Kesah Rasul 13
13
1Nyan halo kawan dulun co porocaya ma Yesus nyan Antiokia, oko kawan nabi. Oko ka kawan dulun co pintar majar dulun co porocaya. Iroh yoh iyohonon Barnabas, Simeon (co herak ka tonisi Niger), Lukius yoh (ingkan kota Kirene), Manahem (co tongombahai homboh-homboh ma Gubernur Herodes) hintang Saulus. 2Nyan ico ondo, iroh kumpur ika bopuasa hintang bodoa. Kotika cioh, Roh Mohotara mantun ma iroh, “Akuh nyoruhan Barnabas hintang Saulus ika umpi gawi husus. Jadi, tonugas doruo ika umpi gawi cioh.” 3Kokon doh puasa hintang bodoa kole. Iroh mandak silun doh nyan tungkui Barnabas doruo Saulus ika nyoruhan doruo tulak momborita Tarung Pio nyan ika co bokon.
Barnabas doruo Saulus momberita Tarung Pio nyan pulo Siprus
13:4-12
4Roh Mohotara mombimbing Barnabas doruo Saulus tulak hamoh bewe sosuai ma kojere Roh Mohotara. Jadi, iroh nosuloh ingkan kota Antiokia hia kota Seleukia. Ingkan intin iroh umba kapal hia kota Salamis nyan pulo Siprus. 5Yohanes co herak ka tonisi Markus mahi umba dohop doruo nyan polayanan cioh. Waktu dapot nyan kota Salamis, iroh tulak hia kawan lopo ika sombayang agama Yahudi. Nyan sika lopo ika sombayang yoh, tongorapot doh Tarung Pio ingkan Mohotaratintun Yesus.
6Paluh iroh ngolanyah pulo Siprus. Kokon ika nyan pulo cioh tonganda doh dapot iroh tocak nyan Papos, ibu kota Siprus. Nyan kota cioh iroh sopopak ma ico beti tukang sihir. Are mahi nabi palsu. Are yoh dulun Yahudi. Arai eh Baryesus. 7-8Ponah bohasa Yunani, dulun naah are Elimas. Elimas tuh tongkanyoh gubernur pulo Siprus co araieh Serigius Paulus. Gubernur cioh dulun co pintar. Are jere ngoneh Tarung Pio ingkan Mohotaratintun Yesus. Jadi, tonaah eh Barnabas doruo Saulus. Tapi Elimas monantang doruo. Tonganyap eh cara ika gubernur cioh aroh porocaya ma Yesus.
9Tapi Roh Mohotara monguasa Saulus co tonisi ka Paulus. Tongontonong eh Elimas. 10Hie eh, “Jahat iko tuh! Kokon kawan aangco buah co tongolawan mu! Iko hopompaluh ngoncunih hintang nipu dulun. Kawan ajaran Tuhan co bujur aroh tongumba mu. Tapi iko jere nyuwah pokengkong calan Tuhan! Umbot bat umpi alo conon. 11Makitu leh Tuhan angar mohukum iko. Kotahin pira-pira waktu co tonantu Tuhan, iko angar bobuto. Kopanda matannondo mahi, aroh boraoi kitam mu bat.”
Kotika ciohleh ka Elimas paluh bobuto. Tongkomo eh are nyan ponah kabut co pindong. Hokangkap are nyalan nganyap silun dulun bokon ika nuntun are. 12Kitan gubernur anco isan iyoh. Paluh are porocaya ma Yesus. Are kagum lau ma ajaran Paulus doruo Barnabas tintun Tuhan Yesus.
Paulus momborita Tarung Pio nyan kota Antiokia nyan derah Pisidia (propinsi Galatia)
13:13-52
13Ingkan kota Papos yoh, Paulus hintang kawan jolahai eh umba kapal hia kota Perga, ibu kota derah Pampilia. Nyan intin, Yohanes Markus naat iroh. Are hopuli kole hia Yerusalem. 14Ingkan Perga, Paulus doruo Barnabas tulak hia kota Antiokia, nyan derah Pisidia.#13:14 Oko duo kota co araieh Antiokia co tonisi nyan solanan Paulus. Are tulak ingkan kota Antiokia nyan derah Siria. Nyan intoi, are nukui nyan kota Antiokia nyan derah Pisidia nyan propinsi Galatia.
