Kesah Rasul 24
24
Paulus nyan tohimo gubernur Pelik
24:1-27
Kawan pomimpin Yahudi nondah Paulus
24:1-9
1Limo ondo opahiyoh, pira pira pomimpin dulun Yahudi dombut, tomasuk Ananias. Are iyohco Imam Kopala co poko bokuasa. Iroh dombut hia Kaisarea mehen ico pongocara, araieh Tertulus. Iroh mohadap gubernur Pelik paluh monjelas kawan tondah doh tohimo Paulus. 2Jadi, Paulus tonaah. Opah Paulus tomehen mohadap gubernur, Tertulus molai tondah eh tohimo Paulus. Hieeh, “Bapa Gubernur Pelik co kaih hormati, kotahin Bapa momorintah, kaih lian bolum ngolandah. Poko tului Bapa polangar bijaksana, maka oko orong kompio indan bangsa kaih. 3Kaih korinah mohargai kokon co tongompian Bapa nyan omoh-omoh. Kaih orong-orong botorima kasih lau ma iko pak. 4Tapi, keleh aroh akuh mende orong waktu Bapa. Akuh baya nyawot ma kohormat ika Bapa bosodia ngoneh kaduan kaih. Akuh monjelas socara singkat. 5Kaih ocop monau bahawa dulun cotuh pongacau. Nyan omoh-omoh are posomput kongicuh nyan halo kawan dulun Yahudi. Are mahi momimpin kolompok dulun co umba ajaran Dulun Nasaret cioh. 6Molahan are nyuwah molangar palin Lopo Mohotara. Poko tului iyoh, kaih nawan are. Kaih nyau mongadili are monurut hukum agama kaih. 7Tapi, Lisias, kopala tontara, dombut ma kawan tontara eh. Socara paksa, are ngoras Paulus ingkan silun kaih. 8Lisias yoh nyuhu kawan dulun co nyau monuntut Paulus ika mohadap Bapa. Maka, kaih dombut hia intoi. Kokon tondah kaih tohimo Paulus mula bujur. Amun Bapa morisa are, maka Bapa tarop angar monau kaih bujur.”
9Kawan pomimpin dulun Yahudi co oko nyan intin mahi umba nondah Paulus ka. Iroh potegas bahawa antun Tertulus yoh mula bujur.
Paulus mombela arop eh
24:10-23
10Opahiyoh, gubernur mihi kode ika Paulus hopander. Maka, Paulus mantun, “Bapa Gubernur, koraong kuh bahawa Bapa ocop botou toun kotahieh mongadili kawan porokara bangsa kaih dulun Yahudi. Poko tului iyoh, akuh sanang mombela arop kuh nyan tohimo Bapa.
11Aroh labih ingkan duo balas ondo co ohut akuh dombut hia kota Yerusalem ika boribadah nyan polontaran Lopo Mohotara. Korinah gampang Bapa hegah monyolidik iyoh. 12Nyan waktu iyoh, arelu oko co noto akuh hojawap. Akuh aroh umpi kongicuh ome-ome, iyoh nyan polontaran Lopo Mohotara, atawa nyan kawan lopo ika sombayang, atawa nyan omoh leh nyan ponah kota cioh. 13Kawan dulun tatuh co potondah akuh aroh lian mihi bukti ome-ome indan Bapa.
