Kesah Rasul 22
22
Paulus hopander timo dulun orong
22:1-22
1Hien Paulus, “Kawan konduang hintang kawan Bapa, ngoneh akuh. Akuh jere hopander ma ikan ika mombela arop kuh.”
2Dulun orong yoh jarin labih tenang awi are hopander hapo bohasa Ibrani, Paulus ngoholuh pander, 3“Akuh dulun Yahudi samah ma ikan. Akuh tonganak nyan kota Tarsus nyan propinsi Kilikia. Tapi akuh tongomahai nyan kota Yerusalem tuh. Ingkan kongolik, akuh bolajar kawan porintah Mohotara co tonulih Musa. Gamaliel co majar akuh.#22:3 Gamaliel iyohco guru co torkenal ponah kolompok agama Yahudi ingkan kolompok Parisi. Noto Kesah 5:33-39. Akuh tomondidik ma kotoliti tintun kokon kawan porintah taiyoh. Maka, akuh tuu-tuu tuhit molayani Mohotara, samah isan kokon ikan ondo tuh.
4Batuh, akuh monganiaya pongikut ajaran Tuhan. Akuh monganiaya iroh dapot matoi. Bokon ma iyoh, akuh mahi nawan kawan bakah atawa bawe paluh nyarah iroh ika tomokuntam hia ponah seper. 5Bahawa aang cioh bujur, kolompok pomimpin agama co poko bokuasa hintang imam Kopala co poko bokuasa lian mara eh. Awi akuh haba kawan surat ingkan iroh. Kawan surat taiyoh tonulih indan sika pomimpin kawan lopo ika sombayang agama Yahudi nyan kota Damsiik. Nyan kota cioh oko ka dulun orong pongikut ajaran Tuhan. Kawan surat taiyoh mihi kuasa ika akuh boraoi nawan iroh hintang mehen iroh hia kota Yerusalem tuh ika doh tomohukum.
6Tapi, ponah solanang kuh hia idi oko aranaang co tojadi. Nyan tohun ondo Kotika akuh ocop dokin kota Damsik, nongkocok oko cohaya ingkan langit. Cohaya cioh nyingah toliut kuh. 7Lansung akuh tahak hia tana. Akuh ngoneh oko suara co mantun, ‘Saulus, Saulus, kura iko monganiaya Akuh?’
8Maka akuh ngisok, ‘Ome boh Iko yoh, Tuan?’
Hie-Eh, ‘Aku tuh ceh co Yesus, dulun Nasaret, co tomonganiaya mu!’
9Kawan dulun co umba homboh akuh mahi kito cohaya cioh. Tapi iroh aroh ngoneh suara co hopander ma akuh.
10Opah iyoh, akuh ngisok ma Yesus, ‘Ome co sobulih tongompiang kuh, Tuhan?’
Hien Tuhan ma akuh, ‘Kokatbat paluh tulak hia kota Damsyik. Daai Akuh angar mihi tugas indam. Nyan kota Damsik angar oko dulun co mara kokoi eh ma iko tintun aang co angar tongompian.’
11Tapi cohaya cioh niin posilo matang kuh. Akuh aroh lian noto ome-ome. Maka, kawan dulun co homboh ma akuh nantot silung kuh. Iroh nuntun akuh muntam hia kota Damsik yoh. 12Nyan intin, oko ico dulun co araieh Ananias. Are dulun co korinah horoluh nontumun porentah Mohotara co tonulih Musa ponah Hukum agama Yahudi. Kokon dulun Yahudi co nukui nyan idi hurmat ma are.
13Are dombut tonjok nyan sila akuh. Hieeh, ‘Konduang kuh Saulus, makitu iko boraoi noto hopuli!’ Hanyih iyoh ka akuh boraoi kito are.
14Paluh Ananias mantun ma akuh, ‘Mohotaran tatu hiang to ocop mili iko ika monau kojere-Eh, ika noto Yesus co hopompaluh bolum bujur nyan toto Mohotara hintang ika ngoneh suara-Eh ingkan baun tioh leh. 15Aang cioh tojadi ma iko ika iko jarin saksi-Eh. Iko sobulih momborita ma kokon dulun tintun uras co tonoto hintang tongoneh mu. 16Jadi makitu, ome kanto mu bat. Kokat bat hintang nyarah aropmu ina tomombaptis. Bodoabat hia Tuhan Yesus ika kawan dosammu tomongampun.’
17Opah iyoh, akuh hopuli hia Yerusalem. Kotika akuh dahat bodoa nyan Lopo Mohotara, akuh oko pongito ingkan Tuhan. 18Ponah pongito cioh Tuhan hopander ma akuh, ‘Kawan dulun Yahudi nyan intoi aroh angar porocaya ma antunmu tintun Akuh. Maka, iko sobulih jion tulak ingkan Yerusalem tuh.’
