2 Korintus 10
10
Paulus oko kuasa ingkan Tuhan ika ngorohon dulun porocaya hintang ngohancur ajaran co sala
10:1-11
1Akuh, Paulus, ocop monau bahawa oko pira-pira dulun nyan halo ikan mantun santuh: “Hiah waktu Paulus oko halo ito, are aroko pongasar. Are bohanyi nopoh ito baya molalui surat nyan waktu are ocu ingkan ito.” Jadi, makitu, akuh nyau nyawot hia ikan ma koaroh kasar samah isan Kristus mahi aroko pongasar hintang pio atoi. 2Akuh nyawot ma ikan: Aroh maksa akuh porahan bahawa akuh bohanyi nopoh ikan ma kongasar nyan waktu akuh halo ikan daai. Akuh bopikir akuh sobulih umpi isan iyoh tohimo kawan dulun totentu co nyompan bahawa kaih bolum nontumun kojere kolunon. 3Mula bujur kaih incah bolum nyan dunia tuh. Tapi kaih aroko bojuang ma cara kolunon. 4Kawan capa co hapan kaih bokon capa dunia tuh. Kaih hapo kuasa ingkan Mohotara. Iyoh isan capa co sangup mohancur kuta musuh. 5Musuh kaih mehen ajaran co sala. Tapi, kaih ngalah kokon iyoh. Dulun co bolecak mangun pagar co hunyung co mohalang kolunon ika nyono Mohotara. Tapi kaih ngehak ngekah kokon iyoh. Dulun empun pikiran co aroko bujur. Tapi, kaih monau pikiran doh aroko bujur paluh kaih majar iroh ina tuhit ma Kristus. 6Opah kokom me ocop tuu-tuu tuhit, kaih siap ika majap kokon dulun bokon co aroko tuhit.
7Ikan sobulih bopikir pio-pio tintun ome co koraom me. Amun oko dulun co yakin bahawa are iyohco tioh Kristus, dulun cioh sobulih pokingat arop eh tintun otuh: Kaih iyohco tioh Kristus ka samah ma are. 8Akuh aroko mohaan amun akuh tolangkun banga ma kuasa co ihin Tuhan indan kaih. Awi, Tuhan mihi kuasa indan kaih ika dohop ikan meleh borohon porocaya, aroko ika mohancur koporacayaam me. 9Ma kawan suratkuh, akuh aroko bomaksut umpi ikan takut. 10Koraong kuh oko dulun co mantun, “Ponah kawan surat eh, Paulus hapo kawan antun co bowibawa hintang tegas. Tapi nyan waktu are oko halo ito, sikap eh kalam, hintang kawan antun eh mohampa leh.” 11Dulun co nain iyoh sobulih porhati otuh: Samah isan kaih hapo kawan antun co tegas ponah surat hiah waktu kaih aroko halo ikan, sanioh ka daai alogawin kaih angar tegas nyan kotika kaih oko halo ikan kole.
Paulus mombela polayanan eh
10:12-18
12Oko kawan dulun totentu co nara arop doh tarop. Kaih aroko bohanyi nisi kaih samah harat ma iroh. Tapi sobujur eh iroh uong. Awi, iroh baya mombanding arop eh ma arop doh leh. Iroh hapo ukuran tiroh leh ika mangap arop eh harat. 13Tapi kaih aroko sanioh. Kaih aroko nara arop meleh hangki batas eh. Kaih aroko nara arop ma polayanan dulun bokon nyan derah bokon. Kaih baya potara tintun polayanan co ihin Mohotara ma kaih. Polayanan cioh tomasuk polayanan kaih nyan halo ikan! 14Awi, batuh kaih ocop dombut hia ikan hintang porapot Tarung Pio tintun Kristus. Jadi, kaih aroko nolangkun batas. 15Kaih aroko nganyap koponara tintun polayanan co tongompian dulun bokon nyan luar batas co tonantu Mohotara indan kaih. Tapi, kaih nara tintun polayanan kaih nyan halo ikan. Polayanan taiyoh incah ponah batas co tonantu Mohotara indan kaih. Iyohonon, kaih boharap ikan sasar borohon porocaya ma Kristus. Maka, ikan angar meleh mohormat kaih. 16Ma isanioh, kaih hegah momborita Tarung Pio nyan kawan derah bokon ka, iyohonon kawan derah co arinai tomolayani dulun bokon. Kaih aroko sobulih nganyap koponara tintun hasir polayanan co tongompian dulun bokon nyan derah co tonantu Mohotara indan doh. 17Tapi kaih lian banga sosuai ma ome co tonulih ponah Surat Borasih: “Amun oko dulun co nongkomo banga, olueh are banga tintun ome co tongompian Mohotara.”#10:17 Ingkan buku Yeremia 9:24. 18Awi, dulun co bujur-bujur patut tonara iyohco dulun co tonara pian Tuhan, aroko dulun co nara arop eh tarop.
Currently Selected:
2 Korintus 10: TBSS
Highlight
Copy
Compare
Share
Want to have your highlights saved across all your devices? Sign up or sign in
