Kesah Rasul 19
19
Paulus majar nyan Epesus
19:1-10
1Kotika Apolos incah oko nyan kota Korintus nyan propinsi Akhaya, Paulus ocop nyari nganda pira pira derah bokon nyan propinsi Galatia hintang Frigia. Are nyalan holuh dapot nyan Epesus nyan propinsi Asia. Nyan intin are sopopak ma pira pira dulun co porocaya ma Yesus. 2Are ngisok ma iroh, “Kotika ikan jarin porocaya, mainboh ikan ocop norima Roh Mohotara?”
Hien doh, “Arinai. Malah kaih arinai piji ngoneh bahawa oko Roh Mohotara.”
3Maka are mantun, “Amun sanioh, ikan tomombaptis ma baptisan co mohboh?”
Hien doh, “Ma baptisan Yohanes.”
4Paluh, Paulus monjelas bat. Hieeh, “Yohanes mombaptis kawan dulun ika ciri bahawa iroh ocop naat kawan dosan doh. Yohanes mahi momborita bahawa angar oko Dulun co dombut opah are. Yohanes mantun bahawa kawan dulun sobulih porocaya ma Dulun cioh. Dulun cioh iyohco Yesus.”
5Kotika iroh ngoneh iyoh, iroh tomombaptis ponah aran Tuhan Yesus. 6Paluh, Paulus mandak siluieh nyan hunyung iroh. Roh Mohotara muntam hia ponah iroh. Iroh molai hopander ponah bobagai bohasa co aroh piji doh bolajar eh. Iroh mahi mantun kawan tungon ingkan Mohotara. 7Oko kira-kira duo balas beti dulun co tomombaptis yoh.
8Paulus mahi tulak hia lopo ika sombayang agama Yahudi nyan kota Epesus. Kotahin tolu bulan, are santar majar nyan intin. Ma kobohanyi are hotaleh ma kawan dulun nyan intin. Are monjelas tintun Korojaan Mohotara. Are bousaha poyakin iroh bahawa Yesus iyohco Laca Co Tomonjanji Mohotara co momorintah nyan Korojaan Mohotara yoh. 9Tapi oko pira pira dulun co ngomahang atoi doh. Iroh kuloi ika porocaya ma Yesus. Malah nyan muka umum iroh mohina ajaran Tuhan Yesus. Poko tului iyoh, Paulus naat lopo ika sombayang cioh. Are mehen kawan dulun porocaya nyan intin hia ika co bokon. Aran ika cioh iyohco Sokulah Tiranus. Paulus majar nyan intin sika ondo. 10Are majar dulun Yahudi hintang dulun Yunani kotahin duo toun. Maka, uras dulun co nukui nyan propinsi Asia ngoneh tintun Tuhan Yesus.
Yesus labih bokuasa hangki ilmu sihir
19:11-20
11Mohotara mihi kuasa ma Paulus ika nguan kawan aang co mosotahir co bohimat lau. 12Malah saput tangan atawa kain co piji tohapan Paulus, amun dulun bokon hapo eh boraoi ka ika pomambuh dulun. Amun kawan kain taiyoh tomandak nyan tungkui kawan dulun co hotoro, maka iroh jarin mambuh. Amun kawan kain taiyoh tomandak nyan tungkui kawan dulun co tonyarung, maka kawan roh jahat pusit ingkan iroh ka.
13-14Tapi oko imam kopala dulun Yahudi. Araieh Skewa.#19:13-14 Mungkin Skewa tuh aroh bujur-bujur imam kopala. Are baya hapo sotilah cioh ika labih orong dulun porocaya ma are. Are oko anak eh pitu beti bakah. Kokoieh jarin tukang sihir. Cara pomolum doh aroh nonan ingkan kota hia kota co bokon. Nyan kota Epesus, iroh bousaha ngomuho kawan roh jahat hapo aran Tuhan Yesus.#19:13-14 Biasaeh tukang sihir naah sogala macam aran dewa ika haba kuasa. Iroh aroh porocaya ma Yesus. Hien doh, “Paulus majar tintun Yesus. Ma kuasan Yesus yoh, kaih morentah roh jahat pusit ingkan dulun cotuh.”
