1 Korintus 15
15
Paulus pokingat dulun Korintus tintun Yesus Kristus bolum hopuli
15:1-11
1Konduang bakah bawe, makitu akuh nyau pokingat ikan tintun Tarung Pio. Batuh akuh ocop momborita Tarung Pio ma ikan, paluh ikan norimaeh. Ikan mahi ocop tuu-tuu porocaya Tarung Pio cioh. 2Amun ikan tenden tuu-tuu porocaya Tarung Pio co ocop tomomborita kuh ma ikan, maka ikan angar solamat. Tapi amun ikan aroh porocaya kokon Tarung Pio borati porocuma leh kopocayaan me kotahin otuh.
3Akuh ocop norima Tarung Pio paluh akuh porapot iyoh ma ikan. Co poko penting ingkan Tarung cioh iyohco kawan poristiwa tatuh: Kristus ocop matoi awi kawan dosan to, isan co tonulih nyan Surat Borasih 4Opah iyoh, Are tongolowong. Tapi nyan ondo kotolu, Are bolum hopuli. Kokon iyoh tojadi sosuai ma Surat Borasih. 5Umbot iyoh Are poleha arop-Eh ma rasul Petrus, paluh ma duo balas rasul-Eh. 6Umbot iyoh, Yesus poleha arop ma limo latuh beti sokaligus. (Orong ingkan iroh incah bolum dapot makitu hiah akuh nulih surat cotuh. Tapi pira-pira ocop matoi.) 7Pongaan eh, Yesus poleha arop-Eh ma Yokobus, paluh ma kokon coruhan husus ingkan Tuhan Yesus co bokon.
8Co tontiput, Yesus poleha arop-Eh ma akuh. Akuh isan anak ua co tonganak nyan waktu co nyala bulan.#15:8 Mungkin Paulus bomaksud are liwat jarin rasul, awi are aroh tomasuk duo balas rasul portama. ATAWA mungkin Paulus bomaksud proses are jarin rasul dalo nyua. Yesus lansung poleha arop-Eh ma Paulus nyan calan hia kota Damsyik. (Kes. 9:1-19.) ATAWA mungkin kiasan cotuh borati Paulus jarin ico rasul socara aroh wajar. Are monjelas aang cioh nyan ayat 9 koholuh eh. 9Awi, nyan halo kokon rasul, akuh co poko aroh borati. Akuh aroh patut tonisi rasul, awi batuh akuh monganiaya kawan dulun co porocaya ma Yesus. 10Awi tului koboraoi atoi Mohotara, Are ocop umpi akuh jarin isan co makitu tuh. Koboraoi atoi Mohotara co ihi ma akuh yoh aroh jarin porocuma. Malah sobalik eh, akuh bogawi bohimat momborita Tarung Pio, meleh karas hangki kokon rasul co bokon. Tapi sobujur eh akuh aroh nguan iyoh ma kongangkah kuh tarop. Akuh lian nguan iyoh baya awi koboraoi atoi Mohotara soming kuh. 11Poko tului iyoh, aroh jarin soal ome co momborita Tarung Pio, akuh atawa kawan rasul co bokon. Opah ikan ngoneh Tarung Pio, ikan jarin porocaya.
Dulun porocaya angar bolum hopuli
15:12-34
12Jadi, kaih momborita bahawa Yesus Kristus ocop bolum hopuli ingkan pompatoi. Amun ikan ocop porocaya iyoh, aroh muntam akar oko nyan halo ikan co mantun bahawa dulun matoi aroh angar bolum hopuli. 13Soandaieh, dulun matoi aroh angar bolum hopuli, Monurut pikiran cioh, maka Kristus mahi aroh bolum hopuli. 14Soandaieh, Kristus aroh bolum hopuli. Borarti, porocuma leh kaih momborita Tarung Pio yoh. Porocuma ka ikan porocaya ma Kristus. 15Meleh hangki iyoh, soandaieh dulun matoi bujur-bujur aroh tongopolum hopuli, maka kaih iyohco dulun ngoncunih tintun Mohotara. Awi, kaih ocop mantun bahawa Mohotara ocop umpi Kristus bolum hopuli, podahar aroko isanioh 16Sindo oni, soandaieh, dulun matoi aroh angar bolum hopuli. Borarti Kristus mahi aroh nyolung bolum hopuli. 17Soandaieh, Kristus aroh nyolung bolum hopuli. Maka, arelu oko gunaieh ikan porocaya ma-Eh. Ikan incah tonguasa pian dosa. 18Sanioh ka ma kawan dulun co porocaya Kristus co ocop matoi. Iroh haba hukuman sumong kotahi. 19Soandaieh, ito yakin hintang boharap ma Kristus indan kobolum nyan dunia cotuh leh, maka ito iyohco dulun co poko sasi hangki kokon kolunon.
