2 Korintus 11
11
Paulus aroko kolu jomaat Korintus ngumba kawan dulun co ngajar ajaran co sala
11:1-15
1 Tapi, akuh nyawot ikan sabar ma akuh awi akuh sobulih hopander isut isan dulun co uong co nara arop eh tarop. Mula ikan sabar ma akuh. 2Akuh nongkomo ngomohu awi akuh aroko kolu ikan ngumba dulun bokon. Tapi nyaman komohu cioh ingkan Mohotara. Awi, akuh nyau ikan ngumba Kristus leh. Ikan somporengu bawe lehoi co ocop botunangan ma ico bakah piang kuh, iyohonon Kristus. Akuh nyau ina me borasih nyan tohimo-Eh. 3Tapi akuh takut ikan tonipu, samah isan hiah jaman sinan Hawa tonipu pian nyipo co licik yoh, iyohonon Lacan Setan. Amun sanioh, ikan angar porocaya ajaran co sala hintang aroko bujur-bujur horoluh porocaya ma Kristus. 4Tului, ikan kolu norima dulun co dombut majar ajaran co sala tintun Yesus. Iyoh bokon hangki ajaran co buah tintun Yesus co ocop tomomborita kaih ma ikan batuh. Ikan mahi kolu norima roh co bokon hangki Roh Mohotara co ocop me torima batuh. Ikan kolu porocaya ajaran co bokon hangki Tarung Pio co ocop me porocayaeh batuh.
5 Ikan mangap iroh yoh kawan rasul co korinah harat. Tapi, monurut akuh, iroh aroko meleh harat hangki akuh. 6Mungkin, tomombanding ma iroh, akuh tomangap kurang pintar mantun. Tapi akuh aroko kurang monau tintun ajaran co buah. Kaih ocop poleha iyoh indam me sika waktu ponah kokon aang.
7Hiah waktu akuh momborita ma ikan Tarung Pio ingkan Mohotara, akuh aroko nyawot ikan nahur akuh. Mainboh iyoh sala? Aroh ka! Ma umpi iyoh, akuh jarin dulun co aroko tomohormat ina me tomohormat. 8Nyan waktu akuh molayani ikan, akuh norima bantuan ingkan kawan jomaat co bokon. Akuh morugi iroh ina kuh lian molayani ikan cuma-cuma. 9Hiah waktu akuh halo ikan, kotika akuh oko kongurang, akuh aroko porepot ikan. Awi, waktu iyoh, uras co tomorulu kuh tomondakan pian kawan dulun co porocaya co dombut ingkan Makedonia. Ponah kokon aang, akuh bojaga ina kuh aroko piji jarin beban indam me. Akuh angar horoholuh isan iyoh indan waktu co pongaan ka! 10Akuh nukas eh, arelu oko ico dulun mahi nyan ngolauh derah Akaya co angar umpi akuh umbot mara bahawa akuh banga molayani ikan cuma-cuma isan iyoh. Aang cioh tuu-tuu bujur samah isan ajaran kuh tintun Kristus bujur.
11Kura akuh aroko nyawot ome-ome ingkan ikan? Mainboh awi akuh aroko hopasi ikan? Mohotara monau bahawa akuh hopasi ikan! 12Tapi otuhboh alasan kuh aroko piji angar nyawot bantuan ingkan ikan isan kawan dulun totentu taiyoh: Iyohonon, ina doh arelu oko kosempatan ika nara arop ma nisi iroh samah isan kaih. 13Awi, kawan dulun totentu taiyoh curang ponah polayanan doh. Iroh mantun iroh iyohco kawan rasul Kristus, tapi sobujur eh iroh kawan rasul palsu. 14Aroko usah hurong amun iroh umpi aang cioh. Lacan setan mahi ponomali arop eh ika dulun nyompan are iyohco molekat kopandau. 15Jadi, aroko aneh amun kawan dulun co molayani Lacan Setan umpi isan iyoh ka. Iroh umpi dulun bopikir iroh iyohco kawan rasul co majar tintun bolum bujur nyan tohimo Mohotara. Nyan ahir kobolum doh, iroh angar norima hukuman sosuai ma kokon alogawin doh co jahat
Paulus iyohco rasul co morandah arop eh hintang mondorita ina Kristus tonara
11:16-33
16Nain co tomantun kuh niin: Aroh oko dulun co mangap akuh uong. Tapi amun ikan mangap akuh uong, akuh nyawot ikan norima akuh sobagai dulun co uong. Ma sanioh, akuh lian isut nara arop kuh. 17Jadi, ma antun kuh pongaan tuh, akuh mantun aroko isan co cuhun Tuhan Yesus. Tapi akuh hopander nara arop isan dulun co uong. 18Orong dulun nara arop tintun kawan aang nyan dunia tuh. Jadi, akuh nyau nara arop isan iroh ina me angar norima akuh ka. 19Tului ikan kolu norima kawan dulun co uong taiyoh. Hiah waktu ikan norima iroh, ikan bopikir ikan korinah bopikir akar. 20Ikan kolu norima kawan dulun taiyoh co umpi ikan isan cipon. Iroh nguasa ikan, nipu ina monu kobohujung ingkan ikan, iroh mangap arop doh labih harat hangki ikan, mohina ikan. 21Kaih aroko umpi ikan isan iyoh. Ponah aang somacam iyoh kaih mula lamah.
