1 Korintus 5
5
Tindakan tohadap anggota jomaat co umpi dosa ina eh hopuli bolum ngonyorih Tuhan
5:1-13
1Akuh ngoneh tarung bahawa oko dulun nyan halo ikan co umpi dosa hokoruh. Dulun cioh umpi dosa co luse lau, iyohonon hokoruh ma tinan tirieh! Kawan dulun co arinai nyono Mohotara malah aroko dapot hokoruh ma tinan tiri doh. 2Tapi ikan seen banga awi dosan dulun cioh!#5:2 Kura jomaat nyan Korintus banga? Oko duo komungkinan. 1) Iroh nongkomo labih ‘suci’ hangki co bokon. Iroh aroh kolu mongaku bahawa oko dulun co bodosa nyan halo iroh. ATAWA 2) Iroh banga awi iroh porahan ‘asin’ ma ome bewe. Iroh aroh poduli amun dulun porocaya umpi dosa. Sobulih eh ikan korinah jorung, paluh pokusit are ingkan jomaat me. 3Oluco akuh socara betin kunga arelu oko halo ikan, tapi atoi kuh oko nyan halo ikan. Akuh ocop umpi koputusan, samah isan kotika akuh oko halo ikan bahawa are sobulih tomohukum ma cara cioh. 4Kotika ikan hokumpur ponah aran Yesus, Tuhan hunyung to, waktu cioh mahi, atoi kuh oko halo ikan. Jadi, nyan waktu cioh, mohukum dulun cioh ma kuasan Yesus, Tuhan hunyung to. 5Dulun cioh sobulih tonyarah hia Lacan Setan ina betieh lumat. Ma isanioh, nyan kotika Tuhan hopuli, roh dulun cioh angar tonyolamat.
6Aroko pio ikan komo banga awi dosan dulun cioh. Ikan mungkin ocop monau: Isut leh dagi angar umpi kokon kucok tepung nyiwuh. Samah isan onon ka dosan ico beti boraoi nyongkit kokon ikan. 7Jadi, ikan sobulih ngomuho dulun co bodosa yoh ina dosa tompokocu ingkan ikan, awi sobulih eh dosa arelu oko bat nyan halo ikan. Tului, Kristus ocop jarin isan domba co tonyarak indan to nyan Ondo Raya Paskah. 8Poko tului iyoh, haas ito moraya gawin Kristus yoh ma cara cotuh: Aroh bat bolum ma atoi co nyau umpi kojahat ma dongan. Mahi aroh bodosa. Tapi bolum ma atoi co moharap aang co pio indan dongan. Hintang bolum sosuai ma ajaran co buah.
9Akuh piji nulih surat indam me.#5:9 Tonyata Paulus ocop piji nulih surat indan jomaat nyan Korintus sorinai surat 1 Korintus. Surat cioh niho dapot jaman tuh. Ponah surat cioh, akuh nyuhu ina me aroh hojolahan ma dulun co umpi dosa hokoruh. 10Maksutkuh nyan surat cioh aroko bosiit ikan hojolahan ma dulun co arinai nyono Mohotara. Mula oko ingkan iroh co umpi dosa hokoruh. Oko ka ingkan iroh co ngalam. Oko co morampuk. Oko co nyembah nyuku aang co boganan. Aroh bodai ikan ngocu arop me ingkan kokon dulun taiyoh. Amun nyau isan iyoh, borati ikan sobulih naat dunia tuh. 11Tapi makitu akuh nulih kole ina ikan aroh hojolahan ma dulun co mantun bahawa are porocaya ma Yesus tapi are incah umpi dosa hokoruh, incah ngalam, incah nyembah nyuku aang co boganan, herak poceet dongai, herak buso, atawa incah morampuk. Aroh dapot kuman halo dulun muder iyoh. 12-13Mohotara angar mohakimi kawan dulun co luar jomaat. Jadi, iyoh aroh urusan kuh. Tapi ikan boh co sobulih mohakimi dongam ponah jomaat. Nain co tonulih nyan ponah Surat Borasih: “Ngomuhoceh dulun jahat ingkan halo ikan.”#5:12-13 Ingkan ulangan 17:7; 19:19; 22:21,24 atawa 24:27.
Currently Selected:
1 Korintus 5: TBSS
Highlight
Copy
Compare
Share
Want to have your highlights saved across all your devices? Sign up or sign in
