1 Korintus 4
4
Mohotara leh co bohak mohakimi kawan dulun co bogawi indai-Eh
4:1-5
1Maka, sobulih eh ikan noto kokon kaih ma cara cotuh: Kaih iyohco kawan dulun co bogawi indan Kristus. Kaih mahi dulun co tomorocaya Mohotara ika momborita roncana-Eh co batuh tocuhuk. 2Co portama-tama tonuntut ingkan polayan co isanioh, iyohco bahawa are sotia ma tuan eh 3Jadi, akuh aroh poduli amun akuh tomohakimi piam me atawa kawan dulun bokon. Malah akuh aroh mohakimi arop kuh tarop. 4Awi ponah atoi norani, akuh aroh nongkomo kosolaa. Tapi onon aroh borati akuh aroh sala nyan tohimo Tuhan. Baya Are co bohak mohakimi akuh. 5Poko tului iyoh, arohboh ikan mohakimi dongam. Ngantoleh dapot waktu Tuhan Yesus dombut. Are angar ngompandau alogawi co tocuhuk ponah kopindong. Are angar poleha kokon roncana co oko ponah atoi sika dulun. Paluh, Mohotara co angar nara iroh#4:5 Paulus monekan bahawa kokon jungus Tuhan sobulih eh haba koponara ingkan Mohotara, aroh ingkan dulun co tomolayani. sosuai ma alogawin doh hopomasing.
Aroh bolecak
4:6-21
6Kawan konduang bakah bawe, co tonulih kuh tuh bolaku indan arop kuh leh hintang Apolos. Tujuaieh ina ikan lian bolajar ingkan porinsip: “Aroh molangar ome co totulih.”#4:6 Maksut Paulus ina jomaat Korintus aroh momenting dulun co majar iroh (are, Apolos, atawa dulun co bokon). Paulus baya nyau ina iroh porhati antun co tonulih ponah kitab suci. Ma isanioh, arelu oko ico beti mahi ingkan ikan lian potamam arop eh hintang mohina co bokon. 7Arelu oko dulun co umpi iko meleh pio hangki dongam. Kokon ang co oko nyan iko kohaba mu ingkan Mohotara.#4:7 Maksut Paulus kokon komampuan husus co tonorima doh ingkan Roh Mohotara. Oko bopira dulun Korintus co bopikir komampuan husus doh meleh harat hangki komampuan husus dulun bokon. Aroh ikan bopikir co oko ikan empuieh yoh hasir usaha tarop sohingga ikan jarin bolecak. 8Ikan mula ocop bosuh. Ikan ocop jarin tato.#4:8 Oko masalah ponah jomaat Korintus ma dulun co tatou hintang co mala. Tapi bahai komungkinan maksut Paulus iroh ocop jarin bolecak. Ikan jarin bokuasa isan laca amun aroko kaih halo ikan. Dalo-dalo kojorih amun ikan leh mula ocop jarin kawan laca. Paluh, kaih mahi lian umba momorintah halo ikan.
9Tapi, monurut akuh, Mohotara ocop mihi ma kaih co kawan rasul-Eh kodudukan co meleh kurang tomohormat. Are umpi kaih jarin somporengu kawan dulun co tomehen pusit ingkan seper ika tomohukum matoi. Awi, kaih tonantang ngolauh dunia, iyohonon kokon kolunon hintang kokon molekat. 10Kaih uong nyan ponah Kristus, ikan pintar nyan ponah Kristus. Kaih remeh, tapi ikan bokuasa. Kaih sasi, ikan tohormat. 11Malah dapot waktu cotuh, kaih derek dou hintang haus. Lembon co hapan kaih ocop nomuun. Kaih derek tomolantu. Kaih arelu oko tukui ika awi nyalan hantin hanoh momborita Tarung Pio. 12Kaih karas bogawi ma silun kaih leh mondakan kobutuhan kobolum kaih. Kotika kaih tomohina kawan dulun, kaih tenden momberkat iroh. Kotika kaih tonganiaya, kaih aroh maleh. 13Kotika kawan dulun pander jahat tintun kaih, kaih tenden pander domu ma iroh. Dapot makitu mahi, kaih jarin isan poruhuk dunia, isan kotoran co tomende leh.
14Aang cotuh tonulihkuh aroh ika ngohaan iko, tapi ina nopoh iko co sobagai kawan anakkuh co tongasih kuh. 15Oluco ikan empun ribuan dulun co majar ikan tintun Kristus, arelu oko orong dulun co jarin isan tamam me. Baya akuh jarin isan tamam me awi akuh iyohco dulun kosulak co momborita ma ikan Tarung Pio tintun Kristus Yesus. 16Poko tului iyoh, akuh nosehat ikan: Nontumun toladan kuh. 17Akuh nyoruhan Timotius hia ikan ina dohop ikan nontumun toladan kuh. Are isan anak co tongosena kuh. Are mahi hegah tomorocaya ponah Tuhan. Are angar pokingat ikan tintun cara akuh bolum nyambo kuasan Yesus. Cara bolum cioh samah isan ome co tomajar nyan sika jomaat nyan omoh bewe.
18Oko pira-pira dulun co mongira bahawa akuh aroh angar dombut kole. Poko tului iyoh, iroh jarin bolecak. 19Tapi amun Tuhan ngonyere, akuh angar jion dombut hia ikan. Nyan waktu cioh, akuh aroko angar porhati antun kawan dulun co bolecak yoh. Akuh angar kito amun iroh bujur-bujur oko kuasan Mohotara ponah kobolum doh. 20Awi Korojaan Mohotara aroh tintun kawan antun tapi tintun kuasan Mohotara. 21Kotika akuh dombut, ikan nyau ome? Kolupai akuh nopoh ikan pahang ponteh somporengu akuh dombut ma cambuk? Atawa ikan nyau akuh dombut ma kongaroh kasar potinjun akuh hopomasi ikan?#4:21 Oluco mungkin Paulus sobulih dombut ina nopoh iroh, mositi are tenden hopomasi iroh ka. Tapi mungkin iroh aroh angar nongkomo kopomasi eh yoh.
Currently Selected:
1 Korintus 4: TBSS
Highlight
Copy
Compare
Share
Want to have your highlights saved across all your devices? Sign up or sign in
