Kesah Rasul 18
18
Paulus nyan kota Korintus
18:1-17
Akwila doruo Priskila
18:1-4
1Opah iyoh, Paulus tulak ingkan kota Atena. Are tulak hia kota Korintus. 2Nyan idi are sopopak ma ico beti dulun Yahudi co borasal ingkan propinsi Pontus. Arai eh Akwila. Oruh eh arai Priskila. Pira pira waktu soun ma iyoh, iroh ruo yoh nukui nyan kota Roma nyan propinsi Italia. Tapi Klaudius, laca co poko kuasa nyan korojaan Roma. Morentah ina kokon dulun Yahudi sobulih pusit ingkan kota Roma. Poko tului iyoh, Akwila doruo Priskila bungkat ingkan Roma hia Korintus. Baa-baa leh iroh nukui nyan kota Korintus, Paulus nganda nyan lopo doh. 3Gawin alo doh samah leh ma Paulus. Iroh nampa tenda ika tohoborakang. Maka, Paulus nukui hintang bogawi samah-samah ma iroh. 4Tapi sika Ondo istirahat dulun Yahudi, Paulus tulak hia lopo ika sombayang dulun agama Yahudi. Nyan intin are hopander ma kokon dulun co oko, iyohonon ma kawan dulun Yahudi hintang kawan dulun Yunani. Are bousaha poyakin iroh ika doh porocaya ma Yesus.
Silas doruo Timotius dombut mombantu Paulus momborita tintun Yesus
18:5-11
5Opahiyoh, Silas doruo Timotius dombut ingkan propinsi Makedonia. Maka, Paulus hegah hapo kokon waktueh ika momborita ma kokon dulun co boagama Yahudi.#18:5 Silas doruo Timotius ahir eh boraoi umba Paulus bat. Mungkin iroh mehen duit ingkan kawan jomaat nyan propinsi Makedonia ika Paulus aroh bat nguan tenda ika nganyap duit ika koporuluaieh (2 Korintus 11:9; Pilipi 4:14-15). Paulus monjelas socara toliti bahawa Yesus iyohco Laca Co Tomonjanji Mohotara. 6Tapi kawan dulun Yahudi taiyoh ngolawan hintang mohina Paulus. Maka, are hoburup dabu ingkan lembon ehika ciri poringat iroh. Hien Paulus ma iroh, “Akuh ocop botanggung jawab momborita Tarung Pio timo kokom me. Tapi ikan tenden aroh porocaya ma Yesus. Onon kosolaam me tarop. Daai amun ikan tomohukum Mohotara, akuh aroh butanggung jawab. Maka, molai makitu, akuh angar tulakmomborita Tarung Pio indan kawan bangsa co bokon ma Yahudi.”
7Paluh Paulus naat iroh. Are tulak hia lopo co oko nyan sila lopo ika sombayang cioh. Lopo cioh iyoh co tioh Titius Yustus. Areiyohco dulun bokon ma Yahudi tapi ocop jarin dulun porocaya ma Mohotara. 8Orong dulun nyan Korintus ngoneh ajaran Paulus paluh jarin porocaya ma Yesus, tomasuk Krispus, kopala lopo ika sombayang cioh hintang kokon dulun co nukui ponah lopo eh. Uras dulun porocaya taiyoh tomombaptis ka.
9Nyan komomi co bokon, Paulus oko ponoto ingkan Tuhan. Tuhan mantun ma eh, “Aroh takut! Tenden momborita Tarung Pio. Aroh tonih. 10Aroh takut awi Akuh somim mu! Aroko ico beti mahi co angar ngomporoh iko. Tenden majar awi oko orong umat-Kuh nyan kota cotuh.” 11Maka, Paulus tatap nukui nyan Korintus, kotahin ico toun sotengah. Nyan intin are majar Tarung Pio ingkan Mohotara tintun Yesus.
Gubernur Galio aroh mongadili Paulus
18:12-17
12 Hiah waktu Paulus incah nyan kota Korintus, pomorentah Romawi mongangkat Galio jarin gubernur propinsi Akhaya yoh. Waktu iyoh, kawan dulun Yahudi hico ngolawan Paulus. Iroh mehen are hia muka Galio ika tomongadili. 13Iroh nondah Paulus. Hien doh, “Dulun cotuh majar kawan dulun ika nyembah nyuku Mohotara. Tapi ajaran eh botontangan ma porentah hintang poraturan Mohotara co tonulis Musa nyan Hukum Torat.”