Tapi, amun kawan dulun totentu taiyoh bohanyi nara arop doh, maka akuh mahi bohanyi ka. (Akuh hopander isan dulun co uong!) 22Mainboh iroh nara arop doh mantun bahawa iroh iyohco dulun totok Ibrani? Akuh mahi dulun totok Ibrani! Mainboh iroh ingkan bangsa Israel? Akuh mahi ingkan bangsa Israel! Mainboh iroh utuh utek Abraham? Akuh mahi utuh utek Abraham! 23Mainboh iroh mantun bahwa iroh molayani Kristus? Akuh molayani Kristus ma komeleh pio! (Akuh bobujon nara arop kuh isan otuh!) Akuh bogawi molayani meleh bohimat hangki iroh. Akuh meleh derek tomokuntam ponah seper awi momborita tintun Kristus. Akuh meleh derek tomongkola, meleh derek jonyo matoi. 24Limo kali kawan dulun Yahudi moncambuk majap akuh. Sindo ajapan tolum pulu suoi cambukan. 25Hontolu akuh tomajap dulun Romawi, tomongkola ma doroh kaju. Piji sindo akuh tomedak ma batu ika ngompatoi akuh. Hontolu kapal co tongumba kuh kahom nyan laut,#11:25 Noto buku Kesah 14:19 dan 16:22. sindo akuh lumpak-lampuk nyan laut kotahin ico kondai ico komomi. 26Ponah sika solanang kuh, akuh torancam hopo macam bohaya: bohaya nyan sungoi, bohaya ingkan porampuk, bohaya ingkan bangsa kuh leh dulun Yahudi, bohaya ingkan kawan dulun co bokon ma Yahudi, bohaya nyan kota, bohaya nyan derah co ngolohiui, bohaya nyan laut, bohaya ingkan kawan dulun co mantun iroh porocaya, tapi sobujur eh aroh.#11:26 Noto buku Kesah 9:23 dan 14:5. 27Akuh boo poca, bogawi bohimat, derek kurang tirui, derek dou hintang haus, derek puasa, derek darom tului kurang pokajan. 28Oko orong kosasi kole co aroko angar kuh nisieh, kocuali otuh: Sika ondo akuh nongkomo giha tintun koadaan kokon jomaat. 29Amun oko anggota jomaat co lamah, tantu akuh mahi umba nongkomo lamah. Amun oko anggota jomaat co tonyasat, tantu atoi kuh hancur.
30Amun akuh sobulih mombanga arop kuh, akuh angar banga tintun kawan aang co poleha bahawa akuh dulun co lamah.#11:30 Paulus umpi kosimpulan ingkan kawan ayat tatuh mombanding arop eh ma kawan dulun co naleh are. Iyohonon, iroh nara arop tintun aang co umpi dulun mohormat iroh. Tapi, Paulus nara arop tintun aang co porahan kolemahan eh. 31Mohotara, iyohonon Tama ingkan Tuhan to, Yesus, tonara dapot sumong kototahieh. Are monau bahawa akuh aroko ngoncunih. 32Hiah waktu akuh nyan kota Damsik, oko gubernur co tomangkat Laca Aretas. Gubernur cioh nyuhu tontara bojaga kawan tungkang gerbang kota cioh ika nawan akuh kotika akuh pusit. 33Tapi oko kawan dulun co dohop akuh luput ingkan are. Iroh mehen akuh hia ico tungko nyan kuta co toliut kota cioh. Paluh, iroh muloh akuh hia luar ponah ico loong koranjang.
Currently Selected:
2 Korintus 11: TBSS
Highlight
Copy
Compare
Share
Want to have your highlights saved across all your devices? Sign up or sign in
