1 Korintus 10
10
Aroh nyembah nyuku aang co boganan
10:1–11:1
Aroh nontumun dosan dulun Israel nyan jaman sinan
10:1-13
1Kawan konduang bakah bawe, akuh nyau pokingat ikan tintun tatu hiang to dulun Israel. Nyan jaman sinan, Musa momimpin iroh pusit ingkan ika doh tohocipon nyan tana Mesir. Mohotara horulut kokon doh ma hawun bobentuk johi co nyolindung tatu hiang to. Paluh, Mohotara horulut kokon doh mitah Laut Merah.#10:1 Kesah cotuh oko nyan buku Koluaran 13:21-22; 14:22-29. 2Ma kawan aang co mosotahir yoh, Mohotara umpi kokon doh jarin pongikut Musa. 3Hiah waktu cioh ka, kokon doh kuman kanon co samah ingkan Mohotara.#10:3 Noto Klu. 16:35 4Iroh mahi ngorih danum co samah ingkan Mohotara. Danum cioh horoholuh nalet ingkan batu. Sobujur eh Kristus samah isan batu cioh#10:4 Noto Klu. 17:6; Bil. 20:11. awi Are horoholuh nyolindung hintang mihi aang co pio hinut indan dulun Israel yoh. 5Tapi iroh tenden bodosa tohimo Mohotara. Jadi, orong ingkan iroh co aroh tongoherak Mohotara. Orong ingkan iroh co tongolumat-Eh. Kawan ontun doh hampah herah nyan padang gurun.#10:5 Noto Bil. 14:29-30.
6Kawan poristiwa taiyoh tojadi sobagai ciri poringatan indan to, ina ito aroh jere umpi kawan alogawi co jahat samah ma co tonguan doh. 7Aroh ikan nyembah nyuku aang co boganan isan pira-pira ingkan iroh. Musa nulih tintun alogawin doh yoh nyan Surat Borasih. Santuh tulisan eh: “Kawan dulun taiyoh kuman, ngorih paluh ngarang ika nyembah nyuku aang co boganan yoh.”#10:7 Noto Koluaran 32:6. Dulun Israel umpi dewa isan tampa sapi co tonguan ingkan bulou. 8Bokon iyoh, aroh ikan umpi dosa hokoruh isan pira-pira ingkan iroh. Opah iroh umpi dosa taiyoh, Mohotara mohukum iroh. Ponah ico ondo, oko duam pulu tolu ribu beti co matoi.#10:8 Noto Bilangan 25:1-18. 9Aroh ikan monguji kosabaran Kristus, isan pira-pira ingkan iroh. Iroh monguji amun Kristus bujur-bujur angar mohukum iroh amun iroh bodosa. Jadi, Tuhan pokatu orong nyipo mohari ika noco iroh. Dapot, orong ingkan iroh matoi.#10:9 Noto Bil. 21:5-6. 10Aroh ikan ngolomumut, isan pira-pira ingkan iroh. Opah iroh ngolomumut, Mohotara nyoruhan molekat pompatoi ika polumat iroh.#10:10 Noto Bil. 16:41-49.
11Kawan poristiwa taiyoh jarin cuntu indan to. Kawan poristiwa taiyoh tonulih ika pokingat ito co bolum ponah jaman ahir.#10:11 ‘Kawan ondo torahir’ iyohco waktu ingkan Yesus tonganak (noto 1 Korintus 10:11; Ibrani 1:2; 9:26; 1 Petrus 1:20 hintang 1 Yohanes 2:18) dapot Yesus dombut hia bumi indan co kohonduo kalieh. 12Poko tului iyoh, dulun co mongangap arop eh borohon porocaya sobulih ati-ati. Aroh dapot are umpi dosa. 13Ikan toningkoh hapo cara co tomongalami kawan dulun ka. Tapi Mohotara sotia. Are aroh angar moholu ikan toningkoh topeleh hangki komampuan me. Bokon ma iyoh, nyan waktu ikan toningkoh, Mohotara mahi angar mihi calan koluar indam me. Are umpi iyoh ina ikan sangup nohimo eh.
Aroh ngaeng arop me ma kawan aang co boganan
10:14-22
14Poko tului uras eh yoh, kawan konduang bakah bawe co tongasih kuh, aroh samah sindo ikan nyembah nyuku kawan aang co boganan. 15Akuh mantun ma ikan awi akuh ocop monau ikan iyohco kawan dulun co boakar pikir. Jadi, ikan leh lian momutus eh buah atawa aroh ome co angar tomantun kuh makitu: 16Hiah waktu ito moraya Pojamuan Kudus, ito ngorih angur ma kobosukur hia Mohotara. Iyoh potinjun bahawa ito jarin ico ma daha Kristus. Hiah kotika iyoh ka ito hobagi rute ika to homboh kuman eh. Onon potinjun bahawa ito jarin ico ma betin Kristus. 17Poko tului rute co samah-samah ito kuman eh yoh tikas ico leh, maka oluco ito orong beti tapi ito jarin ico beti.