20Tapi sobujur eh Mohotara ocop umpi Kristus jarin dulun co portama co bolum hopuli ingkan pompatoi. Poko tului iyoh, ito jarin yakin bahawa Mohotara angar umpi kawan dulun bokon bolum hopuli ingkan pompatoi. 21Awi, kokon dulun sobulih matoi tului ico beti, iyohonon Adam. Sanioh ka kokon dulun angar tongomolum hopuli ingkan pompatoi molalui ico beti iyohonon Kristus. 22Tului, kokon dulun co oko hubungai ma Adam sobulih matoi. Tapi, samah isanioh, kokon dulun co jarin ico ma Kristus angar tongomolum hopuli.
23Tapi oko urutaieh. Portama, Mohotara umpi Kristus bolum hopuli. Pongaan, nyan waktu Kristus hopuli hia dunia tuh, paluh Mohotara angar umpi kawan dulun co tioh Kristus bolum hopuli. 24Opah iyoh angar dapot ahir eh, iyohonon kotika Kristus nyarah korojaan-Eh ma Mohotara co Taman to. Kristus umpi aang cioh opah Are pokalah hintang monguasa kokon pomorintah, kokuasaan, kawun kokuatan.#15:24 Yesus angar pokalah ‘kokon kuasa’, tomasuk kuasan Lacan Setan, kawan roh jahat, hintang kokon kuasa/pomorintahan kolunon. Yesus angar pokalah ‘kokon kuasa’, tomasuk kuasan Lacan Setan, kawan roh jahat, hintang kokon kuasa/pomorintahan kolunon. 25Awi, Kristus sobulih tenden momorintah sobagai Laca dapot Mohotara umpi kokon musuh-Eh tunduk nyan pinda paai-Eh.#15:25 Ingkan Masmur. 110:1. 26Musuh co tongolumat poko tontiput eh iyohco kuasan pompatoi. 27Tului, kokon aranaang ocop tonompi tunduk nyan pinda paai-Eh. Tapi, Mohotara aroko tomasuk nyan ponah kokon aranaang taiyoh. 28Sobalik eh, opah kokon aranaang tonompi tunduk ma Kristus, Are leh sobagai Anak angar tunduk ma Mohotara. Ma isanioh, Mohotara angar momorintah kokoieh.
29 Jadi, mositi Mohotara angar umpi kawan dulun bolum hopuli ingkan pompatoi. Oko nyan halo ikan co tomombaptis indan dulun matoi. Soandaieh dulun matoi sama sino aroko angar bolum hopuli, ome co tongompian doh yoh arelu oko gunaieh 30Sanioh ka ma kaih co sobulih nohimo bohaya sika waktu. 31Bujur, kawan konduang! Sika ondo akuh mondorita cukup tangkan sohingga akuh boraoi matoi. Akuh bosumpah bahawa iyoh tuu, samah isan nyaman kobanga kuh ma ikan mahi tuu. Akuh banga ma ikan awi ito hokohico ma Kristus Yesus, Tuhan co bokuasa ma ito. 32Nyan kota Epesus, akuh bojuang ngolawan kawan dulun co korinah kodangas. Iroh somporengu ocin dangas. Nyan ponoto kolunon, mositi arelu oko untung indang kuh nguan iyoh. Amun Mohotara aroh angar umpi dulun matoi jarin bolum hopuli, maka meleh pio ito numun leh antun cotuh: “Nyuap ito angar matoi. Jadi, meleh pio ito kuman, ngorih hintang sana-sanang leh.”#15:32 Ingkan Yesaya 22:13. Dulun jahat co mantun isan iyoh. 33Aroh sasat: kohojolahan co ceet morusak kobiasaan co pio. 34Jadi, ikan sobulih bat bopikir co bujur. Aroh horoholuh umpi dosa! Akuh mantun otuh awi oko nyan halo ikan co aroh bujur-bujur nyono Mohotara. Akuh nyau ina ikan nongkomo mohaan tintun iyoh.
Koadaan beti co baa opah tongomolum hopuli
15:35-58
35Tapi mungkin incah oko pira-pira dulun nyan halo ikan co ngisok: “Mu bodai dulun matoi tongomolum hopuli? Waktu dulun tongomolum hopuli, betin dulun cioh isan omoh?” 36Iko uwong lau! Sobulih eh iko leh monau: amun iko mimbun luang jangoi nyan ponah tana, luang jangoi cioh sobulih matoi houn hanyar boraoi during. 37Misal eh luang gandum atawa bonyin paroi co bokon. Co tomimbun mu luang eh, aroko co kokon batang eh 38Mohotara co posuluh batang indan jangoi cioh sosuai ma kojere-Eh. Sika macam jangoi tomihi batang eh hopomasing. Bokon ma iyoh, betin dulun matoi aroh samah ma betin dulun cioh opah tongomolum hopuli. 39Porhati ka kokon beti aroh samah. Betin kolunon aroh samah ma betin ocin. Betin beleu aroh samah ma betin ocin danum. 40Kokon banda nyan langit bobeda hangki kokon banda nyan pindaondo. Kawan banda nyan langit co komok bobeda hangki kawan banda co komok nyan pindaondo 41Matanondo oko cohaya tarop. Bulan oko cohaya tarop. Kokon potondu mahi oko cohaya tarop. Malah sika potondu oko cohaya co bobeda hangki kokon potondu co bokon.
