1 Korintus 16
16
Bantuan indan jomaat nyan Yerusalem#16:0 Mungkin sumbangan cotuh awi kodou co tojadi nyan Yerusalem (Kesah 11:27-30).
16:1-4
1 Makitu akuh nyau nulih tintun duit co angar tongumpur ika dohop kawan jomaat nyan Yerusalem. Akuh nyau ina ikan tumun poraturan co ocop tongompiangkuh ma kawan jomaat nyan derah Galatia. Tuhboh poraturan eh: 2Sika ondo Mengu, ikan hopomasing sobulih nongkahin tonga ingkan pongulih me ika mombantu kawan jomaat nyan Yerusalem. Mika duit cioh ina aroh sobulih tongumpur nyan waktu akuh dombut. 3Nyan waktu akuh dombut, ikan sobulih mili pira-pira beti co tomangap me lian tomorocaya. Akuh angar nyoruhan iroh ika nucu duit cioh mahah Yerusalem. Iroh angar mehen surat pongantar ka. 4Amun porulu akuh mahi tulak ka, paluh iroh angar tulak homboh akuh.
Roncana Paulus
16:5-12
5Makitu akuh oko roncana ika buah propinsi Makedonia. Akuh incah angar dombut hia ikan. Tapi akuh angar buah Makedonia houn. 6-7Akuh umpi roncana cioh, awi akuh aroh kolu baya honyulu leh nyari ikan ponah solanang kuh. Amun Tuhan kuhan, akuh nyau nukui lomayan tahi halo ikan. Amun boraoi, mungkin dapot ahir sorang sorongin. Opah iyoh ikan boraoi dohop akuh ngoholuh solanang kuh. 8Tapi, sorinai akuh tulak mahah Makedonia, akuh angar nukui nyan intoi nyan kota Epesus, dapot ondo porami Pentakosta. 9Akuh nyau sanioh awi oko orong kosempatan ponah polayanan kuh nyan intoi. Kosempatan cioh bohimat lau hintang boguna lau. Oluco orong ka dulun co monentang akuh.
10Amun Timotius dombut hia ikan, mongusaha eh ina are aroh nongkomo takut nyan halo ikan. Hormat ma are awi are bogawi indan Tuhan, samah isan akuh. 11Jadi, aroh ico beti mahi nyan halo ikan co aroh mohormati are. Waktu are nyau tulak ingkan ikan, dohop are. Olu are boraoi ngoholuh solanaieh ma kolandah. Paluh, are boraoi hopuli hia akuh. Awi, akuh nganto are dombut homboh ma kawan konduang co bokon.
12Tintun konduang to, Apolos. Akuh tuu-tuu monggasak are ina are umba homboh kawan konduang co bokon ika nyari ikan. Tapi are arinai kolu tulak makitu. Daai, amun oko kosempatan, are angar dombut hia ikan.
Kawan antun tontiput Paulus ponah surat eh
16:13-24
13Jaga arop me! Horoholuh porocaya ma Yesus. Tendenleh bohanyi hintang borohon porocaya ma-Eh. 14Nguan kokon aranaang ma kohopomasi dongan me.
15Konduang bakah bawe, ikan monau Stepanas hintang koluargaeh. Iroh iyohco kawan dulun co portama nyan derah Akhaya co porocaya ma Yesus. Iroh mahi dohop dulun co porocaya. Jadi, akuh mondorong ina ikan 16mohormati iroh sobagai pomimpin me. Tundukboh ka ma dulun bokon isan iroh co bogawi bohimat molayani Tuhan. 17Batuh akuh bolingu ikan. Tapi ma korombut Stepanas, Portunatus, hintang Akaikus hia akuh, maka akuh nongkomo jorih. Akuh nongkomo isan hokohalo ikan kole. 18Awi iroh ocop nompi akuh hintang ikan nongkomo soloah, jadi ngoleka eh boh dulun co molayani isan iyoh.
19Kawan jomaat nyan propinsi Asia Kolik tuh porapot tontoke indam me. Tontoke ka ingkan Akwila doruo Priskila kawun jomaat co kumpur nyan lopo doh. Kokon doh porapot tontoke ma atoi kuan tuu awi kohico ponah Tuhan. 20Tontoke ingkan kokon konduang bakah bawe nyan intoi.
Kojere bat hotabe ma kobolingu.
21Koholuh eh tuh akuh nulih ma silun takuh leh, tontoke ingkan akuh Paulus.
22Oluboh kokon dulun co aroh mongasihi Tuhan Yesus norima hukuman! Dombutbat, yoh Tuhan!
23Akuh bodoa ina Yesus, Tuhan bokuasa ma ito mihi aang co pio hinut indam me.
24Akuh mahi mongasihi kokon ikan nyan ponah Kristus Yesus.
Currently Selected:
1 Korintus 16: TBSS
Highlight
Copy
Compare
Share
Want to have your highlights saved across all your devices? Sign up or sign in