15Tapi roh jahat cioh museh, “Akuh ocop nyono Yesus. Akuh mahi monau Are mihi kuasa ma Paulus ika ngomuho kaih Tapi ikan arelu oko kuasa ome-ome!” 16Lansung dulun co tonyarung roh jahat yoh nompesut, nyarang iroh. Are muhat molantu iroh holuh nirat lembon doh. Iroh topaksa tongkaru ingkan lopo cioh, somurang hintang haring.
17Tarung tintun kojadian cioh tongoneh uras dulun co nukui nyan Epesus, iyoh dulun Yahudi atawa co bokon ma Yahudi. Maka, iroh uras jarin takut. Iroh nara aran Tuhan Yesus awi iroh sadar Are korinah bokuasa. 18Orong dulun ingkan iroh jarin porocaya ma Yesus. Iroh dombut. Paluh, nyan muka umum iroh mongaku kuan gawin doh co jahat. 19Orong ka ingkan iroh yoh co piji umpi sihir. Iroh yoh ngumpur kawan buku sihir doh paluh mapang eh nyan muka dulun orong. Lekan kawan buku taiyoh tomohitung. Kuhat eh kira-kira liman pulu ribu kodilat duit perak.#19:19 Mungkin nilai duit cioh samah leh rimai ma gajih ico toun indan dulun 140 beti.
20Poko tului uras eh non, sasar orong dulun ngoneh tarung tintun Tuhan Yesus. Kawan dulun jarin sadar Yesus korinah bokuasa. Sasar orong dulun jarin porocaya ma-Eh.
Kongicuh nyan Epesus
19:21-41
21Tului dorongan Mohotara, Paulus boroncana ika tulak hia Yerusalem. Ponah solanai hia idi, are nyau buah propinsi Makedonia hintang Akhaya ika are boraoi nyari kawan jomaat nyan idi. Are mahi nyau hia kota Roma. Hieeh, “Opah kuh tulak hia Yerusalem, akuh sobulih nganda kota Roma.” 22Maka, Paulus nyoruhan dulun duo beti jolahai hico gawi, iyohonon Timotius doruo Erastus. Iroh nosoun are hia propinsi Makedonia. Tapi are nukui pira pira kotahi oni nyan kota Epesus nyan propinsi Asia.
23Nyan kotika iyoh, oko kawan dulun monentang kawan ajaran Tuhan. Iroh umpi kongicuh bahai nyan kota Epesus yoh. 24Kongicuh cioh molai tojadi pian dulun co empun usaha perak araieh Demitrius. Demitrius hintang jolahai eh hico gawi umpi kawan kuil kojing ingkan perak. Kawan kuil taiyoh tonampa deon lopo ika nyuku nyembah dewi Artemis co oko nyan kota Epesus yoh. Iroh haba orong duit ingkan usaha cioh.
25Demitrius yoh ngumpur jolahai hico gawieh hintang kokon dulun ingkan luar ika gawieh samah samah tukang perak ka. Hien Demitrius ma iroh, “Kawan konduang, ikan uras monau bahawa ito haba orong duit ingkan usaha cotuh. 26Tapi makitu ikan taropleh ngoneh ajaran Paulus. Are majar bahawa kawan kopatung isan co pian to, bokon dewa tapi baya tonampa silun kolunon leh. Ikan taropleh ocop noto bahawa Paulus ocop mubah pikiran orong dulun, iyoh ponduduk Epesus atawa ponduduk ingkan kokon derah nyan propinsi Asia. 27Onon mombohaya ito. Kawan usaha to angar tomohina. Nohani kuil dewi Artemis to tuh daai angar tomangap sia-sia. Daai dulun aroh angar mangap Artemis layak tonyembah! Kuantuu colaka! Awi areleh dewi co tonarung tonara pian kokon dulun nyan Asia malah nyan ngolauh dunia.”
