2 Korintus 1
1
Tontoke ingkan Paulus
1:1-2
1 Surat cotuh ingkan akuh, Paulus. Akuh tonaah ika jarin rasul Kristus Yesus awi iyoh kojere Mohotara. Tontoke ka ingkan Timotius, konduang to.
Surat cotuh indan jomaat Mohotara nyan kota Korintus kawun kokon dulun co husus tioh Mohotara nyan ngolauh propinsi Akaya.
2Akuh bodoa ina Mohotara Tama to hintang Tuhan Yesus Kristus horoholuh porahan kopio hintang mihi kongolandah kongolami indam me.
Paulus bosukur awi Mohotara mohibur atoi dulun porocaya co mongolami pondoritaan
1:3-11
3Topotaraboh Mohotara, iyohonon Tama ingkan Yesus Kristus, Tuhan to. Are iyohco Tama co sumer kopomasi. Are iyohco Mohotara co horoholuh mohibur atoi to. 4Are mohibur atoi kaih ponah pondoritaan kaih. Ma iyoh, kaih lian mohibur atoi kawan dulun bokon ponah kokon pondoritaan doh. Kaih mohibur atoi doh ma ponghiburan co tonorima kaih ingkan Mohotara. 5Tului, kaih derek lau nohimo pondoritaan samah isan Kristus. Tapi sanioh ka, Mohotara derek lau mohibur atoi kaih molalui Kristus. 6Hiah waktu kaih nohimo pondoritaan, tujuan eh ina atoi me tohibur hintang ina me lian tonyolamat. Hiah waktu atoi kaih tohibur, tujuan eh ina atoi me tohibur ka. Ma sanioh, ikan lian tenden borohon nohimo pondoritaan isan pondoritaan co buah kaih ka. 7Kaih yakin lau bahawa ikan angar tenden tohibur. Kaih yakin awi kaih monau aang cotuh: amun ikan nohimo pondoritaan halo kaih, sanioh ka atoi me angar tomohibur halo kaih.
8Kawan konduang, kaih jere lau ina me monau tintun pondoritaan co tojadi ma kaih nyan propinsi Asia Kolik. Pondoritaan cioh dalo kobahat lau dapot kaih aroko sangup botahan. Kaih putus asa, keleh matoi leh nyamai. 9Mula iyoh co tonongkomo kaih, isan kaih ocop tomohukum matoi leh. Tapi aang cioh tojadi ina kaih aroh mongandal kangkah arop kaih tarop, tapi mongandal Mohotara co umpi dulun bolum hopuli ingkan pompatoi. 10Areboh co ocop nyolamat kaih ingkan bohaya pompatoi co bahai yoh. Hintang Areboh ka co angar nyolamat kaih daai nyan kawan ondo pongaan, awi ma Areboh kaih boharap 11Ikan mahi umba dohop kaih ma orong doa me indan kaih. Jadi, daai, nyan waktu Mohotara porahan kopio ma kaih, maka orong dulun angar bosukur tului iyoh.
Paulus monjelas alasan are aroko hopuli nyari jomaat Korintus
1:12–2:4
12 Kawan konduang, kaih banga tintun otuh: Ponah atoi kaih tarop, kaih monau bahawa cara kaih bolum nyan dunia tuh aroko sala, husus eh ponah hubungan kaih ma ikan. Kaih umpi kokon aranaang ma atoi co jujur hintang borasih. Atoi isan iyoh ingkan Mohotara. Kaih umpi kokoieh ponah kopio-Eh, bokon ma akar pikir ingkan dunia. 13-14Awi, ponah surat kaih indam me, kaih baya nulih kawan aang co liam me mombaca paluh paham. Ikan ocop lian paham tonga. Tapi, isan iyoh ka, akuh boharap ikan angar paham kokoieh. Ma sanioh, akuh boharap nyan waktu Tuhan Yesus hopuli, ikan angar banga ma kaih samah isan kaih angar banga ma ikan.
15Awi akuh yakin tintun iyoh, maka akuh umpi roncana ika nyari ikan honduo kali ina ikan tomihi aang co pio hinut honduo kali ka. Roncana kuh ika nyari ikan batuh, 16paluh ngoholuh solana hia propinsi Makedonia. Pongaan, opah akuh hopuli ingkan Makedonia, akuh nyau nyari ikan kole ina me lian dohop akuh ngoholuh solanang kuh hia propinsi Yudea.
17 Tapi akuh sobulih ngubah roncana cioh. Jadi, mainboh ikan bopikir akuh herak borubah-rubah roncanakuh? Mainboh ikan bopikir akuh herak umpi roncana monurut kojere kuh tarop, dapot akuh mantun koloi ‘Iyoh’ atawa ‘Aroh’. 18Demi Mohotara co lian tomorocaya molalus janji-Eh, janjin kaih ma ikan aroko bimbang nyan antara ‘iyoh’ hintang ‘aroh’. 19-20Awi, Anak Mohotara, Yesus Kristus, mahi aroko bimbang nyan antara ‘iyoh’ atawa ‘aroh’. Akuh, Silas hintang Timotius ocop momborita ma ikan tintun Kristus, iyohonon Laca Co Tomonjanji Mohotara. Poko tului Are, kokon janjin Mohotara jarin nyata, ibarat eh oko useh ‘Iyoh’ ingkan Mohotara. Jadi, nyan ponah Kristus baya oko ‘iyoh’. Iyohboh tuluieh, kotika ito nisi ‘Amin’ ika nara Mohotara, ito nisi ‘Amin’ ponah aran Kristus. 21Mohotara co umpi kaih hintang ikan dohon hokohico ponah Kristus. Are ka co mili ito husus indai-Eh. 22Are mihi Roh-Eh ponah atoi to hintang mihi ciri bahawa ito Tioh. Ma nguan iyoh, Mohotara monjamin Are angar mihi ma ito kokon co tomonjanji-Eh.
23Jadi, akuh naah Mohotara sobagai saksi co nyono ponah atoi kuh. Are monau bahawa otuh bujur: Alasan kuh aroko dombut hia Korintus awi akuh aroko kolu umpi ikan poroh atoi. 24Akuh aroko bomaksut bahawa kaih jere maksa ome co sobulih ikan porocaya. Awi, kaih monau ikan porocaya ma koborohon ma Kristus. Tapi, co maksut kuh iyohonon kaih hintang ikan hodukung ina ikan jarin jorih jerah.
Currently Selected:
2 Korintus 1: TBSS
Highlight
Copy
Compare
Share
Want to have your highlights saved across all your devices? Sign up or sign in