18Porhati ka cara dulun Israel nyembah nyuku Mohotara. Iroh mehen kawan komolum ika tomomporsembah nyan tungkui tungkup batu co tonyusun nyan muka Lopo Mohotara. Kotika iroh kuman daging ingkan kawan komolum cioh, artieh iroh mahi jarin ico ma ika cioh.#10:18 Ponah pasal 8, Paulus majar bahawa aroh mosalah ina kuman daging ingkan komolum co tomporsembah hia kawan dewa. Tapi dulun bokon sobulih tomporhati. Nyan intoi, Paulus majar bahawa ika kuman sobulih tomporhati ka. Aroh kuman nyan lopo ika nyembah nyuku kawan dewa. 19Ome maksut kuh sobujur eh? Aang co boganan hintang kanon co tomomporsembah hiaeh yoh aroko empun arti sama sino. 20Tapi maksut kuh santuh: porsembahan hia kawan aang co boganan sobujur eh iyoh porsembahan hia kawan roh jahat, aroko co hia Mohotara. Akuh aroh kolu ikan jarin ico ma kawan roh jahat! 21Aroh dapot kotika ikan ngorih ingkan cangkir Tuhan ikan mahi ngorih ingkan cangkir roh jahat ka. Aroh dapot kotika ikan kuman homboh Tuhan ikan mahi kuman homboh roh jahat ka. 22Aroh umpi Tuhan ngomohu!#10:22 Noto Ulangan 32:16-17. Ito aroko meleh mamut hangki Tuhan.
Nguanboh kokon alogawi ina Mohotarammu tonara
10:23–11:1
23 Oko kawan dulun co bopikir, “Kokoieh aroko pali indangkuh” Pikiran cioh aroh sala. Tapi aroh kokon alogawi boguna. Aroh kokon alogawi umpi dongan jarin meleh borohon sasar porocaya. 24Jadi, hiah ikan nguan aranaang, momikir tintun co pokopio indan dongan, hangki co pokopio indan aropmu leh.
25-26 Ponah Surat Borasih oko tonulih: “Tuhanboh co empun bumi hintang kokon sangaieh.”#10:25-26 Ingkan Masmur 24:1. Poko tului iyoh, ikan boraoi kuman daging ome bewe co tomorakang nyan pasar. Aroh usah hokisok ingkan omoh asar daging cioh ina atoimu aroh golisah. 27Isan iyoh ka, amun oko dulun co arinai porocaya mundang iko kuman nyan lopoeh. Amun iko umba, boraoi leh. Iko boraoi kuman ome bewe co tomatang doh indam mu. Aroh usah hokisok ingkan omoh asar daging cioh ina atoimu aroh golisah.
28-29Tapi amun oko dulun co maraeh ma iko, “Kanon cioh tomporsembah hia aang co boganan.” Mungkin suara atoi mu aroh nongkomo sala amun iko kuman kanon cioh. Tapi, iko sobulih porhati suara atoi dulun co maraeh ma iko. Amun are nongkomo iyoh sala, arohboh iko kuman kanon cioh.
Nah, amun sanioh, mungkin oko nyan halo ikan co aroko poduli dongai hintang mantun, “Akuh sobujur eh bebas kuman ome bewe. Main akuh porulu umba suara atoi dongang? 30Akuh kuman ma nyama bosukur hia Mohotara. Ome tuluieh dulun bokon mantun co jahat tintun akuh?”
31Ma dulun co mantun isanioh akuh museh, ikan sobulih mingkat ome bewe co tongompiam me, ikan kuman atawa ikan ngorih, nguan eh leh kokon aang taiyoh ika nara Mohotara 32Arohboh umpi atoi dongam tosinggung, iyoh dulun Yahudi, atawa bokon ma dulun Yahudi, atawa dulun ponah kumpulan co porocaya ma Yesus. 33Umpi boh samah isan akuh. Akuh horoholuh bousaha ina kokon alogawing kuh aroh umpi ome bewe tosingung. Akuh horoholuh momikir tintun co pokopio indan dulun orong, hangki co pokopio indang kuh tarop. Akuh nguan kokon iyoh ina iroh lian tonyolamat.
Currently Selected:
1 Korintus 10: TBSS
Highlight
Copy
Compare
Share
Want to have your highlights saved across all your devices? Sign up or sign in
