Kesah Rasul 14
14
Paulus doruo Barnabas momborita Tarung Pio nyan kota Ikonium
14:1-7
1Paulus doruo Barnabas dapot nyan kota Ikonium. Nyan kota cioh iroh houn hia lopo ika sombayang agama Yahudi. Nyan Ikonium yoh, iroh majar ma cara co bohimat lau. Tului iyoh, orong dulun Yahudi hintang dulun co bokon ma Yahudi jarin porocaya ma Yesus. 2Tapi oko ka kawan dulun Yahudi co aroh porocaya. Iroh mohasut kawan dulun co bokon ma Yahudiika aroh porocaya. Jadi, kawan dulun taiyoh karas sangit ma kawan dulun porocaya. 3Olu co isaniyoh, Paulus doruo Barnabas sadang kotahin doh nukui nyan intin. Bohanyi lau, doruo momborita Tarung Pio tintun Tuhan Yesus. Tuhan mahi mihi kuasa indan doruo ika umpi orong macam aang co mosotahir. Nonleh cara Tuhan mombukti bahawa kokon antun Eh yoh bujur.
4Jadi, ponduduk kota cioh topisah jarin duo kolompok. Oko co momihak ma kawan dulun Yahudi co aroh porocaya, hintang oko ka co porocaya ajaran Rasul Paulus doruo Barnabas. 5Oko dulun co bokon ma Yahudi ngolawan rasul duo iyoh. Oko ka kawan dulun Yahudi. Kokon doh umpi roncana sama-samah ma kawan pomimpin doh ika monyiksa Paulus doruo Barnabas hintang medak doruo ma batu. 6Tapi doruo ocop monau roncana cioh. Jadi, iroh buho hia derah co bokon. Iroh tulak hia derah sokitar kota Listra hintang Derbe nyan propinsi Likaonia. 7Nyan derah cioh doruo hopompaluh momberita Tarung Pio tintun Yesus.
Paulus doruo Barnabas momberita Tarung Pio nyan kota Listra
14:8-20
8Nyan Listra yoh oko dulun lumpuh. Paai eh lumpuh ingkan lahir. Are aroh piji nyalan. 9Dulun co lumpuh yoh tuot ngoneh antun Paulus. Jadi, kotika Paulus noto are, Paulus sadar bahawa dulun cioh mula porocaya dapot are boraoi tongomambuh. 10Ma suara co muhat, Paulus mantun, “Tonjok bat!” Paluh nyan kotika cioh leh dulun co lumpuh yoh nomposut tonjok. Paluh liai nyalan.
11Orong dulun noto co aang mosotahir co pian Paulus yoh. Iroh noriak ponah bohasa Likaonia. Hien doh, “Duo dewa to ocop nosuloh ingkan langit. Iroh dombut hia ito nomali jarin Paulus hintang Barnabas.” 12Barnabas tonisi doh dewa Jeus. Paulus tonisi doh dewa Hermes awi are co herak mantun.#14:12 Jeus iyohonon dewa poko penting indan dulun Yunani. Hermes iyohonon dewa co ika tukang hopander dewa bokon. Nyan kotuhi eh, Paulus doruo Barnabas aroh paham ma ome anco hien dulun orong yoh awi iroh hapo bohasa Likaonia.
13Aroh ocu ingkan luar kota cioh oko lopo ika nyembah dewa Jeus. Imam co molayani dewa Jeus yoh dombut hia tungkang kuta kota cioh. Are mehen porsembahan kawan sapi co bohanoi hintang kawan kalungan kambang. Are samah-samah ma dulun orong yoh jere hapo porsembahan ika nyembah Rasul Paulus doruo Barnabas.
