1 Korintus 3
3
Kokon polayan Mohotara iyohco ico tujuan
3:1-9a
1Kawan konduang bakah bawe, hiah waktu akuh halo ikan, akuh aroh boraoi majar ikan isan kawan dulun co tonguasa Roh Mohotara. Awi hiah iyoh ikan isan kawan dulun co bopikir nontumun bolum socara kolunon. Awi hiah iyoh ikan somporengu kawan anakua co arinai ngongko ponah Kristus. 2Akuh majar ikan isan kawan dulun ongko mihi anak eh susu aroh kanon co mahang. Akuh majar ikan tintun Kristus ma kawan aang co sutir tomaham awi ikan arinai siap paham kawan aang co meleh jalom. 3Awi ikan incah bolum monurut tobiat me socara kolunon! Tului ikan incah bosingon hintang hojawap ico ma co bokon, onon porahan bahawa ikan incah bolum monurut tobiat kolunon, isan kawan dulun co aroko nyono Mohotara? 4Antun dolang me mombukti bahawa ikan incah bolum socara kolunon. Awi, nyan halo ikan oko co mantun “Akuh pongikut Paulus.” Co bokon mantun, “Akuh pongikut Apolos.” 5Porhatiboh! Main boh Apolos penting? Aroh. Main boh Paulus penting? Aroh ka! Karo Apolos baya nguan tugas co tomihi Tuhan indan kaih ika dohop ikan porocaya ma Are.
6-9aIkan boraoi tonyamah ma umon tioh Mohotara. Amun oko umo, aroh penting ome mimbun hintang ome co nyiram eh. Co penting iyohco Mohotara umpi imbun komulan cioh bolum. Akuh co mimbun awi akuh co kosulak momborita Tarung Pio indam me. Apolos co nyiram awi are mahi majar ikan tintun Yesus. Tapi baya Mohotara co umpi ikan botambah paham hintang porocaya ma koborohon. Poko tului iyoh, karo Apolos aroh penting. Baya Mohotara co penting awi Are leh co umpi ikan jarin porcaya. Kaih ihin tugas hopomasing. Tapi kaih sama-samah bogawi indan Tuhan. Kaih angar norima tombah sosuai ma alogawin kaih hopomasing.
Aroh Umba ajaran co nyasat
3:9b-23
9bIkan mahi boraoi tonyamah ma bangunan tioh Mohotara. 10Mohotara porahan kopio-Eh ma akuh, iyohonon Are mihi komampuan indang kuh ika majar tintun Yesus. Akuh somporengu ico beti ahli bangunan co pintar. Akuh umpi pondasi bangunan cioh. Paluh, makitu oko dulun bokon co majar ikan. Iroh mangun nyan tungkui pondasi cioh. Tapi sika dulun sobulih aroko boraoi borangai majar samah isan ico beti tukang sobulih aroko boraoi borangai mangun. 11Awi pondasi me iyohco Yesus Kristus. Onon boh pondasi co tongompian Mohotara. Arelu oko dulun co lian umpi pondasi co bokon. 12Opah iyoh, oko kawan dulun co mangun ajaran nyan tungkui pondasi cioh. Oko co hapo bahan ingkan bulou, perak atawa batu intan. Oko ka co hapo kaju, doun parang atawa hampang paroi. 13Gawin sika dulun angar tonguji pian apui nyan ondo Yesus hopuli ika mohakimi sika dulun. Hiah iyoh angar tomonau tonta lau, mainkah hasir gawin sika dulun yoh pio atawa aroh. 14Amun bangunan nyan tungkui pondasi yoh tahan bocaha, dulun cioh angar norima tombah eh. 15Tapi amun bangunan dulun cioh bocaha, are angar noro korugi. Are leh angar solamat, tapi isan dulun co opah norasun apui.#3:15 Apui cotuh boarti apui noraka. Dulun co majar tintun Yesus sobulih hapo akar pikir ingkan Roh Mohotara, aroh akar pikir kolunon. Amun are hapo akar pikir kolunon, maka kawan dulun co tomajar yoh aroko angar paham tintun Yesus. Akibat eh, iroh aroko angar tonyolamat. Mungkin dulun co majar ocop porocaya dapot are tonyolamat, tapi hasil polayanan eh mohampa awi are aroko mombantu dulun bokon jarin porocaya.
16Ikan sobulih eh monau bahawa ikan iyohco Lopo Mohotara, hintang bahawa Roh-eh oko nyan ponah ikan. 17Onon ina ika tukui Mohotara co kudus. Poko tului iyoh, amun oko dulun co ngolumat Lopo Mohotara non,#3:17 ‘Ngolumat Lopo Mohotara’ gamaran amun oko dulun co porapot ajaran co nyasat atawa umpi kawan dulun porocaya hokoleang. maka Mohotara angar ngolumat are. Uras ikan iyohco Lopo Mohotara cioh.
18Arohboh oko dulun co nipu arop eh tarop akar pikir kolunon. Amun oko dulun co mangap arop eh boakar pikir socara kolunon, sobujur eh dulun cioh sobulih jarin uong. Are sobulih nguan iyoh ina are bujur-bujur jarin boakar pikir.#3:18 Dulun co bujur-bujur bohikmat iyohco dulun co porocaya ma Yesus. Tapi, dulun co aroh porocaya angar mongangap koporocayaan to konguong, awi ito hopasi musuh, ito mondorita ponah polayanan, ito aroh hopasi duit, hcbb. Bokon onon, monurut iroh, Laca to matoi nyan sompolaki, tapi ito monau Are bolum hopuli. 19Awi Mohotara mongangap akar pikir kolunon uong. Aang cioh ocop tonulih nyan ponah Surat Borasih: “Mohotara ngalah kawan dulun co boakar pikir ma kopintar doh leh.”#3:19 Ingkan Ayub 5:13. 20Oko ka tonulih: “Tuhan monau kawan roncangan kawan dulun boakar pikir. Sobujur eh kokoi eh mohampa leh.”#3:20 Ingkan Masmur 94:11.
21-22Poko tului iyoh, aroh bat potamam arop sobagai pongikut kuh, atawa pongikut Apolos atawa pongikut Petrus. Awi kokoi eh ikan empui! Dunia iyohco ikan empoi. Bolum atawa matoi ikan empui! Jaman makitu atawa jaman co pangaan daai iyohco tioh ikan. Kokoieh iyohco ikan empui. 23Tapi, ikan iyohco tioh Kristus,#3:23 Paulus pokingat iroh bahawa kokon aranaang iyoh co indan kopion kolunon. Iroh aroko jarin tioh dulun cotuh atawa tioh dulun cioh. Iroh jarin tioh Kristus. hintang Kristus iyohco tioh Mohotara.
Currently Selected:
1 Korintus 3: TBSS
Highlight
Copy
Compare
Share
Want to have your highlights saved across all your devices? Sign up or sign in
