Kesah Rasul 10
10
Mohotara poyakin Petrus ika norima dulun co bokon ma Yahudi
10:1-48
Molekat Tuhan nyuhu Kornelius naah Petrus
10:1-8
1Nyan kota Kaisarea, oko ico beti kopala pasukan tontara. Arai eh Kornelius. Are momimpin sokitar solatuh tontara co tonisi pasukan Italia. 2Kornelius hintang kokon koluarga eh iyoh onon bokon dulun Yahudi tapi tuhit ma Mohotara. Kornelius derek mihi duit indan kawan dulun mala. Are mahi santar bodoa hia Mohotara.#10:2 Kornelius ocop porocaya ma Mohotara iyoh onon Mohotara co bujur, Mohotara co tonyembah dulun Yahudi, tapi are arinai piji ngoneh tintun Yesus.
3Nyan ico kotika sokitar jam tolu macohit,#10:3 Jam tolu macohit tuh iyohco waktu bodoa sombayang dulun Yahudi. Mungkin kotika iyoh Kornelius mahi dahat sombayang. Mohotara nyoruhan molekat hia Kornelius. Tonta lau Kornelius kito molekat cioh. Molekat cioh naah araieh, “Kornelius!” 4Are korinah akut eh nolangon molekat cioh. Are ngisok, “Oko ome boh Tuan?”
Molekat cioh museh, “Iko ngonyorih Mohotara tului iko hopompaluh bodoa hia Mohotara. Iko derek mihi duit indan dulun mala. Ancioh yoh gunai samah ma porsembahan mu hia Mohotara. Tului iyoh, Mohotara mingkat iko. 5Jadi, makitu nyoruhan bat pira-pira beti dulun hia kota Yope. Nyuhu iroh milo ico beti dulun co araieh Simon, are yoh herak dulun nisi eh Petrus. 6Are rahat nukui nyan lopo ico beti pongolola upak ocinlouk, co araieh Simon. Lopo eh nyan saran banut.”
7Paluh molekat cioh tulak. Opah iyoh, Kornelius naah duo beti polayan eh hintang ico beti tontara. Tontara cioh mahi molayani Kornelius. Tontara cioh mahi santar nyuwah ngonyorih Mohotara. 8Kornelius monjelas ma iroh kokon antun molekat cioh. Jadi, are nyuhu iroh hia Yopeika mehen Simon Petrus hia kota Kaisarea yoh.
Petrus oko ponoto ingkan Mohotara
10:9-16
9Nyuap ondo eh kawan dulun co tonyuhu Kornelius yoh incah ponah solanan. Nyan sokitar jam duo balas maondo, iroh ocop dokin kota Yope. Sopondehan iyoh, Petrus nukat hia sapo lopo co rata yoh ika bodoa.#10:9 Bagian topit hunyung lopo hapan isan serambi. Sapo Kawan lopo mula tongompian rata. 10Paluh Petrus nongkomo karas kodoueh hintang jere kuman. Lambak kuankanon tonyodia. Are haba ponoto ingkan Mohotara. 11Are kito langit boporoak, paluh oko anco isan ico kolambar benang co bolambah. Nyan opat buncu eh benang cioh bokomeleng, nosuloh ingkan langit. 12Nyan ponah benang cioh oko orong lau macam ocinloukco pali awi dulun Yahudi, tomasuk ocin co opat paai, ocin co nyole nyan tana, hintang kawan bele co boralik. 13Paluh Mohotara mantun ma are, “Petrus, kokat bat! Nyarak kawan ocin tanon ika kanom mu.”
14Hien Petrus, “Aroh, Tuhan! Akuh aroh piji kuman daging ocin tanon. Kawan ocin tanon pali.”
15Tapi Mohotara mantun nyan kohonduo kali eh, “Amun hieng-Kuh ancioh boraoi kanon, aroh iko nisi eh pali.”
16Hontolu kali koderek ancioh tojadi, punan benang cioh tokatang hopuli hia langit.
Petrus sopopak ma kawan dulun co tonyoruhan Kornelius
10:17-23a
17Rahat Petrus momikir ome arti ingkan anco topototo Mohotara ma are niin, kawan dulun co cuhun Kornelius ocop popak ma lopo Simon. Iroh tonjok nyan baun tungkang pagar polontaran lopo cioh. 18Iroh ngisok, “Mainboh oko pai dulun co araieh Simon atawa co tonisi ka Petrus co nukui nyan lopo cotuh?”
