2 Korintus 2
2
1Jadi, akuh nguan koputusan aroko kolu bat dombut hia ikan ma koponyari co umpi kojorung. 2Awi, amun akuh umpi atoi me jorung, ome co mohibur akuh? Arelu oko dulun bokon ma ikan, co ocop jorung piang kuh! 3Onon boh tuluieh, akuh nulih surat cioh niin indam me. Akuh aroko kolu dombut paluh jarin jorung tului ikan. Sobulih eh ikanboh co umpi akuh jorih! Maka akuh nulih surat houn, awi akuh yakin amun akuh jorih, maka ikan angar jorih ka. 4Mula akuh nulih surat conon halo nyaman atoi co bahat hintang jorung, kawun akuh nangih singuk-singuk. Tapi akuh aroko bomaksut ika umpi ikan jarin jorung. Akuh bomaksut ina me monau bahawa akuh korinah hopasi kokon ikan.
Paulus nyawot ina doh mongampun dulun cioh co ocop naat dosaieh
2:5-11
5Mula oko dulun nyan halo ikan co umpi kojorung, aroh ma akuh bewe tapi are umpi kokom me jorung. (Mungkin co pioeh akuh mantun ‘tonga ingkan ikan’ leh ina akuh aroko nolabih-labih mosalah cotuh.) 6Pokongorong ingkan ikan ocop nopoh are. Topoh cioh ocop cukup. 7Jadi, makitu, ikan sobulih mongampun are, hintang mihi somangat ma are ina atoieh aroko jarin tolangkun jorung dapot are putus asa. 8Tului iyoh akuh nosehat ikan, ina ikan tuu-tuu hopasi are. 9(Ponah surat kuh non, akuh nulih indam me pira-pira potunjuk ika murus mosalah cioh. Tujuan kuh ika nguji ikan mainkah ikan horoholuh nontumun potunjuk kuh.)
10Amun ikan mongampun dulun co umpi sala, maka akuh mahi mongampun dulun cioh. Waktu akuh mongampun dulun amun mula oko co porulu tomampun akuh nguan iyoh indan kopio kokom me. Akuh mahi nguan iyoh nyan tohimo Kristus. 11Ito sobulih mongampun ina Lacan Setan aroko haba kountungan ingkan ito. Mula, ito monau kawan roncanaeh.
Paulus momborita Tarung Pio ma atoi co montong morong
2:12-17
12Hiah waktu akuh dapot nyan Troas ika momborita Tarung Pio tintun Kristus, Tuhan ocop mukap calan indangkuh ina molayani Are nyan idi. 13Tapi, akuh aroko sopopak ma konduang to Titus nyan idi. Jadi, atoi kuh giha. Awi iyoh, akuh mara aropkuh ma kawan dulun porocaya nyan idi paluh tulak mahah propinsi Makedonia.
14Tapi sukur ma Mohotara! Are momimpin kaih ponah pawai kawan dulun co manang awi kaih bolum hokohico ma Kristus. Mohotara hapo kaih ika monyebar borita tintun Kristus nyan omoh-omoh, somporengu buan harum. 15Awi kaih tonyoruhan pian Kristus, maka kaih somporengu buan dupa co Kristus posembah indan Mohotara. Buan cioh tosebar nyan tohun-tohun dulun co dahat nuntuh kosolamat hintang dulun co dahat nuntuh kolumat. 16Indan dulun co angar lumat, kaih somporengu buan karam co mehen pompatoi. Tapi, indan dulun co angar tonyolamat, kaih somporengu buan harum co mehen kobolum co tuu-tuu. Ome boh co sangup nguan tugas cotuh? 17Tului, orong dulun momborita Antun Mohotara ika ngohaba koponatou. Tapi, kaih aroko isan iroh. Kaih momborita Antun Mohotara ma atoi co montong morong. Kaih momborita sobagai dulun co tonyoruhan pian Mohotara, dulun co bopander nyan tohimo Mohotara, hintang dulun co bolum hokohico ma Kristus.
Currently Selected:
2 Korintus 2: TBSS
Highlight
Copy
Compare
Share
Want to have your highlights saved across all your devices? Sign up or sign in
