Kesah Rasul 17
17
Paulus doruo Silas nyan kota Tesalonika
17:1-9
1Ingkan kota Pilipi, Paulus doruo Silas nyalan buah kota Ampipolis hintang kota Apolonia. Paluh, iroh dapot hia Tesalonika, ibu kota propinsi Makedonia. Nyan kota cioh oko lopo ika sombayang dulun Yahudi. 2Isan biasa, Paulus tulak hia lopo ika sombayang cioh houn. Nyan intin, are majar ingkan Surat Borasih. Kotahin tolu menggu botitir, sika ondo istirahat dulun Yahudi are mantun ma iroh nyan intin. 3Are momporahan kawan bagian ingkan Surat Borasih tintun Laca Co Tomonjanji Mohotara. Are monjelas bahawa Laca cioh sobulih soranta dapot matoi. Tapi, Laca cioh angar bolum hopuli. Paluh Paulus mantun, “Akuh momborita ma ikan tintun kawan antun Yesus. Are yoh iyohonon Laca Co Tomonjanji Mohotara yoh.”
4Tonga dulun Yahudi ingkan kota cioh jarin porocaya paluh jarin pongikut Yesus samah ma Paulus doruo Silas. Oko ka kawan dulun Yunani co houn ocop jarin dulun co porocaya ma Mohotara. Cukup orong ingkan iroh jarin porocaya ma Yesus. Orong bawe co topandang mahi jarin porocaya ma Yesus.
5Tapi oko kawan dulun Yahudi bokon co songai bosingon tului orong dulun momihak ma Paulus doruo Silas hangki ma iroh. Jadi, iroh ngumpur pira pira ponjahat co horoholuh nganggur nyan pasar. Samah-samah ma gorombolan taiyoh, iroh umpi korusuhan bahai nyan kota cioh. Iroh nganyap Paulus doruo Silas ika dulun orong boraoi monyidang doruo yoh. Jadi, iroh nyarang lopo Yason, ika Paulus doruo Silas nukui hiloi. 6Tapi iroh aroh popak Paulus doruo Silas nyan intin. Jadi, iroh nawan Yason hintang pira pira dulun porocaya co bokon leh. Iroh momaksa Yason hintang kawan dulun taiyoh hia kawan pojabat kota. Iroh mantun pera perat, “Oko duo dulun co ocop mongacau kokon kota nyan omoh bewe. Makitu, dulun duo iyoh oko nyan kota to ka! 7Yason tuh ocop norima iroh ruo nyan lopo eh. Kokon doh molangar kawan porentah Kaisar iyohonon laca Romawi co poko bokuasa. Iroh mantun bahawa oko laca bokon. Arai eh Yesus.”
8Kotika ngoneh antun doh yoh, dulun orong hintang kawan pojabat kota yoh jarin sangit. 9Kawan pojabat kota taiyoh momaksa Yason hintang kawan dulun porocaya taiyoh ika bayar ma duit jarin jaminan. Umbot iyoh, iroh tomolapas.
Paulus doruo Silas nyan kota Berea
17:10-15
10Nyan momi cioh, kawan dulun porocaya bawe bakah nyan intin jion nyuhu Paulus doruo Silas tulak hia kota Berea. Nyan Berea, doruo tulak hia lopo ika sombayang dulun Yahudi. 11Kawan dulun Yahudi nyan Berea bobeda hangki kawan dulun Yahudi nyan Tesalonika. Kawan dulun Yahudi nyan Berea yoh labih bohinai norima ajaran Paulus doruo Silas. Iroh tuu-tuu nyau momasti mainkah ajaran tintun Yesus mula buah. Maka, sika ondo iroh monyolidik Surat Borasih. 12Orong ingkan kawan dulun Yahudi taiyoh jarin porocaya ma Yesus. Kawun dulun Yunani mahi jarin porocaya, iyohonon kawan bawe co topandang hintang kawan bakah. 13Tapi kawan dulun Yahudi nyan Tesalonika ngoneh tintun Paulus nyan Berea. Iroh ngoneh bahawa Paulus dahat porapot borita ingkan Mohotara tintun Yesus nyan kota cioh ka. Maka, iroh tulak hia Barea ika mohasut dulun orong ina monentang Paulus. 14Poko tului iyoh, kawan dulun porocaya nyan Barea yoh jion nulak Paulus hia derah pantai laut. Tapi Silas doruo Timotius tenden nukui nyan Berea. 15Kawan dulun ingkan Berea yoh nucu Paulus dapot hia kota Atena. Opah iyoh iroh hopuli hia Berea. Paulus molenteng tungon ma iroh ika Silas doruo Timotius nyua ngonulu are.
