2 Korintus 3
3
Paulus molayani momborita tintun Pojanjian Baa co pian Mohotara ma kolunon
3:1-18
1Aroh bopikir kaih molai nara arop kaih. Kawan dulun bokon taiyoh porulu surat co nara kopion doh ina me porocaya ma iroh. Atawa iroh porulu surat ingkan ikan ina dongan porocaya ma iroh. Tapi kaih samah sindo aroko porulu surat isan iyoh. 2Awi, ikan leh ibarat eh surat koponara indan kaih. Ikan isan surat co tonulih ponah atoi kaih, co tonyono hintang lian tomombaca kokon dulun. 3Iroh lian monau bahawa Kristus leh nulih surat cioh molalui polayanan kaih. Surat cioh tonulih bokon ma tintah tapi ma Roh ingkan Mohotara co bolum. Tonulih aroko nyan bintap batu tapi nyan atoi kolunon.
4Kaih yakin mantun iyoh, awi koyakinan kaih ma Mohotara molalui Kristus. 5Akuh aroko bomaksut bahawa kaih oko komampuan tarop co umpi kaih sangup nguan polayanan cotuh. Tapi, kaih sangup baya tului Mohotara. 6Mohotara co umpi kaih sangup molayani momborita tintun Pojanjian Baa. Pojanjian Baa cioh aroko tintun nontumun kawan porentah co tonulih, tapi tintun nontumun Roh Mohotara. Awi, kawan porentah co tonulih nyan Hukum Torat yoh umpi dulun jarin matoi. Tapi, Roh Mohotara umpi dulun jarin bolum.
7 Hukum Torat co tomukir nyan kawan bintap batu, mula mehen pompatoi. Tapi, hiah waktu Musa molayani Mohotara ma mihi Hukum Torat yoh indan dulun Israel, tampa Musa molet pandau. Aang cioh porahan kooko Mohotara, dapot iroh aroko sangup nolangon tampa Musa. Kopandau cioh baya sonyulu leh, tapi polayanan Musa yoh tenden tohormat. 8Amun sanioh, tantu polayanan Roh Mohotara meleh tohormat kole. 9Polayanan Musa mombimbing kolunon hia ponghukuman, tapi polayanan Roh Mohotara mombimbing kolunon ina hokompio kole ma Mohotara. Jadi, amun polayanan Musa harat, maka polayanan Roh Mohotara meleh harat kole. 10Sinan, Hukum Torat yoh tomangap harat. Tapi makitu, Mohotara umpi Pojanjian Baa. Pojanjian Baa cioh meleh harat hangki kokon aranaang. Jadi, tombanding ma iyoh, Hukum Torat yoh aroko harat bat. 11Hukum Torat baya sonyulu leh tapi Pojanjian Baa indan sokotahi-tahieh. Jadi, amun sinan Hukum Torat harat, tantu Pojanjian Baa meleh harat kole.
12Awi kaih empun pongharapan isan iyoh, maka kaih bohanyi momborita tintun Pojanjian Baa cioh. 13Aroko isan jaman sinan waktu Musa mihi Hukum Torat indan dulun Israel. Waktu iyoh, are hapo kain ika nutup tampaeh ina doh aroko nolangon cohaya co sasar niho yoh. Iroh aroko lian paham tujuan ahir ingkan Hukum Torat yoh. 14Pikiran doh ocop totutup. Dapot makitu mahi, isan iyoh. Makitu, hiah waktu dulun Israel mombaca Pojanjian Lama nyan Hukum Torat yoh, ibarat eh oko kain cioh co incah tenden nutup pikiran doh. Iroh aroko lian bujur-bujur paham, awi dulun baya lian paham amun dulun cioh bolum hokohico ma Kristus. 15Tapi, dapot makitu, hiah waktu dulun Israel mombaca Hukum Torat co tonulih Musa yoh, ibarat eh oko kain cioh co nutup atoi doh sohinga aroko paham. 16Tapi, amun atoi dulun hopuli ngonyorih Tuhan, maka ibarat eh kain cioh topotiho. 17Awi Tuhan co tomaksut nyan intoi iyohonon Roh, Roh Tuhan ciohboh co mombebas ito. 18Kokon to co tomombimbing pian Roh Tuhan, Are hopompahui mongubah ito jarin sasar samah isan Are. Maka, kobolum to porahan bahawa Tuhan harat, ibarat eh tampa to aroko tonutup ma kain.
Currently Selected:
2 Korintus 3: TBSS
Highlight
Copy
Compare
Share
Want to have your highlights saved across all your devices? Sign up or sign in
