2 Korintus 7
7
1Kawan konduang co tongasih! Kokon janji Mohotara yoh indan to. Awi iyoh, kojerebat ito ngocu arop to ingkan kokon aang co jahat ina beti hintang atoi to tenden borasih. Ma sanioh, ito sasar bolum husus indan Mohotara hintang nyook ma Tuhan.
Paulus jorih lau tului surat eh batuh umpi atoi doh borubah
7:2-16
2 Sindo oni akuh nyawot, porahan batboh bahawa ikan hopasi kaih. Kaih aroko piji umpi sala ma ome bewe nyan halo ikan. Kaih aroko piji morugi ikan atawa nipu ikan ika haba kobohujung. 3Akuh mantun sanioh aroko ika nyala ikan. Awi isan co ocop piji kuh mantun, kaih korinah hopasi ikan. Ito aroko angar topisah, iyoh ito bolum atawa matoi. 4Akuh bohanyi mander eh sak rak tohimo ikan. Tapi, akuh mahi banga lau tohimo ikan. Oluco kaih nohimo orong pondoritaan, ikan korinah mohibur kaih. Maka, atoi kaih korinah jorih lau.
5Kotika kaih dapot nyan propinsi Makedonia, kaih aroko sampet nondoolai. Kaih porehun nohimo pondoritaan. Nyan luar oko dulun co ngolawan kaih. Nyan ponah atoi kaih ka oko kokuatir. 6Tapi Mohotara yoh horoholuh mohibur kawan dulun co putus asa. Are mohibur songan kaih kotika Are nyoruhan Titus hia kaih. 7Atoi kaih tohibur aroko budas tului Titus dombut, tapi mahi awi are mara bahawa ikan mohibur are. Are ngesah ma kaih bahawa ikan bolingu akuh, ikan moneser ma alogawim me co sala batuh, hintang makitu ikan tuu-tuu jere mondukung akuh. Uras iyoh umpi akuh meleh jorih lau.
8Koraong kuh bahawa surat kuh batuh umpi atoi me jorung. Tapi, akuh aroko moneser nulih surat cioh. (Mula hiah kosulak eh akuh moneser awi koraong kuh surat cioh umpi atoi me jorung. Tapi, ikan jorung baya indan sopondehan leh.) 9Jadi, makitu akuh jorih lau, aroko tului ikan jarin jorung, tapi awi nyaman kojorung cioh umpi ikan naat dosa. Nyaman kojorung isan iyoh mula co tongonyere Mohotara. Jadi, kaih aroko umpi ikan rugi ponah aang ome bewe. 10Awi, amun ikan nongkomo jorung ma cara co tongonyere Mohotara, ulok ehbat ikan naat dosam me. Maka, ikan tonyolamat. Jadi, ikan aroko moneser ma nyaman kojorung cioh. Malah seen kojorung co baya ma ponoto socara kolunon, ulok ehbat ikan matoi topisah ingkan Mohotara 11Notoboh kokon hasir ingkan nyaman kojorung cioh co sosuai ma kojere Mohotara! Iyohonon makitu ikan meleh tuu nontumun Tuhan. Ikan bousaha ina kosolaam me yoh tongomereh. Ikan jarin sangit tohimo dosa hintang meleh takut tohimo Mohotara. Ikan bolingu akuh. Ikan meleh bosomangat umpi aang co pio. Ikan majap dulun co sala. Jadi, opah norima surat kuh yoh, ikan mombukti bahawa ikan ngomereh kokon mosalah cioh ma cara co buah.
12Hiah waktu akuh nulih surat cioh indam me, tujuan eh aroko baya indan dulun co sala yoh atawa indan dulun co tonyala. Sobujur eh, tujuan kuh ina me jarin tohoku nyan tohimo Mohotara bahawa ikan korinah hopasi kaih. 13Awi tului hasir cioh, maka atoi kaih botambah somangat.
Bokon ma somangat cioh, kaih mahi jorih lau meleh kole ma noto bahawa Titus jorih lau. Awi, kokom me umpi atoieh tenang. 14Sorinai Titus nyari ikan, akuh mantun maeh bahawa ikan iyohco dulun co pio. Jadi, ikan aroko umpi akuh mohaan. Kaih horoholuh mantun kawan aang co bujur ma ikan. Sanioh ka, kokon kopiom me co tomantun kaih ma Titus, uras taiyoh tobukti bujur ka. 15Makitu, are sasar hopasi ikan. Hiah waktu, are mingkat bahawa ikan norima are ma hormat hintang ikan uras tuhit. 16Akuh jorih lau, awi ikan lian tomorcaya ponah kokon aranaang.
Currently Selected:
2 Korintus 7: TBSS
Highlight
Copy
Compare
Share
Want to have your highlights saved across all your devices? Sign up or sign in
