur. 14Iroh nukui nyan idi pira pira ondo. Maka, nyan waktu iyoh, Pestus monjelas tintun porokara Paulus ika haba nosehat ingkan laca Agripa. Hieeh, “Oko ico dulun tohanan nyan intoi. Araieh Paulus. Nyan waktu Pelik umbot jarin gubernur, are aroh nyolesai porokara Paulus yoh.
15Waktu akuh oko nyan kota Yerusalem, kawan imam kopala hintang kawan pomimpin dulun Yahudi co bokon dombut hia akuh. Iroh porapot kawan tondah doh tohimo Paulus. Iroh nyawot ika are boraoi tomohukum. 16Tapi akuh museh bahawa hukum pomorintah Romawi aroh kuhan sanioh. Ico dulun co tonondah, aroh boraoi lansung tonyarah hia kawan dulun co nondah are. Are sobulih tomorisa houn. Nyan intin are nohimo kawan dulun co nondah are. Are sobulih tomihi kosempatan ika mombela arop eh tintun tondah cioh. 17Maka, iroh dombut hia intoi hontong akuh. Ico kondai opah akuh dapot nyan Kaisarea, akuh molaksana sidang pongadilan. Jadi, akuh nyuhu ika Paulus tomehen ingkan seper. 18Opahiyoh, kokon dulun co nondah are tonjok toliut are. Akuh nyompan tondah doh angar oko hubungai eh ma gawi co jahat lau. Tapi tondah doh aroh isan iyoh. 19Masalah eh baya tintun ajaran agama doh leh. Oko ka mosalah ma dulun co araieh Yesus. Dulun cioh ocop matoi. Tapi Paulus tegas mantun bahawa Yesus bolum. 20Akuh bingung maindeoi akuh sobulih nyolidik mosalah cotuh. Poko tului iyoh, akuh ngisok are amun are sotuju ika tulak hia Yerusalem. Akuh boraoi mongadili are nyan idi, paluh momutus porokara cioh. 21Tapi Paulus nyawot tonahan dapot laca co poko bokuasa nyan Roma lian mongadili porokara eh. Jadi, akuh nyuhu ika are tatap tonahan dapot akuh boraoi nyuhu dulun nucu are hia laca to nyan idi.”
22Opahiyoh, laca Agripa mantun ma gubernur Pestus, “Akuh leh jere ngoneh ingkan dulun cioh.”
Hien Pestus, “Amun sanioh, nyuap Bapa boraoi ngoneh eh ingkan are leh.”
Paulus tomehen nohimo Laca Agripa
25:23-27
23Jadi, kotika manyuap ondo eh, laca Agripa homboh Bernike dombut. Iroh tonyambut ma upacara ponghormatan co moriah. Iroh muntam hia ponah ruangan ika pongadilan hombo homboh kawan komandan Pasukan hintang kawan dulun penting co bokon ingkan kota cioh. Paluh Pestus nyuhu ika Paulus tomehen muntam. 24Opahiyoh Pestus mantun, “Laca Agripa hintang uras co oko nyan intoi. Ikan kito dulun cotuh. Are tonodah pian uras dulun Yahudi, iyoh co oko nyan Yerusalem atawa co nyan intoi. Iroh ocop dombut hia akuh samir noriak riak bahawa are aroh boraoi bolum labih tahi.
25Tapi akuh ocop morisa are. Akuh aroh popak ico kosolaa mahi dapot are sobulih tomohukum matoi. Are leh nyawot ika porokara eh tomongadili pian kaisar nyan Roma. Maka, akuh mutus eh ika nyuhu dulun nucu are hia kaisar to nyan idi. 26-27Akuh sobulih nulih surat tintun are tuh indan laca to. Tapi arelu oko bukti co mositi ika tonulih kuh ponah surat cioh. Monurut pondapat kuh, aroh wajar amun pokirim dulun tohanan hia laca to arelu oko monjelas kawan tondah tohimo are. Poko tului iyoh, akuh nyuhu tontara mehen are hia ikan, torutama ma iko, Laca Agripa. Akuh boharap opah are tomorisa, akuh oko alasan co jelas ika kuh nulih eh ponah surat indan laca to nyan Roma.”
Currently Selected:
Kesah Rasul 25: TBSS
Highlight
Copy
Compare
Share
Want to have your highlights saved across all your devices? Sign up or sign in
