Kesah Rasul 16
16
Timotius umba Paulus doruo Silas molayanani
16:1-5
1Paulus doruo Silas tulak hia kota Derbe paluh hia kota Listra. Nyan kota Listra oko dulun co araieh Timotius. Are ocop porocaya ma Yesus. Tinai eh iyohco dulun Yahudi co ocop porocaya ma Yesus, tapi tamai eh iyohco dulun Yunani. 2Kokon dulun co porocaya ma Yesus nyan Listra hintang Ikonium mantun bahawa Timotius iyohonon dulun co pio. 3Paulus nyau ika Timotius mahi umba iroh. Tapi kokon dulun nyan derah cioh ocop monau bahawa taman Timotius iyohco dulun Yunani. Maka tului iyoh, Paulus nyuhu ika Timotius tomalak ika kawan dulun Yahudi nyan derah cioh boraoi norima are.#16:3 Kawan rasul hintang kawan ponotua dulun Kristen ocop umpi koputusan bahawa kawan dulun co bokon ma Yahudi co porocaya ma Yesus, aroh sobulih tomalak (Kesah 15:22-35). Paulus sotuju lau ma koputusan taiyoh (Galatia 2:3-5). Biasa eh, hal hobalak aroh kitan, tapi nyan derah cioh kokon dulun ocop nyono Timotius arinai tomalak. Jadi, Paulus aroh kolu hal cioh jarin sual ponah polayanan doh. 4Jadi, Paulus, Silas hintang Timotius tulak ingkan kota hia kota co bokon nganda kawan jomaat nyan derah cioh. Iroh ngorapot koputusan kawan rasul hintang kawan ponatua ingkan Yerusalem. Iroh nosehat kawan jomaat ika koputusan taiyoh tonontumun. 5Ma cara taiyoh, kawan jomaat jarin labih kuat porocaya ma Yesus. Sika ondo sasar orong dulun jarin porocaya ma Yesus.
Roh Mohotara nyuhu Paulus hia derah Makedonia
16:6-10
6Opah iyoh, Paulus, Silas hintang Timotius tulak hia derah Prigia hintang derah Galatia. Sobujur eh roncana doh momborita Tarung Pio hia derah Asia. Tapi Roh Mohotara aroh hoo iroh. 7Kotika iroh dapot nyan batas derah Misia. Ingkan intin, iroh nyau tulak hia derah Bitinia. Tapi, sindo kole Roh Yesus#16:7 Ayat 6 hapo sotilah, Roh Mohotara. Ayat 7 hapo sotilah, Roh Yesus. Arelu oko beda eh awi oko porsatuan antara Mohotara Tama, Anak-Eh, Yesus hintang Roh-Eh (Tolu-Tolu eh Co Esa).aroh hoo iroh hia intin. 8Maka, iroh ngoholuh solanan doh ngolanjah derah Misia dapot nyan polabuhan Troas. Ingkan kota cioh akuh, Lukas, molai umba iroh ka.
9Mamalom eh, Paulus haba ponoto ingkan Tuhan. Are kito ico beti ingkan derah Makedonia. Dulun cioh tonjok samir nyawot asi hia Paulus. Hie eh, “Dohop mitah laut hia Makedonia ika mombantu kaih!”
10Ingkan ponoto cioh, kaih#16:10 Lukas nulih buku Kesah cotuh. Oko pira pira kali, are hapo antun ‘kaih’ hangki ‘iroh’. Borarti, mungkin Lukas umba homboh homboh Paulus nyan waktu iyoh. Mungkin Lukas umba Paulus kole nyan 20:5–21:18 hintang 27:1-28. monyimpul eh bahawa Mohotara naah kaih ika momborita Tarung Pio indan kawan dulun Makedonia. Maka, kaih lansung nganyap kapal co tulak hia intin.
Paulus nyan kota Pilipi nyan derah Makedonia
16:11-40
Lidia jarin porocaya ma Yesus
16:11-15
11Jadi, kaih tulak ingkan Troas, cakat kapal hia pulo Samotrake. Ondo opah iyoh, kaih hia kota Neapolis. 12Ingkan intin, kaih hia kota Pilipi. Kota Pilipi yoh kota co penting nyan derah Makedonia. Kota Pilipi incah tomonjajah pian bangsa Roma. Kaih nukui nyan intin pira pira ondo.