19Tapi akuh museh, ‘Tuhan, iroh monau bahawa batuh akuh ngolawan kawan dulun co porocaya ma-Iko. Akuh ocop muntam hia kawan lopo ika sombayang ika nawan iroh. Akuh molantu iroh hintang nyarah ika doh tomokuntam hia ponah seper. 20Bokon ma iyoh oko dulun co araieh Stepanus co bosaksi tintun Iko. Kotika Stepanus tongompatoi akuh oko nyan ika cioh hintang sotuju ka bahawa are tongompatoi. Akuh tonjok monjaga jubah kawan dulun co ngompatoi are yoh.’
21Tapi Tuhan mantun ma akuh, ‘Tulakbat! Awi Akuh angar nyoruhan iko hia kawan ika co ocu ingkan intoi. Iko sobulih momborita tintun Akuh hia kawan bangsa dulun co bokon ma Yahudi.’ ”
22Dulun orong yoh ngoneh Paulus mantun bahawa Tuhan nyoruhan are hia kawan dulun bokon ma Yahudi. Tapi opah iyoh, iroh noriak ma komuhat, “Ngompatoi bat dulun conon! Awi aroh pantas are bolum!”#22:22 Kawan dulun Yahudi tatuh bopikir baya iroh leh co angar tonyolamat, aroh kawan bangsa co bokon eh. Maka, iroh aroh boraoi porocaya amun Tuhan kuloi iroh paluh nyoruhan Paulus hia kawan dulun co bokon ma Yahudi. Podahar, iroh co kuloi Are. Dulun aroh tonyolamat bodasar ma suku, tapi bodasar ma koporocayaan ma Yesus.
Paulus nyan ponah benteng dulun Romawi
22:23-29
23Iroh horoholuh noriak. Iroh nyoloko jubah doh holuh morawuh dabu hia hunyung.#22:23 Tindakan doh monunjuk iroh siap medak Paulus ma batu. Tapi iroh aroh boraoi hapo batu tului oko tontara Romawi nyan intin. Jadi, iroh hapo dabu leh. 24Maka, komandan cioh lansung nyuhu ika Paulus tomehen muntam hia ponah benteng. Are mihi porintah ika Paulus tomorisa samir tomoncambuk. Are nyau monau kura dulun orong yoh noria riak ma angit timo Paulus isan iyoh.#22:24 Kopala tontara hintang kawan tontara aroh paham bohasa dulun Yahudi. Maka iroh aroh paham antun Paulus ma dulun orong taiyoh niin.
25 Jadi kawan tontara mehen Paulus hia ponah. Iroh mowot are ika tomoncambuk, tapi sorinai Paulus tomoncambuk Paulus mantun ma kopala pasukan co tonjok nyan intin, “Aroh holuh moncambuk akuh awi akuh iyohco warga korojaan Roma. Meleh kole akuh rinai tomongadili socara resmi”#22:25 Monurut poraturan pomorintah Romawi, dulun co warga negara Romawi aroh boraoi tomoncambuk sorinai tomongadili houn.
26Ngoneh antun Paulus yoh, kopala tontara cioh molapor eh ma komandan eh. Hieeh, “Pa komandan, dulun cioh warga negara Roma! Ome co angar tongompiam?”
27Maka, komandan cioh dombut hia Paulus. Are ngisok, “Mantun eboh ma akuh: Mainboh iko bujur-bujur warga negara Roma?”
Paulus museh, “Iyoh bujur.”
28Komandan cioh mantun, “Akuh sobulih darang nahur lekai ika kuh jarin warga negara Roma.”
Paulus mantun, “Akuh aroh sobulih nahur. Akuh haba hak cioh awi akuh tonganak sobagai warga negara Roma.”
29Hayak ngoneh bahawa Paulus bujur-bujur ico dulun warga negara Roma, uras jarin polangar akut doh. Kawan tontara co tonyuhu ika moncambuk Paulus, iroh lansung surut. Komandan mahi jarin takut awi are nyuhu ika Paulus tomowot.
Paulus nyan tohimo kolompok pomimpin agama Yahudi co poko bokuasa
22:30–23:11
30Tapi komandan cioh nyau monau socara jelas kura Paulus tonondah pian kawan dulun Yahudi taiyoh. Jadi, nyan ondo opahiyoh are nyuhu ika Paulus tomokusit ingkan seper. Paluh, are ngumpur kokon pomimpin Yahudi. Oko kawan imam kopala hintang kokon pomimpin Yahudi co poko bokuasa nyan intin. Are nyuhu ika Paulus tomehen ingkan benteng paluh tonjok nyan tohimo iroh.
Currently Selected:
Kesah Rasul 22: TBSS
Highlight
Copy
Compare
Share
Want to have your highlights saved across all your devices? Sign up or sign in
