Kesah Rasul 11
11
Petrus monjelas cara Mohotara poyakin are ika norima dulun co bokon ma Yahudi
11:1-18
1 Nyan derah Yudea. Kawan rasul hintang kawan dulun co porocaya yoh ngoneh borita tintun Petrus. Koneh doh bahawa oko kawan dulun co bokon ma Yahudi ocop porocaya ma tarung pio ingkan Mohotaratintun Yesus. 2Jadi, waktu Petrus tulak hia Yerusalem, kawan dulun co porocaya ma Yesus hintang tuhit ma hukum agama Yahudi nyala are. 3Hien doh, “Iko ocop hojolahan hintang nganda nyan lopo kawan dulun co bokon ma Yahudi. Malah, iko mahi kuman umba iroh!”
4Tapi Petrus monarang kokon anco ocop tojadi yoh ingkan tuhi. 5Hie eh, “Tahin aang tuh, akuh oko nyan kota Yope. Kotika akuh dahat bodoa, akuh haba ponotoingkan Mohotara. Oko anco isan ico kolambar benang co korinah kobolambah eh. Benang cioh meleng meleng nyan opat buncu eh, nosuloh ingkan langit. Kain cioh nosuloh tangar nyan muka kuh. 6Kitang kuh aang nyan ponah eh. Nyan ponah benang cioh orong macam ocin, tomasuk ocin co opat paai, ocin co boralik, ocin co nyole nyan tana, hintang kawan beleu co boralik. 7Paluh oko suara Mohotara co mantun ma akuh, ‘Petrus, tonjok bat! Nyarak kawan ocin tanon ika kanom mu.’
8Tapi hiengkuh museh, ‘Aroh, Tuhan! Akuh aroh piji kuman daging ocin isan onon. Kawan ocin tanon palin agama kaih.’
9Tapi indan co kohonduo kali eh suara Mohotara ingkan sorga mantun ma akuh. ‘Ome co hien Mohotara boraoi kanon, aroh boraoi bat iko nisi eh pali.’
10Ancioh tojadi tolu kali, hanyar benang cioh hopuli tokatang hia langit.
11Nyan kotika cioh ka, oko tolu beti dulun co dombut hia lopo co ika kuh hiloi yoh. Iroh tonyoruhan hia akuh ingkan kota Kaisarea. 12Paluh, Roh Mohotara mantun ma akuh ika aroh ragu-ragu. Roh Mohotara nyuhu akuh ika umba iroh hia kota Kaisarea. Konduang co iroh onom tuhmakitu dahat doh oko intoi, iroh mahi homboh ma akuh ingkan kota Yope yoh.
Hayak kaih dapot nyan Kaisarea, kaih muntam hia lopo dulun co mongundang akuh. 13Dulun cioh bokon ma Yahudi paluh bokesah ma kaih. Hie eh, are ocop noto molekat tonjok nyan lopo eh. Molekat cioh mantun ma are, ‘Nyuhu pira pira beti hia kota Yope ika milo ico beti dulun co araieh Simon, co herak tonisi Petrus. 14Are angar porapot borita indam me hintang kokon dulun co oko nyan ponah lopo mu. Are angar momborita tintun maindeoi ikan boraoi tonyolamat ingkan hukuman dosa.’
15Jadi, akuh molai porapot Tarung Pio indan kokon doh. Kotika cioh ka, songola kokon doh tonyolungkop Roh Mohotara. Roh Mohotara oko nyan iroh, samah ma co ocop tonongkomo to batuh. 16Opah iyoh, hopuli ingkat kuh bat antun Yesus, Tuhan to yoh. Hie-Eh, ‘Yohanes mombaptis dulun hapo danum, tapi ikan angar tomombaptis hapo Roh Mohotara.’
17Opah ito porocaya ma Tuhan Yesus Kristus, paluh Mohotara mihi Roh-Eh indan to. Opah kawan dulun co bokon ma dulun Yahudi taiyoh porocaya, Mohotara mahi mihi Roh Eh indan doh. Amun Mohotara norima dulun bokon ma Yahudi isan iyoh, aroh bodai akuh songola kuloi iroh. Aroh bodai akuh ngolawan Mohotara!”