13Nyan Ondo istirahat dulun Yahudi, kaih nganyap ika dulun Yahudi hokumpur ika bodoa. Kaih bopikir ika cioh oko nyan luar kota. Maka, kaih tulak hia luar tungkang kuta kota cioh paluh hia saran sungoi. Oko kawan bawe ocop hokumpur nyan intin. Kaih tuot paluh hopander ma iroh.#16:13 Deontagas eh arelu oko lopo ika sombayang dulun Yahudi nyan kota Pilipi yoh. Mungkin kawan dulun nyan kota Pilipi aroh herak ma dulun Yahudi. Awi tului iyoh, mungkin aroko kawan bakah dulun Yahudi co hokumpur nyan intin. 14Ico ingkan halo iroh iyohco ponjuar benang ungu co boleka. Arai eh Lidia. Asal eh ingkan kota Tiatira. Are iyohco dulun bokon ma Yahudi tapi ocop jarin dulun co porocaya ma Mohotara. Waktu Paulus majar kawan bawe taiyoh, Tuhan mukap atoi Lidia. Maka, are porocaya ma ajaran Paulus tintun Yesus. 15Are hintang kokon dulun co nukui nyan lopo eh tomombaptis. Paluh, Lidia mongundang kaih hia lopo eh. Hie eh, “Amun ikan mongangkan bahawa akuh bujur-bujur porocaya ma Tuhan Yesus, haasboh nukui hiloi nyan lopo kuh.”
Tului are korinah nyawot asi ma kaih, maka kaih norima tawaran eh yoh.
Paulus doruo Silas tomokuntam ponah seper
16:16-24
16Nyan ondo co bokon, kaih tulak kole hia ika bodoa cioh. Ponah Solana hia intin, kaih sopopak ico beti bawen cipon. Cipon cioh ocop tomonguasa roh jahat co boraoi umpi bawe cioh hegah monau ome co angar tojadi nyan ondo pongaan. Sika dulun co tomoramal cipon cioh, mihi duit orong indan kawan tempun cipon cioh.
17Bawe cioh horoholuh nyalan nyan uwoi likut Paulus hintang kaih samir noriak. Hie eh, “Kawan dulun tatuh iyohco jungus Mohotara co Pokohunyung! Iroh momborita ma ito tintun calan kosolamat!”
18Ponah pira pira ondo are nain iyoh. Kojekai eh, Paulus jira bat tului ganguai yoh. Maka, Paulus noto hia topit bawe cioh nyan uwoi likut kaih. Hie eh ma roh jahat cioh, “Ponah aran Yesus Kristus, akuh morentah iko pusit ingkan bawe cotuh!” Hanyih iyoh ka roh jahat cioh pusit.
19Kawan tempun bawe cioh noto bahawa iroh aroh angar haba kobohujung bat ingkan gawi eh. Maka tului iyoh, kawan tempun bawe cioh nawan Paulus doruo Silas, paluh maksa mehen iroh ruo hia kawan pojabat kota, nyan ika kohosopopak co umum nyan pasar. 20Kawan tempun cipon cioh mantun ma kawan pojabat, “Kawan dulun tatuh iyohco dulun Yahudi. Iroh mongacau ponduduk kota to. 21Iroh tuh mahi majar adat turan dulun Yahudi. Tapi ito iyohco warga negara Roma. Maka, ito aroh boraoi umba adat turan tiroh.”
22Paluh dulun orong mahi tamput sangit ma Paulus doruo Silas. Kawan pojabat taiyoh nyuhu ika lembon doruo yoh tonirat tonisah ingkan betin doh. Paluh, kawan pojabat taiyoh morentah ika Paulus doruo Silas tomolantu hapo tuntu. 23Bulek iroh tomolantu muhat lau. Paluh, iroh tomokuntam hia ponah seper. Kawan pojabat kota nyuhu kopala seper ika bohimat monjaga iroh. 24Awi tului porentah cioh, maka kopala seper pokuntam Paulus doruo Silas hia ponah ruangan co poko ponah. Paan doh mahi tomanga nyan oang duo balok kaju.
