Kesah Rasul 21
21
Paulus tulak hia Yerusalem
21:1-16
1Mula bahat songan kaih hopisah ma kawan ponotua jomaat Epesus. Kaih tulak cakat kapal ingkan Miletus lansung hia pulo Kos. Manyuap ondoeh, kaih hia kota Rodos. Ingkan intin, kaih ngoholuh solana dapot hia kota Patara. 2Nyan idi kaih tobarung kapal co angar mitah hia derah Fenisia. Maka, kaih tulak cakat kapal cioh. 3Kotika kaih dahat bolayar, kaih kito pulo Siprus nyan topit komuloi. Tapi kaih holuh bolayar dapot hia kota Tirus nyan derah Fenisia nyan propinsi Siria. Kapal cioh tondo nyan intin ika mungkar sangai eh paluh potoka eh nyan intin.
4Jadi, kaih nganda kawan dulun co porocaya ma Yesus nyan intin. Kaih hiloi umba iroh kotahin pitu ondo. Roh Mohotara mara ma iroh bahawa Paulus angar soranta nyan Yerusalem. Maka, iroh nosehat Paulus ika aroh tulak hia idi. 5Tapi hayak ocop waktueh, kaih tatap nyau tulaknuntuh hia Yerusalem. Kokon dulun co porocaya nyan intin nucu kaih dapot hia luar kota. Kawan anak oruh doh umba ka. Nyan saran pantai, kaih uras ngelop kalop holuh bodoa. 6Opah hotabe samir poromisi, kaih cakat kapal hintang iroh buli hia lopo hopomasing.
7Ingkan Tirus, kaih ngoholuh polayaran paluh dapot nyan kota Tolemais. Oko kawan dulun co porocaya ma Yesus nyan intin. Kaih hotabe ma iroh, paluh hiloi umba iroh momi cioh.
8Manyuap ondoeh, kaih tulak. Kaih tulak hia kota Kaisarea. Nyan intin kaih nukui nyan lopo Pilipus. Pilipus yoh dulun co momborita Tarung Pio. Pilipus yoh tomasuk ingkan pitu beti dulun co batuh nyan Yerusalem tomili ika molayani kawan balu landa. 9Are oko opat beti anak eh bawe co arinai ngomano. Tuhan mihi komampuan ma opat beti bawe cioh ika porapot tungon ingkan Mohotara.
10Kaih ocop nukui nyan Kaisarea yoh kotahin pira pira kondai. Opah iyoh, oko ico beti dulun co porapot tungon ingkan Mohotara co dombut ingkan propinsi Yudea. Araieh Agabus. 11Are ngoroni kaih ika porapot tungon ingkan Mohotara. Are monu owot kahang Paulus, holuh mowot paan siluieh tarop. Hie eh, “Roh Mohotara mantun bahawa co empun owot kahang cotuh angar tomowot ma cara co samah. Kawan dulun Yahudi nyan Yerusalem angar mowot are. Paluh iroh angar nyarah are ma kawan dulun co bokon ma Yahudi ika are tohukum.”
12Kaih hintang kawan dulun bokon co porocaya nyan intin ngoneh antun nabi Agabus yoh. Maka, kaih uras ngatot Paulus ika aroh ngoholuh solanai eh hia Yerusalem. 13Tapi Paulus museh, “Aroh ikan nangih, onon umpi atoi kuh hanuh! Akuh ocop siap tonawan nyan Yerusalem. Malah, akuh ocop siap matoi poko tului akuh porocaya ma Tuhan Yesus.”
14Ma antun Paulus yoh, kaih sadar are aroh kolu norima nosehat kaih. Maka, kaih aroh bat nyuwah mubah koputusan eh. Kaih baya mantun, “Oluleh kojere Tuhan co nyolung.”
15Opah pira pira ondo nyan Kaisarea, kaih bosiap-siap ika tulak hia Yerusalem. 16Pira pira dulun porocaya ingkan kota cioh umba nucu kaih. Iroh nucu kaih mahah lopo Manason. Manason asaleh ingkan pulo Siprus. Are ocop tahi jarin porocaya ma Yesus. Kaih hiloi nyan lopo eh.