14Tapi akuh mongakui otuh: Akuh bolum sosuai ma cara co tomajar Tuhan Yesus. Pomimpin agama Yahudi tatuh mantun ajaran cioh sala. Tapi akuh tuu-tuu molayani Mohotara co tonyembah pian tatu hiang kaih. Akuh porocaya kokon porintah hintang poraturan Mohotara ponah buku co tonulis Musa hintang buku kawan nabi. 15Samah isan iroh, akuh mahi yakin bahawa nyan pongaan ondo Mohotara angar umpi kokon dulun bolum hopuli ingkan pompatoi, iyoh onon dulun bujur atawa dulun jahat. 16Poko tului iyoh, akuh pompaluh bojaga arop kuh ika koboradaan atoi kuh borasih nyan tohimo Mohotara hintang kolunon,
17Sorinai waktu duo balas ondo co ohut ciyoh, akuh arelu oko nyan Yerusalem kotahin pira pira toun. Tapi akuh hopuli hia idi ika mehen sumbangan dana ika dohop konduang bakah bawe dulun Yahudi. Akuh mahi nyau mihi pira pira kurban komolum indan Mohotara. 18Jadi, akuh tulak hia polontaran Lopo Mohotara. Nyan idi, akuh ngohut upacara co umpi akuh borasih bat ingkan aranaang co ceet. Opah iyoh, oko pira pira dulun Yahudi ingkan propinsi Asia co nyopopak akuh nyan idi. Tapi kotika iyoh arelu oko orong dulun nyan intin. Akuh aroh umpi kongicuh samah sindo. 19Kawan dulun taiyoh ingkan Asia cioh boh co sobulih eh hia intoi. Ome monau iroh oko mosalah tohimo akuh, olu iroh tarop porapot tondah doh hia Bapa. 20Tapi, olu eh boh kawan pomimpin dulun Yahudi co hadir tuh nyuwah mombukti eh amun oko kojahatan co tongompiangkuh isan waktu iroh mongadili akuh batuh nyan tohimo kolompok pomimpin dulun Yahudi co poko bokuasa. 21Akuh baya mantun ico hal co mungkin doh angap sala. Nyan waktu iyoh, akuh tonjok nyan tohu-tohun iroh paluh mantun muhat. ‘Akuh porocaya dulun angar bolum hopuli opah matoi. Iyohboh tului akuh tomongadili ngondai cotuh!’ ”
22Tohorong gubernur Pelik ocop monau orong tintun kawan ajaran Tuhan Yesus. Are monunda sidang cioh. Hieeh, “Daai, Lisias, komandan pasukan, angar dombut. Waktu iyoh, akuh angar umpi koputusan ponah porokara cotuh.”
23Paluh are nyuhu kopala pasukan eh ika Paulus tatap tonahan, tapi oko koringanai. Amun kawan jolahan Paulus dombut, iroh kuhan ika molayan are.
Paulus derek hopander ma gubernur Pelik
24:24-27
24Pira pira ondo opahiyoh, Pelik dombut kole homboh oruh eh. Aran oruh eh Drusila. Are dulun Yahudi. Opah iroh dombut, Pelik nyuhu ika Paulus tomehen hia muka iroh ruo. Iroh ngoneh antun Paulus. Paulus monjelas maindeoi are porocaya ma Yesus, Laca Co Tomonjanji Mohotara. 25Paulus mahi monjelas tintun aang nain otuh: Dulun co porocaya sobulih nguan alogawi co buah nyan tohimo Mohotara. Dulun co porocaya mahi sobulih mongondali kojere eh. Paulus mahi monjelas bahawa nyan ondo pongaan sika dulun angar tomohakimi. Waktu Pelik ngoneh tintun cara bolum isan iyoh, are jarin takut lau. Maka are mantun, “Ocop leh houn! Tulak makitu. Pongaan kole amun oko waktu, akuh naah iko kole.”
26Waktu iyoh, Pelik boharap Paulus angar mihi duit sogok indai eh. Maka Pelik derek nyuhu ika Paulus tomehen ika hopander ma are. 27Opah nyihin duo toun, Pelik tonganti pian Perkius Pestus. Nyan waktu iyoh mahi, Pelik aroh kolu nyolesai porokara Paulus houn. Are tatap moholu Paulus nyan seper awi are jere ngonyorih songan kawan pemimpin dulun Yahudi.
Currently Selected:
Kesah Rasul 24: TBSS
Highlight
Copy
Compare
Share
Want to have your highlights saved across all your devices? Sign up or sign in