Nyan ondo istirahat dulun Yahudi, iroh muntam hia lopo ika sombayang agama Yahudi paluh tuot nyan intin. 15Isan co biasa oko dulun co mombaca kawan buku hukum agama Yahudi hintang buku kawan nabi. Opah iyoh, kawan pomimpin lopo ika sombayang yoh nyuhu dulun porapot tungon ma Paulus doruo Barnabas. Hien doh, “Mungkin kawan konduang oko nosehat ika ngondohon songan kokon kaih nyan intoi. Amun oko, ihin kotika indaieh.”
16Jadi, Paulus tonjok paluh ngode ma siluieh bahawa are jere mantun. Hie eh, “Kawan dulun Israel hintang kawan dulun bokon co ocop porocaya ma Mohotara co tonyembah kaih dulun Yahudi. Ngoneh eh bat! 17Nyan jaman sinan, Mohotaran bangsa Israel ocop mili tatu hiang toika jarin umat-Eh. Iroh yoh dulun tomuoi kotahin doh nukui nyan Mesir. Tapi, Mohotara umpi iroh jarin sasar orong. Paluh, ma kuasai-Eh co bahai, Are mehen iroh pusitingkan ika doh tohocipon nyan Mesir yoh. 18Opah iyoh, kotahin opat pulu toun iroh nukui nyan padang gurun.Kotahin iyoh ka, iroh derek ngolawan Mohotara. Tapi Mohotara tatap sabar ma deon tosan doh yoh. 19Opah iyoh nyan tana Kanaan, Mohotara ngolumat pitu bangsa co bokon. Tana cioh ihin Mohotara ika to dulun Israel tempui. 20Uras antaiyoh ngompunah waktu kotahin opat latuh liman pulu toun.
Opah iyoh, Mohotara mili kawan-ongkon ika momimpin iroh. Isaniyoh cara eh dapot ongkon co terakhir, iyohonon Nabi Samuel. 21Kotika cioh, bangsa Israel nyawot ika doh tomimpin pian ico beti laca. Jadi, Mohotara nunjuk Saul anak Kish ingkan suku Benyamin. Laca Saul momimpin iroh kotahin opat pulu taun. 22Tapi opah iyoh Mohotara ngumbot Saul ika laca. Mohotara mangkat Daud jarin laca co baa indan doh. Mohotara mara tintun sipat Daud. Hie-Eh, ‘Akuh ocop nyoroli Daud, anak Isai yoh. Are ngonyorih songang-Kuh. Are angar umpi anco tongonjere-Kuh.’
23Opah iyoh, Mohotara bojanji ika nyoruhan ico beti Ponyolamat indan dulun Israel. Ponyolamat cioh dai ingkan koturunan Laca Daud. Makitu, Mohotara ocop mongganap janji-Eh yoh. Ponyolamat cioh iyohonon Yesus. 24Sorinai Yesus molai kuan gawi-Eh, Yohanes Pombaptis ocop mantun ma kawan dulun Israel ika umbot bat umpi kawan-dosa hintang paluh tomombaptis bat. 25Kotika Yohanes jonyo ngumbot gawi eh, orong dulun ngisok ‘mainboh iko tuh Ponyolamat co tomonjanji Mohotara yoh pai’. Tapi hien Yohanes, ‘Akuh bokon ma dulun co tonganto nganto me yoh. Tapi aroh tahi onieh Are angar dombut. Are meleh bokuasa hangki akuh. Malah jarin cipon-Eh ika mukoi turumpah akuh aroh patut.’
26Kawan konduang bakah bawe koturunan Abraham, hintang kawan dulun co bokon ma Yahudi co ocop porocaya ma Mohotara: Yesus ocop nyolamat dulun ingkan hukuman dosa. Tarung cioh mahi ocop tongorapot ma kokon to! 27-28Jaman sinan, kawan nabi ocop nyurat tintun Laca Co Tomonjanji Mohotara. Makitu, sika ondo istirahat dulun Yahudi, buku kawan nabi yoh tomombaca nyan kawan lopo ika sombayang. Tapi kawan dulun Yerusalem aroh paham ma antun kawan nabi yoh. Iroh aroh sadar Yesus yoh Laca Co Tomonjanji Mohotara. Kawan pomimpin agama Yahudi mahi aroh sadar. Iroh aroh kolu ma Yesus. Samah sindo aroko alasan ika doh mohukum Are. Tapi iroh tatap monggasak gubernur Pilatus ika Yesus tomohukum matoi. Kokon anco pian doh yoh ika mongganap ome co tojadi co hien kawan nabi sinan. 29Opah kokon aang co angar tojadi tintun Yesus yoh ocop tomongganap, hanyar iroh potosuloh Are ingkan sompolaki Paluh iroh ngolowong ontui-Eh nyan ponah luwang guha batu. 30Tapi Mohotara umpi-Eh hopuli bolum ingkan pompatoi.