Paulus nyan kota Atena
17:16-34
16Jadi, Paulus nganto korombut Silas doruo Timotius nyan kota Atena. Soponehan iyoh, are noto nyan kota cioh oko orong lau kopatung berhala. Hal cioh umpi songai eh jorung korinah. 17Poko tului iyoh, are derek muntam hia lopo ika sombayang dulun Yahudi. Nyan intin, are hopander tintun Yesus hokohalo ma kawan dulun Yahudi hintang ka kawan dulun bokon ma Yahudi houn ocop jarin dulun co porocaya ma Mohotara. Bokon ma iyoh, derek ka are hia pasar. Are mander tintun Yesus ma ome bewe co sopopak ma are nyan intin. 18Paluh pira pira dulun bijaksana ingkan dulun Yunani molai hotaleh ma are. Oko co ingkan kolompok Epikuros. Oko ka ingkan kolompok Stoa. Paulus momobrita Tarung Pio tintun Yesus. Paulus mantun bahawa kawan dulun angar bolum hopuli ingkan pompatoi. Poko tului iyoh tonga doh mantun, “Conon antun dulun uong aroh muntam akar.” Tapi co bokon mantun, “Deontagas anco tomander eh tintun kawan dewa co arinai tonyono.” Iroh mantun sanioh tului Paulus momborita Tarung Pio tintun Yesus. Hie eh Yesus bolum hopuli ingkan pompatoi.
19Paluh kawan dulun bijaksana ingkan dulun Yunani mehen Paulus hia gedung pertemuan kawan pojabat kota cioh. Aran kohosopopak cioh iyohco Areopagus. Nyan intin iroh mantun, “Dohop menjelas eh ma kaih tintun ajaran baa co tomorapot mu yoh. 20Kaih ocop ngoneh ajaran mu. Ajaran cioh nongkocit kaih. Jadi, kaih nyau monau labih orong kole tintun arti ajaran taiyoh.” 21(Isai eh, kawan dulun Atena hintang tomuoi horoholuh munah waktu ika mombahas hintang ngoneh kawan aang co baa.)
22Jadi, Paulus tonjok nyan tohimo dulun orong nyan sidang Areopagus yoh. Hie eh, “Kawan dulun Atena, akuh momporhati ikan tuu-tuu nyembah-nyuku kawan dewa. 23Akuh ocop poleser nyan kota cotuh. Akuh noto orong ika ina nyembah-nyuku kawan dewa me. Oko ka ico meja ika mandak kawan komolum co tonyarah indan dewa ma tulisan co santuh nai: ‘Ika nyembah-nyuku dewa co arinai tonyono.’ Ikan arinai nyono Are, tapi tatap ikan nyembah-nyuku Are. Akuh majar tintun Are yoh.
24Areboh Mohotara co moncipta dunia tuh hintang kokon imbun komulan, ocin louk hintang kolunon co nukui nyan ponah eh. Areboh Tuhan co bokuasa ma langit hintang bumi. Jadi, Are aroh nukui nyan ponah kawan ika co tonguan pian kolunon. 25Are aroko kotopah kokurang eh. Maka, Are aroh morulu pondohop kolunon. Justru sobalik eh. Areboh co mihi ika to bolum, tambung songa, hintang uras aranaang ma kokon kolunon.
26Nyan kosulak eh, Mohotara moncipta ico beti dulun. Ingkan dulun cioh, Mohotara ocop umpi jarin kokon bangsa nyan pindaondo. Are ocop nantu tukui ika hintang kawan nantu sorang indan kokon bangsa hopomasing. 27Mohotara nguan kokoi eh yoh ina iroh bousaha nganyap Are. Mudahan iroh angar bousaha bolajar tintun Are hintang nyopopak Are. Awi, sobujur eh Are aroh ocu ingkan ito hopomasing. 28Are co mihi kobolum indan to, umpi ito hegah bogarak, hintang kuhan ito oko nyan pindaondo. Isan co tonulih pian ponulih puisi ingkan dulun ikan leh co mantun, ‘Ito kokoi eh iyohco kawan anak-Eh.’
29Awi tului ito iyohco ‘kawan anak-Eh,’ maka aroh bopikir Mohotara yoh iyohco aang co tonampa ingkan bulou, perak atawa batu. Kokon banda tanon tomorancang hintang tonampa pian kolunon leh. 30Nyan masa co tongolangkun, oko kawan bangsa co aroh monau cara ika nyembah-nyuku Mohotara. Maka, Mohotara aroh lansung mohukum iroh tului kawan kosolaan doh. Tapi makitu Are morentah kokon dulun nyan omoh-omoh sobulih naat dosa paluh bolum tuhit ngonyorih songai-Eh. 31Ito sobulih naat dosa awi Mohotara angar mohakimi kokon dulun ma koadil-Eh. Are ocop nantu nganto omoh ponghakiman cioh angar tojadi. Are mahi ocop mili ico dulun ika jarin Hakim. Mohotara mombukti kokon iyoh ma cara Dulun cioh bolum hopuli ingkan pompatoi.”
32Kotika kawan dulun taiyoh ngoneh Paulus mantun bahawa oko Dulun co piji bolum hopuli ingkan pompatoi, maka oko nyan halo iroh yoh co mohulut Paulus. Tapi co bokon mantun, “Daai leh kole kaih ngoneh iko mantun aang co non kole.”
33Paluh, Paulus naat iroh. 34Tapi oko pira pira dulun hokahung ma Paulus. Iroh jarin porocaya ma Yesus. Tomasuk ico ingkan pojabat dewan ingkan Areopagus yoh. Arai eh Dionysius. Oko ka ico beti bawe araieh Damaris, hintang pira pira dulun co bokon.
Currently Selected:
Kesah Rasul 17: TBSS
Highlight
Copy
Compare
Share
Want to have your highlights saved across all your devices? Sign up or sign in