Paulus sopopak ma kawan ponotua jomaat nyan Yerusalem
21:17-26
17Kotika kaih dapot nyan kota Yerusalem, kawan dulun co porocaya ma Yesus monyambut kaih ma kosanang songa. 18Manyuap ondo eh, Paulus, kaih samah nyopopak Yokobus. Kokon ponotua co bokon mahi ocop hokumpur nyan intin. 19Paulus paluh hotabe ma iroh. Cicip lau Paluh ngesah tintun orong aang ponah polayanan eh co tonguan Mohotara indan kawan bangsa co bokon ma Yahudi.
20Ngoneh iyoh, kokon ponotua nara Mohotara. Paluh iroh mantun ma Paulus, “Konduang, iko leh kito ocop oko ribuan dulun Yahudi co porocaya ma Yesus. Iroh uras herak tuhit ma kawan porentah Mohotara co tonulih Musa. 21Iroh ocop ngoneh bahawa iko majar kawan dulun Yahudi co nukui nyan derah kawan bangsa bokon ma Yahudi. Iroh ngonehkabar co sala bahawa iko mantun ma kawan dulun Yahudi aroh usah bat tuhit ma kawan porentah Mohotara iyohonon aroh malak kawan anak doh hintang aroh umba adat turan to dulun Yahudi.
22Jadi makitu ito porulu mutus aangco ika ngompio koadaan cotuh. Mositi iroh angar ngoneh bahawa iko ocop oko nyan intoi. 23Maka, kaih ponotua musul iko ika umpi hantuh: Nyan halo kaih, oko opat beti co rahat bojanji husus ma Mohotara. 24Umbabat homboh iroh ponah upacara co umpi doh borasih socara rohani. Tulakbat umba iroh hia polontaran Lopo Mohotara. Nahurbat kokon biaya indan kawan kurban porsembahan hintang co bokon co angar doh momposembah eh hia Mohotara. Maka, iroh boraoi bat ngunting ballo doh sobagai ciri iroh ocop molalus hajat doh. Waktu kawan dulun kito iko umpi isanioh, iroh angar monau bahawa iko tatap mohormat hintang tuhit ma kawan porentah Mohotara co tonulih Musa. Maka, iroh angar monau tarung tintun iko co tumun aang tokoneh doh samah sindo aroh bujur.
25Sadangkan tintun kawan dulun bokon ma Yahudi co ocop porocaya ma Yesus, kaih ocop umpi surat indan doh.#21:25 Noto Kesah 15:22-35. Ponah surat cioh, kaih monjelas koputusan kaih tintun kawan porentah co omoh sobulih doh tuhit ma. Iyohonon, aroh hokoruh ma dulun co bokon ma oruh atawa banam. Aroh kuman daging komolum co tomposembah hia kawan dewa. Aroh kuman daging komolum co tonyiok awi incah oko daha eh. Aroh kuman daha.”
26Jadi, nyan ondo opahiyoh, Paulus umba opat beti dulun taiyoh ponah upacara co umpi iroh borasih ingkan kolakuan co ceet. Opah iyoh, are tulak hia polontaran Lopo Mohotara. Nyan intin, are mara ma kawan imam kotika upacara cioh angar lekas, kotika iyoh ka iroh mehen kurban komolum hopomasing. Paluh, kawan imam taiyoh boraoi momposembah kawan komolum taiyoh indan doh.#21:26 Paulus aroh monentang poraturan indan dulun Yahudi. Tapi are majar bahawa kawan dulun sobulih porocaya ma Yesus ika tonyolamat, aroh baya tuhit ma kawan porentah. Are umba upacara tuh ika kawan dulun Yahudi co porocaya aroh sala paham are. Are nyau ika oko hokohico antara kokon dulun co porocaya.
Paulus tonawan nyan Lopo Mohotara
21:27-36
27Kotika waktu pitu ondo yoh jonyo lekas, oko pira pira dulun Yahudi ingkan propinsi Asia noto Paulus oko nyan polontaran Lopo Mohotara. Paluh iroh mohasut dulun orong ika sangit paluh nawan Paulus, 28iroh noriak, “Haas dulun Yahudi, dohopbat! Tuhceh are co majar kokon dulun nyan omoh-omoh ika ngolawan bangsa to. Are majar dulun ika ngolawan porentah hintang poraturan Mohotara co tonulis Musa. Are mahi majar dulun ika aroh mohormat Lopo Mohotara tuh. Malah makitu are ocop molangar palin ika co borasih tuh tului are mehen dulun Yunani hia intoi.”
