1 Korintus 7
7
Ajaran tintun kopongoruh
7:1-16
1Makitu akuh nyau mander tintun mosalah co tonisi me ponah surat co batuh. Amun ico bakah aroh ngoruh, onon pio. 2Tapi orong dulun aroh boraoi noro kojere ika umpi dosa hokoruh. Poko tului iyoh, meleh pio amun sika bakah empun ico oruh hintang sika bawe empun ico banai. 3Bakah bana wajib mihi tapakah batin oruh eh. Sanioh ka, bawe oruh sobulih momonuhi kowajipan tohimo banaieh. 4Oruh aroko boraoi bokuasa ma betieh tarop; co bokuasa ma arop eh iyohco banai. Isanioh ka banai aroko boraoi bokuasa ma betieh tarop, co bokuasa ma arop eh iyohco oruh eh. 5Aroh nyangit hokongkuloi momonuhi kowajipan hanak horuh. Kocuali oko pakat doruo indan sopondehan waktu ina boraoi mongutama doa. Tapi opah iyoh iroh ruo hopuli hokohico. Amun aroh, Lacan Setan boraoi ningkoh ikan awi ikan aroh boraoi noro kojere betim me. 6Maksud kuh ika mihi ijin. Tapi onon aroh porentah. 7Sobujur eh akuh nyau ina sika dulun samah isan akuh. Tapi sika dulun oko komampuan husus hopomasing ingkan Mohotara. Co ico oko komampuan husus otuh. Dulun co bokon kole oko komampuan husus co bokon eh.
8Indan kawan balu hintang kawan dulun bokon co aroko piji ngoruh, akuh mihi nosehat cotuh: Meleh pio ikan tenden aroh ngoruh, samah isan akuh. 9Tapi, amun ikan aroh boraoi noro kojere beti, meleh pio ikan ngoruh. Awi, meleh pio dulun ngoruh kole hangki horoholuh nongkomo kojere beti aroko boraoi momuas eh.
10Indan kawan dulun co ocop ngoruh, akuh mihi porentah cotuh-sobujur eh porentah cotuh aroh baya ingkan akuh, tapi ingkan Tuhan Yesus leh: Oruh aroh boraoi pisahdarai ma banaieh. 11Tapi amun onon tojadi, are aroh boraoi ngomano kole. Atawa are sobulih hopuli ma banaieh. Porentah cotuh mahi borlaku indan kawan bakah bana. Bakah bana aroh boraoi pisahdarai ma oruh eh.
12Indan kawan dulun bokon, akuh mihi porentah cotuh-sobujur eh porentah cotuh aroh ingkan Tuhan Yesus, tapi monurut akuh poko pio. Porentah cotuh indan kawan bakah bana co porocaya co empun oruh co arinai porocaya. Amun oruhmu tenden nyau hokomolum ma iko, aroh misahdarai are. 13Sanioh ka indan kawan bawe co porocaya co empun bana co arinai porocaya. Amun banammu tenden nyau hokomolum ma iko, aroh misahdarai are. 14Awi, oruh eh porocaya angar umpi Mohotara norima banaieh co aroko porocaya. Sanioh ka bakah bana co porocaya angar umpi Mohotara norima oruh eh co aroko porocaya. Soandaieh posangan eh aroh tonorima Mohotara, kawan anak doh mahi aroh tonorima Mohotara. Tapi sobujur eh kawan anak doh ocop tonorima Mohotara ka.#7:14 Maksut Paulus bakah bana atawa oruh co aroko porocaya tatap tomomberkat Mohotara, tapi incah arinai tonyolamat ingkan dosa. Mungkin maksut Paulus Mohotara poduli ma dulun porocaya awi ocop jarin umat husus Tioh. Aei bakah bana doruo oruh eh ocop jarin ico, maka Mohotara momberkat kokon koluarga cioh. Atawa mungkin oko kawan dulun Korintus co bopikir bahawa dulun co arinai porocaya sobulih tomisah darai awi aroko patut bat sobagai pasangan hanak horuh. Tapi monurut Paulus pikiran doh sala. 15Tapi mungkin dulun co arinai porocaya nyau pisahdarai ma dulun co porocaya yoh. Amun sanioh, olueh iroh pisahdarai. Ponah koadaan conon, dulun co porocaya aroh torikat bat. Tapi Mohotara naah ikan ina bousaha bolum ma kongolandah. 16Awi, arelu oko co monau ome co angar tojadi. Kawan oruh, ikan boraoi leh nompi banam me tonyolamat. Hintang kawan bakah bana, ikan boraoi leh nompi oruh me tonyolamat.
Bolumboh ponah koadaan co samah hiah waktu iko jarin porocaya
7:17-24
17Opah iyoh, sika dulun porocaya akuh mihi nosehat: Bolumboh ponah koadaan co samah hiah waktu ikan tonaah Mohotara ika jarin umat-Eh. Ononboh koadaan co ocop Tuhan nantu eh indam me. Akuh majar porinsip conon nyan kokon jomaat. 18Cuntueh, amun oko dulun co ocop tomalak hiah waktu are tonaah Mohotara, arohboh dulun cioh bousaha potiho kawan ciri balak cioh. Amun oko dulun co aroh tomalak hiah waktu are tonaah Mohotara, dulun cioh aroh sobulih tomalak. 19Awi, amun ito tomalak atawa aroh, iyoh aroh penting. Co penting iyohco ito tuhit ma kawan porentah Mohotara.