28Kotika kokon tukang perak ngoneh iyoh, jarin korinah angit doh. Iroh noria riak, “Hebatboh Artemis, dewi dulun Epesus! Hebatboh Artemis!”
29Orong dulun bokon jarin tolibat. Ngolauh kota cioh jarin kacau. Dulun orong rami rami tongkoru muntam lapangan umum co bahai. Duo jolahan Paulus tonawan holuh tomaksa hia idi kaeh. Aran doruo Gayus hintang Aristarkus. Iroh ruo ingkan Makedonia tapi umba Paulus ponah polayanan eh. 30Waktu iyoh, Paulus mahi nyau muntam hia ponah lapangan cioh. Are nyau hopander ma dulun orong yoh. Tapi kawan dulun co porocaya aroh hoo are. 31Malah pira pira pojabat pomorentah propinsi Asia mahi porapot tungon ika are aroh muntam hia ika cioh. Kawan pojabat taiyoh ocop jarin jolahan Paulus ingkan batuh.
32Koadaan nyan lapangan cioh kacau lau. Oko dulun co noriak santuh. Dulun bokon noriak angco bokon. Pokongorong dulun aroh monau sama sindo ika arai iroh hokumpur nyan intin. 33Kawan dulun agama Yahudi ngonyuhung ico beti hia muka. Araieh Aleksander. Maka, oko kawan dulun co bopikir are co sala. Aleksander mihi kode ma silui ika dulun orong tonih. Are jere monjelas bahwa masalah cotuh aroh tonyabab pian dulun Yahudi. 34Tapi dulun orong nyono are sobagai dulun Yahudi. Maka, iroh aroh kolu ngoneh are. Iroh noria noriak, “Hebatboh Artemis, dewi dulun Epesus!” Kotahin kira-kira duo jam, dulun orong horoholuh noriak sanioh.
35Opahiyoh, sokotaris kota cioh nyuhu ika dulun orong yoh tenang. Hieeh, “Haasih dulun Epesus, aroh kicuh! Mositi uras dulun nyan dunia tuh ocop monau bahawa ito dulun Epesus co monjaga kuil Artemis, dewi co poko hebat! Uras dulun ocop monau bahawa itoboh co monjaga kopatung Artemis. Kopatung cioh nokah ingkan langit. 36Arelu oko dulun co lian naleh konyataan ang cioh. Poko tului iyoh, kojerebat ito tenang. Arohbat umpi angco roko tomomikir houn. 37Sobulih eh ikan aroh mehen dulun duo otuh hia intoi ma kongicuh isan otuh. Iroh aroh nako ome bewe ingkan kuil dewa to. Iroh aroh mohina are. 38Amun Demitrius hintang jolahai hico gawi oko mosalah ma dulun, oko aturan ika ngomeres mosalah cioh. Iroh sobulih mehen porokara cioh hia sidang pongadilan. Oko kawan hakim co angar mongadili porokara antara duo pihak tuh. 39Amun ikan incah oko mosalah co bokon, mosalah cioh sobulih tonyolesai daai ponah sidang rayat co resmi. 40Ikan arelu oko alasan co resmi ika hokumpur ondo tuh. Amun ikan umpi kongicuh isan otuh, ito aroh boraoi monjelas eh ma pomorintah Romawi. Conon bohaya awi daai iroh hegah nyala kokon to.”
41Ngoneh antun sokotaris kota cioh, maka kumpulan rayat taiyoh bubar.
Currently Selected:
Kesah Rasul 19: TBSS
Highlight
Copy
Compare
Share
Want to have your highlights saved across all your devices? Sign up or sign in