19Kotika Petrus incah momikir tintun ome anco topoleha Mohotara ma are yoh niin, Roh Mohotara mantun ma are, “Petrus! Oko dulun tolu beti nganyap iko. Punan doh dombut. 20Kokat bat paluh nosuloh hia pinda. Oluco iroh bokon ma dulun Yahudi, iko aroh ragu-ragu tulak umba iroh awi Akuh boh co nyoruhan iroh hia iko.”#10:20 Petrus incah ragu hojolahan ma dulun bokon ma Yahudi tului poraturan agama Yahudi, Poraturan agama Yahudi ngosiit iyoh.
21Jadi, Petrus nosuloh. Paluh are mantun ma iroh tolu yoh, “Akuh tuh boh dulun co tonganyap me yoh. Oko ome boh dapot ikan dombut nganyap akuh?”
22Hien doh ma are, “Kaih hia intoi cuhun ico beti kopala tontara Romawi. Co araieh Kornelius. Are yoh dulun co pio. Are mahi ocop porocaya ma Mohotara. Uras dulun Yahudi hormat ma are. Malom, oko molekat Mohotara dombut hia are. Molekat cioh nyuhu are mongundang iko ika dombut hia lopo eh, ika are boraoi ngoneh ajaran ingkan iko.” 23aOpah iyoh, Petrus nyawot iroh hiloi houn nyan lopo cioh.
Petrus popak Kornelius
10:23b-33
23bKotika manyuap ondo eh bat, Petrus bosiap siap tulak homboh kawan dulun coruhan Kornelius yoh. Oko pira pira beti dulun co porocaya ingkan kota Yope yoh mahi umba. 24Nyan ondo opah iyoh kole punan doh dapot nyan kota Kaisarea. Nyan kota cioh, Kornelius ocop nganto iroh. Nyan lopo eh yoh are ocop ngumpur kokon koluarga eh hintang kawan jolahai eh. 25Waktu Petrus dapot lopo eh, Kornelius paluh ngelop kalop eh nyan tohimo paan Petrus paluh nyembah nyuku are. 26Tapi Petrus nantot Kornelius, ngocet ika eh tonjok. Hien Petrus ma are, “Tonjok leh. Aroh nyembah nyuku akuh. Akuh tuh mahi kolunon, samah leh ma iko.”
27Samir hopander ma Kornelius, kokon doh paluh muntam hia ponah lopo. Nyan intin, Petrus noto orong dulun ocop kumpur. 28Petrus mantun ma iroh, “Hukum agama kaih dulun Yahudi, tongosiit hojolahan ma dulun co bokon ma Yahudi isan ikan tuh. Kaih mahi aroh boraoi nganda hia lopo dulun co bokon ma dulun Yahudi. Ancioh uras ocop tomonau me. Tapi duo ondo ohut tuh, akuh oko ponoto ingkan Mohotara. Mohotara mara ma akuh ika aroh mangap dulun co bokon ma Yahudi iyoh aroh patut tohojolahan, dapot kaih bopikir dulun cioh aroh pantas tonorima pian Mohotara. 29Poko tului iyoh, waktu akuh tomongundang, akuh aroh bahat nyamang kuh dombut. Jadi makitu, akuh nyau ngisok: Kura boh ikan nyompakat akuh hia intoi?”
30Kornelius museh, “Tolu ondo co ohut tuh, akuh nukui nyan lopo. Kira-kira waktu eh samah ma otuh ka, jam tolu macohit, dahat kuh bodoa. Nongkocok oko molekat co tonjok nyan muka kuh. Lembon eh ngololinyap. 31Hien molekat cioh, ‘Kornelius, Mohotara ngoneh doamu. Mohotara mahi jorih tului iko derek mihi duit indan kawan dulun mala. 32Jadi, nyuhu bat pira pira beti dulun tulak hia kota Yope ika milo ico beti dulun co araieh Simon, are yoh herak ka tonisi Petrus. Makitu are dahat nukui nyan lopo ico beti pongolola upak ocin, co araieh mahi Simon ka. Lopo eh nyan saran banut.’ 33Jadi akuh jion nyuhu dulun tulak milo iko ika lian dombut hia intoi. Akuh botorima kasih lau awi iko ocop dombut. Makitu tuh kaih ocop kumpur nyan intoi. Mohotara mahi oko halo ito. Tuhan ocop porapot ajaran-Eh ma iko. Nyawot dohop iko porapot kokon anco hien Mohotara yoh ma kaih. Makitu kaih siap ngoneh eh.”