14Tapi Barnabas doruo Paulus ngoneh aang cioh. Jadi, kotika iyoh ka iroh nirat nesah lembon doh, tokoru hia tohun dulun orong, hintang noriak, 15“Kawan jolaha, aroh lau ikan nyembah kaih. Awi kaih tuh baya kolunon biasa leh, samah ma ikan. Kaih dombut hantoi ika momborita Tarung Pio tintun Yesus ma ikan. Kojere kaih ika me baya nyembah Mohotara co bolum leh, bokon ma kawan dewa co aroh bujur non. Mohotara co moncipta langit, tana, laut hintang kokon sangan eh. 16Nyan masa co tongolangkun, Mohotara moholu kokon bangsa umpi ome bewe anco tomikir doh bujur. 17Tapi sobujur eh, Mohotara co mihi ikan ucan ingkan langit. Mohotara mihi hasir ingkan imbun komulan ika cukup kanom me. Mohotara umpi songam me sanang. Mohotara mihi kokon anco pio yoh indam me, ika me monau bahawa Are mula oko.”
18Oluco Paulus doruo Barnabas monarang ancioh, dulun orong yoh tenden jere ka nyarak kawan sapi ika nyembah doruo. Paulus doruo Barnabas heka-lau kosodahai hegah ngumbot dulun orong co jere mihi porsembahan cioh indan doruo.
19Opahiyoh pira pira dulun Yahudi ingkan Antiokia hintang Ikonium dombut hia intin. Iroh mompongaruh orong dulun nyan kota Listra yohika aroh porocaya ma antun Paulus. Paluh tomedak doh Paulus ma batu ika ngompatoi eh. Tonyompan doh Paulus ocop matoi, tohobuhut doh beti eh hia luar kota cioh. 20Tapi oko kawan dulun nyan kota Listra co molai porocaya ma Yesus. Iroh dombut hintang tonjok toliut Paulus. Nyan kotika cioh, Paulus tonjok paluh muntam kole hia kotahomboh ma iroh. Manyuap ondo eh, are tulak hia kota Derbe homboh Barnabas.
Paulus doruo Barnabas hopuli hia kota Antiokia nyan derah Siria
14:21-28
21Nyan kota Derbe, Paulus doruo Barnabas momborita Tarung Pio. Orong dulun jarin porocaya ma Yesus. Opah iyoh, doruo hopuli kole hia kawan kota co tonganda doh nyan derah Galatia. Iroh hopuli hia Listra, Ikonium paluh Antiokia nyan derah Pisidia. 22Nyan kawan kota cioh, Paulus doruo Barnabas mihi somangat indan kawan dulun porocaya. Doruo mihi somangat indan kawan dulun ika tenden porocaya meleh yakin ma Yesus. Hien doh, “Ito porolu orong mondorita ika muntam ponah Korojaan Mohotara.”
23Paulus doruo Barnabas mahi mili kawan ponotua indan sika kolompok dulun porocaya. Kawan ponotua taiyoh tomili pian Paulus dorou Barnabas ingkan halo dulun co ocop porocaya ma Yesus, nyan kokon aranang uras Tuhan co bokuasa. Paulus doruo Barnabas bodoa hintang puasa ika Tuhan tatap monjaga kokon kawan ponotua taiyoh.
24Opah Paulus doruo Barnabas nyolana nyihin derah Pisidia, iroh dapot nyan derah Pampilia. 25Nyan derah Pampilia, oko ico kota co araieh Perga. Nyan kota cioh ka, iroh momborita Tarung Pio. Paluh, iroh nosuloh hia kota Atalia.
26Nyan intin, iroh umba kapal hopuli hia kota Antiokia co nyan derah Siria. Batuh, kawan dulun porocaya nyan Antiokia yoh co nyoruhan Paulus doruo Barnabas hia kawan ika co bokon ika momborita Tarung Pio. Iroh co bodoa ika Mohotara mihi aang co pio indan Paulus doruo Barnabas ponah solanan doh yoh. Gawin Paulus doruo Barnabas yoh ocop umbot. 27Jadi, kotika doruo dapot nyan Antiokia, tongumpur doh dulun co porocaya ma Yesus yoh. Doruo ngesah kokon anco ocop pian Mohotara ma iroh ponah gawin doh yoh. Husus eh, tongesah doh cara Mohotara mihi cara orong dulun co bokon ma Yahudi jarin porocaya ma Yesus. 28Paulus doruo Barnabas tahi nukui umba dulun porocaya nyan kota cioh.
Currently Selected:
Kesah Rasul 14: TBSS
Highlight
Copy
Compare
Share
Want to have your highlights saved across all your devices? Sign up or sign in