Kopala seper hintang koluarga eh jarin porocaya ma Yesus
16:25-34
25Kira-kira bontung malom, Paulus doruo Silas dahat bodoa hintang ngolojut indan Mohotara. Kokon dulun bokon co tongohukum ngoneh iroh ruo. 26Nongkocok oko gempa bumi. Gempa bumi cioh korinah komuhat dapot pondasi seper cioh hoguncang. Kotika iyoh ka kokon tungkang seper cioh topukap. Sika panga solontong ingkan kokon dulun co tomohukum nyan intin.
27Opah iyoh, kopala seper cioh potoponyun. Kitai eh bahawa kawan tungkang seper taiyoh ocop topukap. Hien songai eh kokon dulun co tomohukum ocop ngomuho arop doh. Maka, are nyopet usok padang eh ika ngompatoi arop.#16:27 Kopala seper nyau ngompatoi arop tului are takut tomohukum matoi. Nyan waktu iyoh nyan korojaan Romawi, amun oko dulun hukum co buho, ponjaga co tomohukum yoh tongompatoi. 28Tapi Paulus hapo suara co muhat mantun ma are, “Aroh nyolaka aropmu! Kokon kaih incah oko nyan intoi.”
29Kopala seper cioh nyuhu anak buah eh monu culuk. Paluh, iroh tongkoru muntam hia ponah. Kopala seper hororiki takut, ngelop kalop eh nyan muka Paulus doruo Silas. 30Opahiyoh, are nucu doruo hia luar. Hie eh, “Kawan bapa, ome co sobulih piang kuh ika akuh tonyolamat?”
31Hien doruo, “Porocayabat ma Yesus, Tuhan co poko bokuasa, maka iko angar tonyolamat. Isanioh ka co sobulih eh tongompian kokon dulun co nukui nyan ponah lopomu.”
32-34Kopala seper cioh mehen iroh ruo hia lopo eh. Are ngorasih kawan dingan doh, mihi kanon doruo. Paluh, Paulus doruo Silas porapot Tarung Pio tintun kawan antun Tuhan Yesus ma are hintang kokon dulun co nukui nyan lopo eh. Nyan momi cioh ka, kopala seper hintang kokon dulun co nukui nyan lopo eh jarin porocaya Paluh kokon doh tomombaptis. Kopala seper cioh korinah kojorih tului kokon doh porocaya ma Mohotara.
Paulus doruo Silas tomombebas ingkan seper
16:35-39
35Manyuap ondo eh, kawan pojabat nyoruhan pira pira potugas koamanan kota hia kopala seper cioh. Kawan potugas taiyoh mara are ika Paulus doruo Silas tomombebas. 36Kopala seper porapot iyoh hia Paulus. Hie, “Kawan pojabat ocop nyuhu ika ikan ruo tomombebas. Jadi, makitu ikan ruo boraoi pusit. Tulak bat ma kosolamat.”
37Tapi Paulus mantun ma kawan potugas co dombut, “Kawan pojabat kota tatuh ocop nyuhu ika kaih tomolantu nyan muka umum. Iroh pokuntam kaih hia ponah seper. Tapi, iroh aroh mongadili kaih houn. Gawin doh non molanggar hukum awi kaih warga negara Roma! Makitu iroh nyau kaih tulak tonih-tonih. Tantu bewe kaih aroh kolu! Olu iroh leh dombut hantoi holuh nucu kaih hia luar seper tuh!”
38Kawan potugas taiyoh tulak molapor antun Paulus hia kawan pojabat taiyoh. Waktu iroh ngoneh bahawa Paulus doruo Silas iyohco warga negara Roma, iroh jarin takut. Buah hukuman. 39Maka, kawan pojabat taiyoh dombut holuh nyawot maap hia Paulus doruo Silas. Opah iyoh, iroh nucu Paulus doruo Silas hia luar seper cioh. Iroh nyawot ika iroh ruo naat kota cioh.
Paulus doruo Silas mihi somangat kawan dulun porocaya nyan kota Pilipi cioh
16:40
40Umbot iyoh, Paulus doruo Silas pusit naat seper holuh tulak hia lopo Lidia. Iroh hokumpur ma kawan dulun porocaya nyan kota cioh. Paulus doruo Silas mihi somangat ma iroh ika tatap porocaya ma Yesus. Opah iyoh, iroh tulak ingkan kota cioh.
Currently Selected:
Kesah Rasul 16: TBSS
Highlight
Copy
Compare
Share
Want to have your highlights saved across all your devices? Sign up or sign in