14Punan Paulus jere hopander, tapi gubernur Galio lansung museh iroh. Hien Galio, “Haasih kawan dulun Yahudi. Ikan mehen dulun cotuh hia akuh ika eh tomongadili. Amun are molanggar hukum Romawi atawa umpi kojahatan co bokon, akuh boraoi sabar ngoneh kadu me. 15Tapi otuh baya mosalah antun, atawa mosalah aran, atawa mosalah hukum me leh. Olu ikan mongurus tarop mosalah cotuh. Akuh aroh kolu mongadili mosalah somacam otuh.”
16Paluh Galio nyuhu ika iroh tongomuho ingkan ruang pongadilan cioh. 17Waktu iyoh, kokon doh nawan kopala lopo ika sombayang agama Yahudi. Araieh Sostenes. Are tomolantu nyan tohu tohun ruang pongadilan yoh. Tapi Galio sama sindo aroh poduli.
Paulus hopuli hia Antiokia, ibu kota nyan propinsi Siria
18:18-23
18Opah iyoh, Paulus incah nukui cukup tahi nyan Korintus. Paluh, are poromisi buli ma kawan dulun co porocaya ma Yesus nyan intin. Paulus tulak ingkan idi homboh homboh Priskila doruo Akwila. Iroh dapot nyan kota polabuhan Kengkrea. Nyan intin, Paulus ngunting balloeh awi are ocop ngohut hajat eh ma Tuhan. Opah iyoh, iroh cakat kapal hia propinsi Siria. 19-21Kotika iroh dapot nyan kota Epesus, Paulus muntam hia lopo ika sombayang. Are hopander ma kawan dulun Yahudi nyan intintintun Yesus. Iroh nyawot are ika nukui labih tahi nyan idi. Tapi are kuloi. Hieeh, “Amun Mohotara kuhan, akuh angar dombut kole hia intoi.” Jadi, are tulak cakat kapal, tapi Priskila doruo Akwila tatap nukui nyan kota Epesus yoh.
22Paulus pusit ingkan kapal nyan kota Kaisarea. Paluh, are tulak hia Yerusalem. Are hotabe ma jomaat nyan idi. Paluh, are ngoholuh solanaieh hia Antiokia. 23Are nukui pira pira kotahi nyan idi. Paluh, are tulak kole hokanda kawan jomaat nyan propinsi Galatia hintang Frigia. Are dohop ika konduang bakah bawe taiyoh porocaya ma Yesus ika labih yakin.
Apolos nyan Epesus
18:24-28
24 Sopondehan Paulus nyan propinsi Galatia hintang Frigia. Nyan kota Epesus propinsi Asia oko dulun co majartintun Yesus, dulun cioh araieh Apolos. Are iyohco dulun Yahudi co borasal ingkan Aleksandria ibu kota nyan negri Mesir. Are paseh hopander. Apolos mahi ocop orong mompolajari Surat Borasih. 25Are piji tomajar tintun ajaran Tuhan. Are majar tintun Yesus ma kosomangat hintang toliti. Tapi, are baya monau baptisan Yohanes.
26 Nyan kota Epesus Apolos molai majar ma hanyi nyan lopo ika sombayang dulun Yahudi. Maka, Priskila doruo Akwila ngoneh ajaran Apolos yoh oko co kurang langkap. Poko tului iyoh, iroh makat are hia lopo doh. Nyan intin, iroh monjelas ma are labih langkap kole tintun ajaran Mohotara co nyolamat dulun.
27Pira pira waktu opahiyoh, Apolos nyau tulak hia propinsi Akhaya. Maka kawan dulun co porocaya nyan Epesus jere dohop are. Iroh nulih surat indan kokon dulun co porocaya nyan idi ika are tonyambut ma kopio. Nyan Akhaya, oko kawan dulun co porocaya Yesus tului Mohotara monunjuk kopioi-Eh ma iroh. Waktu Apolos dapot nyan idi, are boguna lau indan doh. 28Are mampu lau hotaleh ma kawan dulun Yahudi co aroh porocaya ma Yesus. Nyan muka dulun orong, are bohimat ngolawan iroh. Are pompaluh ngalah iroh. Are mongguna Surat Borasih ika mombukti bahawa Yesus iyohco Laca Co Tomonjanji Mohotara.
Currently Selected:
Kesah Rasul 18: TBSS
Highlight
Copy
Compare
Share
Want to have your highlights saved across all your devices? Sign up or sign in
