2 Korintus 12
12
Paulus ihin ponoto ingkan Mohotara, tapi are mahi oko toro ina are aroko bolecak
12:1-10
1Akuh sobulih nara aropkuh kole, oluco arelu oko gunaieh. Makitu akuh nara aropkuh tintun kawan ponoto ingkan Tuhan, waktu Are mara kawan aang ma akuh. 2Akuh nyono ico dulun co porocaya ma Kristus.#12:2 Paulus hopander tintun arop eh tarop. Are hapo dulun kotolu (are), isan are hopander tintun dulun bokon ina kesan eh aroko dalo bolecak. Tapi, are mahi hapo luang antun ika monekan bahawa poristiwa cotuh korinah mewah, awi ciohboh mirip cara kawan dulun co totentu taiyoh nara arop doh. Opat balas toun co soun nongkocok Mohotara mangkat dulun cioh hia tingkat co kotolu nyan sorga. (Akuh aroko monau amun betieh tomangkat hia sorga atawa baya roh eh leh. Baya Mohotara co monau iyoh.) 3-4Tapi, akuh monau dulun cioh tomangkat hia sorga. (Sindo oni, akuh aroko monau amun betieh tomangkat hia sorga atawa baya roh eh leh. Baya Mohotara co monau iyoh.) Hiah waktu dulun cioh nyan idi, are ngoneh kawan aang co aroko lian tomonjelas ma luang antun. Kolunon tongosiit hopander tintun kawan aang taiyoh. 5Akuh nyau nara dulun cioh. Tapi akuh aroko kolu nara aropkuh tarop kocuali akuh nara aropkuh tintun aang co porahan bahawa akuh lamah. 6Tapi, sompamaeh akuh nyau nara aropkuh, aang cioh aroko borati akuh iyohco dulun co uong. Awi, akuh boraoi nara aropkuh tintun aang co bujur. Tapi, akuh noro aropkuh ina aroh oko dulun co bopikir akuh korinah koharat tului ponoto cioh. Akuh nyau ina doh baya monilai akuh ingkan aang co kitan doh akuh umpieh hintang aang co koneh doh akuh mantun. Aroko labih hangki iyoh.
7 Tuhan aroko kolu akuh jarin bolecak tului kawan ponoto co bohimat lau yoh. Maka, akuh ihin somacam toro isan duhi ponah usok kuh. Toro cioh iyohco alat Lacan Setan co mohantam akuh ina kuh aroko jarin bolecak. 8Ocop tolu kali akuh nyawot ma Tuhan ina toro cioh tongompio. 9Tapi Tuhan aroko umpi iyoh. Are mantun eh ma akuh, “Akuh porahan koboraoi ma iko. Iyoh cukup indam mu. Awi, nyan kotika dulun lamah, malah hiah iyoh kuasang-Kuh tuu-tuu jarin nyata.” Iyohboh tuluieh akuh meleh jorih nara tintun aang co porahan kolamah kuh. Awi hiah waktu akuh lamah, Kristus nguat akuh ma kuasai-Eh. 10Poko tului iyoh, akuh jorih nohimo kokon macam kosasi ika molayani Kristus. Akuh jorih amun akuh lamah, amun akuh tomohina, amun akuh nohimo mosalah, amun akuh tonyiksa, amun akuh mondorita. Awi, nyan waktu akuh lamah, malah hiah iyoh akuh kuat.
Paulus koatir amun jomaat Korintus aroko bolum ngonyorih Tuhan
12:11-21
11Akuh ocop horoholuh nara arop isan dulun uong. Tapi ikan maksa akuh umpi iyoh. Awi sobulih eh ikan boh co nara ngilang akuh. Awi oluco akuh iyohco dulun co arelu oko arti, akuh aroko kalah tohimo kawan dulun totentu taiyoh co tomangap me kawan rasul co bohimat lau. 12Hiah waktu akuh halo ikan, akuh mombuktieh ma ikan bahawa akuh iyohco rasul co bujur. Ma korinah kosabar Akuh umpi kokon macam aang co mosotahir, kawan alogawi ajaib co porahan kuasan Tuhan. 13Mainboh oko aranaang co tongompiang kuh indan jomaat co bokon co aroko kuh umpi indam me? Arelu oko, kocuali ico aang cotuh co akuh aroko umpi indam me: iyohonon akuh aroko kolu ngorepot ikan. Maap leh boh ma kosalaang kuh yoh!
14Ngonehboh! Akuh ocop siap nyari ikan indan co kohontolueh. Nyan waktu conon, akuh incah aroko angar ngorepot ikan. Awi, akuh aroko nganyap harta me tapi ikan. Iyoh wajar, awi ikan somporengueh kawan anakkuh. Kawan anak aroko sobulih ngumpur harta indan dulun ongkoeh. Dulun ongkoboh co sobulih ngumpur harta indan kawan anak eh. 15Iyoh tuluieh ma kojorih atoi akuh selang nyarah ome bewe co oko nyan akuh malah aropkuh indan kopentingan me. Akuh korinah hopasi ikan, mainboh patut ikan kurang hopasi akuh? 16Pioboh! Ito sotuju bahawa akuh aroko piji ngorepot ikan. Tapi oko dulun co bopikir bahawa akuh licik paluh nipu ikan ika ngohaba kohujung ingkan ikan. 17Mainboh akuh haba kobohujung ingkan ikan molalui kawan dulun co tonyoruhan kuh hia ikan? Aroh ka! 18Akuh ocop nyoruhan Titus nyari ikan homboh-homboh ma konduang co bokon yoh. Nyan waktu iyoh, mainboh Titus monu kohujung ingkan ikan? Mahi aroh! Cara bopikir eh hintang cara bolum eh montong morong samah isan akuh.
19Kotahin otuh ikan bopikir bahawa kaih bousaha ngilang arop kaih tohimo ikan. Tapi, kawan konduang co tongasih kuh, sobujur eh tuhboh kohimat kaih: (Kaih mantun otuh nyan tohimo Mohotara hintang sobagai dulun co bolum hokohico ma Kristus.) Kokon co pian kaih iyohco ika mombantu ikan bolum sasar ngonyorih Tuhan. 20Awi akuh koatir nyan waktu akuh dombut daai, deom me aroko angar pio isan co tonyau kuh. Sanioh ka, amun akuh sobulih nopoh ikan, deong kuh aroko angar isan co tonyau me. Akuh koatir ikan angar hojawap, nongkomo bosingon atoi, jarin jion sangit, menting arop me tarop, poceet aran dongam, hasut-mohasut, jarin bolecak, umpi kongicuh. 21Akuh koatir nyan waktu akuh dombut kole, Mohotarang kuh angar umpi akuh mohaan nyan tohimo ikan. Akuh angar nangih jorung awi orong dulun nyan halo ikan incah bolum umpi dosa. Iroh arinai naat kawan deo co luse, kawan alogawi dosa hokoruh, kawan alogawi hokoruh co aroko pantas.
Currently Selected:
2 Korintus 12: TBSS
Highlight
Copy
Compare
Share
Want to have your highlights saved across all your devices? Sign up or sign in
