Kesah Rasul 15
15
Sidang nyan Yerusalem ika mombahas masalah hobalak
15:1-21
1Kotika Paulus doruo Barnabas incah nyan kota Antiokia yoh, oko pira pira beti dulun ingkan derah Yudea dombut. Kawan dulun taiyoh molai majar kawan dulun co porocaya ma Yesus. Hien doh, “Nyan jaman sinan, Musa majar porentah Mohotara. Sika dulun co kolu porocaya ma Mohotara sobulih tomalak. Jadi ikan dulun co bokon ma dulun Yahudi sobulih tuhit ma poraturan cioh, samah ma dulun Yahudi. Amun aroh, ikan aroh lian tonyolamat.”
2Tapi Paulus doruo Barnabas mula aroh sotuju ma ajaran kawan dulun taiyoh. Aroh isut kohosolisih nyan holang iroh yoh. Pokotului iyoh, Paulus doruo Barnabas kawun pira pira dulun bokon tonyoruhan hia kota Yerusalem. Iroh tonyoruhan ika mombahas masalah kohobalak yoh ma kawan rasul Yesus hintang kawan ponotua nyan Yerusalem.
3Jadi, kolompok dulun co porocaya ma Yesus nyan Antiokia nucu kawun nyoruhan iroh hia Yerusalem. Iroh buah derah Penisia hintang Samaria. Nyan kawan derah taiyoh, iroh ngesah ma kawan dulun porocaya nyan intin. Tomara doh bahawa orong dulun co bokon ma Yahudi ocop jarin porcaya ma Yesus. Ancioh ngonyorih songan kawan dulun co porocaya nyan intin.
4Opah iyoh, Paulus doruo Barnabas hintang kolompok dulun ingkan Antiokia dapot nyan Yerusalem. Pio leh Paulus doruo Barnabas tonorima pian kokon dulun co porocaya tomasuk kawan ponotua jomaat hintang kawan rasul. Paulus doruo Barnabas ngesah kokon anco ocop tongompian Mohotara ponah polayanan dohma kawan dulun co bokon ma Yahudi. 5Tapi oko pira pira dulun co porocaya ma Yesus co sulak eh iyohonon pomimpin agama Yahudi ingkan kolompok Parisi. Hien doh, “Kawan dulun co porocaya co bokon ma Yahudi sobulih tomalaksamah ma dulun Yahudi. Ito sobulih nyuhu iroh ika tuhit ma hukum co tonulih Musa.”
6Jadi, kawan rasul hintang kawan ponotua hokumpur ika mombahas masalah cioh. 7Tahi lau iroh mombahas masalah cioh. Opah iyoh, rasul Petrus tonjok. Hie eh, “Kawan konduang! Tomonau me bahawa Mohotara ocop mili akuh ingkan halo ikan. Tahin aang tuh, Mohotara mili akuh ika momborita Tarung Pio ma kawan dulun co bokon ma Yahudi. Anco pian Mohotara yoh ika doh boraoi ngoneh hintang paluh porocaya ma Yesus. 8-9Mohotara monau ponah songan kokon dulun. Mohotara aroh mombeda-beda antara itodulun Yahudi ma irohco bokon ma dulun Yahudi. Opah iroh porocaya ma Yesus, Mohotara umpi songan doh borasih. Cioh leh cara eh songan to mahi tongombaa piai-Eh. Batuh Mohotara mihi Roh-Eh indan to. Mohotara mahi ocop mihi Roh-Eh indan kawan dulun co bokon ma Yahudi co porocaya ma Yesus. Cioh leh cara eh Mohotara mara bahawa Are norima iroh, aroko sarat-sarat co bokon. 10Nah, amun cioh kojere Mohotara, aroh ikan jere nyuwah ika noto Mohotara mohukum ikan kotika ngolawan kojere-Eh. Aroh momaksa kawan dulun co bokon ma Yahudi ika tuhit ma kokon porintah hintang poraturan Mohotara co tonulis pian Musa nyan ponah buku Hukum Torat. Aang cioh sama leh ma momaksa iroh nyanon aangco sobolih aroh tonyanon doh. Ingkan tatu hiang kitan sinan dapot ito makitu mahi aroh lian tuhit ma kokon poraturan cioh. 11Tapi, ito porocaya bahawa Yesus nyolamat ito awi kopion songai-Eh aroh tului ito tuhit ma poraturan agama Yahudi yoh. Cioh leh cara ika kawan dulun co bokon ma Yahudi lian tonyolamat ka.”
