Kesah Rasul 23
23
1Paulus nontonong lansung hia kawan pomimpin Yahudi taiyoh hintang mantun. Hieeh, “Kawan konduang, dapot ondo tuh akuh tenden bolum ma hati nurani co moruni nyan tohimo Mohotara.”
2Ananias,#23:2 Ananias tuh iyohco Imam Kopala co poko bokuasa. Oko Ananias bokon co tongesah nyan Kesah 5:1-11. Oko Ananias co bokon kole co bodoa indan Saulus nyan Kesah 9:1-19. Imam Kopala co poko bokuasa, oko nyan intin. Hiah are ngoneh antun Paulus yoh, are nyuhu ika ico beti dulun co tonjok nyan sila Paulus nampar baun Paulus.
3Jadi, Paulus mantun ma Ananias yoh, “Iko iyohco dulun co herak pura-pura leh somporengu kuta ceet co tomoncat bura! Daai, Mohotara angar mohukum iko ka! Iko tuot nyan intin hapo kawan porentah co tonulih Musa ika mongadili akuh. Tapi iko nyuhu ika akuh tonampar oluco akuh aroh umpi kosolaa.”
4Iroh co tonjok nyan dokin Paulus mantun, “Aroh mohina Imam Kopala co poko bokuasa. Are iyohco tomili Mohotara!”
5Paulus museh, “Kawan konduang, akuh aroh monau amun are iyohco Imam Kopala co poko bokuasa. Memang oko porentah nyan ponah Surat Borasih: ‘aroh iko mohina pomimpin bangsamu.’ ”#23:5 Porintah cotuh ingkan Koluaran 22:28. Oko duo komungkinan co tomaksud Paulus. 1) Paulus bomaksud ika nyawot maap. Kohosopapak cotuh aroko resmi, Jadi are aroko monau ome Imam Agung hiyah waktu cioh ATAWA 2) Paulus bamaksud ika nyindir. Paulus ocop monau ome co mihi porentah cioh, tapi Paulus aroko manggap Ananias sobagai Imam co bujur tului alogawi eh co jahat.
6-8Paulus ocop monau nyan halo kawan pomimpin co oko nyan intin, oko co ingkan kolompok Saduki hintang oko ka co ingkan kolompok Parisi. Are ocop monau dulun Saduki aroh porocaya dulun matoi angar bolum hopuli. Iroh mahi aroh porocaya oko kawan molekat atawa kawan roh. Tapi dulun Parisi porocaya kokon aang cioh. Onon boh, are mantun muhat, “Kawan konduang, akuh iyohco dulun Parisi. Tamang kuh mahi dulun Parisi. Akuh porocaya bahawa dulun matoi angar bolum hopuli. Ononboh tului akuh tomongadili ondo cotuh!”
Antun Paulus umpi kawan dulun Parisi hintang kawan dulun Saduki nyan intin molai hojawap. Kohosopak doh yoh jarin tobagi-bagi. 9Iroh jarin polangar kicuh. Paluh, pira pira guru agama ingkan kolompok Parisi tonjok. Karas lau iroh ngolawan kawan dulun Saduki. Iroh mantun, “Monurut kaih, dulun cotuh samah sindo aroh sala! Mungkin oko molekat atawa roh co hopander ma are.”
10Maka, porpecahan jarin sasar bahai. Komandan jarin takut amun Paulus angar tongoroyok doh. Jadi are nyuhu kawan tontara eh ika toka ingkan benteng paluh nyolamat Paulus ingkan tohu-tohun doh. Iroh mehen are hia ponah benteng kole.
11Nyan momi cioh Tuhan Yesus tonjok nyan sila Paulus paluh mantun ma eh, “Aroh takut. Ma kobohanyi, iko bosaksi tintun Akuh nyan kota Yerusalem. Daai iko sobulih bohanyi ka bosaksi tintun Akuh nyan kota Roma.”
Kawan dulun Yahudi umpi kewak ika ngompatoi Paulus
23:12-22
12-13Manyuap ondo eh, oko labih opat pulu beti dulun Yahudi co umpi kewak ika ngompatoi Paulus. Iroh umpi kewak cioh co aroh tomonau dulun. Iroh uras bosumpah ma Mohotara bahawa iroh aroh angar kuman ngorih sorinai iroh bohasir ngompatoi Paulus.
14Jadi, iroh tulak hia kawan imam kopala hintang kawan pomimpin Yahudi co bokon. Iroh mara kewak doh yoh. Hien doh, “Kaih ocop bosumpah hia Mohotara bahawa kaih aroh angar kuman ngorih sorinai kaih bohasir ngompatoi Paulus. 15Makitu kaih nyawot asi ika kawan bapa hokahung ma kolompok pomimpin co poko bokuasa ingkan bangsa to dulun Yahudi. Samah-samah leh ikan nyawotbat hia komandan pasukan Romawi ika Paulus tomehen ingkan markas ika nohimo ikan. Ikan pura-pura nyau morisa porokara eh labih toliti. Tapi waktu are nyan owang calan, kaih ocop siap ika ngompatoi are.”
16Tapi akon Paulus ngoneh tintun kewak cioh. (Are iyohco anak bakah konduang Paulus co bawe.) Opah are ngoneh tintun kewak cioh, are tulak hia benteng paluh muntam hia ponah kawun mara eh ma Paulus.
