Kesah Rasul 20
20
Paulus nyan propinsi Makedonia hintang Akaya
20:1-6
1Opah kawan dulun nyan kota Epesus tenang bat, Paulus ngumpur kokon jomaat. Are mihi somangat ika iroh porocaya ma Yesus labih yakin, paluh mantun ‘Pio-pio ikan nukui’ sambir hotabe ma iroh. Opah iyoh, are tulak hia propinsi Makedonia. 2Are nganda jomaat nyan bobagai derah nyan propinsi cioh. Are mihi orong nosehat ika doh porocaya ma Yesus labih yakin. Opahiyoh, are tulak hia propinsi Akaya, co tonisi ka tana Yunani. 3Are nukui nyan indi kotahin tolu bulan. Opah iyoh, are bosiap siap ika cakat kapal hia propinsi Siria. Tapi are ngoneh oko kawan dulun Yahudi dahat boroncana ika ngompatoi are ponah solanai eh yoh. Poko tului iyoh, are mutus eh ika hopuli hia Yerusalem buah Makedonia. 4Oko kawan dulun co umba are ponah solanai eh yoh, iyohonon: Timotius, Sopater (anak Pirus ingkan kota Berea), Aristarkhus hintang Sekundus (dulun duo iyoh ingkan kota Tesalonika), Gayus (ingkan kota Derbe), hintang Tikhikus doruo Trofimus (doruo ingkan propinsi Asia). 5Iroh tulak labih houn hangki Paulus hintang akuh. Jadi, iroh nganto kaih nyan kota Troas. 6Karo Paulus tondo soun nyan kota Pilipi. Opahiyoh, umbot ondo poraya Rute aroh Bodagi, kaih cakat kapal hia Troas. Opah limo kondai solana, karo dapot. Nyan intin kaih sopopak ma iroh co houn ma kaih. Kaih uras nukui nyan idi kotahin pitu ondo.
Nyan Troas, Paulus umpi Eutikhus bolum hopuli
20:7-12
7Nyan ondo portama ponah menggu cioh, kaih hintang kawan dulun co porocaya nyan Troas bokumpur. Kaih uras samah-samah homboh kuman rote hintang ngorih angur ika mongingat Yesus. Paulus hintang kaih jolahai hico solanaieh boroncana ika tulak ingkan Troas manyuap ondoeh. Maka, Paulus majar iroh tahi lau, dapot bontung malom. 8Kaih uras bokumpur nyan laoh hunyung, saoh co kotingkat tolu. Oko orong polita co bolum.
9Nyan intin, oko ico bakah lehoi tuot nyan tungko. Araieh Eutikus. Somontara Paulus incah horoholuh hopander, Eutikus jarin potontundu lau. Kosodahai are aroh lian noro tundueh. Are tontirui lonyok, jadi lansung tahak ingkan tingkat tolu yoh dapot hia tana. Lansung oko dulun toka mangkat are. Tornyata, are ocop matoi. 10Tapi Paulus toka, ngoncahap ngohampu eh nyan bolikat bakah lehoi cioh, holuh ngohapon are. Umbot iyoh, oluco bakah lehoi cioh ocop matoi tapi Paulus paluh mantun ma kokon dulun nyan intin. Hieeh, “Aroh kwatir, awi are incah bolum.”
11Opahiyoh kaih uras hopuli nukat hia hunyung. Paulus momimpin kaih homboh samah-samah kuman rote hintang ngorih angur ika mongingat Yesus. Umbot kuman, Paulus paluh majar dapot ulak nyuap. Opah iyoh, are tulakhombo homboh ma kaih jolahai nyolana. 12Eutikus yoh tonucu buli hia lopoeh. Kokon kawan dulun porocaya nyan kota Troas yoh korinah jorih tului are hopuli bolum.
Solanan Paulus ingkan Troas hia kota Miletus
20:13-16
13Jadi rombongan kaih tulak ingkan Troas mahah kota Asos. Paulus ocop mongatur roncanaeh. Are tarop buah calan tana, tapi kaih co bokon cakat kapal. Maka, kaih labih houn dapot nyan Asos paluh ngindai Paulus nyan idi. 14Waktu Paulus dapot nyan Asos, are mahi cakat kapal homboh kaih. Paluh, kaih uras ngoholuh Solana mahah kota Metilene.
15Nyan ondo opahiyoh, kaih cakat kapal ingkan Metilene dapot hia dokin pulo Kios. Nyan ondo opahiyoh eh kole, kaih nyihin pulo Samos. Ico ondo kole opah iyoh, kaih dapot nyan kota Miletus. 16Ingkan pulo Samos hia kota Miletus, kaih aroh tondo nyan kota Epesus. Paulus ocop mutus eh sanioh. Are aroh kolu tahi-tahi nyan propinsi Asia awi are jere jion dapot Yerusalem. Amun sompetan, are nyau oko nyan idi nyan ondo raya Pentakosta.