12Kokon dulun potoranai ngoneh ponjelasan Petrus. Opah iyoh, Paulus doruo Barnabas mantun. Kokon dulun tonih ngoneh eh. Doruo ngesah kokon aang co mosotahir co ocop tongompian Mohotara indan doruo, kotika iroh molayani kawan dulun co bokon ma Yahudi.
13Opah doruo umbot mantun, paluh Yokobus#15:13 Otuh bokon rasul Yokobus. Yokobus cotuh jarin pomimpin utama jomaat Yerusalem Noto Kes. 12:17. mantun kole. Hie eh, “Kawan konduang, ngoneh akuh. 14Simon Petrus ocop ngesah pongolaman eh batuh. Are ngesah cara Mohotara pokintuk kopioi ma kawan bangsa co bokon. Mohotara mili kawan dulun nyan halo iroh ika jarin dulun Tioh. 15Nyan jaman sinan, kawan nabi ocop nyurat tintun kawan dulun co bokon ma Yahudi co jarin umat Mohotara. Oko nabi co nyurat antun Mohotara santuh nai:
16‘Korojaan Daud ocop hancur.
Tapi, Akuh angar hopuli.
Akuh angar mangun hopuli korojaan cioh.
Akuh angar umpi korojaan cioh labih dohon kole.
17Akuh angar nonjok hopuli korojaan cioh ika kawan dulun bokon angar dombut nganyap Akuh, Tuhan doh.
Akuh ocop mili kawan dulun co bokon ma Yahudi ika jarin umat-Kuh. Iroh mahi angar dombut hia Akuh.
Akuh, Tuhan, ocop mara ancotuh. Mositi, Akuh angar umpi kokon antatuh.
18Ocu sorinai antatuh tojadi, Akuh ocop mara kokoi eh.’#15:16-18 Ingkan Amos 9:11-12.
19 Jadi, Kawan konduang ocop jelas Mohotara mili kawan dulun ingkan kawan bangsa co bokon ma Yahudi hintang jarin porcaya ma Mohotara. Iroh boraoi dombut ma Mohotara.#15:19 Cara iroh ‘dombut hia Mohotara’ iyohco iroh porocaya ina Yesus. Poko tului iyoh monurut pondapat kuh, aroh ito momaksa iroh tuhit ma kokon aturan agama co bahat tuh. 20Tapi, ito sobulih umpi surat indan doh. Ito mara iroh ika aroh bahanjuh. Aroh kuman kawan kanon co ocop hapan ika nyembah kawan dewa. Aroh kuman kawan daging ocin co matoi tului tonyiok korai eh. Aroh kuman daha. 21Co poko pio eh iroh tonyuhu tuhit mali aang co tongosiit yoh. Awi, ingkan jaman sinan kawan hukum co tonulih Musa tomomborita nyan kokon kota. Dapot makitu mahi incah dulun mombaca eh sika ondo Sabat nyan kawan lopo ika sombayang agama Yahudi.”#15:20-21 Nyan kotika cotuh, kokon dulun Kristen nyembah Mohotara nyan kawan lopo ika sombayang. Oko dulun Yahudi hintang dulun bokon ma Yahudi nyan intin. Koputusan cotuh monjaga ika nyan antara iroh yoh boraoi hico. Kawan pomimpin co porocaya ma Yesus aroh kolu dulun co bokon ma Yahudi umpi dulun Yahudi tosinggung ma hal-hal isan masalah kanon. Baya koporocaya ma Yesus boraoi misah iroh ma dulun.
Surat indan kawan dulun co bokon ma Yahudi co porocaya ma Yesus
15:22-35
22-23Kawan rasul, kawan ponotua kawun kokon kawan dulun co porocaya ma Yesus yohnorima nosehat Yokobus. Iroh momutus ika umpi surat indan kawan dulun co bokon ma Yahudi co porocaya ma Yesus. Tomili doh pira pira beti ingkan halo iroh ika ngorapot surat cioh. Kawan dulun taiyoh tulak hia kota Antiokia homboh Paulus doruo Barnabas. Jadi, iroh mili Silas hintang Yudas co tonisi Barsabas. Dulun duo iyoh iyohonon pomimpin co tomohormat nyan songkolang kawan dulun co porocaya ma Yesus nyan Yerusalem.