20 Sindo oni, akuh mantun: Bolumboh ponah koadaan co samah hiah waktu iko tonaah Mohotara. 21Cuntueh kole, amun iko ocop tomorakang ika bogawi sobagai cipon hiah waktu iko tonaah Mohotara, onon aroh ome-ome. Tapi mula, jaka iko haba kosempatan ika jarin bebas, hapobat kosempatan cioh. 22Awi, hiah waktu dulun cipon tonaah Tuhan, are jarin dulun bebas ponah pongito Tuhan. Sanioh ka, hiah waktu dulun bebas tonaah, are jarin dulun cipon co bogawi indan Kristus. 23Awi iko ocop tomoli hintang lekaieh ocop lunas tonahur. Poko tului iyoh, aroh ikan jarin cipon kolunon.#7:23 Nyan ayat 21, Paulus ocop mantun aroh ome-ome amun dulun cioh iyohco cipon. Maksud eh nyan intoi, ito sobulih tunduk ma kojere Yesus hangki kolunon. 24Sindo oni, Konduang bakah bawe, akuh mantun ma ikan: Bolumboh ponah porsokutuan ma Mohotara ponah koadaan co samah hiah waktu ikan tonaah.
Nosehat tintun ngoruh atawa aroh ngoruh
7:25-40
25Makitu, tintun kawan dulun co arinai ngoruh. Akuh arelu oko porentah ingkan Tuhan tintun onon. Tapi awi Are monunjuk komasi hejeng ma akuh, maka akuh iyohco dulun co hegah tomorocaya mihi nosehat. 26Poko tului waktu kosusah angar nyua dombut, pondapat kuh iyohco sika dulun keleh eh bolum ponah koadaan eh makitu tuh. 27Maksud kuh, amun bakah ocop ngoruh, aroh are pisahdarai ma oruh eh. Amun bakah lehoi atawa buju, aroh are nganyap oruh. 28Tapi amun bakah ngoruh, iyoh aroko dosa. Sanioh ka, amun bawe ngomano, iyoh aroko dosa. Tapi kawan dulun co ngoruh yoh angar mongolami orong kosusah ponah kobolum cotuh. Hintang akuh jere ikan angar tohindar ingkan kawan kosusah isan iyoh.
29Konduang bakah bawe, maksud kuh santuh: Aroko tahi oni waktu angar borahir. Poko tului iyoh, molai ingkan makitu sika dulun co ngoruh sobulih mingat bahawa ngoruh aroh indan sumong kototahieh. 30Sika dulun co korinah kojorung sobulih are deon dulun co aroko kojorung. Sika dulun co jorih jerah sobulih are deon dulun co aroko kojorih jerah. Sika dulun co moli aranaang sobulih are deon dulun co aroko empun ome-ome. 31Pokoeh, sika dulun co borurusan ma aang co duniawi ome bewe mingat bahawa urusan nyan dunia tuh aroh indan sokotahi-tahieh. Tului, aroh tahi oni dunia co tonyono to makitu tuh angar borahir.#7:29-31 Paulus bomaksud kawan aang nyan dunia tuh (kopongawin, kojorung, jorih jerah, barang banda, urusan, hintang co boko-bokon.) Aroh indan sumong kotahi. Amun ito mingkat bahawa kawan aang nyan dunia tuh angar borahir, atoi to aroh pokus ma kawan aang tanon. Ito boraoi pokus ma Yesus paluh molayani Are ma kokuan tuu atoi.
32Akuh jere ina ikan aroh koatir tintun ome bewe. Bakah co aroh ngoruh lian porhati kawan aang tintun Tuhan, iyohonon maindeoi caraeh are boraoi ngonyorih Tuhan. 33Tapi dulun co ocop ngoruh angar orong momikir aang co nyan dunia tuh, awi are jere ngonyorih atoi oruh eh. 34Maka, porhatiaieh tobagi nyan antara koluargaeh hintang Tuhan. Bawe co arinai piji ngomano atawa arelu oko banaieh bat, are lian porhati kawan aang tintun Tuhan. Are nyau bolum husus indan Tuhan, iyohonon ponah cara are hapo betieh hintang ponah pikiran eh. Tapi bawe co ngomano sobulih porhati tintun porokara duniawi, iyohonon maindeoi caraeh are boraoi ngonyorih banaieh. 35Akuh aroh mantun kokon otuh ina umpi kawan pantangan indam me. Akuh bomaksud ika dohop ikan ina ikan bolum ma cara co pio, ina ikan lian bogawi indan Tuhan sopio mungkin aroh sobulih koatir tintun kawan aang co duniawi.
36Tintun kawan bakah co rahat botunangan. Mungkin bakah cioh bopikir bahawa are momporlaku tunangan eh ma cara co sala. Amun tunangan eh sasar ongko paluh are bopikir meleh pio iroh kawin, oluboh iroh kawin. Iyoh aroh dosa. 37Tapi, mungkin oko bakah co ocop umpi koputusan ika aroh horuh ma tunangan eh. Are yakin ponah atoieh tarop hintang aroh tomaksa dongai. Amun bakah cioh boraoi noro kojere beti, cioh pio amun aroh nyolung horuh. 38Jadi, dulun co horuh ma tunangaieh umpi aang co pio. Tapi dulun co balang horuh ma tunangaieh umpi aang co meleh pio kole.
39 Mongonai kawan balu kole. Oruh aroh boraoi kawin ma dulun bokon kotahin banaieh incah bolum. Tapi amun banaieh matoi, bawe cioh bebas kawin kole. Are boraoi ngomano ome dulun co are kolu, asar dulun cioh porocaya ma Yesus. 40Tapi pondapat kuh balu cioh angar meleh sanang amun are aroh ngomano kole. Akuh bopikir pondapat kuh ingkan Roh Mohotara co oko nyan akuh ka.
Currently Selected:
1 Korintus 7: TBSS
Highlight
Copy
Compare
Share
Want to have your highlights saved across all your devices? Sign up or sign in
