2 Korintus 5
5
Paulus aroko putus asa nohimo pondoritaan awi are yakin ito ngohaba beti baa
5:1-10
1 Kaih aroko putus asa, awi kaih koraon otuh: Betin to nyan dunia tuh ibarat eh kemah co baya indan sopondehan. Amun kemah to tomungkar, ito angar ngohaba lopo nyan sorga co angar marot sokotahi-tahieh. Lopo cioh ingkan Mohotara, aroko tonguan silun kolunon. 2Kotahin ito nyan ponah kemah tuh, ito ngolomumut, awi ito korinah bolingu lau nukui nyan lopo baa co ito haba nyan sorga yoh. 3Amun ito matoi ito aroko jarin roh co aroko hobeti. Ito ngohaba lopo co baa yoh. 4Tapi kotahin ito nyan ponah beti cotuh, ito nyohorui tului kobahat moho co tonongkomo to. Aroh tului ito jere matoi, naat beti tuh, tapi tului ito jere hapo beti baa cioh. Ito jere isan iyoh ina beti cotuh co baya indan sopondehan lian tonganti jarin beti co angar bolum sokotahi-tahieh. 5Mohotara leh co nyiap ito indan iyoh. Are mihi Roh-Eh ma ito jarin jaminan bahawa Are angar mihieh indan to kobolum baa cioh.
6Iyohboh tuluieh, kaih nongkomo yakin. Kaih monau bahawa kotahin kaih incah bolum nyan ponah beti cotuh, kaih nongkomo ocu ingkan Tuhan. 7Awi kaih bolum bodasar ma koporocaya kaih ma Kristus, aroh bodasar ma ome co kitan kaih. 8Iyoh tuluieh kaih tenden nongkomo yakin. Oluco sanioh, kaih meleh jorih matoi, naat beti cotuh, paluh bolum hokohalo Tuhan nyan sorga. 9Poko tului iyoh, amun kaih bolum atawa matoi, kaih horoholuh bousaha ngonyorih atoi Tuhan. 10Awi, daai kokon to sobulih tonjok nohimo korusi korojaan Kristus ika tomongadili. Sika dulun angar norima baleh sotimpar ma alogawieh nyan dunia tuh, iyohonon alogawieh co pio atawa co jahat.
Paulus nyompakat dulun ika porocaya ma Yesus ina iroh lian bodamai hopuli ma Mohotara
5:11–6:2
11Jadi, awi kaih nyook ma Tuhan, maka kaih bousaha moyakin dulun. Mohotara ocop monau bahawa atoi kaih bujur harus. Akuh nyau ina me mahi monau iyoh. 12Ma porahan iyoh, kaih aroko nganyap koponara ingkan ikan. Tapi, kaih nyau ina me hegah ngilang kaih, iyohonon ikan lian nara kaih nyan tohimo kawan dulun totentu taiyoh. Iroh yoh potamam arop tintun kawan aang co leha, aroh tintun atoi. 13Amun oko dulun co mangap kaih bobujon, aroko taluh-taluh, awi ome co tongompian kaih ika molayani Mohotara. Atawa amun oko dulun co mangap kaih boakal, iyoh indan kopentingan me. 14Tapi alasan indan kokon alogawin kaih iyohco tului Kristus masi ma ito. Awi kaih paham otuh: Amun ico Dulun ocop matoi indan kokon dulun, maka kokon dulun taiyoh ocop matoi ka. 15Maksut eh santuh: Kristus ocop matoi indan kokon dulun. Are nguan iyoh ina kawan dulun co bolum, iroh aroko bolum ika ngonyorih arop doh leh, tapi iroh bolum ika ngonyorih Are, iyohonon Are co ocop matoi hintang bolum hopuli indan doh.
16Awi tului yoh, kaih aroko bat monilai dulun umba ukuran kolunon. Kaih piji monilai Kristus umba ukuran kolunon. Tapi makitu aroko bat isan iyoh. 17Kawan dulun co bolum hokohico ma Kristus, iroh somporengu kolunon baa. Iroh ocop umbot bolum ma cara co usang. Kotuueh, iroh bolum ma cara co baa. 18Kokoieh yoh tongompian Mohotara. Ma alogawin Kristus, Mohotara ocop umpi ito bodamai hopuli ma Are. Mohotara mahi nyoruhan kaih ika dohop dulun bokon ina doh lian hopuli bodamai ma Are. 19Kaih momborita bahawa ma alogawin Kristus, Mohotara ocop umpi calan ina dulun hegah hopuli bodamai ma Are. Are aroko hopingkat-pingkat kosalaan dulun. Are co nyoruhan kaih ika momborita tarung cioh.
20Jadi, kaih iyohco coruhan Kristus. Mohotara hapo kaih, soolah-olah Are leh nosehat dulun. Ponah aran Kristus, kaih nyawot asi: “Hopulibat bodamai ma Mohotara.” 21Kristus aroko bodosa, tapi Mohotara umpi Are monangung dosan to, ina ito hokompio ma Mohotara tului hokohico ma Kristus.
Currently Selected:
2 Korintus 5: TBSS
Highlight
Copy
Compare
Share
Want to have your highlights saved across all your devices? Sign up or sign in