31Nyan ponah kurung waktu opat pulu ondo yoh, pira pira kali Are poleha Arop-Eh. Are poleha arop-Eh ma kawan murid co ocop umba Are ingkan propinsi Galilea hia kota Yerusalem. Kawan dulun taiyoh co makitu momborita tintun Are ma bangsa to Israel tuh.
32Jadi makitu kaih ngorapot Tarung Pio cioh ma ikan. Nyan jaman sinan, Mohotara bojanji ma tatu hiang to. 33Makitu, Mohotara ocop mongganap janji-Eh indan to, koturunan Israel. Tuh boh cara eh Mohotara mongganap janji-Eh. Iyoh onon Mohotara umpi Yesus hopuli bolum.#13:33 Mohotara bojanji ika nyoruhan Laca co angar momorintah umat-Eh sokotahi-tahieh. Mohotara molalus janji-Eh yoh ma nyoruhan Anak-Eh Yesus, hia dunia tuh. Kotika Yesus bolum hopuli, Are mombukti eh bahawa janji-Eh tomolalus. Samah ma antun Mohotara co tonulih ponah Masmur pasal duo. Hie-Eh,
‘Iko iyoh co Anak-Kuh.
Ngondaii tuh Akuh jarin Tamam-Mu.’#13:33 Ingkan Masmur 2:7. Antun cotuh ika bukti bahawa Mohotara nyoruhan Yesus. Antun cotuh mahi ngesah main deoi hubungan husus nyan antara Mohotara ma Yesus.
34Mohotara umpi Yesus hopuli bolum. Jadi, Yesus aroh angar piji matoi bat. Nyan jaman sinan, Mohotara ocop monjanjiika mihi anco pio indan umat-Eh. Hie-Eh, ‘Akuh ocop bojanji ma Daud.
Akuh bojanji ika mihi anco pio indam me umat-Kuh. Janji cioh dohon hintang tuu tojadi.’#13:34 Ingkan Yesaya 55:3-5.
35Nyan buku Masmur oko Daud nyurat,
‘Iko aroh moholu Akuh karam nyan kolowong awi Akuh hopompaluh tuhit ma-Iko.’#13:35 Ingkan Masmur 16:10.
36-37 Surat cioh arti eh tintun Yesus, aroh tintun Daud. Daud ocop matoi hintang tongolowong hico ma tatu hiang eh, opah are umpi anco tonyuhu Mohotara. Tapi ontun Yesus aroh karam nyan kolowong. Mohotara umpi-Eh hopuli bolum.
38Kawan konduang bakah bawe, akuh monyimpul antun kuh. Amun ito bousaha nuhit kokon porentah hintang poraturan Mohotara co tonulih Musa ponah Hukum Torat, aang cioh aroh nompi kawan dosan to tomongampun. 39Sadangkan kokon dulun co porocaya ma Tuhan Yesus, tomangap bujur nyan ponoto Mohotara. 40Tapi, botawat bohina Mohotara aroh mohukum ikan. Mohotara ocop momporingat ikan. Poringatan cioh tonulih pian nabi. Santuh nai:
41‘Porhati eh pio-pio, ikan co polea-lea antun-Kuh!
Ikan angar hurong nongkomo awi nyan jaman cotuh Akuh angar umpianco ika me angar karas soranta.
Olu co ocop tomara dulun ma ikan tintun hukuman cioh, mula aroh me mikir bahawa hukuman angar tojadi.
Tapi hukuman cioh angar tojadi. Ikan angar matoi lumat.’#13:40-41 Ingkan Habakuk 1:5.
Jadi, konduang bakah bawe, ngoneh eh pio-pio ika hukuman cioh aroh buah ikan.”