Paulus promisi tulak samir hotabe ma kawan ponotua ingkan Epesus
20:17-38
17Poko tului kaih aroh tondo nyan Epesus, maka Paulus nyuhu ico beti ika porapot tungon hia kawan ponotua nyan uwoidi. Are nyawot ika iroh dombut nyopopak are nyan Miletus. 18Jadi, iroh dombut. Paluh, Paulus mantun ma iroh, “Ikan monau cara akuh bolum kotahing kuh nukui umba ikan. Ingkan ondo kosulak akuh dapot nyan Asia dapot waktu cotuh, ikan ocop monau kokoieh. 19Akuh molayani Tuhan ma korandah atoi. Ponah polayanan yoh, derek akuh dapot nangih. Akuh saum orong pondoritaan tului kawan dulun Yahudi co aroh porocaya ma Yesus horoholuh nyau ngompatoi akuh. 20Oluco sanioh, akuh tatap momborita tintun Yesus. Akuh bogawi indan Tuhan aroh tului koharat kuh hangki ikan. Akuh majar nyan muka umum atawa ingkan lopo hia lopo. 21Akuh horoholuh majar ma koterus terang, iyoh ma kawan dulun Yahudi hintang dulun Yunani, ika iroh sobulih naat dosa paluh bolum tuhit ngonyorih atoi Mohotara. Iroh mahi sobulih porocaya ma Yesus, Tuhan co bokuasa ma kokon to.
22Makitu, akuh sobulih mahah Yerusalem awi Roh Mohotara ocop nyuhu akuh. Akuh sobulih tuhit ma-Eh oluco akuh aroh monau ome co angar pian dulun ma akuh nyan uwoidi. 23Akuh baya monau otuh. Nyan sika kota co tongohia kuh, Roh Mohotara ocop mara ma akuh bahawa daai akuh angar tomokuntam hia ponah seper. Akuh mahi angar mongalami pondoritaan. 24Oluco akuh tongompatoi, tapi akuh aroh poduli., Tuhan Yesus ocop mihi tugas indang kuh ika momborita Tarung Pio bahawa Mohotara ocop potintun kopioi-Eh ma kolunon. Akuh sobulih ngorapot garis ahir. Cioh co penting, aroh kobolum kuh.
25Akuh ocop monau ikan uras aroh angar sopopak ma akuh bat eh. Tapi akuh ocop majar kokon ikan tintun Korojaan Mohotara. 26-27Aku aroh solingo janji kuh ma Mohotara, akuh ocop majar ikan tintun kokon roncana Mohotara. Poko tolui iyoh, ngondai tuh akuh mantun nain otuh: Amun oko dulun nyan halo ikan co buah hukuman Mohotara daai tului aroh porocaya ma Yesus, iyoh aroh kosolaangkuh.
28Ikan sobulih monjaga arop me hintang kawan jomaat ika tatap porocaya. Mohotara ocop nahur dosan doh ma daha Tioh leh. Maka, kawan dulun taiyoh co porocaya ma Yesus ocop jarin dulun tioh Mohotara bat. Ikan ocop tomili Roh Mohotara ika momimpin kawan jomaat taiyoh. Poko tului iyoh, ikan sobulih monjaga iroh somporengu kawan gembala monjaga pumpun dombaeh. 29Akuh monau bahawa opah akuh tulak, angar oko kawan dulun co dombut hia ikan mehen ajaran co sala. Iroh angar nyuwah umpi dulun ika porocaya ajaran doh co sala yoh. Iroh somporengu kawan serigala dangas co jere ngompatoi kawan domba me. 30Malah ingkan halo ikan tuleh angar oko kawan dulun co majar ajaran co sala. Iroh angar bousaha ika dongan aroh bat porocaya ajaran co buah tapi jarin pongikut doh. 31Poko tului iyoh, bojaga-jagabat! Mingat ehleh! Kotahin tolu toun, hondo homalom akuh aroh umbot majar ikan hopomasing. Akuh momporingat ikan ma orong danum mata ika me tatap porocaya ma Yesus.
32Makitu, akuh nyarah ikan ma Mohotara. Olu bat Mohotara nyolindung ikan. Tatap leh porocaya ma Tarung Pio tintun kopio atoi Mohotara. Olu bat Mohotara hintang Tarung Pio non umpi ikan porocaya ma Yesus sasar dohon. Awi Mohotara mihi aang co pio hinut yoh, co ocop tonongkahin indan dulun co husus indan Mohotara,
33Akuh aroh piji nyau tomihi harta pian dongang, iyoh borupa perak, bulou, atawa lembon pokajan. 34Ikan tarop leh monau bahawa akuh bogawi ina mondakan kokon kobutuhan kuh. Akuh nampa kemah ma koduo silung ku tuleh. Ingkan gawing ku yoh, akuh haba cukup indan kawan jolaha co molayani umba akuh ka.
35Ponah kokon taiyoh co tongompiang kuh, akuh jarin cuntu indam me. Ikan mahi sobulih bogawi bohimat paluh dohop kawan dulun co mala. Aroh solingo antun Tuhan Yesus, ‘Mohotara labih momberkat dulun co mihi bantuan hangki dulun co torima bantuan.’ ”
36Opah Paulus mantun uras taiyoh, are ngelop kalop holuh bodoa homboh kokon ponotua ingkan Epesus yoh. 37Iroh uras nangih samir ngohapon hintang marok are boula-ulang. 38Korinah kojorung doh, mele-meleh tului Paulus mantun bahawa iroh aroh angar sopopak are bat eh.
Opahiyoh, iroh nucu are hia kapal.
Currently Selected:
Kesah Rasul 20: TBSS
Highlight
Copy
Compare
Share
Want to have your highlights saved across all your devices? Sign up or sign in