18Maka iyoh leh nain kesah Petrus nyan Yerusalem ma kawan dulun Yahudi co porocaya. Maka tului iyoh, iroh umbot nyala Petrus. Sobalik eh, iroh nara Mohotara. Hien doh, “Eeh! Sokalinya, dulun co bokon ma Yahudi mahi tonorima Mohotara. Ocop ihin Mohotara kosempatan ma iroh ika naat kawan dosan doh paluh tuhit bat ngonyorih songan Mohotara. Hapo cara cotuh, iroh mahi boraoi haba kobolum co kototahi nyan sorga.”
Orong dulun nyan kota Antiokia jarin porocaya ma Yesus
11:19-30
19Sopondehan iyoh, kawan dulun co porocaya ma Yesus ocop tosebar hantin hanoh.#11:19 Noto Kesah 8:1-4. Opah Stepanus tongompatoi, nyan kota Yerusalem kawan dulun porocaya tonyiksa. Maka tului iyoh, iroh ocu ngombuho arop doh hia negri Penisia, pulo Siprus, hintang hia kota Antiokia. Iroh holuh ngorapot Tarung Pio tintun Yesus nyan derah cioh. Tapi iroh baya momborita ancioh ma dulun Yahudi leh. 20Oko pira pira beti ingkan halo iroh co asal eh ingkan Siprus hintang kota Kirene. Iroh tulak hia Antiokia. Nyan idi, iroh ngesah Tarung Pio, iyohonon Yesus yoh Tuhanco bokuasa ma kokon aranaang. Iroh mahi momborita eh ma kawan dulun Yahudi hintang dulun co bokon ma Yahudi. 21Kuasan Tuhan oko nyan iroh sohingga orong dulun jarin porocaya ma Yesus hintang naat dosan doh paluh tuhit bat ngonyorih songan Mohotara.
22Nyan kota Yerusalem kawan dulun porocaya ma Yesus ngoneh borita ingkan Antiokia yoh, jadi iroh nyoruhan Barnabas hia idi.
23Kotika Barnabas dapot nyan Antiokia are kito cara pomolum doh borubah poko tului Mohotara umpi aang co pio indan doh. Poko tului iyoh Barnabas jorih lau, hintang paluh nyawot ika iroh porocaya ma Tuhan Yesus ma atoi co kuan-tuu. 24Nah, Barnabas iyohonon dulun co pio songai. Are hopompahui tonguasa Roh Mohotara. Karas lau koporocaya eh ma Yesus. Jadi, opah polayanan Barnabas, orong dulun co jarin porocaya ma Tuhan Yesus.
25 Opah iyoh, Barnabas jere nyawot dohop ma Saulus ika dohop are molayani. Jadi, Barnabas tulak hia kota Tarsus ika bousaha nganyap Saulus nyan idi. Hayak are popak Saulus, paluh ehe Saulus hopuli hia Antiokia. 26Kotahin ico toun, doruo nukui nyan intin. Nyan intin iroh derek hokumpur ma kawan dulun co porocaya ma Yesus. Orong dulun tomajar doh tintun Yesus Kristus. Nyan Antiokia yoh bat, poko tuhi kawan dulun porocaya ma Yesus yoh tonisi ‘Kristen’.
27Nyan kota Yerusalem oko kawan nabi co porapot tungon Mohotara ma kawan dulun co porocaya ma Yesus. Kotika Barnabas doruo Saulus nyan Antiokia, pira pira nabi taiyoh dombut. 28Ico ingkan iroh yoh arai Agabus. Nyan ico ondo, are tonjok nyan kohosopopak ma kawan dulun porocaya. Roh Mohotara oko nguasa are. Paluh are mantun aang co angar tojadi ingkan Mohotara tintun kodouonuh nyan ngolauh pindaondo tuh. (Douonuh cioh mula tuu tojadi kotika Klaudius jarin laca nyan Roma). 29Jadi, opah ngoneh aang co angar tojadi yoh, kokon murid Yesus nyan Antiokia momutus eh ika dohop konduang bakah bawe co nukui nyan derah Yudea iroh ngumpur sumbangan. Sika dulun mihi sumbangan sopira kuhat sosuai ma co tongolian doh hopomasing. 30Tonyarah doh sumbangan cioh ma Barnabas doruo Saulus ika doruo boraoi nucu eh indan kawan ponotua dulun porocayanyan Yerusalem.
Currently Selected:
Kesah Rasul 11: TBSS
Highlight
Copy
Compare
Share
Want to have your highlights saved across all your devices? Sign up or sign in