42 Jadi, Paulus ngumbot antun eh. Doruo Barnabas pusit ingkan lopo ika sombayang cioh. Pondehan iyoh, dulun orong yoh nyawot ika iroh ruo hopuli kole nyan ondo istirahat dulun Yahudi co pongaan dai. Kawan dulun jere kole ngoneh tintun kokon aang co tongorapot doruo non nin. 43Opah umbot bat sombayang, orong dulun ngonulu Paulus doruo Barnabas. Oko kawan dulun Yahudi hintang dulun co bokon ma Yahudi co ocop muntam agama Yahudi. Uras doh tomajar Paulus doruo Barnabas, bahawa Mohotara yoh mula pio. Mohotara mongampun dosan kokon dulun co porocaya ma Yesus. Rasul duo iyoh mihi somangat ika tenden nyampah nyaman doh ma kopion songan Mohotara yoh.
44Nyan ondo istirahat dulun Yahudi co opah cioh kole, jonyo kokon dulun nyan kota Antiokia yoh hokumpurnyan lopo ika sombayang. Pokongorong ingkan iroh yoh dulun co bokon ma Yahudi. Iroh jere ngoneh antun Tuhan. 45Tapi kotika kawan dulun Yahudi yoh noto orong dulun, jarin karas kobosingon doh.#13:45 Kawan dulun Yahudi (husus eh kawan pomimpin) jarin bosingon tului orong dulun co ngoneh antun Paulus hangki ngoneh iroh. Iroh mohina Paulus. Iroh mahi monantang anco tomajar eh.
46Tapi Paulus doruo Barnabas aroh takut. Hien doruo, “Yesus nyoruhan kaih ika ngorapot Tarung Pio tintun Are. Kaih sobulih ngorapot eh labih soun ma ikan, kawan dulun Yahudi. Tapi ikan aroh porocaya ma ancioh. Conon ciri eh bahawa ikan aroh pantas ika norima kobolum co kototahi. Poko tului iyoh, makitu kaih naat ikan paluh tulak nyalan molayani kawan bangsa co bokon ma Yahudi. 47Awi Mohotara ocop nyuhu kaih. Hie-Eh, ‘Akuh ocop nyoruhan iko ika ngompanda kawan bangsa co bokon ma Yahudi. Conon ika kokon dulun nyan ngolauh pindaondo tuh monau cara eh maindeoi iroh boraoi tonyolamat.’ ”#13:47 Ingkan Yesaya 49:6. Kotuhi eh Mohotara nisi antun cotuh ma Laca Co Tomonjanji-Eh iyohonon (Kristus). Nyan intoi, Paulus ika potinjun bahawa are (hintang kokon dulun co tenden umba Kristus) yoh mahi sobulih umpi anco pio indan dulun nyan pindaondo, iyohonon iroh sobulih ngorapot Tarung Pio tintun Yesus Kristus indan kokon dulun.
48Ngoneh ancioh, karas kojorih dulun co bokon ma Yahudi. Hien doh bahawa tarung tintun Tuhan Yesus mula pio tuu. Kokon dulun co ocop tonantu Mohotara ika haba kobolum sumong katahi, iroh jarin porocaya ma Yesus. 49Tomomborita doh Tarung Pio tintun Yesus nyan ngolauh derah cioh.
50Tapi kawan dulun Yahudi yoh mohasut kawan dulun co penting nyan kota cioh, tomasuk kawan bawe co bopongaruh co ocop porocaya ma Mohotara. Kawan dulun co penting yoh nompi dulun bokon monyiksa Paulus doruo Barnabas. Ahir eh, Paulus doruo Barnabas tomusir ingkan derah cioh. 51Tapi Paulus doruo Barnabas nontokoh dabu ingkan paan doh. Cioh ika ciri poringatan indan ponduduk nyan kota cioh bahawa Mohotara angar mohukum iroh. Opah iyoh, Paulus doruo Barnabas tulak hia kota Ikonium. 52Kawan dulun co punai porocaya ma Yesus nyan Antiokia tenden bolum ma kojorih jerah. Roh Mohotara hopompaluh monguasa iroh.
Currently Selected:
Kesah Rasul 13: TBSS
Highlight
Copy
Compare
Share
Want to have your highlights saved across all your devices? Sign up or sign in
