1 Korintus 9
9
Sobagai rasul, Paulus oko kawan hak eh tapi are aroh monggunaeh
9:1-27
1Mohotara ocop mombebas akuh. Malah akuh ocop kito Yesus, Tuhan To. Akuh tuu-tuu ico rasul co tonyuruhan Tuhan. Ikan mahi iyohco hasir alogawi co tongompiangkuh indan Tuhan. 2Mungkin oko dulun bokon co aroh mongangap akuh iyohco rasul. Tapi mositi ikan mongangap akuh rasul. Awi, ikan jarin porocaya ma Tuhan onon buktieh bahawa akuh rasul.
3Indan kawan dulun co ragu amun akuh tuu-tuu ico beti rasul atawa aroh, akuh ngilang arop kuh ma kawan aang tatuh: 4Mositi kaih bohak ika haba ongkun pongumaningkan kawan jomaat co tomolayani kaih. 5Rasul Petrus, kawan konduang Tuhan Yesus, hintang kawan rasul co bokon mehen oruh doh co porocaya ponah solana polayanan doh. Mositieh kaih mahi bohak nguan iyoh! 6Dongan co molayani ikan aroh sobulih nganyap gawi bokon ika mondakan koporuluan bolum. Jadi, Mositi karo Barnabas mahi bohak ika haba koporuluan bolum sika ondo ingkan ikan. 7Porhati kawan cuntu tatuh: Arelu oko ico mahi tontara co sobulih nahur gajih eh tarop. Dulun co ngabun angur, mositi are bohak kuman bua ingkan kabun cioh. Mositi dulun co nyorunuh kawan domba bohak ngorih susu ingkan komolum eh yoh. 8Akuh mantun kawan aang tanon aroh baya awi muntam akar indan kokon kolunon. Tapi buku Hukum Torat mahi mantun tintun onon. 9Musa nulih Hukum Torat. Oko porentah co tonulih nyan intin: “Aroh mowot baun sapi co rahat bogawi ngoleet gandum ika luang eh cupeng ingkan tampung ina sapi cioh boraoi kuman samir bogawi.”#9:9 Ingkan Ulangan 24:5. Dulun Yahudi hapo sapi ika gandum bokorowoi ingkan tamping eh. Ma mihi porentah cioh, mositi Mohotara aroh bomaksud sapi cioh bewe, kan? 10Co tomaksud Mohotara iyohco ito. Dulun co mombajak bohak moharap bagian. Dulun co ngoleet gandum mahi bohak moharap bagian. 11Kaih ocop momborita Tarung Pio indam me. Poko tului iyoh, patut lehboh amun kaih haba berkat jasmani ingkan ikan. 12Amun dulun bokon bohak haba iyoh ingkan ikan, mositi kaih meleh bohak lau haba iyoh ingkan ikan.
Tapi kaih aroh piji nuntut hak cioh. Kaih botahan ponah kokon aranaang. Awi, kaih aroh kolu umpi aranaang co lian mohalang dulun ngoneh Tarung Pio tintun Kristus.#9:12 Amun Paulus ngohaba berkat jasmani ingkan kawan dulun co tomolayani eh, mungkin aang cioh boraoi mohalang dulun ngoneh Tarung Pio. Awi mungkin baya dulun co mampu angar tomolayani, atawa mungkin dulun bokon angar mantun bahawa Paulus baya mihi ika ngohaba koponatou.
13Mositi ikan monau tintun poraturan Mohotara. Kawan dulun co bogawi nyan ponah Lopo Mohotara. Iroh bohak haba kanon ingkan porsembahan nyan Lopo Mohotara yoh. Kawan dulun co molayani nyan ika momposembah komolum, iroh bohak haba bagian ingkan daging co tomposembah nyan ika cioh. 14Samah isan iyoh ka, Tuhan Yesus ocop umpi porentah tatuh: Kawan dulun co momborita Tarung Pio, iroh bohak haba kobutuhan ingkan gawi cioh.