Petrus porapot Tarung Pio ma koluarga Kornelius hintang ma kawan jolahai eh
10:34-43
34Opah iyoh, Petrus mantun, “Makitu akuh tuu-tuu paham bahawa Mohotara aroh baya mongasihi ico bangsa labih hangki bangsa co bokon. 35Tapi Mohotara norima kawan dulun ingkan bangsa comoh bewe. Mohotara angar norima kawan dulun amun iroh ngohurmat Are paluh nguan anco bujur.
36Koraom me bahawa Mohotara ocop porapot Tarung Pio ma kaih bangsa Yahudi. Jaman sinan, Mohotara bojanji Are angar nyoruhan ico beti Laca. Laca cioh angar mihi calan ika dulun boraoi bodamai ma Mohotara. Yesus iyohco Laca cioh Co Tomonjanji Mohotara. Yesus yoh Tuhan indan kokon dulun nyan pindaondo tuh, aroh baya indan dulun Yahudi bewe.
37-38Ikan mahi ocop ngoneh tintun kokon poristiwa co tojadi ma Yesus nyan ngolauh tana bangsa kaih dulun Yahudi. Opah Yohanes momborita tintun baptisan, Yesus molai polayanan-Eh. Yesus yoh dulun ingkan kota Nasaret. Are molai polayanan-Eh nyan propinsi Galilea. Mohotara mihi Roh-Eh indan Yesus. Mohotara mahi mihi kuasa indan Yesus. Jadi, Yesus tulak hia omoh-omoh, nguan anco pio, mombebas kawan dulun ingkan kuasan anco jahat. Are boraoi nguan kokon macam aang co mosotahir tului Mohotara somi Eh.
39Yesus nguan gawi-Eh nyan ngolauh derah dulun Yahudi, tomasuk kota Yerusalem. Kaih kawan rasul-Eh tuh mahi noto ma matan kaih tuh leh tintun kokon anco tongompiai-Eh yoh. Nyan kota Yerusalem yoh, kawan dulun ngompatoi Are nyan sompolaki 40Tapi nyan ondo co kotolu,#10:40 Yesus matoi ondo jomahat paluh hopuli bolum nyan ondo Menggu. Mohotara umpi Are bolum hopuli ingkan pompatoi. Ika oko bukti eh, Mohotara moholu kawan dulun co lian noto Yesus opah iyoh. 41Tapi aroh uras kokon dulun tomoholu Mohotara noto Yesus, baya kawan dulun co ocop tomili-Eh leh co boraoi, tomasuk kaih kawan rasul Yesus. Opah Yesus bolum hopuli, kaih lian kuman ngorih homboh Are. 42Jadi, Yesus morentah kaih ika momborita eh ma kawan dulun. Kaih cuhui porapot bahawa Mohotara ocop mili Yesus jarin hakim indan kokon dulun, aroh poduli dulun co bolum hintang co matoi. 43Nyan jaman sinan, kawan nabi mahi mara tintun Yesus awi iroh nyurat tintun Are yoh iyohco Laca Co Tomonjanji Mohotara. Nyan surat doh yoh nisi bahawa Yesus yoh oko kuasai ika mongampun kawan dosan kokon dulun co porocaya ma Yesus.”
Roh Mohotara nyolungkop kawan dulun co bokon ma dulun Yahudi
10:44-48
44Waktu Petrus incah hopander, Roh Mohotara toka nyolungkop kokon dulun co ngoneh borita cioh. 45Oko ka kawan dulun Yahudi co porocaya co umba Petrus ingkan kota Yope. Iroh noto poristiwa cioh. Korinah kohurong doh tului Roh Mohotara mahi dombut nyolungkop kawan dulun co bokon ma dulun Yahudi. 46Kawan jolahan Petrus iyoh mahi monau Roh Mohotara oko nyan kawan dulun co bokon ma Yahudi tului iroh rahat hopander hapo kawan bohasa bokon hintang nara Mohotara.
Jadi, Petrus ngisok ma kawan dulun Yahudi co umba are niin. Hie eh, 47“Iroh tuh ocop norima Roh Mohotara samah ma ito ka.#10:47 Nyan ondo Pentakosta, Roh Mohotara dombut nyolungkop iroh. Noto Kesah 2:1-4. Jadi, aroh dapot oko dulun co ngosiit iroh tomombaptis ma danum ka”
48Paluh, Petrus nyuhu kawan dulun co bokon ma dulun Yahudi yoh tomombaptis ponah aran Yesus Kristus. Opah iyoh, Kornelius hintang iroh co bokon yoh nyawot Petrus nukui umba iroh kotahin pira pira ondo onieh.
Currently Selected:
Kesah Rasul 10: TBSS
Highlight
Copy
Compare
Share
Want to have your highlights saved across all your devices? Sign up or sign in