42Samah isan iyoh, opah Mohotara umpi dulun matoi bolum hopuli, betin dulun cioh aroh samah ma betieh co soun eh. Waktu betin dulun tongolowong, beti cioh angar lumat. Tapi waktu betin dulun cioh tongomolum hopuli, beti cioh aroh angar lumat bat. 43Nyan kotika dulun ngolowong beti cioh, koadaan eh karam hintang lenyoh: tapi kotika Mohotara ngomolum eh hopuli, koadaan eh angar jarin segah hintang bungah. 44Beti co tongolowong yoh iyohco beti ingkan dabu tana. Beti co tongomolum hopuli daai iyohco borasar ingkan Mohotara. Awi oko beti ingkan dabu tana hintang oko ka beti ingkan Mohotara.#15:44 Beti rohani aroh borati isan lio atawa roh. Maksud eh beti co baa co layak bolum nyan sorga. 45Isan co tonulih nyan ponah Surat Borasih: “Mohotara nampa kolunon portama, iyohonon Adam. Adam jarin bolum.”#15:45 Ingkan Kojadian 2:7. Adam yoh iyohco Adam portama. Tapi Kristus tonisi Adam torahir. Are iyohco Roh co bokuasa mihi kobolum co tuu-tuu. 46Porhatilah urutaieh! Beti co ingkan dabu tana dombut meleh houn. Hanyar opah iyoh beti co ingkan Mohotara dombut. 47Kolunon portama, iyohonon Adam, tonampa ingkan dabu tana. Bolum eh nyan dunia. Tapi Adam koduo, iyohonon Kristus, borasar ingkan sorga. 48Kokon dulun nyan dunia tuh samah isan Adam co borasar ingkan dabu tana. Kokon dulun co angar muntam sorga daai angar jarin samah isan Kristus co borasar ingkan sorga. 49Betin to makitu samah isan betin Adam, co tonguan ingkan dabu tana. Sanioh ka daai betin to angar jarin samah isan betin Kristus co borasar ingkan sorga.
50Konduang bakah bawe, otuh co penting ika tomaham: Beti isan co ito empui makitu, todiri ingkan kotah daha, aroh lian muntam Korojaan Mohotara daai. Betin to tuh boraoi matoi. Jadi, beti isan otuh aroh boraoi bolum kotahi-tahieh. 51-52Porhatilah! Akuh nyau mara aranaang ma ikan co batuh dulun aroh monau: Aroh kokon to angar matoi. Tapi nyan waktu sangkakala torahir muhing, Mohotara angar mubah kokon betin to. Iyoh angar tojadi ponah sokorobilop mata. Mohotara angar umpi kawan dulun matoi jarin bolum hopuli. Iroh angar tongubah ina lian bolum sokotahi-tahieh. Kokon to co incah bolum nyan waktu cioh angar tongubah isan iyoh ka. 53Awi, betin to co boraoi lumat sobulih tongubah jarin beti co aroh boraoi lumat. Betin to co boraoi matoi sobulih tongubah jarin beti co aroh boraoi matoi. 54Hiah waktu betin to tongubah isan iyoh, maka antun cotuh co tonulih ponah Surat Borasih angar togenap:
“Kuasan pompatoi ocop tongalah. Tuhan ocop manang.”#15:54 Ingkan Yesaya 25:8.
55“Pompatoi ocop niho kokuataieh.
Pompatoi aroh bat lian ngomporoh dulun.”#15:55 Ingkan Hosea 13:14.
56Pompatoi montek hapo dosa. Dosa jarin bokuasa molalui Hukum Torat. 57Tapi sukur ma Mohotara awi dosa aroko pokalah ito ma cara cioh. Ito co porocaya manang poko tului Yesus Kristus, Tuhan co bokuasa ma ito!
58Jadi, konduang bakah bawe co tongasih kuh, tendenporocaya ma Yesus ma koborohon. Aroh tokinga! Bogawiboh hopompaluh ma kobohimat indan Tuhan. Awi, ikan monau bahawa kokon co tomonggawi me indan Tuhan aroh mohampa.
Currently Selected:
1 Korintus 15: TBSS
Highlight
Copy
Compare
Share
Want to have your highlights saved across all your devices? Sign up or sign in