15Tapi akuh aroh piji nuntut hak cioh. Akuh mahi aroh nulih otuh ina ikan mihi pondohop indang kuh. Meleh pio akuh matoi hangki umpi aang cioh. Arelu oko dulun co hegah potiho porasaan banga kuh non. 16Maksudkuh, akuh aroko bohak mombanga arop ponah momborita Tarung Pio ingkan Mohotara. Awi, onon co mula sobulih eh tongompiangkuh. Malah, akuh colaka amun aroh momborita Tarung Pio. 17Soandaieh akuh momborita Tarung Pio tului kojere kuh tarop, maka akuh mositi haba tombah. Tapi, sobujur eh Mohotara co nyoruhan akuh hintang momporocaya tugas momborita Tarung Pio yoh ma akuh. 18Jadi, ome tombah kuh? Tombah kuh iyohco akuh tomihi kosempatan momborita Tarung Pio aroh tonahur! Nonboh cara kuh aroh nuntut hak ika haba koporuluan ingkan alogawi cioh.
19Sobujur eh akuh aroh cipon ome bewe. Tapi akuh umpi arop kuh jarin cipon kokon dulun. Akuh umpi iyoh ina dohop labih orong dulun dapot iroh jarin porocaya ma Yesus. 20Maksud kuh, amun akuh halo dulun Yahudi, akuh bolum ma cara dulun Yahudi. Akuh umpi iyoh ina dohop dulun Yahudi dapot iroh jarin porocaya ma Yesus. Amun akuh halo kawan dulun co bolum tuhit ma Hukum Torat, akuh mahi bolum tuhit ma Hukum Torat. Akuh umpi iyoh ina dohop iroh dapot jarin porocaya ma Yesus. Tapi sobujur eh akuh bebas ingkan tuntutan ika tuhit ma Hukum Torat. 21Amun akuh halo kawan dulun co bolum bebas ingkan tuntutan ika tuhit ma Hukum Torat, akuh mahi bolum bebas ingkan koharusan ika tuhit ma Hukum Torat. Akuh umpi iyoh ina dohop iroh dapot jarin porocaya ma Yesus. Tapi sobujur eh akuh aroh bebas ika tuhit ma Hukum Mohotara. Akuh tuu-tuu tuhit ma Porentah Kristus.#9:21 ‘Hukum Kristus’ nyan intoi boraoi boarti kokon ajaran Yesus, tapi hususeh ajaran ika hokopasi. Noto Yohanes 13:34. 22Amun akuh halo kawan dulun co lamah, akuh bolum isan dulun co lamah. Akuh umpi iyoh ina dohop iroh dapot jarin sasar porocaya ma Yesus. Pokoeh, akuh nyosuai arop kuh ma cara bolum kokon dulun co tomolayani kuh. Akuh umpi iyoh ina oko pira-pira dulun nyan halo iroh co tonyolamat. 23Akuh bolum ma kokon cara taiyoh ina meleh orong dulun norima Tarung Pio yoh. Mahi ina akuh boraoi norima kokon berkat co tomonjanji ponah Tarung Pio.
24Mositi ikan monau bahawa ponah lomba tongkoru, kokon poserta umba tongkoru. Tapi baya ico co haba hodiah. Samah isan iyoh, ikan sobulih bousaha bolum ma cara co ngonyorih Mohotara ina haba hodiah co ihin Mohotara. 25Sanioh ka, kokon dulun co umba ponah lomba sobulih noro arop ponah kokon aang ika karas bolatih. Iroh umpi iyoh ika haba hodiah. Hodiah doh hegah rusak. Tapi ito co porocaya noro arop ponah kokon aang ina haba hodiah co aroh piji angar rusak sokotahi-tahieh. 26Iyoh tuluieh akuh bolum aroh isan dulun co arelu oko tujuan. Ibarat eh dulun co tongkoru aroko tujuan atawa ico potinju co nampar hapa umai. 27Tapi akuh molatih beting kuh korinah lau. Akuh noro arop kuh. Akuh umpi kawan aang tanon ina opah momborita Tarung Pio indan dulun bokon, aroh dapot akuh malah aroko layak nyan tohimo Mohotara.
Currently Selected:
1 Korintus 9: TBSS
Highlight
Copy
Compare
Share
Want to have your highlights saved across all your devices? Sign up or sign in
