2 Korintus 9
9
Paulus nyompakat dulun Korintus ika mihi sumbangan ma kojorih jerah
9:1-15
1Sobujur eh, akuh aroko porolu nulih indam me tintun dohop kawan dulun bokon co porocaya nyan Yerusalem. 2Awi, ocop koraong kuh ikan tuu-tuu nyau nyumbang indan iyoh. Ponah aang cotuh, akuh nara ikan tohimo kawan dulun Makedonia. Akuh mara iroh bahawa ikan nyan derah Akaya ocop siap nyumbang ingkan toun houn. Jadi, somangat me umpi orong dulun Makedonia nyau nyumbang ka. 3Tapi, akuh ocop nyoruhan Titus hintang konduang duo iyoh hia ikan ina me bujur-bujur siap isan co ocop kuh mara ma kawan dulun nyan Makedonia. Aroh dapot koponara kuh ma ikan yoh mohampa. 4Jakai oko kawan dulun Makedonia co umba homboh akuh daai, paluh iroh noto bahawa sumbangan me arinai siap, maka kaih angar mohaan. Ikan mahi angar mohaan ponah aang cioh. 5Iyohboh tuluieh akuh nongkomo porulu nyoruhan tolu konduang taiyoh hia ikan. Iroh nosoun akuh ina doh lian murus sumbangan co ocop tomonjanji me yoh. Ma isanioh, sumbangan taiyoh ocop siap sorinai akuh dombut. Onon mombukti bahawa ikan mihi ma kosanang atoi aroko tului tomaksa.
6 Mingatboh popatah cotuh: dulun co mimbun isut, are angar mutoi isut ka. Tapi dulun co mimbun orong, are angar mutoi orong ka. 7Jadi, sobulih eh sika ikan mihi sosuai ma koputusan co ocop me umpi ponah atoi hopomasing. Aroh mihi ma kobahat atoi atawa nyama topaksa. Awi, Mohotara jorih ma dulun co mihi ma kojorih jerah. 8Mingatboh ka bahawa Mohotara sangup mihi orong aang co pio hinut indam me, ina me ngohaba kokon aranaang co tomorulu me. Ma sanioh, ikan hegah nguan orong alogawi pio. 9Isan co tonulih nyan ponah Surat Borasih:
“Are hobagi-bagi ma komohian songai ma kawan dulun mala.
Are angar nguan aang co pio dapot sokotahi-tahieh.”#9:9 Ingkan buku Masmur 112:9.
10Mohotara co nyodia jangoi indan dulun co mimbun hintang kanon indan to. Isan iyoh, Are angar nyodiaeh meleh hangki cukup jangoi indam me. Are mahi angar umpi hasir alogawim me co pio sasar orong. 11Maksut eh, Mohotara angar mihi indam me meleh hangki cukup ina me hegah mihi indan dulun bokon ma komohian songai. Paluh, nyan waktu kaih porapot sumbangan me daai, orong dulun angar bosukur ma Mohotara.
12Awi, hiah waktu ikan molayani isan iyoh, ikan angar mombantu mondakan koporuluan kawan dulun porocaya nyan Yerusalem. Tapi aroko baya iyoh bewe. Ikan mahi angar umpi orong dulun bosukur ma Mohotara. 13Polayanan co piam me yoh porahan bahawa ikan bolum bujur nyan tohimo Mohotara. Maka kawan dulun angar nara Mohotara. Iroh angar nara Mohotara awi ikan nontumun ajaran Tarung Pio tintun Kristus co tomorocaya me. Iroh mahi angar nara Mohotara tului komohian atoi me mihi sumbangan indan doh hintang indan kokon dulun. 14Iroh angar mondoa ikan ma nyaman komasi hejeng awi Mohotara ocop porahan koboraoi-Eh indam me. 15Bosukur boh ma Mohotara awi aang co ihi-Eh indan to aroko lian tonilai.
Currently Selected:
2 Korintus 9: TBSS
Highlight
Copy
Compare
Share
Want to have your highlights saved across all your devices? Sign up or sign in