Santuh nai surat co tongorapot doh yoh:
“Salam indan kawan konduang co bokon ma Yahudi nyan kota Antiokia, nyan propinsi Siria, hintang nyan propinsi Kilikia. Hormat ingkan kaih, kawan konduang me nyan kota Yerusalem. Kaih kawan rasul hintang kawan ponotua 24ocop ngoneh tarung ingkan Paulus, Barnabas hintang dulun bokon co tonyoruhan me hia kaih. Koneh kaih tarung eh oko kawan dulun ingkan halo kaih co dombut hia ikan. Tapi, iroh yoh aroh tonyoruhan kaih. Tomajar doh ikan ika sobulih tomalak amun jere tonyolamat. Ajaran doh yoh umpi ikan bingung, umpi songam me ragu-ragu. 25Maka tului iyoh, kokon kaih samah-samah umpi koputusan ika nyoruhan pira pira dulun hia ikan. Iroh yoh tulak homboh ma koduo konduang co tongasih kaih, iyohonon Barnabas doruo Paulus. 26Barnabas doruo Paulus molayan Tuhan co monguasa kobolum to, iyohonon Yesus Kristus. Kobolum doh ika taruh polayanan cioh. Olu co iroh tomancam ika tongompatoi, mahi tatap iroh molayan Yesus.
27Jadi kaih ocop nyoruhan Yudas doruo Silas ika ngorapot hintang paluh mara ma ikan maksud surat cotuh.
28Kaih co tonuntun Roh Mohotara ocop umpi koputusan cotuh: Aroh usah bat ikan tomaksa tuhit ma kokon poraturan agama Yahudi. Tapi oko kawan poraturan co porulu tomonurut. 29Iyohonon, aroh hokoruh ma dulun co bokon ma oruh atawa banam. Aroh kuman kawan kanon co hapan ika nyembah kawan dewa dewi. Aroh kuman daging ocin louk co matoi tului tonyiok korai eh. Aroh kuman daha. Amun ikan tuhit ma poraturan cioh, anco pian me yoh pio. Non leh surat kaih. Tontoke indan kokon konduang.”
30Jadi, rombongan dulun co tonyoruhan yoh hotabe hopisah paluh tulak hia Antiokia. Nyan kota cioh, iroh nyawot ika kokon dulun co porocaya ma Yesus hokumpur. Paluh, kawan coruhan yoh ngorapot surat cioh ma iroh. 31Jadi, surat cioh tomombaca. Karas kojorih jerah kawan dulun taiyoh tului nain antun co ponah surat cioh umpi songan doh tohibur.
32Yudas doruo Silas koduo-duo eh yoh nabi ka iyoh onon dulun co monau kojere Mohotara. Jadi, iroh derek mihi nosehat indan kawan konduang nyan Antiokia. Doruo dohop ika kawan konduang taiyoh labih porocaya kole ma Yesus. 33Yudas doruo Silas nukui pira pira waktu kotahi nyan Antiokia. Opah iyoh, ma kojorih songa kawan dulun porocaya nyan Antiokia nyoruhan doruo ika hopuli hia kawan dulun porocaya nyan Yerusalem. 34[Tapi SIlas nukas arop eh tenden nukui nyan Antiokia leh.]
35Tapi Paulus doruo Barnabas incah nukui pira pira waktu kotahi nyan Antiokia. Iroh, samah-samah ma orong dulun bokon, momborita paluh majar tintun kawan antun Tuhan Yesus.
Paulus doruo Barnabas hopisah
15:36-41
36Pira pira waktu opah iyoh, Paulus mantun ma Barnabas, “Haas boh kite hopuli hia kawan konduang co nyan sika kota co piji kite hia eh tahin aang tuh yoh. Kite ocop momborita tintun kawan antun Tuhan Yesus nyan idi. Jadi, co pio amun kite nyari iroh ika monau maindeon koporocaya doh.”
37Barnabas sotuju, tapi are jere ika Yohanes co tonisi Markus yoh umba homboh iroh kole. 38Tapi Paulus karas aroh kolu mehen Yohanes tului tahin aang tuh yoh are aroh kolu ngompaluh polayanan doh dapot umbot. Malah Markus naat iroh seen nyan derah Pampilia. 39Jadi, oko kohosolisih co bahai antara Paulus doruo Barnabas tului Markus. Doruo hopisah. Barnabas mehen Markus, cakat kapal hia pulo Siprus. 40Tapi Paulus tulak mehen Silas. Kawan konduang nyan Antiokia bodoa indan doruo ika Tuhan momberkat iroh ponah polayanan. 41Paulus doruo Silas tulak hia kawan kota nyan propinsi Siria hintang Kilikia. Nyan kawan kota taiyoh, doruo dohop kokon jomaat ika doh meleh porocaya kole ma Yesus.
Currently Selected:
Kesah Rasul 15: TBSS
Highlight
Copy
Compare
Share
Want to have your highlights saved across all your devices? Sign up or sign in
