1 Korintus 6
6
Aroh ngadu dongam co porocaya nyan pongadilan umum
6:1-11
1 Oko tarung bahawa ico dulun nyan halo ikan hokolisih ma dongai co porocaya. Are aroh nyolesai mosalah cioh nyan halo jomaat. Tapi are seen mehen porokara cioh ina tomongadil pian kawan dulun co aroh nyono Mohotara, co aroh bolum bujur nyan tohimo Mohotara. Kura are dapot nguan iyoh? 2Ikan sobulih monau bahawa kawan dulun porocaya angar mohakimi kawan dulun co aroh porocaya.#6:2 Nyan waktu Yesus hopuli, umat Mohotara oko poranan ponah momorintah hintang mohakimi dunia tuh. Noto Daniel 7:22; Matius 19:28; 20:21-23; Lukas 22:29-30; 2 Timotius 2:12; Wahyu 20:4-6. Jadi ikan tomasuk kawan dulun co angar mohakimi kawan dulun co aroh porocaya. Maka, ikan mahi sobulih eh hegah nyolesai kawan porokara co kolik. 3Ikan sobulih eh monau bahawa ito angar mohakimi kawan molekat. Maka, ito mahi sobulih eh hegah nyolesai kawan porokara ponah kobolum cotuh. 4Jadi, amun oko nyan halo ikan co empun porokara ponah kobolum tuh, kura ikan mehen porokara cioh hia kawan dulun bokon ma jomaat? 5Akuh mantun nain otuh ina me nongkomo mohaan. Mu arelu oko jah, dulun nyan halo ikan co cukup boakar pikir ika umpi koputusan ponah kawan porokara nyan halo kawan dulun porocaya? 6Tapi kura oko anggota jomaat co ngadu dongai co porocaya nyan tohimo kawan dulun co aroh porocaya.
7Ikan malah ocop gagal amun tojadi porokara nyan halo ikan. Meleh pio ikan tomomporlaku aroko adil hintang tomorugi. 8Tapi mula oko dulun nyan halo ikan co curang hintang sala. Alogawi cioh meleh jahat kole awi tongompian ma dongam co porocaya.#6:7-8 Ponah ayat 7, deontagas eh Paulus nopoh dulun co mehen porokara cioh hia hakim co aroh porocaya. Ponah ayat 8, deontagas eh Paulus nopoh dulun co umpi kosolaa yoh. Tapi, Paulus mahi bomaksud ina kokon jomaat Korintus tonopoh awi iroh aroh nyolesai mosalah taiyoh nyan halo jomaat doh.
9Ikan mositi monaueh bahawa Mohotara aroh angar mihi hak indan dulun co jahat ika momorentah umba Are. Aroh sasat! Kawan dulun co umpi dosa hokoruh, kawan dulun co nyembah nyuku aang co boganan, kawan dulun co hokoruh ma co bokon ma oruh atawa banaieh, kawan dulun co hokoruh ma co samah kohaan, 10kawan dulun co nako, kawan dulun co bobolai, kawan dulun co herak buso, kawan dulun co herak pocee-ceet dongai, kawan dulun co morampuk tioh dongai. Kokon dulun isan iyoh mositi aroh angar haba bagian ponah Korojaan Mohotara. 11Batuh oko kawan dulun nyan halo ikan co bolum isan iyoh. Tapi ikan ocop tongorasih ingkan kawan dosa taiyoh. Ikan mahi ocop jarin umat husus tioh Mohotara. Mohotara ocop mangap ikan buah tului kuasan Tuhan Yesus Kristus hintang Roh Mohotaran to.
Hapoboh betimmu ma cara co mihi hormat ma Mohotara
6:12-20
12 Oko co mantun, Uras eh arelu oko co pali indangkuh. Tapi, porulu tomingkat bahawa aroko kokon aang boguna indan to atawa dongan to. Jadi, oluco kokoieh boraoi, akuh aroh kolu kobolumkuh tonguasa pian ome bewe nyan dunia tuh.
13Kanon tonampa ika nyangan olom to. Olom to tonampa ika nongkomo kanon: Tapi Mohotara angar ngolumat koduo-duoeh. Tapi Mohotara nampa betin to aroh ika umpi dosa hokoruh. Betin to tonampa ika nguan kawan aang co nara Tuhan Yesus. Hintang Tuhan co monguasa betin to. 14Mohotara ocop ngomolum hopuli Tuhan Yesus. Mohotara ka angar ngomolum ito hopuli ma kuasai-Eh.
15Aroh solingo bahawa betin to somporengu bagian betin Kristus. Awi tului ito iyohco bagian betin Kristus, mositi ito aroko boraoi jarin bagian betin polacur! 16Aroh solingo bahawa dulun co bohubungan hokoruh ma polacur jarin isan ico beti ma are. Nain co tonulih ponah Surat Borasih: “Dulun duo iyoh jarin isan ico beti.”#6:16 Ingkan Kojadian 2:24. 17Tapi dulun co hokohico ma Tuhan Yesus, roh dulun cioh hintang Roh Tuhan jarin ico.
18Jadi, ngocu arop mu ingkan dosa hokoruh. Kokon dosa co bokon aroh lansung leket nyan betin dulun cioh. Tapi dulun co umpi dosa hokoruh, nyolaka betieh tarop.#6:18 Moho tomaham maksud Paulus socara pas ponah ayat cotuh. Umum eh, dosa hokoruh korinah mompongaruh betin dulun, meleh hangki dosa co bokon. Oko ahli Alkitab co bopikir mungkin ayat cotuh samah isan ayat 12-13. Paulus hapo pikiran pira-pira dulun Korintus, paluh monjelas eh bahawa pikiran taiyoh sala. Monurut pondapat cioh, ayat cotuh boraoi tonerjemah nain otuh: Oko co bopikir, “Uras dosa iyohco nyan luar beti. Jadi ito boraoi nguan ome bewe ma betin to.” Tapi pikiran cioh sala. Dulun co umpi dosa hokoruh, nyolaka beti eh tarop. 19Ikan sobulih monau bahawa betim me somporengueh lopo Roh Mohotara. Hintang, Mohotara ocop mihi Roh-Eh ika nukui nyan ponah ikan. Artieh betim me aroh ikan leh empui bat. 20Awi iko ocop tomoli hintang lekaieh ocop lunas tonahur: Tului iyoh nara Mohotara ma betin kungam.
Currently Selected:
1 Korintus 6: TBSS
Highlight
Copy
Compare
Share
Want to have your highlights saved across all your devices? Sign up or sign in
