2 Korintus 4
4
Alasan Paulus aroko putus asa hiah waktu are mondorita molayani Tuhan Yesus
4:1-18
1Mohotara porahan komasi-Eh ma ihi polayanan momborita Pojanjian Baa yoh ma kaih. Awi iyoh, kaih aroko putus asa. 2Kaih samah sindo aroko nyuhuk tujuan aranaang co umpi kaih mohaan. Kaih aroko hapo cara co licik hiah waktu kaih momborita Antun Mohotara tintun Kristus. Kaih mahi aroko moncampur ajaran co sala ma Antun Mohotara yoh. Malah, kaih majar kawan aang co bujur ma kosak rak. Awi saniohboh polayanan kaih nyan tohimo Mohotara, maka uras dulun lian monilai kaih ponah atoi doh leh. 3Mungkin oko kawan dulun co aroko hegah paham Tarung Pio co tomomborita kaih. Tapi iyoh baya kawan dulun co rahat nuntuh kolumat, 4iyohonon kawan dulun co aroko kolu porocaya. Lacan Setan, co monguasa dunia tuh, ocop umpi iroh aroko hegah paham. Are nutup atoi doh dapot iroh aroko lian noto cohaya, iyohonon Tarung Pio tintun Kristus co tohormat yoh, Kristus co gamaran Mohotara.
5Kaih aroko momborita tintun arop kaih, tapi momborita bahawa Yesus Kristus iyohco Tuhan ma kokon dulun. Are mahi nyoruhan kaih jarin polayan me. 6Awi, Mohotara co mantun, “Kojereboh oko kopandau co bocohaya ingkan ponah kopindong!” Are mahi co umpi kopandau bocohaya nyan ponah atoi to. Iyohonon, Are umpi ina to lian paham otuh: Mohotara korinah tohormat hintang iyoh lian tonoto molalui tampa Kristus.
7 Tarung Pio tintun Kristus iyohco harta co bungah tomika ponah ika co aroko boleka. Awi, Tarung Pio yoh korinah boleka. Tapi, kaih co momborita tintun iyoh aroko boleka. Ma isanioh, ocop nyata bahawa kuasa co bohimat lau yoh borasar ingkan Mohotara, aroh ingkan arop kaih tarop. 8Horoholuh oko kawan dulun co naleh kaih, tapi kaih aroko kalah. Kaih punah akar nohimo pondoritaan, tapi kaih aroko putus asa. 9Kawan dulun nganiaya kaih, tapi Mohotara aroko naat kaih. Kawan dulun ngomporoh kaih tapi kaih aroko matoi. 10-11Kotahin kaih bolum, kaih horoholuh tongancam matoi awi kaih molayani Yesus. Samah isan kaih horoholuh mehen pompatoi Yesus nyan ponah betin kaih. Tapi, kaih nguan iyoh ina pomolum Yesus mahi lian tonoto ponah kaih, iyohonon ponah betin kaih tuh co angar matoi. 12Jadi, artieh, kaih nohimo pompatoiponah polayanan kaih ina me ngohaba kobolum sumong kotahi.
13Oko antun cotuh co tonulih nyan Surat Borasih: “Akuh porocaya, maka akuh hopander!”#4:13 Ingkan buku Masmur 116:10. Kaih porocaya samah isan iyoh ka, maka kaih hopander tintun Yesus. 14Kaih porocaya bahawa Mohotara co ocop umpi Tuhan Yesus bolum hopuli, angar ka umpi kaih bolum hopuli ika bolum sokotahi-tahieh umba Yesus. Mohotara angar mehen kaih homboh-homboh ma ikan hia tohimo-Eh. 15Kaih nohimo kokon pondoritaan taiyoh indan kopiom me. Iyoh tojadi ina sasar orong dulun nongkomo kopion Mohotara. Maka, meleh orong dulun bosukur ma-Eh. Ma isanioh, Are tonara.
16Iyoh tuluieh kaih aroko putus asa. Oluco betin kaih sasar ujuh ongko, tapi atoi kaih sika ondo tongombaa. 17Pondoritaan co tonohimo kaih makitu baya indan sopondehan leh. Tapi hasir ingkan iyoh iyohco kaih ngohaba hodiah co tenden marot. Jadi, pondoritaan taiyoh sopele tombanding ma hodiah cioh co ocu meleh bahai hangki sogala-galaeh. 18Poko tului iyoh, kaih aroko momikir tintun kawan aang nyan dunia tuh co hegah tonoto. Tapi kaih momikir tintun kawan aang nyan sorga co aroko hegah tonoto. Tului kawan aang nyan dunia baya indan sopondehan leh, tapi kawan aang nyan sorga tatap dapot sokotahi-tahieh.
Currently Selected:
2 Korintus 4: TBSS
Highlight
Copy
Compare
Share
Want to have your highlights saved across all your devices? Sign up or sign in
