2 Korintus 8
8
Paulus mondorong dulun Korintus ika nyumbang ina dohop kawan jomaat nyan Yerusalem
8:1-15
1Kawan konduang, kaih nyau mara ma ikan tintun cara Mohotara poleha kopio-Eh ma kawan jomaat nyan derah Makedonia. 2Iroh tonguji ma orong macam pondoritaan. Tapi Mohotara umpi atoi doh korinah jorih jerah. Iroh mala lau, tapi Mohotara umpi atoi doh korinah sanang mihi sumbangan ika dohop dongan. 3Akuh lian momastieh bahawa iroh mihi somampu doh, malah labih 4Ingkan atoi tiroh leh, iroh korinah nyawot ma kaih amun iroh boraoi umba dohop nyumbang indan kawan jomaat nyan Yerusalem. 5Iroh mihi ocu meleh ingkan co tonyangka kaih. Iyohonon, portama-tama iroh ngonyorih Tuhan. Opaiyoh, ngonyorih kaih. Awi, cara cioh sosuai ma kojere Mohotara.
6Titusboh co umpi ikan molai aang co pio cotuh. Jadi kaih nyawot Titus nyari hintang dohop ikan ngoholuh usaha co pio tuh. 7Nah, ikan nguan kokon aranaang ma cara co pio lau. Iyohonon, ikan porocaya ma Yesus ma koborohon lau. Ikan majar ma cara co anar. Ikan monau orong aang. Ikan korinah bosomangat. Ikan korinah hopasi kaih. Samah isan ikan nguan kokon aranaang yoh ma cara co pio lau, sobulih eh ka ikan mihi sumbangan ma komohian atoi.
8Akuh mantun otuh aroko jarin porentah. Tapi, akuh mara tintun pondohop ingkan kawan dulun nyan Makedonia sobagai cuntu indam me. Ma isanioh, akuh nyau nguji amun ikan bujur-bujur hopasi kawan konduang co bokon. 9Ikan mahi monau bahawa Tuhan to, Yesus Kristus, porahan kopio-Eh ma ikan. Iyohonon, Are naat koponatou-Eh nyan sorga paluh jarin mala. Are jarin mala ina me lian jarin tatou ma orong aang co pio hinut ingkan Mohotara.
10Jadi, otuhboh nosehat kuh tintun aang taiyoh. Otuh angar boguna indam me: Toun co houn, ikan molai nyumbang. Aroko baya iyoh, tapi ikan oko kojere ika ngoholuh eh! 11Jadi, makitu, ngoholuh eh bat yoh! Batuh ikan bosomangat jere mihi. Ma somangat co samah yoh ka, kojerebat ikan bosomangat ika nguan eh. Mihiboh sosuai ma komampuan me. 12Amun dulun lera mihi, maka Mohotara norima pihi cioh. Mohotara nyau norima pihi co sosuai ma komampuan dulun. Dulun aroko sobulih mihi meleh hangki komampuaieh.
13Akuh aroko bomaksut maksa ikan mihi sumbangan ika dohop dongam dapot kobolum me jarin soranta. Tapi, maksut kuh ina kotopah hopomasing samah-samah tomoncukup. 14Makitu, ikan co oko koholowi sobulih eh dohop iroh co ponah kotopah. Sanioh ka, daai kotika iroh oko koholowi hintang ikan ponah kotopah, maka iroh hegah dohop ikan. Ma isanioh, kotopah hopomasing samah-samah tomoncukup. 15Samah nain co tonulih nyan ponah Surat Borasih:
“Kawan dulun co ngumpur orong, iroh aroko kolabih eh.
Kawan dulun co ngumpur isut, iroh aroko kotopah eh.”#8:15 Ingkan Koluaran 16:18.
Paulus nyoruhan Titus hintang duo konduang co bokon hia jomaat nyan Korintus
8:16-24
16Kaih bosukur ma Mohotara awi Are umpi atoi Titus tuu-tuu nyau mombantu ikan samah isan kaih tuu-tuu nyau mombantu ikan. 17Hiah waktu kaih nyuhu are tulak hia ikan, are sotuju. Tapi, sobujur eh ponah atoieh leh, are ocop korinah jere nyari ikan.
18 Bokon ma Titus, kaih mahi nyoruhan ico konduang to co bokon hia ikan. Uras jomaat mohormat are awi are mombantu ponah polayanan momborita Tarung Pio. 19Aroko iyoh bewe! Kawan jomaat mahi ocop mili konduang cioh ika nyomin kaih ponah solana ika mehen sumbangan mahah Yerusalem. Kaih umpi polayanan cioh ina Mohotara tonara, hintang ina dulun lian kito bahawa kaih tuu-tuu nyau dohop dulun bokon. 20Kaih nyoruhan konduang cioh awi kaih ati-ati lau ina aroh dapot oko dulun co boraoi nisi kaih curang hiah waktu kaih mongawas pongumpulan hintang pombagian sumbangan co orong yoh. 21Kaih nyau nguan kokon aranaang ma kobujur harus, aroh baya nyan tohimo Tuhan, tapi nyan tohimo kolunon mahi.#8:21 Ingkan buku Amsal 3:4.
22Homboh ma iroh yoh kaih nyoruhan konduang to co bokon kole. Kaih ocop derek lau nguji are. Tonyata are horoholuh tuu-tuu nyau dohop dongai. Makitu, are meleh bosomangat kole awi are porocaya bahawa ikan nyau mihi sumbangan taiyoh.
23Amun oko co ngisok tintun Titus, are iyohco jolahang kuh co bogawi samah ma akuh ika molayani ikan. Amun oko co ngisok tintun konduang bokon co duo yoh, iroh iyohco kawan dulun co tonyoruhan pian kawan jomaat. Iroh porahan bahawa Kristus bohimat lau. 24Awi iyoh, polehabat ma iroh bahawa ikan hopasi iroh. Kaih ocop mantun ma iroh orong aang co pio tintun ikan. Jadi, poleha bat ka bahawa kokon aang taiyoh bujur. Ma isanioh, maka kawan jomaat co bokon hegah kito kokoieh yoh.
Currently Selected:
2 Korintus 8: TBSS
Highlight
Copy
Compare
Share
Want to have your highlights saved across all your devices? Sign up or sign in