29(Iroh isan otuh awi nyan ondo co bokon, iroh kito Paulus homboh Tropimus. Are dulun Yunani ingkan kota Epesus. Iroh nyompan bahawa Paulus ocop mehen dulun cioh hia polontaran Lopo Mohotara)#21:29 Dulun bokon Yahudi co muntam agama Yahudi, baya boraoi nyuku nyembah Mohotara nyan polontaran luar leh. Opah iyoh, oko polontaran bawen Yahudi. Labih ponah kole oko polontaran kawan bakah Yahudi. Baya imam boraoi hia ponah gedung Lopo Mohotara.
30Opah doh mantun nain iyoh, ngolauh kota jarin kacau. Dulun orong tongkoru-koru bokumpur toliut Paulus. Iroh nawan are paluh maksa are hia luar ingkan kuta Lopo Mohotara yoh. Hanyih iyoh ka kokon tungkang kuta Lopo Mohotara tonutup. 31Dulun orong yoh nyau ngompatoi Paulus. Tapi tarung tintun kokicuh cioh ocop dapot hia kopala tontara Roma. 32Are homboh kawan kopala tontara hintang kawan tontara holuh bogarak. Iroh maju hia ika dulun orong yoh. Kotika kawan dulun Yahudi kito kopala tontara hintang tontaraeh dombut, iroh umbot molantu Paulus.
33Opah kopala tontara cioh dombut, are nyuhu ika Paulus tonawan. Jadi duo silun Paulus tomowotnyan silun duo beti tontara co nyan topit komuloi eh hintang kontouieh ma duo rantai. Paluh, kopala tontara cioh ngisok, “Omeboh dulun cotuh? Ome kosolaa co ocop tongompiaieh?”
34Tapi oko dulun co noriak santuh. Dulun tonga noriak nain otuh. Suara kawan dulun dalo kicuh. Maka, kopala tontara cioh aroh liai momasti comoh co tuu. Poko tului iyoh, are morentah ika Paulus tomehen hia benteng doh.
35-36Jadi, iroh mehen Paulus hia idi. Tapi, dulun orong ngonulu iroh dapot kucan batu co nuntuh hia benteng yoh. Dulun orong hotorenye ngorubut Paulus samir noria riak, “Ngompatoi are non! Ngompatoi are non!” Maka, kawan tontara topaksa mangkat Paulus.
Paulus nyawot ijin hopander ma dulun orong
21:37-40
37Kotika kawan tontara yoh ocop siap mehen Paulus hia ponah benteng, Paulus ngisok hapo bohasa Yunani ma kopala tontara yoh. Hieeh, “Pa, boraoipai akuh hopander honyulu leh ma iko?”
Kopala tontara museh, “Iko boraoi bohasa Yunani! 38Jadi, iko bokon pomboruntak ingkan Mesir cioh? Pira pira waktu co tumun aang, are hontong opat ribu dulun bosonjata ngolawan pomorintah Romawi. Tapi makitu iroh uras buho hia padang gurun. Iko iyohco are pai?”
39Paulus mantun, “Ndoi bokon lau jah, aku tuh bokon dulun cioh. Akuh iyohco dulun Yahudi. Asal kuh ingkan kota Tarsus kota co penting nyan kilikia. Akuh tuh iyohco warga ingkan kota cioh. Jadi, boraoi pai akuh hopander ma dulun orong tuh?”
40Maka, kopala tontara mihi ijin indan Paulus. Paulus tonjok nyan tungkui kucan paluh mihi kode ma siluieh indan dulun orong yoh ika doh tonih. Kotika iroh tonih, are hopander ma iroh hapo bohasa dulun Yahudi, iyoh onon bohasa Ibrani.
Currently Selected:
Kesah Rasul 21: TBSS
Highlight
Copy
Compare
Share
Want to have your highlights saved across all your devices? Sign up or sign in
