2 Korintus 6
6
1Jadi sobagai dulun co bogawi samah-samah ma Are, maka kaih nyawot ma ikan: Aroh umpi kopion atoi Mohotara jarin sia-sia. 2Awi, nyan ponah Surat Borasih, Mohotara mantun:
“Nyan waktu co tangar, Akuh ngoneh iko.
Nyan ondo cioh, Akuh dohop hintang nyolamat iko.”#6:2 Ingkan buku Yesaya 49:8.
Porhatibatboh, kawan konduang! Makitu iyohco waktu co tangar! Makitu iyohco ondo Mohotara nyau nyolamat dulun.
Paulus nopak antun co oko ponah atoi ma jomaat Korintus
6:3-10
3Kaih aroko kolu polayanan kaih tonyala. Tului iyoh, kaih bousaha ina polayanan kaih aroko hocala. 4Tapi, ponah kokon aranaang co pian kaih, kaih porahan bahawa kaih iyohco kawan dulun co molayani Mohotara. Iyohonon, kaih horoholuh sabar kotika noharep kokon macam kosusah. 5Kawan dulun molantu kaih, pokuntam kaih ponah seper, umpi korusuh ika ngolawan kaih. Kaih bogawi bohimat, derek dou, kurang tirui. 6Kaih molayani ma atoi co montong morong, ma akar pikir ingkan Mohotara, ma kosabar, ma kopion atoi, hintang ma bimbingan Roh Mohotara, ma komasi co aroko pura-pura. 7Kaih horoholuh momborita ajaran co buah. Kaih nguan kokon aranaang ma kuasa ingkan Mohotara. Cara kaih bolum bujur nyan tohimo-Mohotara, Ma cara kobolum cioh kaih mongguna isan capa ika naleh dulun. 8Inung dulun hormat ma kaih, inung iroh mohina kaih. Inung dulun nara kaih, inung iroh potampa kaih. Kaih horoholuh jujur, tapi oko co mangap kaih nipu dulun. 9Kawan dulun aroko nyono kaih, tapi Mohotara nyono kaih. Kaih derek jonyo matoi, tapi kaih tenden bolum. Kaih derek tonyiksa, tapi kaih aroko matoi. 10Kaih derek tongompian jorung, tapi kaih horoholuh jorih. Kaih mala, tapi umpi orong dulun jarin tatou ma aang co pio hinut. Kaih aroko empun ome-ome, tapi kaih empun kokon aranaang ponah Kristus.
Paulus mihi somangat jomaat Korintus ika bolum ngocu arop ingkan dosa
6:11–7:1
11Kawan konduang nyan Korintus! Kaih ocop hopander sak rak ma ikan. Kaih nopak ome co nyan ponah atoi kaih ma ikan. 12Kaih korinah hopasi ikan arelu oko hopaieh. Tapi ikan ngohoom asim me tohimo kaih. 13Jadi, makitu olu akuh hopander ma ikan samah isan ikan kawan anak takuh leh. Awi kaih hopasi ikan, maka sobagai baleh, akuh nyawot: Polehabatboh bahawa ikan hopasi kaih ka.
14Arohboh ikan hosopakat ma dulun co aroko porocaya co mompongaruh ikan ocu ingkan Kristus. Awi, moh tonai dulun co bujur hegah hokahung ma dulun co jahat? Moh tonai kopandau lian hokohico ma kopindong? 15Aroko mungkin Kristus sopondapat ma Lacan Setan. Ome kosamah dulun kristen ma dulun co bokon ma kristen? 16Moh tonai Lopo Mohotara oko nyan ika co samah ma kawan aang co hapan ika nyembah kawan dewa? Mohotara nukui nyan halo ito. Jadi, ito somporengu Lopo tioh Mohotara co bolum. Isan antun Mohotara cotuh co tonulih nyan ponah Surat Borasih:
“Akuh angar nukui nyan halo iroh. Akuh angar bolum hokohalo ma iroh.
Akuh angar jarin Mohotara co kotikas-tikas eh tonyembah doh.
Iroh angar jarin umat-Kuh.#6:16 Ingkan buku Imamat 26:12 dan Yeheskiel 37:27.
17Poko tului iyoh, Tuhan Mohotara mahi mantun,
Pusitboh ingkan halo kawan dulun co aroko porocaya ma-Akuh.
Misahbat arop me ingkan iroh.
Aroh nyantuk kawan aang co nyawuh ikan.#6:17 Ingkan buku Yesaya 52:11.
Amun ikan nontumun kawan porentah-Kuh non, maka Akuh angar norima ikan.#6:17 Ingkan buku Yeheskiel 20:34,41.
18Akuh angar jarin Tamam me.
Ikan angar jarin kawan anak-Kuh, co bakah hintang bawe.
Saniohboh antun Tuhan Mohotara, Co Poko Bokuasa.”#6:18 Ingkan buku 2 Samuel 7:14; 1 Tawarik 17:13; Yesaya 43:6; Yeremia 31:9.
Currently Selected:
2 Korintus 6: TBSS
Highlight
Copy
Compare
Share
Want to have your highlights saved across all your devices? Sign up or sign in