17Jadi, Paulus naah ico beti kopala tontara. Hieeh, “Dohop mehen daja cotuh hia komandan. Oko aranaang co nyau tomolapor eh ma are.”
18Maka kopala pasukan cioh mehen akon Paulus yoh hia komandan tontara. Hieeh, “Paulus, tahanan cioh, naah akuh. Are nyawot ika daja cotuh tonucu hia iko. Oko aranaang nyau are molapor ma iko.”
19Komandan cioh nantot silun daja cioh paluh mehen are tarop doruo. Are ngisok, “Oko ome co nyau mu molapor ma akuh?”
20Akon Paulus yoh mantun, “Kawan dulun Yahudi ocop umpi kewak. Iroh angar nyawot hia Bapa ika nyuap Paulus tomehen ingkan benteng tuh. Iroh mahi angar mantun ma bapa bahawa iroh nyau Paulus nohimo kelompok pomimpin agama Yahudi co poko bokuasa. Iroh mahi angar mantun ma bapa bahawa iroh nyau haba ponjelasan co labih toliti ingkan Paulus. Tapi iroh pura-pura leh.
21Jadi, aroh boh Bapa ngoneh iroh, awi oko labih opat pulu beti ingkan iroh ocop siap ngimpa are ponah solanai. Iroh ocop bosumpah bahawa iroh aroh angar kuman ngorih sorinai iroh bohasir ngompatoi Paulus. Makitu iroh ocop siap ma kewak doh yoh. Iroh baya nganto Bapa nyotuju ika Paulus tomehen ingkan intoi.”
22Ngoneh iyoh, kopala tontara mihi porentah ma daja cioh, “Aroh mantun hia ome bewe bahawa iko mara aang cotuh ma akuh.” Paluh, are nyuhu buli daja cioh.
Paulus tongirim hia gubernur Pelik nyan Kaisarea
23:23-35
23-24Opahiyoh komandan cioh naah duo kopala pasukan. Hieeh, “Nyiapbat orong tontara ika mehen Paulus hia gubernur Pelik nyan Kaisarea. Are sobulih dapot nyan idi ponah koadaan solamat. Jadi, nyiapbat duo latuh tontara hopadang, duo latuh tontara holunju, hintang pitum pulu ponunggang kuda. Nyiap ka pira-pira kuda indan Paulus. Bosiap-siapbat ika tulak jam suoi momi tuh ka.”
25Paluh komandan cioh nulih surat. Nain otuh uhing eh, 26“Indan co tohormat Gubernur Peliknyan Kaisarea: Tontoke ingkan akuh Klaudius Lisias, komandan pasukan nyan kota Yerusalem. 27Hontong ma surat cotuh, akuh nyuhu dulun nucu ico tohanan. Dulun cotuh ocop tonawan pian kawan dulun Yahudi. Iroh bomaksud ngompatoi are. Tapi akuh ngoneh bahawa are iyohco warga negara Roma. Maka, akuh dombut ma kawan tontara ika nyolamat are.
28Akuh nyau monau kura are tonondah pian doh. Maka, akuh ngumpur kawan pomimpin doh dulun Yahudi co poko bokuasa. Akuh mehen are nohimo iroh. 29Tornyata mosalah eh baya tintun poraturan agama doh leh. Maka, arelu oko alasan dapot are tomohukum matoi atawa tomokuntam hia ponah seper. 30Tapi ondo cotuh ka akuh ocop tomara oko kolompok dulun Yahudi co umpi kewak ika ngompatoi are. Maka, akuh lansung nyuhu dulun mehen are hia Tuan. Akuh mahi ocop nyuhu iroh co nondah are ika iroh mahi porapotbat tondah doh nyan tohimo Tuan. Hangkat intoi surat ingkan akuh.”
31Jadi, kawan tontara nontumun porentah co tomihi indan doh. Nyan waktu homalom, iroh milo Paulus ingkan benteng paluh nucu are hia kota Antipatris houn. 32Ondo opahiyoh eh kokon opat latuh tontara co nyalan paa buli hia benteng nyan Yerusalem. Iroh moholu pitum pulu tontara bokuda ngoholuh solana ma Paulus hia Kaisarea.
33Waktu tontara bokuda yoh dapot nyan Kaisarea, iroh porapot surat ingkan komandan indan gubernur Pelik. Iroh mahi nyarah Paulus hia eh.
34Jadi, gubernur mombaca surat cioh. Paluh, are ngisok ma Paulus, “Iko borasal ingkan propinsi comoh?”
Paulus museh, “Akuh ingkan propinsi Kilikia.”
35Hien gubernur, “Akuh angar morisa porokaramu nyan waktu kawan dulun co nondah iko ocop dapot nyan intoi.”
Jadi, are nyuhu ika Paulus tomehen hia istana Laca Herodes. Paulus tonahan nyan intin.#23:35 Laca Herodes matoi aroh tahi opah Yesus tonganak. Istana co tomangun eh tuh, tohapan ika benteng bahai nyan derah dulun Israel yoh.
Currently Selected:
Kesah Rasul 23: TBSS
Highlight
Copy
Compare
Share
Want to have your highlights saved across all your devices? Sign up or sign in
